1 Пачаби 12
12
Шамуилица гӀизраилаздехун ахирисеб вагӀза-насихӀат гьаби
1ТӀолабго ГӀизраилалъул халкъалда Шамуилица абуна:
«Нужеца абурабщиналъухъги гӀенеккун, гьале дица кинабго нужее бокьухъе гьабуна ва нужеда тӀад пачаги тана. 2Гьанже нужер цевехъанлъун пача вукӀина; дун бетӀерги хъахӀлъун херлъун вуго, амма дир васал хутӀила нужгун. ГӀолохъанлъудаса жакъа къоялде щвезегӀан нуж нухда рачана дица. 3Гьале дун гьанив нужеда цеве эхетун вуго. БЕТӀЕРГЬАНАСДА ва Гьес нужеда тӀад лъурав пачаясда рагӀун бице гьанже: лъилниги оц, лъилниги хӀама чӀобого бачанищ дица, лъилниги ракӀ бакъвазабунищ, лъиданиги зулму гьабунищ, жиндир тӀекълъи бахчизе гӀоло лъихъаниги ришват босанищ? Гьедин гьабун батани, дица гьеб кинабго бецӀила».
4Цинги гьез жаваб кьуна: «Дуца нижер ракӀ бакъвазабичӀо, нижеда тӀад зулмуги гьабичӀо ва чӀобого лъихъаниги щибниги дуего босичӀо», – ян.
5Шамуилица абуна: «Жакъа дир кверда хӀарам батичӀолъиялъе нугӀлъун вуго БЕТӀЕРГЬАН ва Гьес нужеда тӀад тарав пача», – ян.
«Гьеб битӀараб буго», – ян жаваб кьуна гьез.
6Гьебмехалъ Шамуил гьадин кӀалъана халкъалда: «БЕТӀЕРГЬАНАС Мусаги Гьарунги тӀаса рищана, ва нужер умумул Мисриялдаса нахъе рачана. 7Гьанже дида цере эхета гьанир, нужее ва нужер умумузе БЕТӀЕРГЬАНАС гьабурабщинаб лъикӀлъиги хӀикматалги нужеда бадир чӀвазе руго дица.
8Якъуб Мисриялде вахъун заман индал, гьенир зулмуялъ тату хварал нужер умумул гӀода-чӀван БЕТӀЕРГЬАНАСДА гьардедал, БЕТӀЕРГЬАНАС Мусаги Гьарунги ритӀун гьел Мисриялдаса хвасар гьаруна ва гьаб ракьалде рачана.
9Амма гьез жидерго БЕТӀЕРГЬАН Аллагьасде мугъ рехана. Гьединлъидал, Гьесги гьезда тӀаде Хацоралъул аскаразул бетӀер Сисараги, пилистималги, МогӀавалъул пачаги тӀамуна, ва гьез нужер умумузулгун рагъ гьабуна. 10„БЕТӀЕРГЬАНГИ рехун тун, БагӀалазеги Ашторатазеги бетӀерги чӀван, нижеца мунагьал гьаруна. Хвасар гьаре ниж нижер тушбабаздаса, цинги нижеца цо Дуе гьабила тӀагӀат-гӀибадат“, – иланги абун, гьел гӀода-чӀвадун БЕТӀЕРГЬАНАСДЕ гьардедал, 11БЕТӀЕРГЬАНАС ЕрубагӀал, Бедан, Иефай ва Шамуилги ритӀун, нуж нужер тушбабаздаса хвасар гьаруна, ва хӀинкъи гьечӀеб парахатаб гӀумру кьуна нужее.
12Амма Аммоналъул пача Нахаш нужеда данде рагъде вахъиндал, нужер пачалъун Живго БЕТӀЕРГЬАН Аллагь вукӀаниги, нужеца дида абуна: „Хан вукӀа абе нижеда тӀадги“, – ян. 13Гьединлъидал, гьале нужеего бокьун нужеца тӀалаб гьабурав пача. БЕТӀЕРГЬАНАС кьуна нужее гьев. 14БЕТӀЕРГЬАНАСУКЬА хӀинкъун, цохӀо Гьесие как-динги гьабуни, Гьесухъги гӀенеккани, БЕТӀЕРГЬАНАСЕ рихарабги гьабичӀони ва нужги нужеда тӀад вугев пачаги нужер БЕТӀЕРГЬАН Аллагьгун хьвадани – цӀакъ лъикӀ буго! 15Амма нуж БЕТӀЕРГЬАНАСЕГИ мутӀигӀлъичӀони ва Гьесие рихарабги гьабуни, цинги БЕТӀЕРГЬАНГИ нужеда данде чӀела ва нужер умумузул хабалцин инжит гьарила.
16Гьанже тӀаде рахъа ва ралагье БЕТӀЕРГЬАНАС нужер беразда цебе гьабизе бугеб кӀудияб гӀаламаталъухъ. 17Ролъ бакӀарулеб заман#12:17 Ролъ бакӀарулеб заман – маялъул ахир, июналъул байбихьи. ГӀизраилалда гьеб ккола цӀад балареб гӀуж. гурищ гьанже бугеб? Амма дица БЕТӀЕРГЬАНАСДЕ дугӀа гьабила ва Гьес, зобги гъугъазабун, пириги пирхизабун цӀад базабила; нижее пача вокьун вугинги абун, БЕТӀЕРГЬАНАСДА данде кигӀан кӀудияб мунагь нужеца гьабураблъи нужеда бихьун ва лъан букӀине».
18Цинги Шамуилица БЕТӀЕРГЬАНАСДЕ дугӀа гьабуна ва БЕТӀЕРГЬАНАС, зобги гъугъазабун, пириги пирхизабун, цӀад базабуна гьеб къоялъ. БЕТӀЕРГЬАНАСУКЬА ва Шамуиликьа кутакаб хӀинкъи рещтӀана тӀолабго халкъалде. 19Цинги халкъалъ Шамуилида абуна: «Нижер рахъалъ дурго БЕТӀЕРГЬАН Аллагьасда гьаре ниж хвечӀого хутӀизе рукӀине; нижее пача кьеянги абун, нижеца нижерго мунагьал жеги цӀикӀкӀинарун ругелъул».
20Шамуилица жаваб кьуна:
«ХӀинкъуге. Нужеца гьабуна гьеб мунагь, амма букӀаниги БЕТӀЕРГЬАН рехун тоге ва БЕТӀЕРГЬАНАСЕ ракӀ-ракӀалъ тӀагӀат-гӀибадатги гьабе. 21Гьесде мугъги рехун, пайда гьечӀел аллагьзабазде руссунге. Гьезда кӀоларо нужее, я щибниги лъикӀлъи гьабизе, я нуж цӀунизе, щайгурелъул гьел руго щибго гурел жал. 22Жиндирго Иллагьияб цӀаралъе гӀоло рехун теларо БЕТӀЕРГЬАНАС Жиндирго халкъ; щайгурелъул БЕТӀЕРГЬАНАСЕ бокьана нуж Жиндирго халкълъун тӀокӀ гьаризе. 23Нужедаса дугӀа гьабичӀого чӀеялъул мунагьалдаса дунго цӀунила дицаги БЕТӀЕРГЬАНАСДА цеве. Гьанжеялдаса нахъеги нужеда лъикӀаб ва битӀараб нух малъулев вукӀина дунгоги. 24Нужги, вореги БЕТӀЕРГЬАНАСУКЬА хӀинкъа ва ракӀ-ракӀалъго бацӀцӀадаб как-диналда рукӀа Гьесда цере. Гьесдасан рачӀарал кӀуди-кӀудиял гӀаламаталги рихьун ругелъул нужеда. 25Амма квешлъи гьабун гурони нуж чӀечӀони, ракьалдасаго тӀагӀинарун хӀур лъугьинабила нужерги нужер пачаясулги».
Currently Selected:
1 Пачаби 12: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
