Апостолхнень тевсна 7

Стефанонь корхтамац Оцю пуромксть инголе

1Эста озксвятиень оцюнясь мярьгсь: «Тя виде?» 2Стефан корхтай: «Ялгат и ломаньтналонь аляньке, кулхцондода! Иневалдонь Шкайсь эвондась Авраам аляньконди Месопотамияса, сяда инголе, кода сон ётась эряма Харрану. 3Шкайсь мярьгсь Авраамонди: "Листь эсь масторстот, эсь юромстот, аляцень кудста, и архт ся мастору, конань Мон няфтьса тейть". 4И Авраам лиссь Халдеянь масторста и озась эряма Харрану. А тоста, Авраамонь алянц куломда меле, Шкайсь ётафтозе сонь тя мастору, коса тинь тяни эрятада. 5Шкайсь ашезь макса Авраамонди тя масторть эзда вакс пенявок, но сяка надияфтозе максомс сонь Авраамонди и сонь уноконь-уноконзонды, хуш ся пингоня Авраамонь идецка ашель. 6Шкайсь мярьгсь тейнза: "Тонь уноконь-унокне кармайхть ширде сафокс лиятнень масторса. Синь тисазь урекс и кармайхть люпштамост ниле сятт киза. 7Но Мон судендаса ся ломаньтналть, конань кядяла синь улихть урекс, – мярьгсь Шкайсь. – Тяда меле синь лисихть ся масторста, и кармайхть сюконякшнема Тейне тя вастса". 8Шкайсь тись Авраамонь мархта соткс, кона кемокстави киськопень керомаса. Тянь коряс Авраам, Исаак цёранц шачемста, кафксоце шиня керозе иднять киськопенц, а Исаак керозе Иаков цёранц киськопенц, а Иаков тяконь тиезе эсь кемгафтува цёранзон мархта, конат сямольде тейнек арасть атянь-атякс.

9Иаковонь цёранза каясть сельме Иосифонь лангс и мизь сонь урекс Египету. Но Шкайсь ульсь мархтонза 10и лихнезе сонь сембе зияттнень эзда. Сон макссь тейнза оцю смузьши и ладязе ширезонза фараонть, Египетонь оцязорть, седиенц, и ся тиезе Иосифонь марнек Египетть и оцязоронь кудть лангса вятикс. 11Сяльде сась Египету и Ханаану вачаши и кандсь эсь мархтонза тостонь эряйхненди оцюдонга оцю маятамат, атянь-атяньковок ашесть мушенда эстейст ярхцамбяль. 12Иаков маряфтозе, кле, Египетса ули кши, и кучезень тоза цёранзон, минь атянь-атяньконь. Тя ульсь Египету синь васенце якамасна. 13А мзярда синь тусть тов омбоцеда, Иосиф панжезе эсь брадонзонды, кие сон; и фараонти содавсь Иосифонь юромоц. 14Иосиф кучезень брадонзон Иаков алянц мельге и сембе мала ломанензон мельге, эздост ульсь сизьгемонь ветие ломань. 15Иаков ётась эряма Египету. Тоса сон кулось и тоса кулость минь аляньковок. 16Синь ускозь Сихему и путозь калму, конань Авраам рамазе сиянь ярмакта Сихемса Емморонь цёранзон кядьста.

17Малаткшнесь пингсь, мзярда эрявсь пяшкодевомс надияфтомати, конань Шкайсь максозе Авраамонди. Ломаньтналоньке Египетса коль кассь и ламолгодсь, 18мзярс ашезь са оцязорондама од оцязор, кона ашезе сода Иосифонь. 19Ся оцязорсь ёжуста и казямста люпштась ломаньтналоньконь эса, кошярязень ломаненьконь ёрямс эсь идняснон, афольхть ляда шиса. 20Тя пингть шачсь Моисей, и сон пяк Шкайть мялезонзоль. Колма кофт сонь касфтозь тядянь-алянь кудса. 21А мзярда сон ульсь ёрдаф, цёранять сявозе фараонть стирец и касфтозе, кода эсь иденц. 22Моисеень тонафтозь Египет масторонь марнек смузьшити, и сон сафтозе и валса, и тевса.

23Мзярда тейнза топодсь нильгемонь киза, седиец тердсь молемс варжамс эсь ломаньтналонц, Израилень цёратнень. 24Кодак няезе, фкять эздост пиксозе Египетонь аля, сон арась ширезонза, и шавозе пиксыть. 25Сон арьсесь, эсь ломаненза шарьхкодьсазь: Шкайсь вельденза иди эсост, аньцек сят ашесть шарьхкоде. 26Омбоце шиня Моисей няезе, кода тюрихть кафта еврейхть. Сон ёразе ладямс ёткснон, корхтась: "Ломатть, тинь фкя веронь, мес мольхтяда фкя-фкянь каршес?" 27Но ся, кона пиксозе маластонц, тостяфтозе Моисеень и мярьгсь: "Кие путонзе тонь лангозонк азоркс и судьякс? 28Пади ёрат моньге шавомс, кода исяк шавить Египетонь ломанть?" 29Тянь кулемда меле Моисей ворьгодсь Египетста и озась эряма Мадиамонь модати, коса сонь шачсть кафта цёранза.

30Ётась нильгемонь киза, и Азорть ангелоц эвондась тейнза Синай пандалдонь шавмодаса, палы кусторксть толгяльса. 31Моисей тянь няемста дивандазевсь. А мзярда маладсь сяда лацкас ваномонза, кулезе Азорть вайгяленц: 32"Мон тонь атянь-атятнень Шкайснан, Авраамонь Шкаецан, Исааконь Шкаецан и Иаковонь Шкаецан!" Моисей ушедсь трнатома эводемать эзда, пельсь сельмонзонга кеподемс. 33И Азор Шкайсь мярьгсь тейнза: "Каяйть пильгстот карьсембяльхнень, сяс мес вастсь, конань лангса ащат – иняру мода. 34Мон няине: ломаньтналозе люпштави Египетса, кулине сонь куфцеманц, и валгонь сонь мяньфтомонза египетоннетнень эзда. Тяни сак, Моисей, Мон кучте тонь меки Египету".

35Тя ся Моисейсь, конань израиленнетне аердазь, мзярда мярьгсть: "Кие путонзе тонь азоркс и судьякс?" Тя сонь Шкайсь ангелть вельде, кона эвондась сялги кусторксса, кучезе тейст вятикс и воляс нолдайкс. 36Тя сон лихтезень синь и тиендсь дивань тефт и тяштькст Египетонь масторса, Якстерь оцюведьса и шавмодаса нильгемонь кизонь кувалмос. 37Тя ся Моисейсь, кона мярьгсь израиленнетненди: "Азорсь, тинь Шкаенте, кучи тейнть Пророк тинцень ломаньтналстонт, кода кучемань монь; Сонь кулхцондость". 38Тя Моисейсь, мзярда ломаньтналсь кочкафоль шавмодаса, пачфтезе минь аляньконди сянь, мезе азсь тейнза ангелсь Синай пандть пряса. Сон сявозень эряфонь канды валхнень и максозень тейнек. 39Но минь аляньконь ашель мяльсна кулхцондомс сонь, синь аердазь и шарфтозь седиснон Египету. 40Синь мярьгсть Аарононди: "Тийхть тейнек шкайхть, конат кармайхть вятемонк, сяс мес аф содасаськ, мезе лиссь Египетста лихтиеньконь, Моисеень мархта". 41И ся шитнень синь валсть букань калоп и кандсть тейнза озксказне, и тисть ила эсь кятть тиф шкайснон лемс. 42Но Шкайсь шарфтсь эздост и кадозень сюконякшнемда менелень валдоптыхненди, кода сёрматф пророкнень книгаса:

"Израилень ломатть!

Дяряй Тейне каннеде печкф жуватат и озксказнет

сембе нильгемонь кизотнень, мзярс уледе шавмодаса?

43Молохонь котфонь кошенц

и Ремфан шкаентень тяштенц тинь каннесть мархтонт,

тинь тиеде эстейнть аф афкуксонь шкайхть сюконякшнеманди.

Сяс Мон паттядязь Вавилонть омбокс"#7:43 Амос 5:25-27.

44Шавмодава якамста аляньке каннезь мархтост Шкаень улемань-ащемань иняру кошть#7:44 иняру кош – скиния. Шкайсь кошардозе Моисеень тиемс тя котфонь кошть ся кепотьксть коряс, кона няфтьфоль тейнза. 45Сяльде аляньке, конатненди сатсь иняру кошсь эсь аляснон эзда, Иисус Навинонь вятикс улемстонза, кандозь сонь модати, конаста Шкайсь панезень тостонь ломаньтналхнень аляньконь ингольде. Тяфта тя иняру кошсь ульсь кядьсонк Давид оцязорть пингс. 46Давид сатозе Шкайть эзда пароказнеть и эняльдсь Шкайти, мярьговоза тейнза путомс куд Иаковонь Шкаенцты. 47Но стяфтозе кудть Тейнза Соломон. 48Но Инь Вярдень Шкайсь аф эряй ломанень кядьса путф кудса! Вов кода корхтай тянь колга пророксь:

49"Менельсь – Монь оцязоронь озама вастозе,

а модась – пильгонь путома нежезе.

Кодама куд тинь Тейне путтада? – кизефни Азорсь –

Кодама ваймама васта Тейне аноклатада?

50Дяряй аф Монь кядьсон тя сембось тиф?"#7:50 Исаия 66:1-2

51Аф кулхцонды ломатть, кинь седисна аф содасазь Шкайть, кинь пилесна аф кульсазь видешить! Тинь фалу моледе Иняру Ваймопожфть каршес – алянтевок, тиньге! 52Кинь пророкнень эзда ашезь панце тинь алянте? Синь шавозь сятнень, кит кунардонь пингть инголькиге азсть Видексшинь Тиить саманц колга, Сянь, конань тинь ня шитнень мисть и шавость! 53Тейнть ангелхнень вельде максозь койть, но тинь ашесть ванфта сонь!»

Стефанонь кевса шавомац

54Тянь кулемста Оцю пуромксстотне лиссть эсьстост и порьсть пейхть лангозонза. 55А Стефан Иняру Ваймопожфта пяшкотьфста варжакстсь менели и няезе Шкайть иневалдонц и Иисусонь, кона ащи Шкайть види кядь ширесонза. 56Стефан мярьгсь: «Вов, мон няйса панжада менельть и Ломанень Цёрать, кона ащи Шкайть види кядь ширесонза».

57Но синь кайгиста юватькшнесть и паннезь пилеснон. Сяльде фкя мяльса врьгятсть Стефанонь лангс, 58лихтезь сонь ошста и кармасть ёряма лангозонза кевса. Пикссиенза кадозь щамснон ваномс Савл лемса цёрати. 59Стефанонь эса шавсть кевса. Стефан тердезе Шкайть и мярьгсь: «Иисус Азор! Сявк ваймозень». 60Тяда меле прась плманжа лангс и кайги вайгяльхть ювадсь: «Азор! Тяк лува тейст тянь пежекс!» Азозе тянь и ваймоц лиссь.

Currently Selected:

Апостолхнень тевсна 7: ОС16

Highlight

Copy