San Juan 6

Jesús cinco mil jo̧mȩnä̧ u̧mä̧tö̧rö̧ ttucua pä'ö iyinö huȩnȩ

1Ja̧u̧nu̧ o'ca'a, Jesús Galilea dubora ji̧jȩcu̧nä̧ 'chi̧nö̧do. Juhuora Galilea dubora koro i̧mi̧mä̧ Tiberias pä'ö micuora. 2Recuätö ttö̧ja̧ koro juäi ttö̧ja̧ ttieru juäi, na̧'ä̧chä̧tö̧rö̧ aditö icua'a tottinö o'ca'a, chutä o'ca'anä cue'ächinätödo. 3Ja̧'hua̧ ja̧'a̧ Jesús u̧huo̧juȩtä̧u̧cu̧ möä'cara̧'a̧ 'cha'ächö pä̧mä̧di̧nö̧do. 4Judíos ttö̧ja̧ pascua fiesta jȩttö̧ mo̧ro̧ tö'cöhuächi'ina'ado. 5Jesús recuätö ttö̧ja̧ o'ca'anä cue'ächätörö topö, Feliperö pä'inödo:

—Pa̧'a̧nö̧ ttirecua'a, ¿tottö tȩmä̧cua̧'a̧jä̧ttö̧ cuäcuähuä ttucua pä'ö?

6Ja̧'hua̧nö̧ pä'inödo, Felipe ädäta'a ä̧ju̧cua̧ pä'ö. Chutä Jesús jȩä̧cuȩmä̧ huo̧jui̧nö̧do. 7Felipe ädätö pä'inödo:

—Doscientos bolívares jo̧mȩnä̧ i̧ri̧si̧ tȩmö̧ttö̧mä̧, ppo̧ö̧cu̧nä̧ tiyä'cha'anä, yoröiso ttö̧'a̧ja̧cuä̧chö̧ juiyö'a̧nö̧ ja̧'a̧.

8Ja̧'hua̧ ja̧'a̧ttö̧ Simón Pedro ö̧jä̧hua̧ Andrés, ka̧ra̧ Jesús u̧huo̧juȩtä̧u̧ttu̧ i̧sa̧, pä'inödo:

9—Ya̧tȩ ji̧'qui̧cha̧hua̧ pȩnȩ kö̧. Ja̧u̧ i̧ri̧si̧ ji̧mö̧tȩ jähuä ö̧si̧'i̧nä̧, po̧i̧'i̧nä̧ ta̧ju̧ru̧tä̧ ku̧nä̧rö̧. Ja̧'hua̧nö̧ ja̧'a̧nä̧ recuätö ttucua pä'ö ¿tta̧'a̧nö̧ rö̧ȩnä̧ pa̧ja̧cuä̧cha̧'a̧jä̧ttö̧?

10Ja̧'hua̧nö̧ ja̧'a̧ Jesús pä'inödo:

—O'ca toi'önä ttö̧'ä̧mä̧da̧ pä'ö ji'ähuitö.

Ju̧huȩnȩmä̧ rȩjȩ isä'cua rö̧ȩnä̧ pi̧no̧mȩdo. Ja̧'hua̧nö̧ ja̧'a̧ttö̧ u̧mä̧tö̧mä̧ cinco mil jo̧mȩnä̧ pä̧mä̧di̧nä̧tö̧do. 11Ja̧'hua̧ ja̧'a̧ Jesús u̧mö̧nä̧ i̧ri̧si̧ 'chu̧'ä̧rö̧, Diosrö ucuocuinödo. Ucuocuäji'ca̧ u̧huo̧juȩtä̧u̧ru̧ iyinödo, juhua'a yabo rȩjȩnä̧ pȩjä̧mä̧tö̧rö̧ ttiya pä'ö. Ja̧'hua̧ta̧nö̧ jȩpi̧nö̧do po̧i̧rö̧'i̧nä̧, suttädi'önä ttucua pä'ö. 12Täcö suttädi'önä ttucuäji o'ca'a, Jesús pä'inödo u̧huo̧juȩtä̧u̧ru̧:

—Ttucuäji o'ca'a ka̧cui̧pä̧ji̧mä̧ ca̧ca̧tä̧tu̧cui̧ surojuoächa'acu.

13Ja̧'hua̧nö̧ hueä̧u̧ ca̧ca̧ti̧pö̧, uru'tiyu ttö̧jä̧pö̧ttö̧nö̧ to'tare suhuädi'önä ȩni̧nä̧tö̧do i̧ri̧si̧ ji̧mö̧tȩ jähuä ö̧si̧ttö̧ ka̧cui̧pä̧ji̧mä̧. 14Ja̧'hua̧ ja̧'a̧ jahuätö ttö̧ja̧ Jesús ja̧'hua̧nö̧ tottocö jȩo̧mȩnä̧ topö pä'inätödo:

—Iso päi'önä Dios i̧huȩnȩ jiäcuähuä i̧sa̧ pi̧jä̧ra̧'a̧ i̧chä̧cua̧ pättinäcu, pidetä a̧'cua̧ra̧'a̧.

15Ja̧'hua̧nö̧ ja̧'a̧nä̧ Jesús ttu̧ru̧hua̧ päi'önä ö̧ja̧ pä'ö ttȩmi̧pa̧rö̧ pä'ö ttucuocuomenä u̧huo̧jua̧'a̧ttö̧, 'chi̧nö̧do möä'ca ju'täcara̧'a̧ katä ö̧ja̧ pä'ö.

Jesús ajiya huämoyanä cue'ächinödo

16Täcö ni̧pä̧cho̧mȩnä̧, Jesús u̧huo̧juȩtä̧u̧ duborara̧'a̧ mȩjä̧hui̧nä̧tö̧do. 17Jahuätö huoi'canä pä̧mä̧dö̧, dubora kähuächinätödo Capernaum ötahuiyära̧'a̧ 'chä̧nö̧. Jesús ji̧nä̧ ichoca'a. Täcö yo̧i̧na̧'a̧do. 18Jahuätö tti̧'cho̧mȩnä̧, kä̧ru̧'coppa rö̧ȩnä̧ kä̧ru̧'co̧hui̧na̧'a̧do. Dubora'inä rö̧ȩnä̧ ppahuina'ado. 19Täcö otonänö cinco kilómetros jo̧mȩnä̧ tti̧'cho̧mȩnä̧, Jesús ajiya huämoyanä cue'ächö tö'cönänö ichi'a'a topinätödo. Jahuätömä juiyo ye'ecuinätödo. 20Ja̧'hua̧nö̧ yettecua'a topö, Jesús pä'inödo jahuätörö:

—Ttötäsä. Yecuhuecuätucuä'.

21Ja̧'hua̧nö̧ ja̧'a̧ttö̧ jahuätöcu huoi'canä ö̧'ä̧mä̧da̧ pä'ö eseunu pä'inätödo ja̧u̧ru̧. Chutä ö̧'ä̧mä̧dä̧ji̧ o'ca'a, dubora ji̧jȩcu̧ jurunänö rȩbȩhui̧nä̧tö̧do.

Jesúsru usinätödo ttö̧ja̧mä̧

22Ja̧u̧nu̧ o'ca'a mo̧ro̧, ttö̧ja̧mä̧ dubora ji̧jȩcu̧nä̧ ka̧cui̧pi̧nä̧tö̧mä̧ huoi'ca juiya'a topinätödo. Ju̧huȩnȩmä̧ huoi'ca ji'catetä ji̧na̧'a̧do. Ja̧'hua̧nö̧ ja̧'a̧ttö̧ Jesús u̧huo̧juȩtä̧u̧ juhuä'ca huoi'canä tti̧'chi̧na̧'a̧ huo̧jui̧nä̧tö̧do. Ja̧'hua̧ta̧nö̧ Jesús jahuätöcu i̧'cho̧ca̧'a̧ huo̧jui̧nä̧tö̧do. 23Ja̧'hua̧nö̧ ja̧'a̧nä̧'i̧nä̧ koro huoi'quiyu Tiberias ötahuiyättö ichö, jahuätö ttö̧ja̧ i̧ri̧si̧ Jesús Diosrö ucuocuäji o'ca'a ttucuinome tö'cönänö huä̧mi̧pä̧chi̧nä̧tö̧do. 24Ja̧'hua̧nö̧ ja̧'a̧ttö̧ jahuätö ttö̧ja̧ Jesús'inä, u̧huo̧juȩtä̧u̧'i̧nä̧ tottepa'a tottomenä, ja̧u̧ huoi'quiyunä pä̧mä̧dö̧, Capernaum ötahuiyära̧'a̧ 'chi̧nä̧tö̧do Jesúsru usu.

Kä̧cuä̧huä̧ i̧ri̧si̧ huȩnȩ

25Jahuätö ttö̧ja̧ dubora ji̧jȩcu̧nä̧ tti̧'chi̧'o̧mȩnä̧, Jesúsru po̧cui̧pö̧, jä'epinätödo:

—Huo̧juȩcuä̧ I̧sa̧, ¿ti̧yȩnö̧ cuichäjättö pocumä?

26Jesús pä'inödo jahuätörö:

—Iso päi'önä pä'ösä ucuturu, ucutu sucuhuädi'ätucunä cucuätucu o'ca'a usätöjä ttörö. Ji̧yȩ ttö̧ja̧ ttieru juäi jȩchä̧ji̧ amöcuädömä, usocotöjä ttörö. 27Cuäcuähuä surojuoächä̧cuȩmä̧ a̧mö̧cuä̧rö̧, cuaditätucuä'. Yoröiso surojuoächocömä, kä̧cuä̧huä̧ i'co iyötä, a̧mö̧cuä̧rö̧ aditätucui. Ja̧u̧tä̧ juäi, ttötä, Ubo I̧tti̧mä̧ iyösä ucuturu, Chä'o Dios ttörö ja̧'hua̧nö̧ hueina'attö.

28Ja̧'hua̧ ja̧'a̧ttö̧ ja̧u̧ru̧ jä'epinätödo:

—Diosrö pä̧huä̧ rö̧jö̧ jȩta̧ pä'ö, ¿tta̧'a̧nö̧ jȩtä̧cua̧'a̧jä̧ttö̧?

29Jesús jahuätörö ädätinödo:

—Dios pä̧huä̧ rö̧jä̧cu̧ chutä hueinäcuru cuesetätucua pä'ö.

30Ja̧'hua̧nö̧ päomenä, jä'epinätödo:

—Ujutu topö teseta pä'ö, ¿däje cui̧jȩpä̧cua̧'a̧jä̧ttö̧? ¿Däje jȩcu̧'ä̧cua̧'a̧jä̧ttö̧? 31Ujutu tä̧do̧tö̧ mi̧nä̧ de'anä kä̧nö̧, mo̧ro̧jä̧ra̧'a̧ttö̧ ma̧i̧nä̧si̧ i̧ri̧si̧ cuinätödo Huȩyu̧cuä̧ Huȩnȩ päö'a̧nö̧: “Dios jahuätörö i̧ri̧si̧ mo̧ro̧jä̧ra̧'a̧ttö̧ iyinödo ttucua pä'ö,” —pä'inätödo.

32Jesús jahuätörö ädätö pä'inödo:

—Iso päi'önä pä'ösä ucuturu, Moisésmä ja̧u̧ juäi i̧ri̧si̧ mo̧ro̧jä̧ra̧'a̧ttö̧ iyocö pi̧nö̧do. Chä'otä iso päi'önä i̧ri̧si̧ mo̧ro̧jä̧ra̧'a̧ttö̧ iyö ucuturu. 33I̧ri̧si̧mä̧, Dios iyömä, mo̧ro̧jä̧ra̧'a̧ttö̧ mȩyȩhui̧nö̧do. Ja̧u̧mä̧ pi̧jä̧ ttö̧ja̧rö̧ kä̧cuä̧huä̧ iyö.

34Ja̧'hua̧nö̧ päomenä, Jesúsru pä'inätödo:

—Tu̧ru̧hua̧, ja̧u̧ i̧ri̧si̧ 'cuäopönä iyi ujuturu.

35Jesús pä'inödo jahuätörö:

—Ttötä i̧ri̧si̧mä̧ kä̧cuä̧huä̧ i'co iyömä. Ttörö ichömä, yoröiso ppäi rö̧jo̧co̧cu̧ jä̧cua̧. Ja̧'hua̧ta̧nö̧ ttörö esetömä, yoröiso a̧di̧ rö̧jo̧co̧cu̧ jä̧cua̧. 36Ja̧'hua̧nö̧ ja̧'a̧nä̧ ucuturu pädäji ta'anö, ttörö tocu'ätucua'anä, yoröiso esetocotöjä. 37O'ca toi'önä Chä'o ttörö i̧yä̧u̧mä̧, ttörötä ichätö. Ja̧'hua̧ta̧nö̧ ttörö ichätörömä, yoröiso ya'opö icuocösä. 38Ttötä chamönä pä̧huä̧ rö̧jö̧tä̧ jȩcha̧ pä'ö ichocö pi̧nö̧sä̧ mo̧ro̧jä̧ra̧'a̧ttö̧. Ttörö hue'inörö pä̧huä̧ rö̧jö̧tä̧ jȩcha̧ pä'ö ichinösä. 39Chä'o, ttörö hue'inömä, pä̧huä̧ rö̧jä̧cu̧ o'ca toi'önärö, ttörö iyinä̧u̧ru̧, röji mo̧ro̧ päi'omenä ttodäda pä'ö, ya̧tȩ'i̧nä̧ ire'tehuächö juiyönä. 40Ja̧'hua̧ta̧nö̧ ttörö hue'inömä pä̧huä̧ rö̧jä̧cu̧ o'ca toi'önä Dios I̧tti̧rö̧ topö esetätömä kä̧cuä̧huä̧ i'co ttu̧ju̧nä̧ra̧ pä'ö. Röji mo̧ro̧ päi'omenä, jahuätörö tto̧dä̧dä̧cuä̧u̧, —pä'inödo Jesús.

41Jesús, “Ttötäsä i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧” päomenä, judíos ttö̧ja̧ suronä ttucuocuinäcudo. 42Jahuätö pä'inätödo:

—¿Pidemä, José i̧tti̧ Jesúscö̧? Jä'orö'inä, ja̧ju̧ru̧'i̧nä̧ huo̧juä̧tö̧jä̧ ujutumä. “Mo̧ro̧jä̧ra̧'a̧ttö̧ mȩyȩhui̧nö̧sä̧”, ¿tta̧'a̧nö̧ pä'ö päa'ajä̧ttö̧?

43Ja̧'hua̧ ja̧'a̧ Jesús pä'inödo jahuätörö:

—Suronä cucuocuätucuä'. 44Chä'o, ttörö hue'inömä, i'cächö juiyöttömä, yoröiso ichocotö ttörö. Ttörö ichätörö, röji mo̧ro̧ päi'omenä tto̧dä̧dä̧cua̧sä̧. 45Dios i̧huȩnȩ jiäcuähuä isotö tti̧huȩyu̧ti̧nä̧'tä̧nä̧ pa̧'a̧nö̧ päa'a: “Dios o'ca toi'önärö u̧huo̧juȩtä̧cua̧,” päa'a. Ja̧'hua̧nö̧ ja̧'a̧ttö̧ o'ca toi'önä Chä'orö ä̧ju̧cu̧ huo̧jui̧pä̧tö̧mä̧, ttörö esetö ichätö.

46“Chä'orö topinömä, yoröiso toa'a. Ya̧tȩtä̧ Dios ö̧jo̧mȩttö̧ ichinötä, ja̧u̧ru̧ topinö. 47Iso päi'önä pä'ösä ucuturu, ttörö esetömä, kä̧cuä̧huä̧ i'co ku̧nä̧rö̧. 48Ttötä i̧ri̧si̧mä̧, kä̧cuä̧huä̧ i'co iyömä. 49Ucutu cuä̧do̧tö̧ mi̧nä̧ de'anä kä̧nö̧, mo̧ro̧jä̧ra̧'a̧ttö̧ ma̧i̧nä̧si̧ i̧ri̧si̧ cuinätödo. Ja̧'hua̧nö̧ ttucuomenä'inä hua'ö icuinätödo. 50Ja̧'hua̧nö̧ ja̧'a̧nä̧ koro i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧ pä'ösä ttö. Ja̧u̧ i̧ri̧si̧ttö̧ cumä, yoröiso hua'ocödo. 51Ttötäsä ja̧u̧ kä̧cuä̧huä̧ i'co i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧. Pi̧yȩ i̧ri̧si̧ttö̧ cumä, 'cuäopönä ö̧jä̧cua̧. Ja̧u̧ i̧ri̧si̧ chiyömä, ttötä chidepä chi̧yä̧huä̧cua̧sä̧. Pi̧jä̧ ttö̧ja̧ ttö̧ja̧cua̧ pä'ö chi̧yä̧huä̧cua̧sä̧, —pä'inödo Jesús.

52Ja̧'hua̧ ja̧'a̧ttö̧ judíos ttö̧ja̧ ttamönä ucuocuäcuäu, pä'inätödo:

—Pidemä chutä idepämä, ¿tta̧'a̧nö̧ pä'ö iyäcua'ajä̧ttö̧ ujuturu tucua pä'ö?

53Jesús ädätö pä'inödo:

—Iso päi'önä pä'ösä ucuturu, ucutumä Ubo I̧tti̧ idepättö'inä cucuätucu juiyöttömä, ucuojattö'inä cuahuätucu juiyöttömä, yoröiso kä̧cuä̧huä̧ i'co jui'ätöjä. 54Ttötä chidepättö'inä cumä, chucuojattö'inä aumä, ja̧u̧tä̧ kä̧cuä̧huä i'co ku̧nä̧rö̧. Ja̧'hua̧ta̧nö̧ ja̧u̧ru̧ röji mo̧ro̧ päi'omenä tto̧dä̧dä̧cua̧sä̧. 55Ttö chidepämä iso päi'önä cuäcuähuä. Ja̧'hua̧ta̧nö̧ ttötä chucuojamä iso päi'önä ahuähuä. 56Ttötä chidepättö'inä cumä, chucuojattö'inä aumä, ttöcu eseunu kö. Ttö'inä ja̧u̧cu̧ eseunu kö̧sä̧. 57Chä'o, ttörö hue'inömä, kä̧cuä̧huä̧ i'co iyö. Ja̧'hua̧ta̧nö̧ chutä ö̧ja̧'a̧ttö̧, ttö'inä kö̧sä̧. Ja̧'hua̧ta̧nö̧ ya̧tȩ ttö chidepättö cumä, ö̧jä̧cua̧ ttö chö̧ja̧'a̧ttö̧. 58Ttö i̧ri̧si̧ mo̧ro̧jä̧ra̧'a̧ttö̧ mȩyȩhui̧nö̧mä̧ pä'ösä. Ucutu cuä̧do̧tö̧ mi̧nä̧ de'anä kä̧nö̧, i̧ri̧si̧ ttucuinä̧si̧'a̧nö̧mä̧ pä'ocösä. Ja̧u̧ i̧ri̧si̧ttö̧ ttucuomenä, o'ca toi'önä hua'ö icuinätödo. Ttö pädäjittö cumä, 'cuäopönä ö̧jä̧cua̧, —pä'inödo Jesús.

59Jesús pi̧yȩ huȩnȩ Capernaum ötahuiyättö judíos ttö̧ja̧ ttu̧huo̧jui̧'i̧nodenä huo̧juȩti̧nö̧do.

Kä̧cuä̧huä̧ i'co huȩnȩ

60Pi̧yȩ huȩnȩ ä̧ju̧cu̧, recuätö Jesús o'ca'anä cue'ächätö pä'inätödo:

—Jitä päjimä tesetö juiyö'a̧nö̧ ja̧'a̧to. ¿Dijä ja̧'hua̧nö̧ jȩä̧cua̧mä̧?

61Ja̧'hua̧ ja̧'a̧ jahuätö ja̧'hua̧nö̧ ttucuocuäcuähua'a huo̧jui̧'ö̧, Jesús jä'epinödo:

—Jitä pädäjimä, ¿suronä pä'äjisä tä̧ji̧, ucuturu? 62Ubo I̧tti̧ pä'äji ö̧ji̧na̧'a̧ cä'ecuächö tocu'ätucuttumä, ¿tta̧'a̧nö̧ päcuhuätucuäcua'ajä̧ttö̧? 63Iso päi'önä Espíritu Santotä ta̧'cua̧rö̧ iyömä. Tidepämä yoröiso micuähuoca'a. Pi̧yȩ jidähuäjimä, iso päi'önä huȩnȩ ja̧'a̧. Ja̧'hua̧ta̧nö̧ jidähuäjimä kä̧cuä̧huä̧ i'co iyö. 64Ja̧'hua̧nö̧ ja̧'a̧nä̧ ji̧nä̧ korotömä ucututtu esetocotöjä.

Jesús ja̧'hua̧nö̧ ucuocuäji ä'canä, jahuätö esetocotörö huo̧jui̧nö̧do. Ja̧'hua̧ta̧nö̧ ja̧u̧ru̧ suronä jȩpä̧tö̧rö̧ iyä̧cua̧rö̧'i̧nä̧ huo̧jui̧nö̧do. 65Chutä pä'inödo:

—Ja̧'hua̧nö̧ ja̧'a̧ttö̧ ucuturu pä'äjisä, Chä'o i'cächö juiyöttömä, ttörö yoröiso ichocotödo.

66Ja̧'hua̧nö̧ päomenä, recuätö o'ca'anä cue'ächäjätömä, ja̧u̧ru̧ jaropi'inätödo. Juhua'a yabonö cue'ächocotö pi̧nä̧tö̧do Jesúscu. 67Ja̧'hua̧ ja̧'a̧ttö̧ Jesús u̧huo̧juȩtä̧u̧ru̧, ttö̧jä̧pö̧ttö̧nö̧ ta̧ju̧nu̧ huotörö, pä'inödo:

—¿Ucutu'inä jarocu'ipätucua pä'ätöjä tä̧ji̧?

68Simón Pedro ädätö pä'inödo:

—Tu̧ru̧hua̧, ucuru jaroti'öttömä, ¿dirö tesetäcua'ajä̧ttö̧? Ucutä kä̧cuä̧huä̧ i'co huȩnȩ huo̧juȩtö̧jä̧. 69Ujutu täcö esetinätöjä. Ucumä Dios kö̧ I̧tti̧ Cristojä, huo̧juä̧tö̧jä̧ ujutumä.

70Jesús ja̧u̧ru̧ ädätinödo:

—Ucuturu ttö̧jä̧pö̧ttö̧nö̧ ta̧ju̧ru̧, ¿ttötä o'ipocö pi̧nö̧sä̧ tä̧ji̧? Ja̧'hua̧nö̧ ja̧'a̧nä̧ ucututtu ya̧tȩ ähuettärö ku̧nä̧rö̧ ami iso'quinä.

71Ja̧'hua̧nö̧ päomenä, Simón i̧tti̧rö̧, Judas Iscarioterö, ucuocuinödo. Ja̧u̧mä̧ u̧huo̧juȩtä̧u̧ ttö̧jä̧pö̧ttö̧nö̧ ta̧ju̧nu̧ huotö ja̧'a̧nä̧, Jesúsru suronä jȩpä̧tö̧rö̧ i̧yä̧cua̧ ji̧nö̧do.

Currently Selected:

San Juan 6: PIDNT86

Highlight

Copy