San Mateo 22
22
Ya̧tȩ ü'käwinü̧ pä'kärinä̧ wȩnȩtü̧ ji'äwinü̧
(Lc 14.15-24)
1Pä'äjita'anü̧ Jesú-mä̧ wȩnȩtä̧rü̧tä̧ jiäwinä̧u̧:
2Mo̧ro̧jä̧ Ru̧wa̧ weomȩmä̧ ya̧tȩ ru̧wa̧ rey i̧tti̧ ü'käu pä'käri jȩi̧nü̧'a̧nü̧ ja̧'a̧. 3Jua̧u̧mä̧ u̧mü̧wä̧yotürü we'inü̧ ä̧tȩpä̧jä̧u̧ru̧ pä'kärira̧'a̧ ttichäkua'anü jittäwäjiyarü pä'ü. Ja̧'wa̧nü̧ weaja'anä̧ tticha pä'okotü pinä̧tü̧. 4Ji̧nä̧ pä'äjita'anü̧ kkorotü u̧mü̧wä̧yotürü we'ü pä'inü̧: «Täkü kuäkuäwämä̧ jo̧mȩnü̧ ja̧'a̧. Chä̧ji̧mü̧ pä̧kä̧yü̧rü̧'i̧nä̧ ja̧'wa̧ta̧nü̧ de'a isotü bärepätürü'i̧nä̧ kuä'ü jo̧mȩnü̧ jȩpü̧ ttu̧ju̧nu̧nä̧ we'äjisä, pä'kärira̧'a̧ tticha pä'ätukui.» 5Ja̧'wa̧nü̧ jittäwa'anä̧, juätürü esetü jui'ü ya̧tȩmä̧ i'ättara̧'a̧ 'chi̧nü̧, kka̧ra̧mä̧ iäre newosiura̧'a̧ i̧'cha̧'a̧nä̧, 6ja̧'wa̧nü̧ kkorotümä̧ ru̧wa̧ rey umüwäyotü wȩä̧jä̧u̧ru̧ 'chu'ädo'ü kuäkuäpäjä'kotü kuä'ü tti̧kui̧nä̧u̧. 7Ja̧'wa̧nü̧ jȩttä̧ji̧yä̧ku̧ ru̧wa̧ rey-mä̧ ra̧wä̧ri̧pü̧ umüwäyotü su̧ro̧do̧u̧ru̧ we'inü̧ juätü kuä'äwäjätürümä̧ ttidepiyu'i̧nä̧ kkuwü iku kkä̧nü̧ kuä'ü ttikuatü pä'ü. 8Ja̧'wa̧nü̧ jä̧jí̧ o'ka'a u̧mü̧wä̧yotürü pä'inü̧: Pä'kärimä̧ jo̧mȩnü̧ ja̧'a̧nä̧ chä̧tȩpä̧jä̧u̧mä̧ ichokotü päjätü, suropätü ja̧'a̧ttü̧. 9Ja̧'wa̧nü̧ ja̧'a̧ttü̧, mä̧ni̧yä̧ räopomȩku̧ tätukui, juorü to̧'kuä̧tu̧kuä̧u̧ru̧mä̧ o'katoi'ünä̧rü̧ kuä̧tȩpä̧tu̧kua̧jä̧, pä'kärira̧'a̧ tticha. 10Ja̧'wa̧nü̧ wȩä̧u̧ umüwäyotümä̧ mä̧ni̧yä̧ra̧'a̧ku̧ rä'opü o'katoi'ünä̧rü̧ ttü̧'o̧kui̧'ä̧u̧ru̧mä̧ ä̧tȩpi̧nä̧tü̧ adiwä isotürü'i̧nä̧, suronä̧ jȩpä̧'i̧jä̧tü̧rü̧'i̧nä̧ jü̧nä̧; ja̧'wa̧nü̧ jȩtto̧mȩnä̧ pä'käri jȩtto̧ka̧mä̧ juätü ttä̧tȩpä̧jä̧u̧ttu̧tä̧ suwädi'ina̧'a̧.
11Ja̧'wa̧nü̧ ja̧'a̧ ru̧wa̧ rey-mä̧ ä̧tȩpä̧jä̧u̧ru̧ do'ächi'ü toomȩnä̧, ttü'käwomȩ 'chä̧nü̧ 'ka̧tä̧kuä̧wä̧ta̧ 'ka̧tä̧wo̧kü̧rü̧ ya̧tȩ 'kä̧wä̧ra̧'a̧ topinü̧. 12Jua̧u̧ru̧ pä'inü̧: «Cha̧wa̧ru̧wa̧ ¿ukumä̧ toku dokuächäjättü̧, pä'kärinä̧ do'ächü 'ka̧tä̧kuä̧wä̧ta̧ juikua'anä̧mä̧?» päku, jua̧u̧mä̧ yorisotä ädätokü pinü̧. 13Ja̧'wa̧nü̧ ji̧yä̧ku̧ ru̧wa̧ rey-mä̧ u̧mü̧wä̧yotürü pä'inü̧: «Ü̧jä̧pi̧yä̧nä̧'i̧nä̧, u̧mü̧pi̧yä̧nä̧'i̧nä̧ nü̧'kipü u̧mi̧ yo̧mȩku̧ do'opü ikuätukuirü. Jua'attümä̧ ttaku norü ajuäkuäwätä kkä̧kua̧'a̧.» 14Isopäi'ünä̧ wopü ä̧tȩpä̧u̧mä̧ rekuätü ja̧'a̧nä̧, ü'ojo̧'ä̧u̧mä̧ a̧'u̧ku̧nä̧tä̧ ja̧'a̧.
Roma-ra̧'a̧ iyäwä pärätä tü'kü ji'äwinü̧
(Mc 12.13-17; Lc 20.20-26)
15Ja̧u̧ jä̧ji̧ o'ka'a, fariseo wotümä̧ ka̧ka̧kui̧pü̧, Jesú-ru suronä̧ päomȩnä̧ ji̧yȩnä̧tä̧ ttu̧wȩnȩta̧rü̧ pä'ü, ukuokuäkuäu kku̧ni̧nä̧tü̧. 16Ja̧'wa̧nü̧ ja̧'a̧ttü̧ jitütäku wotürü'i̧nä̧ we'ükkä̧nü̧, Herode-ku wotürü'i̧nä̧ we'inä̧tü̧, pa̧'a̧nü̧ pättarü pä'ü:
—Wo̧juȩkuä̧ i̧sa̧, ukumä̧ jueünä̧tä̧ ukuokuä'ijü pätäkujä̧ ja̧'wa̧ta̧nü̧ Dio u̧mä̧nä̧dä̧jä̧ jueünä̧tä̧ ku̧wo̧juȩta̧'a̧ttü̧, ttü̧ja̧ ä'koyättü pätta'akumä̧ esetokü pä'ü tu̧wo̧juä̧ku̧jä̧. 17Ja̧'wa̧nü̧ ja̧'a̧ttü̧, ukumä̧ toku päkua'ajä̧ttü̧: ¿Roma ru̧wa̧ emperado-rü pärätä iyäwänä̧mä̧ adiu'anü̧ tä̧jí̧, surojü'anü̧ tä̧jí̧?
18Jesú-mä̧ suronä̧ jȩtta̧rü̧ pä'ü tta̧mü̧kuädü wo̧jui̧'ü̧ päinä̧u̧:
—¡Ä'koyättü esetäkuäwä isotüjä̧! ¿Suronä̧ pädiyätukuaku pä'ü päkuätukua'a tä̧jí̧? 19Roma-ra̧'a̧ iyäwä pä̧rä̧tä̧bi̧ poku i̧jȩpä̧tu̧kui̧ttü̧.
Päomȩnä̧, denario i̧sä̧bi̧ ttiyopo'äku, 20Jesú-mä̧ jä'epü ä̧ju̧kui̧nä̧u̧:
—¿Pi̧yȩmä̧ dí i'äjä̧ttü̧ ja̧'wa̧ta̧nü̧ dí i̧mi̧ wȩyu̧kua̧'a̧jä̧ttü̧?
21Päomȩnä̧, ttädätinä̧ku̧:
—Jua̧u̧mä̧ ru̧wa̧ emperador ja̧'a̧.
Pä'ü ttädätäku, Jesú-mä̧ päinä̧u̧:
—Jua̧u̧nu̧mä̧ ru̧wa̧ emperador jäwämä̧, jua̧u̧ru̧tä̧ iyätukui ja̧'wa̧ta̧nü̧ Dio jäwämä̧, Dio-rütä iyätukui.
22Pä'a ä̧ju̧ku̧, rü̧ȩnä̧ amükuädinä̧tü̧; ü̧ji̧pa̧'a̧nä̧tä̧ i̧wi̧'i̧nä̧tü̧.
Ttoächäkuäwä tü'kü jä'epü ä̧ju̧kui̧nä̧tü̧
(Mc 12.18-27; Lc 20.27-40)
23Jua̧u̧nu̧tä̧ mo̧ro̧, saduceo wotüttü, wa'arettümä̧ ttoächäkuäwoka'a pä'ü esetätü ja̧'a̧, yotüte Jesú-ru jä'epü ttä̧ju̧kui̧nä̧ku̧:
24—Wo̧juȩkuä̧ i̧sa̧, Moisé-mä̧ pä'inü̧: Ya̧tȩ i̧tti̧mü̧ to̧'a̧ ja̧'a̧nä̧ 'korujuoächomȩnä̧mä̧, ubüo mi̧nä̧ rekuarü ü̧jä̧wa̧ o̧'ka̧mä̧ irekua päi'ünä̧ ȩmä̧kua̧, ubüomi̧nä̧ i̧tti̧mü̧rü̧ yoepa pä'ü. 25Ja̧'wa̧nü̧ ja̧'a̧mä̧, ya'utenä̧ ujutumä̧, i̧jä̧wa̧tu̧ku̧mä̧ kko̧ro̧mü̧ttü̧nü̧ ta̧ju̧ jo̧mȩnä̧ wa̧ kki̧nü̧. Ja̧'wa̧nü̧ ja̧'a̧ ä̧kuo̧mȩnä̧ ttubüomä̧, irekuarü ȩmä̧ji̧'ka̧ 'korujuo'ächinü̧. Ja̧'wa̧nü̧ i̧tti̧mü̧ to̧'a̧ 'korujuoächa'attü̧, jua̧u̧ rekuarümä̧ ü̧jä̧wa̧tä̧ ȩmi̧nä̧kua̧. 26Ja̧'wa̧nü̧ ji̧nü̧ o'ka'a, jua̧u̧ o'komȩnä̧ ü̧jä̧wa̧'i̧nä̧ 'korujuo'ächinü̧, jua'a yabo'i̧nä̧ kkorotürümä̧ ja̧'wa̧nü̧tä̧ ji̧na̧'a̧, kko̧ro̧mü̧ttü̧nü̧ ta̧ju̧ wotürümä̧, o'katoi'ünä̧tä̧. 27Ja̧'wa̧nü̧ ji̧nü̧ o'ka'a, isaju'i̧nä̧ 'korujuo'ächinä̧ju̧, rüjinä̧mä̧. 28Ja̧'wa̧nü̧ ja̧'a̧ ttottächomȩnä̧mä̧ ¿juätü kko̧ro̧mü̧ttü̧ ta̧ju̧nü̧ wäjätüttümä̧, ji̧nä̧somä̧ dí irekua jä̧kua̧'a̧jä̧ttü̧, o'katoi'ünä̧ku̧ kkü'käwina̧'a̧mä̧?
29Pättiyäku Jesú-mä̧ ädätinä̧u̧:
—¡Dio ujuru'i̧nä̧ ja̧'wa̧ta̧nü̧ i̧wȩnȩ'i̧nä̧ kuieruwätukua'attü̧, jäyä pä'ätüjä̧! 30Isopäi'ünä̧ ttottächi'omȩnä̧mä̧, u̧mä̧tü̧'i̧nä̧ ja̧'wa̧ta̧nü̧ nä̧tü̧'i̧nä̧ ü'käwokotü ttäkuotü, jua'amä̧ mo̧ro̧jä̧nä̧ kka̧kuä̧tü̧ á̧gȩrȩ jü̧'a̧nü̧tä̧ ttäkua'attü. 31Ja̧'wa̧ta̧nü̧, wa'ü ikuinä̧tü̧ ttottächü tü'kümä̧ ¿topokotü pä'ijätüjä̧, Dio i̧wȩnȩnä̧ pä'ijomȩmä̧: 32Ttümä̧ Abraha̧'i̧nä̧, Isaa'i̧nä̧ ja̧'wa̧ta̧nü̧ Jaco'inä̧ ttü̧ä̧nä̧wa̧ Dio-sä? ¡Ja̧'wa̧nü̧ ja̧'a̧ttü̧ Dio-mä̧ wa'ü ikuinä̧tü̧ ttü̧ä̧nä̧wa̧mä̧kü̧ pärokua'aku a̧'kua̧rä̧tü̧tä̧ ttü̧ä̧nä̧wa̧ ja̧'a̧!
33Ja̧'wa̧nü̧ pi̧yȩ ä̧ju̧ku̧, ttü̧ja̧mä̧ rü̧ȩnä̧ amükuädinä̧tü̧ Jesú u̧wo̧juȩtü̧mä̧.
Weäwä wȩnȩttü̧ ji̧nä̧so ukuo jäwä ji̧nü̧
(Mc 12.28-34)
34Ja̧'wa̧nü̧ saduceo wotürü Jesú-mä̧ 'korudü ikuäja'a ä̧ju̧ku̧, fariseo wotü'i̧nä̧ ka̧ka̧kui̧pi̧nä̧tü̧, 35ya̧tȩ weäwä wȩnȩ wo̧juȩkuä̧ i̧sa̧, Jesú-ru ji̧nä̧ iweyettü jä'epü ä̧ju̧kui̧nü̧:
36—Wo̧juȩkuä̧ i̧sa̧ ¿weäwä wȩnȩttü̧ ji̧nä̧so, ji̧yȩtä̧ ukuo jäwämä̧ ti̧yȩjä̧ttü̧?
37Jesú-mä̧ jua̧u̧ru̧ ädätinü̧:
—«Kuami'iso'ki'i̧nä̧, kua̧'kua̧rü̧'i̧nä̧, kuamükuädü'i̧nä̧ o'kajuiyünä̧ ku̧ru̧wa̧ Dio-rü eseunu̧ repe'i.» 38Pi̧yȩ ja̧'a̧ weäwä wȩnȩttü̧ ä̧kuo̧mȩnä̧ jäwämä̧ ja̧'wa̧ta̧nü̧ ji̧nä̧so ukuo jäwämä̧. 39Ja̧'wa̧ta̧nü̧ juȩnȩ o'komȩnä̧ jäwämä̧, jua̧u̧ jü̧ta̧'a̧nü̧ pä'ija'a: «Kua̧wa̧ru̧wa̧rü̧mä̧ kua̧mü̧nä̧ repekuäuta'anü̧ repe'i» jü̧nä̧. 40Pi̧yȩ todärenä̧ jü̧ttü̧tä̧ kkada'kawa'a weäwä wȩnȩmä̧ ja̧'wa̧ta̧nü̧ profetas wotü tti̧wȩyu̧ti̧nü̧ o'kajuiyünä̧mä̧.
¿Crito-mä̧ díttü ichinü̧jä̧ttü̧? Pä'ü jä'epü ä̧ju̧kui̧nä̧u̧
(Mc 12.35-37; Lc 20.41-44)
41Ji̧nä̧ fariseo wotümä̧ ka̧ka̧kuä̧jä̧'kotü ttü̧jo̧kua̧'a̧nä̧,
42Jesú-mä̧ jä'epü ä̧ju̧kui̧nä̧u̧:
—¿Toku päkuätukua'ajä̧ttü̧ Crito ütü'kümä̧? ¿Dí i̧tti̧ ja̧'a̧jä̧ttü̧?
Päomȩnä̧ ttädätinä̧ku̧:
—Dawi i̧tti̧, pä'ätüjä̧.
43Ttädätäku Jesú-mä̧ päinä̧u̧:
—Ja̧'wa̧nü̧ jü̧ttü̧mä̧ ¿Toku pä'ü, Dawi-mä̧, Epíritu jiäwäkumä̧ Chu̧ru̧wa̧ pä'ü päinä̧ku̧jä̧ttü̧? pa̧'a̧nü̧ ukuokuina̧'a̧mä̧:
44Chu̧ru̧wa̧ Dio-mä̧, chu̧ru̧wa̧ Crito-rü pä'inü̧:
chu̧wo̧jua̧'a̧ku̧nä̧ pä̧mä̧di̧,
Kuaboiyotürü ku̧jä̧pü̧
dȩa̧'a̧ku̧ chutomebü päi'ünä̧.
45¿Toku pä'ü Crito-mä̧, Dawi-ttü ichina̧'a̧jä̧ttü̧, chutä Dawi'i̧nä̧ Chu̧ru̧wa̧ pä'ü oinä̧ku̧ ja̧'a̧nä̧mä̧?
46Ya̧tȩ'i̧nä̧ yoriso ädätokoku pinü̧ ja̧'wa̧nü̧ ja̧'a̧ttü̧ jua̧u̧nu̧tä̧ mo̧ro̧ kkä̧mä̧dü̧ ya̧tȩ'i̧nä̧ yabokumä̧ jä̧ttȩpä̧ro̧ko̧ku̧ pinü̧.
Currently Selected:
San Mateo 22: PNT13
Highlight
Share
Copy
Want to have your highlights saved across all your devices? Sign up or sign in
© Sociedades Biblicas Unidas en Venezuela
