1 Пачаби 10
10
Шамуилица Шаулида зайтуналъул нах бахин
1Зайтуналъул нахул цӀураб хъабаги босун, Шамуилица Шаулил ботӀроде тӀуна гьеб#10:1 Пуланав чиясул пачалъи, ялъуни авараглъи тасдикъ гьабизе букӀине, гьесда зайтуналъул нах бахунаан, хӀакъикъаталда, гьесул ботӀроде зайтуналъул нахул цӀураб хъаба чӀехьолаан. ва гьесда убачги гьабун, абуна:
«БЕТӀЕРГЬАНАС Жиндирго халкъалда тӀад пачалъун толев вуго мун. 2Гьаб бакӀги тун Буняминил ракьалде, Целцахалда бугеб Рахилил хабаде аскӀове мун щваравго, дуда дандчӀвазе вуго кӀиго чи ва гьез дуда абизе буго: „Дуца ралагьулел рукӀарал цӀухӀамул ратана. Гьанже гьелги кӀочон, щибдай дир васасе кканаян нужер ургъалида вуго дур эмен“, – ин.
3Гьениса довехун ина мун Таворалда бугеб миккигъотӀохъе щвезегӀан, ва гьенир Бет-Элалде Аллагьасе тӀагӀат-гӀибадаталъе унев лъабго чи вачӀина дуда данде; гьезул цоясухъ лъабго бурутӀ, цогидасухъ лъабго чед ва лъабабилесухъ цо рахълъен чӀагӀдал букӀина. 4Гьез саламги кьун кӀиго чед кьела духъе; дуца гьезухъа гьеб босе.
5Хадув мун ина Гивеат-Элохималде#10:5 Гивеат-Элохим – Аллагьасул гохӀ абураб магӀна ккола гьелъул.. Пилистимазул рагъухъабазул бо буго гьениб гӀагарда. Шагьаралде щвараб мехалда дуда дандчӀвала как-диналъул гохӀдаса гӀодоре Аллагьасул амруялги загьир гьарулаго рачӀунел кашпу-карамалъи бугезул къокъа; лира, жергъен, щвантӀих ва арфа бачунел чагӀиги рукӀина гьезда цере-цере рачӀунел. 6БЕТӀЕРГЬАНАСУЛ РухӀ рещтӀина гьениб дуда тӀаде, ва мунги лъугьина Аллагьасул амраби къватӀире загьир гьаризе ва Иллагьияб РухӀалъ мун гьенив тӀуван хисизавила. 7Гьел киналго ишал тӀураралго, дуца дудаго бажарарабщинаб гьабе, щайгурелъул Аллагьас квербакъи гьабизе буго дуе сундулъго.
8Мун дидаса цеве Гилгалалде а. Дун вачӀине вуго гьениве тӀуран рухӀулел ва ракълил къурбанал хъвезе; дун вачӀинегӀан чӀа анкьго къоялъ, цинги дица бицина дуда дуца гьабизе кколеб жо».
9Гьениса инеян гьес мугъ рехарабго, Аллагьас Шаулил ракӀ хисизабуна – батӀияб бихьи кьуна, ва кинабгоги Шамуилица абухъе ккана. 10Гивеаялде щваралго, кашпу-карамалъи бугезул къокъа бачӀана гьезда данде, ва Шаулида тӀаде БетӀергьанасул РухӀ рещтӀана. Цинги гьезда цадахъ Аллагьасул амраби къватӀире загьир гьаризе лъугьана гьевги. 11Гьеб бихьидал, гьев лъалез цоцада абулеб букӀана:
«Гьав Кишил васасе ккараб жогӀаги щиб? Шаулгийищ аварагзабазда гьоркьове ккарав?» – ин.
12Цо гьеб бакӀалдаса чияс абуна: «Гьалцоял лъил васалдай кколел?» Гьелдаса хадуб гьаб аби тӀибитӀана: «Вай, Шаулгийищ аварагзабазда гьоркьов вугев?»
13Аллагьасул амраби загьир гьарун лъугӀидал, гьев как-диналъул гохӀде вилълъана.
14Шаулил инсул вацас цӀехана гьесда ва гьесул рагьтӀателасда: «Нуж кир рукӀарал?» – абун.
Шаулица жаваб кьуна: «ЦӀухӀамул ралагьизе рахъун рукӀана, амма гьелги ратичӀого, Шамуилихъе щвана».
15Цинги Шаулил инсул вацас абуна: «Бицея дида, щиб абураб нужеда Шамуилица», – ян.
16Шаулица абуна: «Дос хӀамул ратанин бицана».
Амма пачалъиялъул хӀакъалъулъ Шамуилица абураб жоялъул цӀар бахъичӀо гьес.
Шаул пачалъун вахъин
17Шамуилица Мицпаялде БЕТӀЕРГЬАНАСДА цебе данде ахӀана халкъ, 18ва гьес гӀизраилазда абуна:
«Гьадин абулеб буго БЕТӀЕРГЬАНАС: „Дица Мисриялдаса къватӀире рачана нуж. Дица Мисриялъулги цоги батӀиял тӀолалго пачабазул зулмуялдасаги хвасар гьаруна нуж“. 19Нужецайин абуни, квешлъи-къварилъиялдасаги тӀолалго балагьаздасаги нуж цӀунулев Аллагьги нахъчӀван, гьанже нижее пача кьеян абуна. Гьединлъидал, БЕТӀЕРГЬАНАСДА цере эхете къавмккун ва хъизан-агьлуккун».
20Шамуилица къавмккун аскӀорегӀан рачӀинаруна гӀизраилал ва Буняминил къавм тӀаса бищана. 21Цинги Буняминил къавм бачӀинабуна аскӀобегӀан хъизан-агьлуккун, ва Матрил агьлу тӀаса бищана. Матрил хъизан-агьлуялда гьоркьов Кишил вас Шаул тӀаса вищана, амма гьев валагьизе лъугьиндал, араб бакӀ лъачӀого тӀагӀун ватана. 22Цинги БЕТӀЕРГЬАНАСДА гьарун дугӀа гьабуна:
«ТӀадвуссун вачӀинадай дов тӀокӀалъ?» – ин цӀехана. Гьаказул къайи-къоноялда гьоркьов вахчун вугилан БЕТӀЕРГЬАНАС гьев вугеб бакӀ загьир гьабуна. 23Рекерун ун, цояз вачун вачӀана гьев гьениса ва халкъалда гьоркьов чӀезавуна. Лага-черхалъул борхалъиялъ халкъ гьесул кӀигъажабазухъе гурони бахунароан.
24Шамуилица халкъалда абуна: «Вихьулев вугищ БЕТӀЕРГЬАНАС тӀаса вищарав чи? Халкъалда гьоркьов гьасда ващадав щивго гьечӀо», – ян.
«БетӀерчӀахъаяв пача!» – ян ахӀдана гьебмехалъ тӀолабго халкъ.
25Шамуилица халкъалда рагӀун киналго пачаясул ихтиярал цӀалана, ва гьел тӀехьалда хъвана; тӀехь БЕТӀЕРГЬАНАСУЛ КъотӀиялъул гъансида аскӀоб лъуна. Хадуб тӀолабго халкъ рокъобе биччана Шамуилица.
26Шаулги вилълъана Гивеаялде жиндирго рокъове. Аллагьас ракӀ гьесизабурав чанги бахӀарчиги вилълъана гьесда цадахъ. 27ХӀалихьатал-къадарал чагӀацани абуна: «ГьесгӀаги гурищ нилъ хвасар гьаризе ругел?» – ин.
Гьез малъикъ гьавун щибго сайгъат-саламги кьечӀо гьесие. Амма Шаулица гьеб бихьулареб ххвел гьабуна.
Currently Selected:
1 Пачаби 10: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
