1 Пачаби 11

Шаулица Иавеш шагьар хвасар гьаби

1КватӀичӀого Аммоналъул пача Нахаш вачӀана жиндирго аскаргун ва ГилгӀадалъул Иавеш шагьар сверун ккуна. Иавешалъул жамагӀаталъ гьесда абуна: «Нижергун къотӀи-къай гьабе, цинги ниж дуда цере хӀалтӀила», – ян.

2Амма аммонияв Нахашица абуна: «Дица къотӀи-къай гьабила нужергун тӀолго ГӀизраил хӀакъир гьабиялъе гӀоло нужер жив-живасул кваранаб берги бахъун».

3Гьебмехалъ Иавешалъул чӀахӀиял чагӀаз абуна: «Цо анкьгӀанасеб заман кье нижее, нижеца киса-кирего ГӀизраилалде чапарзаби ритӀизе рукӀине. Гьебмехалъги нижее кумекалъе чи щвечӀони, ниж духъе кверде рачӀина», – ян.

4Чапарзаби Шаулил шагьар Гивеаялде рачӀана ва гьениб халкъалда кинабго бицана. Гьебмехалъ тӀолабго халкъалъ кӀудиял гьаркьал гьарун магӀу бахъана. 5Гьебго заманалда, цере тӀамун оцалгун Шаул вачӀунев вукӀана хуриса, ва гьес цӀехана: «Халкъалде бачӀараб гьаб балагь щиб? Гьел гӀодиялъе гӀилла щиб?» – ин.

Цинги Иавешалъул жамагӀаталъ битӀун бачӀараб хабар гьесда бицана.

6Гьеб хабар рагӀарабго, БетӀергьанасул РухӀ рещтӀана Шаулиде, ва гьесул кутакалда ццин бахъана. 7КӀиябго оцги хъун, бутӀаби гьаруна гьес ва гьадин гьабизе бугин Шаулидаги Шамуилидаги хадур рилълъинчӀел чагӀазул оцазеянги абун, гьел бутӀаби чапарзабазда цадахъ ГӀизраилалъул ракьалде киса-кирего ритӀана.

Гьебмехалъ халкъалъул рекӀелъе БЕТӀЕРГЬАНАСДАСА кӀудияб хӀинкъи лъугьана ва, цо хутӀичӀого, гьел къватӀире рахъана. 8Шаулица гьел Везекалде ракӀарана. ГӀизраилалдаса лъабнусазарго, Ягьудиялдаса лъеберазарго бихьинчи вукӀана кинавниги.

9Гьез чапарзабазда абуна: «Гьадин абе ГилгӀадалъул Иавеш шагьаралъул жамагӀаталда: „Метер къалъул гӀужалда нуж хвасарлъизе руго“».

Чапарзаби тӀадруссана ва Иавешалъул халкъалда гьеб хабар бицана; гьелги кутакалда рохана. 10Гьебмехалъ Иавешалъул жамагӀаталъ Нахашида абуна: «Метер ниж нужехъе кверде рачӀина, хадуб нужеего бокьараб гьабе», – ян.

11Гьеб сордоялъ Шаулица халкъ лъабиде бикьана, ва нахъисеб къоялъ радал хъахӀлъи балелде гьел тӀаде кӀанцӀана; къалъуде щвезегӀан гъурана аммониял; гьезул чӀаго хутӀарал щущахъ рана – щивав жиндирго рухӀ хвасар гьабизе гӀедегӀахъдана.

Шаулил пачалъи тасдикъ гьаби

12Цинги халкъалъ Шамуилида абуна: «Лъица абун букӀараб „гьав Шаулицайищ нилъеда тӀад пачалъи гьабизе бугеб“, – ин? Нижеда рихьизаре гьел чагӀи, нижеца чӀвазе рукӀине».

13Амма Шаулица абуна: «Жакъа гӀадаб къоялъ чи чӀвазе бегьуларо, щайгурелъул БЕТӀЕРГЬАНАС ГӀизраил хвасар гьабураб къолъидал гьаб».

14Цинги Шамуилица халкъалда абуна: «Рилълъа Гилгалалде Шаулил пачалъи тасдикъ гьабизе», – ян.

15Кинабго халкъ Гилгалалде билълъана. Гьениб, БЕТӀЕРГЬАНАСДА цебе#11:15 БетӀергьанасда цебе – гьеб ккола БетӀергьанасул КъотӀиялъул гъамас лъураб бакӀалда цебе., Шаулил пачалъи тасдикъ гьабуна ва БЕТӀЕРГЬАНАСЕ ракълил къурбанал хъуна; Шаулги тӀолалго гӀизраилалги гьелдаса кутакалда разилъана.

Currently Selected:

1 Пачаби 11: АварАК

Highlight

Copy