Wenía 14

Abrãone ãwẽ epashko shavá amati ivo yoã

1Aatiã shavapa Anrafelro Sinar shavapa kakáya, Arioquero Elasar shavapa kakáya, Quedorlaomer ivoro Elão shavapa kakáya, Tidal ivoro Goim shavapa kakáya aká. 2Kakáyarasĩ aatiisho, Bera, Sodoma shavapa kakáya, Birsa, Gomorra shavapa kakáya, Sinabe, Admá shavapa kakáya, Semeber, Zeboim shavapa kakáya, Belã#14.2 Ane wetsaro “Bela”, ane wetsaro “Zoar” aká shavapa kakáya akárasĩ atonĩ pakã ikinanãvo. 35 kakáya ivorasĩ mató sapaka Sidim atõ akánamã, Katxi Iã#14.3 Ane wetsaro “Katxi Iã”, ane wetsaro “Veí Iã” aká kesó ashkã kãtxívaĩvo. 4Askái kakáya Quedorlaomer 12 vari pakã raket ashõ, “noke kopímakõvaĩtsoma”, ikĩ ato ãwẽ shokõatõsho, 13 vari tavákeanamãsho nerishõ ato kopiki ichnákeóvo.

5Askái 14 varinamã, kakáya Quedorlaomerni ãwẽ avé pakã takéarasĩnĩ nerishõ Refain yorarasĩ Asterote-Carnaimnamã keyovo. Aská avaikĩ Zuzin yorarasĩ Hãnamã aovo, Emin yorarasĩro Savé-Quiriataimnamã askásevi akávo. 6Aská avaikĩ Horeu yorarasĩ keyoóvo. Atõ mainamãro Seir matórasĩnamãsho kaí El-Parãnamã kesoketaná, askata wenẽ orakama. 7Askátani vesokevai veí, shavá Cadesnamã vevotiã, Mispate akĩ atõ anepaóanamã, amalequitanĩ amorreurasĩ Hazazon-Tamarnamã atõ shokomaĩnõ pakã ashõ mai ato viãkéki.

8Askámaĩnõ kakáyavorasĩ Sodoma, Gomorra, Admá, Zeboim, Bela aatii õsíkesho pakayai voávo, Sidim mató sapakanamã. 9Ano Elão shavapa kakáya, Goim shavapa kakáya, Sinar shavapa kakáya, Elasar shavapa kakáya naatiinĩ pakã ikinanãvo, wetsarasĩro 4 kakáya, wetsarasĩro 5 kakáya aká. 10Ano mató sapaka Sidim atõ akánamã, pae shãtó ranóma. Askái atonĩ pakã ikinanãvaí Sodomanĩ Gomorra yorarasĩ atõ poshókatsikimẽkĩ ravé aaivo shãtó naki para ivaĩvo, ravéro mató keyáka matxi poshóvo. 11Atõ askámaĩnõ 4 kakáya ivorasĩni Sodomanĩ, Gomorra yorarasĩ atõ awe roapa, atõ piti aká viãkãvo. 12Viãkãvaíki, Abrãone epashko Sodomanamã niá ivo, aa, ãwẽ awe roapa ivorasĩ aká atxisho vivaĩóvo. 13Askámaĩnõ yora wetsa arí westípakekeyatõ tachikaĩsho Abrão, hebreu yora, katseki yoãshokĩ. Aatiã ã niáro iwi carvalho, Manre, amorreu yoraná ivo orakama niá. Askái Manre, ãwẽ take Escol, Aner aatíiro Abrão avé takéarasĩ.

14Askái ãwẽ epashko atxisho vivaĩvaivo ikí nĩkãinã, 318 yora pakayai tsasiyavo ato kawivaĩki. Aaivo yorarasĩro ano shavapashõ vake kaniavorasĩ. Askáki atonĩsho, kakáya 4 txivãvaĩi voí Dãnamãsho nokovo. 15Askáki ãwẽ yorarasĩ ravé akĩ oshkevakĩsho, yamé ato pakã akávo. Askái, 4 kakáya atõ shokõkenavonĩ ashkã poshómaĩnõ, Hobá shavákiri Damasconamãsho kaí, mekiri paróri ato txivãvaĩsho, ãatõse ato akĩ. 16Anosho keyoki arimẽse ato kawivarãóki, ã epashkó, aĩvorasĩ, yora viatávai ivorasĩ, awe roaparasĩ aatíi.

17Askái, Abrão, Quedorlaomer, kakáyavo wetsarasĩ aká ato paketani oshõ, Sodoma kakáya Savé mató sapaka, “Kakáyatõ Mató”, atõ akánamãsho veyánanãvo.

18Askámaĩnõ Melquisedeque, Salem maĩ kakáyatõ kakĩ, pãonĩ vinho Abrão vishõvaĩki. Aaivo yoraro Matxi Niaya Yové vevoshoaya yora. 19Askáki vana roapa ivõ Abrão netãi vanai. “Matxi Niaya Yové naí, mai aká shovimaiya ivõ Abrão roapa ivo ave ashõnõ. 20Askái mĩ ranokasmaya ivorasĩ mia yomẽ ashõvaiya, Matxi Niaya Yovéro roapa”, akĩ Melquisedequẽ.

Ãwẽ askámaĩnõ, Abrãone ãwẽ awe vivarãa ivo, 10tíi pashka pashkavaíki westíkase Melquisedeque inãki.

21Askámaĩnõ Sodoma kakáyatõ Abrão vana aoki. “Yora atxívai ivorasĩro ea ato enesho, askámaĩnõ, awe mĩ vitãvai ivorasĩro miãse vitso”, akĩ. 22Ãwẽ askámaĩnõ, “Ea aská akatĩpa. Yavé, Matxi Niaya Yové naí, mai aká shovimaiyamẽsho tekítĩpa vana mia ẽ ashõai. 23Askáma, awe westíchta, mayáchtase, taríti patichta askárasĩchta ea mia viãkekatsikíma. ‘Abrão enõsho aweyai kakáya mestẽkai shovisho niá’, ea mĩ amísi. 24Earo viáma askámẽkĩ ẽ shokõkenavo atõ pivai ivoro roase, askávaíse evé votãvai ivo yorarasĩ Aner, Escol, Manre aatíishoro ato mĩ inãkatsiki awe ave vinõvo”, akĩ Abrãone.

Currently Selected:

Wenía 14: YKV

Highlight

Copy