Апостолъёслэн ужъёссы 6

6-тӥ ЛЮКЕТ

1Со нуналъёсы, дышетскисьёс тросгес луэм бере, грек кылын вераськисьёсыз еврейёс ас кылынызы вераськись еврейёслы пумит керӟегъяськыны кутскизы, соослэн палкышнооссы нуналлы быдэ кулэяськисьёслы люкет сётканлэсь палэнтэмын шуыса. 2Соку дас кык апостолъёс, троссэ дышетскисьёсты огазе люкаса, соослы шуизы: «Асьмелы ӟеч ӧвӧл, Инмар кылэз палэнтыса, ӝӧк выл сиён-юонэз люкылон сярысь сюлмаськыны. 3Соин ик, агай-вынъёс, асьтэ пӧлысь сизьымзэ оскиськымонъёссэ, Святой Духен но визьмын тыр луэмъёсты быръе: та ужез соослы оскоме. 4Нош асьмеос дугдылытэк вӧсяськыса, Инмар кылэз тодытыса уломе». 5Та ӵектон ваньзылы люкаськемъёслы яраз. Бырйизы Стефанэз – осконэн, Святой Духен тыр луэм пиосмуртэз, нош озьы ик Филиппез, Прохорез, Никанорез, Тимонэз, Парменэз но язычникъёс пӧлысь иудей осконэ выжем Антиохияысь Николаез. 6Соосты апостолъёс азе султытӥзы, нош апостолъёс вӧсяськыса соос вылэ кизэс понӥзы.

7Инмарлэн кылыз паськыт вӧлмыны кутскиз. Дышетскисьёслэн лыдзы Иерусалимын шӧдскымон йылӥз. Священникъёс пӧлысь но туж тросэз Иисус Христослы осконэз кабыл басьтыны кутскизы.

8Стефан Инмарлэн дэлетэныз, кужыменыз тыр луыса, калык пӧлын быдӟымесь паймымон ужъёс, паймымон тодметъёс лэсьтӥз. 9Либертин сӥнагогае ветлӥсьёс, Киринеяысь, Александрияысь, нош озьы ик Киликияысь, Асияысь вуэм куд-ог иудейёс Стефанэн ченгешыны кутскизы; 10но солэсь мур визьмын но Духен тыр луыса вераськемзэ кылыса, соос пумит сылыны ӧз быгатэ. 11Соку соос куд-огъёссэ либатыса Стефанлы пумит вераны дышетӥзы: «Ми кылӥмы, кызьы со Моисей вылэ, Инмар вылэ сантэман кылъёс вераз». 12Калыкез, тӧроосты, книга тодӥсьёсты солы пумит бугыртыса, солэн вылаз урдскизы. Стефанэз кутыса сӥнедрионэ нуизы. 13Адӟемзэс ӧрекчаса ивортӥсьёсты поттӥзы, соос шуизы: «Та адями дугдылытэк та святой инты вылэ, Моисей закон вылэ сантэман кылъёс вера. 14Ми асьмеос кылӥмы, кызьы со вера вал: ”Назаретысь Иисус та интыез куашкатоз но Моисей пыр асьмелы сётэм сямъёсты воштоз”». 15Собере ваньмыз сӥнедрионын пукисьёс Стефан шоры учкизы: солэн ымнырыз Кылчинлэн ымнырызлы укшась луиз шуыса адӟизы.

Currently Selected:

Апостолъёслэн ужъёссы 6: УДМБИБ

Highlight

Copy