San Juan 5

Jesús ya̧tȩ cue'ächocörö aditö icuinö huȩnȩ

1Ja̧u̧ 'cuäopäji o'ca'a, judíos ttö̧ja̧ koro fiesta jȩpi̧nä̧tö̧do. Ja̧u̧nu̧mä̧ Jesús Jerusalén ötahuiyära̧'a̧ ppa̧'ä̧chä̧chi̧nö̧do. 2Ja̧u̧ ötahuiyänä, äpate Ovejas pä'ö micuinate tö'cö, ajiya reju a̧cui̧na̧'a̧do. Juhua'a reju iso'u i̧mi̧mä̧ hebreos tti̧huȩnȩnä̧ Betesda pä'ö mi̧cui̧na̧'a̧do. Ja̧'hua̧ta̧nö̧ iso'u jäyänä u̧mi̧ i̧so̧ca̧ ji̧mö̧tȩ jähuä jo̧mȩnä̧ ji̧na̧'a̧do. 3Ju̧huȩnȩ iso'u jäyänä i̧so̧ca̧nä̧ recuätö na̧'ä̧chä̧tö̧'i̧nä̧, ä̧to̧cä̧tö̧'i̧nä̧, cue'ächocotö'inä, 'cuä'ätö'inä rö̧ji̧nä̧tö̧do iso'u yuhuecua'a to̧pä̧rö̧. 4Ja̧u̧nu̧ pä̧nä̧ koronö'inä, koronö'inä ya̧tȩ ángel ja̧u̧ iso'unä i̧mȩyȩhuo̧mȩnä̧, ajiya yuhuecuina'ado. Ajiya ja̧'hua̧nö̧ yuhuecuomenä, iso'u jacuotonä äcuomenä ma̧'ä̧chi̧nö̧mä̧ adiu pi̧'i̧nö̧do na̧huä̧chi̧nö̧mä̧. 5Ju̧huȩnȩmä̧ ya̧tȩ treinta y ocho a̧'ȩ jo̧mȩnä̧ na̧'ä̧chi̧nö̧mä̧ tta̧'ä̧ri̧nö̧do. 6Jesús ja̧u̧ ö̧ra̧'a̧ tomenä, ja̧'hua̧nö̧ recuo na̧huä̧chi̧nö̧ huo̧jui̧nö̧do. Ja̧u̧ru̧ jä'epinödo:

—¿Aditö chicuacu pä'öjä tä̧ji̧?

7Ja̧u̧ na̧'ä̧chi̧nö̧ ädätinödo:

—Chu̧ru̧hua̧, iso'unä ajiya yuhuecuomenä, ttörö ppä'ädömä yoröiso to̧'a̧sä̧ jacuoto ma̧dä̧cha̧ pä'ö. 'Cuäopönä ka̧ra̧tä̧ chä'canä ma̧'ä̧chö̧.

8Ja̧'hua̧ ja̧'a̧ttö̧ ja̧u̧ru̧ pä'inödo Jesús:

—Ä̧rä̧mi̧'i̧. Cu̧rä̧sa̧mä̧ ȩmi̧pö̧ täi.

9Yotäcu Jesús ja̧'hua̧nö̧ päomenä, ja̧u̧ ubomä adiu päi'inäcudo. Ö̧rä̧sa̧ ȩmi̧pö̧ cue'ächinödo. Ja̧'hua̧nö̧ 'cuäopomenä, ttö̧ja̧ 'cuättächi'ö mo̧ro̧ ji̧na̧'a̧do. 10Ja̧'hua̧nö̧ ja̧'a̧ttö̧ judíos ttö̧ja̧ pä'inätödo ja̧u̧ru̧, Jesús aditö icuäjäcuru:

—Jitä mo̧ro̧, ttö̧ja̧ 'cuättächi'ö mo̧ro̧. Cu̧rä̧sa̧ cuȩpö̧ juiyö'a̧nö̧ ja̧'a̧.

11Ja̧u̧mä̧ ädätinödo:

—Ttö na̧dä̧chä̧ji̧ aditö icuäjimä pä'äji ttörö: “Cu̧rä̧sa̧ ȩmi̧pö̧ täi.”

12Ja̧'hua̧nö̧ päomenä, jä'epinätödo:

—“Cu̧rä̧sa̧ ȩmi̧pö̧ täi” ucuru hue'äjimä ¿dijä̧ttö̧?

13Ja̧u̧ ubomä ja̧u̧ru̧ aditö icuäjirö jerupinödo: ttö̧ja̧ ttirecuina'attö. Ja̧'hua̧ta̧nö̧ ja̧u̧ru̧ aditö icuäji'ca̧, Jesús kara'a 'chä̧nö̧ rä'opächö 'chi̧nö̧do. 14Ja̧u̧nu̧ o'ca'a, Jesús ja̧u̧ uborö Diosrö ucuocuäcuähuodenä topinödo. Ja̧u̧ru̧ pä'inödo:

—Ä̧ju̧cui̧. Täcö na̧cu̧huä̧chä̧ji̧ttö̧ cu̧'i̧pä̧ji̧ o'ca'a, pä'äji ta'anö suronämä jȩcu̧'ä̧', pä'äji na̧cu̧huä̧chi̧nö̧ttö̧'i̧nä̧ abonänö rö̧ȩnä̧ na̧cu̧huä̧cha̧'a̧cu̧.

15Jesús ja̧'hua̧nö̧ päomenä, ja̧u̧ ubomä judíos ttö̧ja̧rö̧ ji'äu 'chi̧nö̧do. Jahuätörö pä'inödo:

—Jesús pä'ö mi̧cua̧ ttörö aditö icuäji.

16Ja̧'hua̧nö̧ ja̧'a̧ttö̧ judíos ttö̧ja̧ ra̧huä̧rö̧ usinätödo Jesúsru cuä'ö tticua pä'ö, ja̧'hua̧nö̧ jö̧mä̧ ttö̧ja̧ 'cuättächi'ö mo̧ro̧ jȩa̧'a̧ttö̧. 17Ja̧'hua̧ ja̧'a̧ttö̧ Jesús pä'inödo jahuätörö:

—Ttö Chä'o jitä mo̧ro̧ päi'önä aditö. Ttö'inä jitä aditösä.

18Ja̧'hua̧nö̧ ja̧'a̧ttö̧ judíos ttö̧ja̧ ji̧nä̧ isocu cuä'ö tticua pä'inätödo Jesúsru. Jahuätö pä'inätödo:

—Ja̧u̧ ttö̧ja̧ 'cuättächi'ö mo̧ro̧ hueähuämä amöcuädocö. Ja̧'hua̧ta̧nö̧ Jä'o Diosrö ucuocuomenä, Dioscu yoräteunä hua̧sä̧ pä'ö, —pä'inätödo jahuätö judíos ttö̧ja̧.

Dios I̧tti̧ ujuru huȩnȩ

19Ja̧'hua̧ ja̧'a̧ttö̧ Jesús pä'inödo jahuätörö:

—Iso päi'önä pä'ösä ucuturu, Dios I̧tti̧ chutä amönä amöcuädömä, yoröiso jȩpo̧cö̧. Chutä Jä'o jȩö̧ tomenä, ja̧u̧ juäi jȩpö̧ chu'inä. O'ca juiyönä Jä'o jȩö̧mä̧, I̧tti̧'i̧nä̧ ja̧'hua̧ta̧nö̧ jȩpö̧. 20Ja̧'hua̧nö̧ ja̧'a̧nä̧ Jä'omä I̧tti̧rö̧ repe'ö. Ja̧'hua̧ta̧nö̧ o'ca juiyönä jȩö̧mä̧, i̧jȩpö̧ I̧tti̧rö̧. Koro juäi'inä, pi̧yȩttö̧'i̧nä̧ abonänö adihuä juäi i̧jȩpä̧cua̧. Ucutu ja̧u̧ juäi tocu'ätucuomenä, nö̧'ä̧chö̧ to̧cu̧'ä̧rä̧cuo̧tö̧jä̧. 21Jä'o'inä 'corupätti'omettö kä̧cuä̧huä̧ iyö ttoädö'a̧nö̧, I̧tti̧'i̧nä̧ churutä pä̧huä̧ rö̧jä̧u̧ru̧ kä̧cuä̧huä̧ i'co iyö. 22-23Ja̧'hua̧ta̧nö̧ Jä'omä ttö̧ja̧rö̧: “Ucu adiu jȩpö̧jä̧”, “Ucu suronä jȩpö̧jä̧” pä'ocö. I̧tti̧rö̧tä̧ hue'inö ujurunä: “Ucu adiu jȩpö̧jä̧”, “Ucu suronä jȩpö̧jä̧” päa pä'ö, o'ca toi'önä Jä'o Diosrö ttucuotö'a̧nö̧, I̧tti̧rö̧'i̧nä̧ ttucuotäcua'a̧nö̧. Ya̧tȩ Dios I̧tti̧rö̧ ucuotocömä, Jä'orö'inä, I̧tti̧rö̧ hueinäcuru, ucuotocö.

24“Iso päi'önä pä'ösä ucuturu, ttö pädö ä̧ju̧cu̧'inä̧, ttörö hue'inörö esetö'inä, kä̧cuä̧huä̧ i'co ku̧nä̧rö̧. Ja̧u̧ru̧ tä̧bo̧cuä̧mä̧ 'cuäopoca'a jä̧cua̧. Ja̧u̧mä̧ 'corupä'i'ätö jä̧'i̧nö̧'a̧nö̧ ja̧'a̧nä̧, jitä 'corupä'i'ocö, kä̧cuä̧huä̧ i'co u̧ju̧nä̧ra̧'a̧ttö̧. 25Iso päi'önä pä'ösä ucuturu, 'corupä'i'inätömä Dios I̧tti̧ i̧huȩnȩ ttä̧ju̧cu̧nä̧ päi'äcua'a. Ttö ja̧u̧mä̧ jitä ja̧'a̧ pä'ösä. Ja̧u̧ru̧ adiu ä̧ju̧cuä̧tö̧mä̧ ttö̧ja̧cuä̧cuo̧tö̧. 26Chutä Jä'o tta̧'cua̧rö̧ iyähuänä ju̧ru̧hua̧. Ja̧'hua̧ta̧nö̧ ja̧u̧ ujuru iyinö I̧tti̧rö̧, ja̧u̧'i̧nä̧ tta̧'cua̧rö̧ iya pä'ö. 27Ja̧'hua̧ta̧nö̧ Ubo I̧tti̧ ja̧'a̧ttö̧, ja̧u̧ru̧ iyinö ujuru ttö̧ja̧rö̧: “Ucu adiu jȩpö̧jä̧”, “Ucu suronä jȩpö̧jä̧” huo̧ju̧nä̧ päa pä'ö. 28Ja̧'hua̧nö̧ jidähuomenä, to̧cu̧'ä̧rä̧tu̧cuä̧'. Yodoji mo̧ro̧ o'ca toi'önä 'corupä'i'inätö i̧huȩnȩ ttä̧ju̧cu̧ mo̧ro̧ päi'äcua'a. 29I̧huȩnȩ ttä̧ju̧cuo̧mȩnä̧, 'corupätti'inomettö rättopächäcuotö. Adiu jȩpi̧nä̧tö̧mä̧, kä̧cuä̧huä̧ i'co ttu̧ju̧nä̧ra̧ pä'ö ttottächäcuotö. Ja̧'hua̧nö̧ ja̧'a̧nä̧ suronä jȩpi̧nä̧tö̧mä̧, tä̧bo̧cuä̧nä̧ 'cuättopa pä'ö ttottächäcuotö, —pä'inödo Jesús.

Jesús churutä tu̧huo̧jua̧ pä'ö huo̧juȩti̧nö̧do

30Juhua'a yabonö pä'inödo Jesús:

—Ttötä chamönä chamöcuädomenä, yoröiso jȩpo̧cö̧sä̧. Ttörö hueö'a̧nö̧ pä'ösä. Ja̧'hua̧ta̧nö̧ adiunätä pä'ösä. Ttörötä pä̧huä̧ rö̧jö̧tä̧ jȩcha̧ pä'ocösä. Chä'o, ttörö hue'inörö pä̧huä̧ rö̧jö̧tä̧ jȩcha̧ pä'ösä. 31Ttötä chamönä adiu chucuocuäuttumä, yoröiso micuähuocö ja̧u̧mä̧. 32Ja̧'hua̧nö̧ ja̧'a̧nä̧ ka̧ra̧ kö̧, ttörö adiu ucuocumä. Ja̧u̧ ttörö ucuocuomenä, adiu micuähua'a huo̧jua̧sä̧. 33Ucutumä Juanrö jä'epö ä̧ju̧cui̧nä̧tö̧jä̧. Ja̧u̧ iso päi'önä huȩnȩ ädätinödo ucuturu. 34Ja̧'hua̧nö̧ ja̧'a̧nä̧ ya̧tȩ pi̧jä̧ ttö̧ja̧ i̧sa̧ ttörö adiu ucuocua pä'ö tta̧'ä̧ro̧cö̧sä̧. Pi̧yȩtä̧ pä'ösä ucuturu, cuesetätucua pä'ö. 35Juan koro lámpara adiu cuo'ö tȩa̧hua̧'a̧ jä̧'i̧nö̧'a̧nö̧ ki̧nö̧do. Ucutumä ja̧u̧ tȩa̧u̧nä̧ beometä eseunu cu̧ja̧cuä̧tu̧cua̧ pä'inätöjä. 36Koro Juan jiähuinöttö'inä abonänö adihuä juäi ku̧nä̧rö̧sä̧, ttörö cuesetätucua pä'ö. O'ca juiyönä jȩchö̧mä̧, Chä'o hueinäcusä ja̧u̧ jȩcha̧ pä'ö. Ja̧u̧ juäi topö cu̧huo̧juä̧tu̧cuä̧cua̧'a̧nö̧ Chä'o hueinäcusä. 37Chä'o'inä, ttörö hue'inömä, ttörö cuesetätucua pä'ö ucuocu. Ucutu ja̧u̧ i̧huȩnȩmä̧ yoröiso ä̧ju̧cuo̧co̧tö̧jä̧. Ja̧'hua̧ta̧nö̧ ja̧u̧ru̧ yoröiso topocotöjä. 38Ucutumä Chä'o hueinäcuru cuesetätucuoca'attö, chutä i̧huȩnȩ 'cucuächi'oca'a ä̧ju̧cui̧nä̧tö̧jä̧. 39Ucutumä ttu̧ȩcuä̧nä̧ ucuocuätöjä Huȩyu̧cuä̧ Huȩnȩ. Ja̧'hua̧nö̧ ucuocu, kä̧cuä̧huä̧ i'co cu̧'o̧cui̧'ä̧tu̧cua̧ pä'ätöjä. Ja̧'hua̧nö̧ ja̧'a̧nä̧ Huȩyu̧cuä̧ Huȩnȩ ttörötä päa'a. 40Ja̧'hua̧nö̧ ja̧'a̧nä̧ ucutumä ttörö cuesetätucua pä'ocotöjä, ja̧u̧ kä̧cuä̧huä̧ i'co cu̧ju̧nä̧rä̧tu̧cua̧ pä'ö.

41“Pi̧jä̧ ttö̧ja̧ ttörö adiunä ttucuocua pä'ö pä'ocösä. 42Ucuturu huo̧jua̧sä̧. Ucutu Diosrö repecuhuätucuoca'a huo̧jua̧sä̧. 43Ttö Chä'o hueäcu ichinösä. Ttörö kö'cocotöjä ucutumä. Ja̧'hua̧nö̧ ja̧'a̧nä̧ ka̧ra̧tä̧ chutä amönä amöcuädäu jȩpö̧ ichöttömä, ja̧u̧ru̧ kö'cajatöjä. 44Ucutu pi̧jä̧ ttö̧ja̧ ttucuocutä usu, Dios chu ä̧cua̧tä̧ i̧huȩnȩ cusätucuoca'anä, ¿tta̧'a̧nö̧ pä'ö cuesetätucua'ajä̧ttö̧? 45Ja̧u̧mä̧ Jä'o ä'ca jo̧mȩttö̧ ujuturu suronä ji̧ä̧huä̧cua̧ pä'ö cuamöcuädätucuättö. Moiséstä, ucutu cuesetätucutä, ucuturu suronä ji̧ä̧huä̧cua̧. 46Ucutumä, Moisés päinö cuesetätucuttumä, ttörö'inä esetajatöjä. Chutä Moisés ttörötä huȩyu̧ti̧nö̧do. 47Ja̧'hua̧nö̧ ja̧'a̧nä̧ ja̧u̧ i̧huȩyu̧ti̧nö̧ cuesetätucu juiyöttömä, ttö pädömä ¿tta̧'a̧nö̧ pä'ö cuesetätucua'ajä̧ttö̧? —pä'ö huo̧juȩti̧nö̧do Jesús.

Currently Selected:

San Juan 5: PIDNT86

Highlight

Copy