Апостолъёслэн ужъёссы 5

5-тӥ ЛЮКЕТ

1Анания нимо пиосмурт но Сапфира кышноеныз музъемзэ вузаз. 2Кышноеныз вераськыса, дунызлэсь одӥг люкетсэ ватӥз, нош кыӵе ке но люкетсэ вайиз но апостолъёслэн пыд выжыязы понӥз. 3Соку Петр шуиз: «Анания! Малы тон шайтанэз аслад сюлэмад пыртӥд, Святой Духез ӧрекчад – музъем дуныдлэсь одӥг люкетсэ ватӥд? 4Маид вал, со тынад ӧй вал-а? Вузкарыса басьтэм дуныд но тынад ки улад ик ӧй вал-а? Малы тон та ӧрекчаськонэз аслад сюлэмад пыртӥд? Тон адямиосыз ӧд ӧрекча, Инмарез ӧрекчад». 5Та кылъёсыз кылэм бераз Анания пограз но кулӥз. Ваньзы тае кылэм-адӟемъёс туж зол кышказы. 6Егит пиос султӥзы но Ананиез ватыны дасязы, поттыса ватӥзы. 7Та бере, ог куинь час ортчыса, мар луэм сярысь номыр но тодытэк, солэн кышноез лыктӥз. 8Петр солэсь юаз: «Вера мыным, сыӵе дунэн-а музъемдэс тӥ вузады?» Со шуиз: «Бен, сыӵе дунэн». 9Соку Петр солы шуиз: «Кызьы тӥ Кузё-Инмарлэн Духезлэсь визьзэ сынаны соглаш луиды? Тани, тынэсьтыд кузпалдэ ватӥсьёс ӧсэтӥ пыро, тонэ но поттозы». 10Соку ик Сапфира Петрлэн пыд выжыяз усиз но лулыз потӥз. Егит пиос пырыку, со кулэмын вал ни. Сое поттӥзы но картэз вӧзы ватӥзы. 11Быдэс черк, ваньмыз кылэм-адӟем калык туж зол куалектӥзы.

12Апостолъёслэн киынызы калык пӧлын трос паймымон тодметъёс, паймымон ужъёс лэсьтэмын вал. Соос ваньназы Соломонлэн Бӧльмы пушказ люкаськылӥзы. 13Палэнысь лыктэмъёс пӧлысь нокин но соос борды кариськыны ӧз дӥсьты, калык соосты данъяса улӥз. 14Кузё-Инмарлы оскисьёс тросгес но тросгес луизы, – пиосмуртъёс но, кышномуртъёс но. 15Висисьёсты, ульчаосы поттылыса, валесъёс, кӧлан шобретъёс вылэ тырылӥзы, – вӧзтӥзы ортчись Петрлэн вужерез ке но куд-огзы вылэ мед усёз вал шуыса. 16Иерусалиме артысь городъёсысь трос муртъёс висисьёсты, перияськемъёсты вайылӥзы. Соос ваньзы бурмылӥзы.

17Нош архиерей но соин валче ваньзы, саддукейёслэн партиенызы герӟаськем осконэз тугась-пожасьёс, кӧтсы пӧсен 18апостолъёсты кырмыса пытсэтэ ворсатӥзы. 19Нош Кузё-Инмарлэн Кылчинэз уйин пытсэтлэсь ӧсъёссэ усьтӥз но соосты поттыса шуиз: 20«Мынэлэ, храм пушкы султэ но Христос бордын улонлэсь вань та кылъёссэ калыклы вералэ». 21Верам кылэз кылзӥськыса, ӵукна соос храме пыризы но отын дышетыса улӥзы. Нош архиерей но соин ӵош лыктэмъёс, сӥнедрионэз, израиль пиослэсь тӧрооссэс люказы но апостолъёсты пытсэтысь вайыны ыстӥзы. 22Медоос мынӥзы, но соосты пытсэтысь ӧз шедьтэ. Берытскем беразы 23шуизы: «Ми адӟимы: пытсэт туж юн тунгонамын, ӧсъёс дорын возьмаськисьёс сыло; ӧсэз усьтӥм но отысь нокинэ ӧм шедьтэ». 24Та иворез кылыса, храмез возьмасьёслэн кузёйырзы но, архиерейёс но, кызьы та тазьы луиз шуыса, абдразы. 25Кин ке но лыктӥз но соослы урттылӥськыса шуиз: «Воргоронъёс, тани кинъёсты тӥ пытсэтэ ворсады, соос калыкез дышетыса храмын сыло». 26Соку возьмаськисьёслэн кузёйырзы медоосын ӵош мынӥз но апостолъёсты вӧсь карыны дӥсьтытэк татчы вайиз, – соосты изэн медаз тышкалэ шуыса, калыклэсь кышказы уго. 27Апостолъёсты вайизы но сӥнедрион азе султытӥзы. Архиерей соослэсь юалляськиз. Собере шуиз: 28«Ми тӥледыз юн-юн ӧм алэ-а, та Адямилэн нимыныз медад ни дышетэ шуыса? Нош тӥ асьтэлэсь дышетондэс быдэс Иерусалиме вӧлмытӥды ини, Со Адямилэн вирыз понна милемыз янгыше уськытыны турттӥськоды». 29Соку Петр но соин ӵош мукет апостолъёс ответ сётыса шуизы: «Адямиослы сярысь, Инмарлы золгес тэрытскыны кулэ. 30Тӥледын писпу вылэ кортӵогаса вием Иисусэз атайёсмылэн Инмарзы улӟытыса султытӥз. 31Израильлы сьӧлыкъёсыз понна ӧпкельыны но сьӧлыкъёссэ куштыны луонлык сётон понна Сое Аслаз бур киыныз Кузёйыр, Утись кариз. 32Вань та ужъёсты ми адӟисьёс луиськомы, Святой Дух но, Кудзэ Инмар сётӥз Солы тэрытскисьёс понна».

33Тае кылыса, соос йырзы курен пурӟизы но апостолъёсты виылыны малпазы. 34Соку сӥнедрионын Гамалиил нимо одӥг фарисей, законлы дышетӥсь, вань калыклэн гажано муртэз султӥз но кӧня ке гинэ дырлы апостолъёсты педло поттыны косӥз. 35Собере татын пукисьёслы шуиз: «Израиль калык! Асьтэ куспын эшшо ӟеч-ӟеч малпалэ ай та адямиос сярысь, мар тӥледлы соосын кароно: 36уго, кема ик ӧвӧл на, кызьы потӥз вал Февда но ассэ со кыӵе ке но вылӥ-дано адямиос радэ пуктӥз. Со сьӧры ог ньыль сю мурт мынӥз. Но сое виизы. Ваньмыз, кинъёс со сьӧрын ветлӥзы, пазьгиськизы, быризы. 37Собере, калыкез ӵотаса-лыдъяса гожъян вадесэ, Галилеяысь Иуда потӥз но сьӧраз трос калыкез бугыръяськон пӧлы нуиз. Сое но виизы, нош ваньмыз, кинъёс со сьӧрын ветло вал, пазьгиськизы. 38Соин ик али тӥледлы верасько: та адямиос бордысь палэнске, асьсэ понназэс кельтэлэ соосты. Уго та ужпум, та ужъёс адямиос бордысь ке потэмын, со куашкалоз, 39нош Инмарлэсь ке со, тӥ сое куашкатыны уд быгатэ. Инмарлы пумит мынӥсьёс медад луэ». 40Соос Гамалииллэсь верамзэ санэ понӥзы. Апостолъёсты ӧтьыса жугытӥзы но, Иисуслэсь нимзэ медаз ни вералэ шуыса, соосты алыса лэзизы. 41Нош апостолъёс, Кузё-Инмарлэн Иисуслэн нимыз понна сантэманэз ас вылазы чидано луизы шуыса, сӥнедрионысь шумпотыса кошкизы. 42Соос нуналлы быдэ храмын но, коркась корка ветлыса но дугдылытэк дышетылӥзы, Иисус Христос сярысь Ӟеч Ивор тодытыса ветлӥзы.

Currently Selected:

Апостолъёслэн ужъёссы 5: УДМБИБ

Highlight

Copy