Wenía 15

Yavepa vana tekísma ivo Abrão eneshoti ivo yoã

1Askávai shavá wetsã Abrãone namáki oĩatõ akĩ ãwẽ oĩa, Yavepa tachikarãsho vana akĩ. “Rakéroa, eã vitxi toĩa keská akĩ rakéka ivorasĩ mia ẽ teashokatsai, roapa ivorasĩ mia ẽ ashõkatsa”, akĩ tanamakĩ.

2Ãwẽ askái vanamaĩnõ, “Yavepá, aská akĩ awe roapa ea mĩ inãkatsikimẽkĩ ea vake yamarvikatá. Ea vake yamasho, ẽ mekẽya awerasĩro, ea mee ishõya, Eliézer, Damasco yorã ivokekatsa. 3Ea vake mĩ inãpaitsĩkĩ. Askásho ẽ mee ima ivõse ẽ mekẽya awe vikatsai”, akĩ.

4Ãwẽ askámaĩnõ Yavé askái vanainaói. “Askáma, mĩ vakesekatá mĩ mekẽya awe ivokekatsaiyanã, mia mee ishõya Eliézer ivomarívi”, akĩ. 5Aská avaikĩ Abrão ikotĩ ewevaĩsho tanamaóki. “Ramaro naí shavári patáinásho ichi awetii naĩ masoraki tanáta, mĩ keyoki tanátiraki oĩ. Waa ichi masoatii ikatsai ato mĩ revomarasĩ”, akĩ. 6Askái Abrãone Yavé anõ akátõsho, yora chinã mekika oĩki. 7Askái txipo vanaói. “Earo Yavévere. Ur, caldeu yorarasĩni shavánamãsho, mia neno ẽ ewevarãmtá, ‘mai ivokétso’, iinã”, akĩ.

8Ãwẽ askái vanamaĩnõ, revíóki. “Yavepá miaro mestẽpá, mai ivokéki aweshõ ẽ tanakatsa”, ãwẽ imaĩnõ, 9“neskátõsho mĩ tanakatsa, txasho aĩ, cabra aĩ, txivo vene aatii ea kawivarãshotso, atõ vari katsé 3 tanátimamẽse. Askávaíki noma, oshko aká vivarãótso”, akĩ.

10Ãwẽ askámaĩnõ yoinavorasĩ kawivarãsho, naki txari apásho masõvakĩvarãki. Askámaĩnõ yoini peiyavorasĩro aská akĩ naki txari apáma. 11Anosho shete tachivarãa oĩinã, ato posha poshaki. 12Askávai yãtakawãmaĩnõ, oshá ranóimaki namáki ã oĩa vakíchi tsaopakéa oĩinã rakéi kavima.

13Askámaĩnõ Yové Koĩni aská akĩ. “Anõpakĩ ea onãtatso, minõsho revovaĩyavorasĩro, yora wetsã mainamã shokoi vokatsaivo. Askái ano atõ shokomaĩnõ ato ati akĩ onís awemakĩ 400 vari tavámaki shokõkatsavo. 14Mĩ revomaa yorarasĩ atõ askámaĩnõ aaivo yorarasĩ eãse ato ẽ yostakatsa. Askámaĩnõ minárasĩro awe roapa ivorasĩ aya vekatsaivo. 15Askámaĩnõ miaro sheniwetsa mashtésho raké oĩtaníma mia roakitákatsa, mĩ papavonĩ. 16Askái aaivo yora wetsarasĩni maĩ shokosho, atõ shokovõ shokórasĩ arimẽse iovarãókatsavo. Awesáma, amorreu yorarasĩ, naa mai mia ẽ inãkatsa ivo naki shokosho, ichnái mashtémasho ã ikí. Aatiã atõ ichnái mashtémaĩnõrívi, minárasĩ iovarãkatsavo”, akĩ.

17Askái yãta vakíchikawãmaĩnõ, Abrãone ano nishõ ãwẽ oĩa yoá mashkõsho koĩ tokóinái. Oĩtakĩse ã oĩase amo shekó ketĩya tachivarãi. Askávai yoini tosha masovakĩanamã vevavaĩi vowãvo. 18Askái anosho Yavepa vana tekísma ivo Abrão eneshokĩ. “Naa mai, Egito mainamãsho kesowani kaí Eufrates wakanamã kesoketaná masoa ivo, 19anõ queneurasĩ, quenezeurasĩ, cadmoneurasĩ, 20heteurasĩ, ferizeurasĩ, refainrasĩ 21amorreurasĩ, cananeurasĩ, girgaseurasĩ, jebuseurasĩ aatii anõ shokoa ivo mai mĩ revomarasĩ ato ẽ ivomakatsai”, akĩ.

Currently Selected:

Wenía 15: YKV

Highlight

Copy