San Juan 21

Jesús ko̧ro̧mö̧ttö̧nö̧ ta̧ju̧nu̧ u̧huo̧juȩtä̧u̧ru̧ i̧jȩcui̧nö̧ huȩnȩ

1Ja̧u̧nu̧ o'ca'a, pä'äji ta'anö Jesús i̧jȩcui̧nö̧do u̧huo̧juȩtä̧u̧ru̧ Tiberias dubora jäyora ttö̧ja̧cua̧'a̧. Pa̧'a̧nö̧ i̧jȩcui̧na̧'a̧do: 2Ju̧huȩnȩ ka̧cui̧nä̧tö̧do Simón Pedro'inä, Tomás, Ta̧ju̧hui̧nö̧ pättinäcumä'inä, Natanael, Caná ötahuiyä Galilea rȩjȩ i̧sa̧'i̧nä̧, Zebedeo i̧tti̧mö̧'i̧nä̧, korotö ta̧ju̧ Jesús u̧huo̧juȩtä̧u̧ttu̧'i̧nä̧ ka̧cui̧nä̧tö̧do. 3Ju̧huȩnȩ ttö̧ja̧cua̧'a̧nä̧, Simón Pedro pä'inödo:

—Po̧i̧rö̧ 'cho'ö 'chö̧sä̧.

Jahuätö ädätinätödo:

—Ujutu'inä ichätöjä ucucu.

Po̧i̧rö̧ 'cho'ö 'chä̧nö̧, huoi'canä pä̧mä̧di̧nä̧tö̧do. Ja̧u̧nu̧ yodomä, yoröiso 'cho'ocotö pi̧nä̧tö̧do. 4Pä'ötä mo̧ro̧ päi'a'a, dubora jäyora ichinödo Jesús. Ja̧'hua̧nö̧ ja̧'a̧nä̧ u̧huo̧juȩtä̧u̧mä̧ ja̧u̧ru̧ jerupinätödo. 5Ja̧'hua̧ ja̧'a̧ttö̧ Jesús pä'inödo jahuätörö:

—Möäyotö, ¿yoröiso 'cho'ocotö päjätöjä tä̧ji̧?

Jahuätö ttädätinäcudo:

—Yoröiso 'cho'ocotöjä.

6Ja̧'hua̧ ja̧'a̧ttö̧ Jesús päinä̧u̧do:

—Cu̧huo̧juä̧tu̧cua̧'a̧nä̧ icuätucui ma'ayämä. Juhua'a 'chocuhuäcuotöjä.

Päji ta'anö jȩtto̧mȩnä̧, po̧i̧ rö̧ȩnä̧ ttȩji̧pä̧ja̧'a̧ttö̧, yoröiso cättepö juiyönä ji̧na̧'a̧do. 7Ja̧'hua̧nö̧ ja̧'a̧ttö̧ ya̧tȩ u̧huo̧juȩtä̧u̧ttu̧ i̧sa̧, Jesús rö̧ȩnä̧ repeäcumä, pä'inödo Pedrorö:

—¡Ja̧u̧mä̧ Tu̧ru̧hua̧do!

Pedro po̧i̧rö̧ 'chottomenä, ö̧'ca̧tä̧huä̧ta̧ huäme i̧sä̧ta̧ ko̧'ä̧dä̧cuä̧u̧ icuinödo. A̧hua̧ru̧hua̧ ja̧'hua̧nö̧ päa'a ä̧ju̧cu̧, ö̧'ca̧tä̧huä̧ta̧ 'ca̧tä̧huo̧po̧'ö̧, duboranä tö'inödo jäyotocu i̧'cha̧ pä'ö. 8Korotö u̧huo̧juȩtä̧u̧mä̧ ma'ayä po̧i̧ rö̧ȩnä̧ ttȩja̧'a̧ttö̧, jacuotonä do'ö rȩba̧cu̧ 'chi̧nä̧tö̧do huoi'canä. Ja̧'hua̧nö̧ 'chottomenä, jäyotottö tö'cönänö ka̧cui̧nä̧tö̧do. 9Jäyotocu tti̧'chi̧'o̧mȩnä̧, ocu i̧sa̧ri̧ cuoa'a topinätödo. Ja̧'hua̧ta̧nö̧ ocuränä po̧i̧ dahua'a'inä, ocurä jäyä i̧ri̧si̧ pa̧'a̧'i̧nä̧ topinätödo. 10Jesús pä'inödo jahuätörö:

—Po̧i̧ 'chocuhuätucuä̧u̧ttu̧ i'cächätucui.

11Ja̧'hua̧nö̧ ja̧'a̧ttö̧ Simón Pedro huoi'canä 'cha'ächi'ö, rȩba̧cu̧ do'inödo ma'ayä po̧i̧ bärepätö ttȩja̧'a̧. Jahuätö ciento cincuenta y tres jo̧mȩnä̧ po̧i̧ ȩji̧pi̧nä̧tö̧do. Ja̧'hua̧ta̧nö̧ ja̧'hua̧nö̧ rö̧ȩnä̧ ttȩji̧po̧mȩnä̧'i̧nä̧, ma'ayä serächi'oca'a ji̧na̧'a̧do. 12Ja̧'hua̧ ja̧'a̧ Jesús pä'inödo jahuätörö:

—Cu̧cuȩ cucuätucua ichätucui.

Jahuätö u̧huo̧juȩtä̧u̧mä̧, pidemä dijä̧ttö̧ pä'ö yoröiso jä'epocotö pi̧nä̧tö̧do. Ja̧u̧mä̧ Tu̧ru̧hua̧ ja̧'a̧ pä'ö huo̧jui̧nä̧tö̧do o'ca toi'önä. 13Ja̧u̧nu̧ o'ca'a Jesús tö'cönänö 'chä̧hui̧'ö̧, i̧ri̧si̧ u̧mö̧nä̧ 'chu̧'ä̧rö̧, iyinödo jahuätörö. Ja̧'hua̧ta̧nö̧ po̧i̧'i̧nä̧ 'chu̧'ä̧rö̧, iyinödo.

14Ja̧'hua̧nö̧ jȩo̧mȩnä̧, 'corupäi'äja'attö tto'ächäji'ca̧mä̧, huäbodäcuänä päi'önä i̧jȩcui̧nö̧do u̧huo̧juȩtä̧u̧ru̧.

Jesús Simón Pedrorö ucuocuinö huȩnȩ

15Ttu̧cuȩ ttucuäji o'ca'a, Jesús jä'epinödo Simón Pedrorö:

—Simón, Jonás i̧tti̧, ¿pitöttö'inä abonänö ttörö repe'öjä tä̧ji̧?

Pedro ja̧u̧ru̧ ädätinödo:

—A̧'a̧, Chu̧ru̧hua̧. Ucuru repe'ösä huo̧jua̧jä̧.

Ja̧'hua̧nö̧ päomenä, Jesús pä'inödo ja̧u̧ru̧:

—Ja̧u̧ttu̧mä̧, ya̧tȩ o̧vȩja̧stö̧ tti̧tti̧mö̧rö̧ tta̧huä̧ra̧'a̧ jä̧'i̧nö̧'a̧nö̧, tta̧'ä̧ri̧ ttörö esetätörö.

16Pä'äji ta'anö todärenä jä'epinödo Jesús:

—Simón, Jonás i̧tti̧, ¿ttörö repe'öjä tä̧ji̧?

Pedro ja̧u̧ru̧ ädätinödo:

—A̧'a̧, Chu̧ru̧hua̧. Ucuru repe'ösä huo̧jua̧jä̧.

Ja̧'hua̧ ja̧'a̧ pä'inödo ja̧u̧ru̧:

—Ja̧u̧ttu̧mä̧, ya̧tȩ o̧vȩja̧stö̧ tta̧huä̧ra̧'a̧ jä̧'i̧nö̧'a̧nö̧, tta̧'ä̧ri̧ ttörö esetätörö.

17Ja̧'hua̧ta̧nö̧ pä'äji ta'anö huäbodäcuänä päi'önä jä'epinödo:

—Simón, Jonás i̧tti̧, ¿ttörö repe'öjä tä̧ji̧?

Ja̧'hua̧ ja̧'a̧ttö̧ huäbodäcuänä ja̧u̧tä̧ juäi jäepäcu, Pedro a̧'cua̧ tta̧'ȩcu̧ pä'inödo Jesúsru:

—Chu̧ru̧hua̧, ucu o'ca juiyönä huo̧jua̧jä̧. Ucuru repeda'a huo̧jua̧jä̧.

Ja̧'hua̧ ja̧'a̧ Jesús pä'inödo ja̧u̧ru̧:

—Ja̧u̧ttu̧mä̧, ya̧tȩ o̧vȩja̧stö̧ tta̧huä̧ra̧'a̧ jä̧'i̧nö̧'a̧nö̧, tta̧'ä̧ri̧ ttörö esetätörö. 18Iso päi'önä pä'ösä ucuru, mö̧ä̧ya̧ cu̧jä̧i̧, ucurutä pä̧huä̧ rö̧jo̧mȩnä̧ 'ca̧tä̧hui̧nö̧jä̧ cu̧'ca̧tä̧huä̧ta̧. Ja̧'hua̧ta̧nö̧ ucurutä pä̧huä̧ rö̧jo̧mȩnä̧ cue'ächinöjä. Ja̧'hua̧nö̧ ja̧'a̧nä̧ bö̧o̧ i̧sa̧ juocuhuächomenä, cujo cä̧cu̧huȩpä̧cua̧jä̧. Ja̧'hua̧ta̧nö̧ ka̧ra̧ ö̧'ca̧tä̧cua̧ ucuru. Ja̧'hua̧ta̧nö̧ ucuru pä̧huä̧ rö̧jo̧ca̧'a̧nä̧, churutä pä̧huä̧ rö̧jo̧mȩnä̧ ȩpä̧cua̧jä̧.

19Ja̧'hua̧nö̧ päomenä, Jesús ji'ähuinödo jahuätörö Pedro 'corupäi'ä̧cuȩ huȩnȩ. Ja̧'hua̧ta̧nö̧ ja̧'hua̧nö̧ 'corujuoächomenä, korotö Dios öadihuä tottäcua'a pä'ö ji'ähuinödo Jesús. Ja̧u̧nu̧ o'ca'a pä'inödo Pedrorö:

—¡Ttöcu cue'ächi!

Ya̧tȩ u̧huo̧juȩtä̧u̧ttu̧ i̧sa̧rö̧ repeinö huȩnȩ

20Jesús ja̧'hua̧nö̧ jiähuäji o'ca'a, Pedro kärächi'ö, ka̧ra̧rö̧ topinödo tto'ca'anä cue'ächörö. Ja̧u̧mä̧ Jesús rö̧ȩnä̧ repeäcu pi̧nö̧do. Ja̧'hua̧ta̧nö̧ pä'äji ttu̧cuȩ ttucuomenä, Jesús ippeyänä pä̧nö̧, jä'epinödo: “Chu̧ru̧hua̧, ¿dijä̧ttö̧ ucuru suronä jȩpä̧tö̧rö̧ i̧yä̧cua̧mä̧?” 21Ja̧'hua̧ ja̧'a̧ttö̧ Pedro ja̧u̧ru̧ tomenä, Jesúsru jä'epinödo:

—Chu̧ru̧hua̧, piderömä, ¿tta̧'a̧nö̧ päi'äcua'ajä̧ttö̧ ja̧u̧ru̧?

22Jesús ja̧u̧ru̧ ädätinödo:

—Pä'äji ta'anö chichome jubö päi'önä ö̧ja̧ pä'ö pädöttömä, ¿ucurumä suroja'a tä̧ji̧? Ucutä ttöcu cue'ächi.

23Jesús ja̧'hua̧nö̧ päomenä, Jesús u̧huo̧juȩtä̧u̧mä̧ ja̧u̧mä̧ yoröiso 'corupä'i'ocö jä̧cua̧ pä'ö ucuocuinätödo. Ja̧'hua̧nö̧ ja̧'a̧nä̧ Jesúsmä, ja̧u̧mä̧ yoröiso 'corupä'i'ocö jä̧cua̧ pä'ocö pi̧nö̧do. Chutä Jesús pä'inödo: “Pä'äji ta'anö chichome jubö päi'önä ö̧ja̧ pä'ö pädöttömä, ¿ucurumä suroja'a tä̧ji̧?”

24Ja̧u̧tä̧ Jesús u̧huo̧juȩtä̧u̧ i̧sa̧ pi̧yȩ o'ca juiyönä ji'ähuinödo. Ja̧'hua̧ta̧nö̧ pi̧yȩ o'ca juiyönä huȩyu̧ti̧nö̧do. Ja̧'hua̧ta̧nö̧ ujutu huo̧juä̧tö̧jä̧ ja̧u̧mä̧ iso päi'önä huȩnȩ ji'ähuinödo.

25Ja̧'hua̧ta̧nö̧ koro Jesús jȩi̧nö̧ huȩnȩ rö̧ȩnä̧ ka̧'a̧. O'ca juiyönä koro'inä, koro'inä tti̧huȩyu̧tu̧ttu̧mä̧, pi̧jä̧nä̧ o'ca juiyönä yoröiso pa̧ja̧cuä̧cho̧ca̧'a̧ a̧'cua̧ra̧'a̧ ja̧u̧ juäi cuyäru. Amén.

Currently Selected:

San Juan 21: PIDNT86

Highlight

Copy