Апостолхнень тевсна 6

Сисем лездыхнень кочкамасна

1Ся пингть, мзярда тонафнихнень лувкссна коль кассь, греконь кяльса корхтай еврейхне кармасть изгордома еврейхнень лангс. Синь корхтасть, кле, эрь шиня лезксонь явомста синь удаваснон ётнесазь вакска. 2Эста кемгафтува апостолхне тердезь сембе тонафнихнень и мярьгсть: «Аф пара тейнек кадомс Шкаень валть и пичедемс ломаттнень андомаснон кувалма. 3Сяс, кемай ялгат, кочкада эсь ёткстонт сисем ломатть, конатнень лемсна пара лувкссот и конат пяшксет Иняру Ваймопожфта и смузьшида. Тейст макссаськ тя тевть, 4а минць путсаськ пряньконь-седиеньконь озондомати и Шкаень валть кандоманцты». 5Сембе кирдезь тя мяльть ширенц. Тя тевти синь кочказь: Стефанонь, алять, кона пяшксель кемамада и Иняру Ваймопожфта, Филиппонь, Прохоронь, Никаноронь, Тимононь, Парменонь и Антиохиянь Николайть, кона шарфтфоль евреень кемамати. 6Синь вятезь апостолхненди и сят, лангозост кядень путозь, озондсть инксост.

7Шкаень валсь срадсь-келемсь, и тонафнихнень лувкссна Иерусалимса пяк кассь. Озксвятихненьге эзда пяк ламотне кармасть кемама.

Стефанонь кундамац

8Стефан, кона пяшкотьфоль кемамада и вийда, тиендсь пяк оцю дивань тефт и тяштькст ломаттнень ёткса. 9Ся пингоня сонь мархтонза кармась пялькстома мзярошка ломань воляс нолдафнень синагогаста – тяфта сон лемневсь. Нят ульсть Киринеянь и Александриянь еврейхть и мзярошка еврей Киликияста и Асияста сафнень эзда. 10Но синь ашесть пялькстав ся смузьшить и Иняру Ваймопожфть каршес, конатнень вельде корхтась Стефан.

11Эста синь салава корхтазь кона-кона ломаттнень, азолезь сятне: «Минь кулеськ, кода сон сялдозе Моисеень и Шкайть». 12Тяфта синь взафтозь ломаттнень, ломаньтналонь оцюнятнень и койти тонафтыхнень, кундазь Стефанонь и вятезь Оцю пуромксть инголи. 13И вятсть васькафни ломатть, конат корхтасть: «Тя ломанць апак лотксек сялдсы тя иняру Шкаень кудть и койть. 14Минь кулеськ, кода сон корхтась: ся Назаретонь Иисуссь срафтсы иняру Шкаень кудть и полафтсыне койхнень, конатнень максозень тейнек Моисей». 15Оцю пуромксса сембе ащихне ванцть Стефанонь лангс и няезь: сонь шамац ульсь кода ангелонь шама.

Currently Selected:

Апостолхнень тевсна 6: ОС16

Highlight

Copy