लुका 8
8
येसुलाइ सघाइनाराइ बेटिलत
1अनि ह्व पछि येसु परमेसोरकर राज्यकर बारेनाइ गाउँ-गाउँ र सहर-सहरनाइ सुसमचार सुनाइतिन जाइले। येसुसिन बारेउटाइ चेलालत पुनि रइला। 2रोग र भुत आत्माबान बिसेक हक्लाइ केइ बेटिलत पुनि येसुसिन जाइलाइ रइला। होलत मद्दे मरियम मग्दलिनिबान सातुटाइ भुत आत्मा निकाल्ल रल्ति। 3हेरोद राजाकर भन्डारे खुजासकरि बोहेक योअन्ना रइलि। सँगिन सुसन्ना र आने धेराइ बेटिलत पुनि रइला, होल्किन येसु र येसुकर चेलाल्काइ आफ्ने धन-सम्पतिन सयोग गर्तेला।#मति २७:५५-५६; मर्क १५:४०-४१; लुक २३:४९
बिउ छर्नार उखान
(मति १३:१-९; मर्कुस ४:१-९)
4जब सहर-सहरबान मान्छेल्को भिड येसु हक्ल ठउँनाइ आइला अनि येसुन होल्काइ एउटो उखान बल्-ल्याक,
5“एउटो किसान बिउ छरइ निस्किले। बिउ छर्तिन केइ बिउ बाट्नाइ परल्ते र मान्छेल्किन खुन्ला अनि चरिल्किन आइके खाइला। 6केइ बिउ ढड्यान#८:६ ढड्यान ढड्यान जग्गा, माटिहेठान बड्खो-बड्खो पाथर हक्ल जग्गा, जोत्तिनखेर हल्कर फालिन मात्र पाथर भेट्टाइनार जग्गा। जग्गानाइ परल्ते, ह्व बिउ उम्रइ ता उम्रल्ते तर चिसो माटि बइहक्ल हुदान सुकिहालल्ते। 7केइ बिउ चाइ काँटो घारिनाइ परल्ते, उम्रइ ता उम्रल्ते तर काँटो घारिन गर्तिन बाढइ बइपाल्ते। 8अनि कुनइ बिउ चाइ मलिलो जग्गानाइ परल्ते र उम्रिकइ मजार फल फलाइकइ सय गुना फल फलल्ते।”
ह्य बल्लपछि येसुन बाज्ले, “जुनकर सुन्नार कान आछि, होइनिन सुन्दिक।”
उखानकर उदेस्य
(मति १३:१०-२३; मर्कुस ४:१०-२०)
9येसुकर चेलाल्किन ह्य उखानकर अर्थ केति हो बाजिके सोद्ला। 10येसुन होल्काइ बल्-ल्याक, “तोराल्किन ता परमेसोरकर राज्यकर रहस्य जान्नार ग्यान पाइलाछो, तर आनेकोसिन चाइ मुइ उखानबान बाज्छु, कि ‘होल्किन हेरइ ता हेर्छत तर बइदेखत र सुनइ ता सुन्छत तर बइबुजत।’”#यस ६:९-१०
येसुन उखानकर अर्थ बल्ल
(मति १३:१८-२३; मर्कुस ४:१३-२०)
11“उखानकर अर्थ ह्य हो, बिउ चाइ परमेसोरकर बचन हो। 12बाट्नाइ पर्ल बिउ चाइ होलत हो, जुनिन परमेसोरकर बचन सुनइ ता सुन्छत तर बचन सुनिके बिस्वास जुनगर्दिखन र जुनबाँच्दिखन बाजिके दियाबलसिन आइके होल्को हिर्दयबान बचन लाकाइदिस्याक। 13ढड्यान जग्गानाइ पर्ल बिउ चाइ होलत हो, जुनिन परमेसोरकर बचन सुनिके खुसिसिन सुइकार गरिहाल्छत तर बचन हिर्दय भित्रबान बिस्वास बइगर्ल हुदान दुख कस्टकर समयनाइ होल्किन बिस्वास गरइ छाड्छत। 14काँटो घारिनाइ पर्ल बिउ चाइ होलत हो, जुनिन परमेसोरकर बचन सुन्छत र बिस्वास गर्छत तर जिबनकर चिन्ता, धन-सम्पतिकर लोब, सुख र मोज-मस्तिन गर्तिन बिस्वासनाइ बाढइ बइसकत र होइनिन केइ फल फलाइ बइसक। 15तर मलिलो जग्गानाइ पर्ल बिउ चाइ होलत हो, जुनिन परमेसोरकर बचन सुनिके बिस्वास गर्छत र इमान्दारि हकिके पालन गर्छत होल्किन ठिक-ठिक समयनाइ फल फलाइछत।”
बत्तिकर उखान
(मर्कुस ४:२१-२५)
16“कुन्नुल्किन पुनि दियो बालिकइ पाथिन बइछोपत, न ता खाट हेठ्ठान नुकाइके धर्छत, बुरु घरभित्र आइनारकाइ उज्यालो हक्दिक बाजिके बत्ति ढाङ्गो ठउँनाइ धर्छत।”#मति ५:१५; लुक ११:३३
17अनि नुकाइके धर्ल सेब्बे कुरो देख्नार आछत र गोप्पे कुरो सेब्बाल्किन था पाइनारआछत।#मति ११:२६;१२:२
18होइ हुदान तोराल्किन सुन्ल कुरोलाइ मजसिन ध्यान देओ किनारइभने जुनसिन आछि, होलाइ अजइ दिनारआछ, र जुनसिन बइने, होइसिन जे आछि बाजिके होइनिन सम्जिछइ, ह्व पुनि ह्वबान खोसिनारआछि।#मति २५:२९; लुक १९:२६
येसुकरि आमेक र भाएकलत
(मति १२:४६-५०; मर्कुस ३:३१-३५)
19एक दिन येसुकरि आमेक र भाएकलत येसुलाइ भेट्टाइ आइला, तर मान्छेल्को भिडिन गर्तिन होल्किन येसुलाइ भेट्टाइ बइसक्ला। 20एउटो मानुसिन येसुलाइ बलल्ते, “तोरि आमेर र भाएरलत तुइलाइ भेट्टाइलाइ बाइर अस्याइधर्लाछत।”
21तर येसुन होल्काइ बल्-ल्याक, “मोरि आमेक र मोर भाएकलत होइलत ने हो, जुनिन परमेसोरकर बचन सुन्छइ र पालन गर्छइ।”
येसुन हुन्डरिलाइ रोक्ल
(मति ८:२३-२७; मर्कुस ४:३५-४१)
22एक दिन येसु आफ्ने चेलाल्कोसिन लाउनाइ चड्ले र येसुन होल्काइ बल्-ल्याक, “हाइ तालकर पारपटि जिउँ” होलत लाउनाइ चडिके जाइला। 23लाउनाइ जाइतिन गर्तिन येसु निदाइले। तालनाइ एक्कासि बड्खो हुन्डरि आल्ते, लाउनाइ पानि पसिके डुब्तेठि हकल्ते र होलत बड्खो आपतनाइ पर्ला। 24होइ हुदान चेलाल्किन आइके येसुलाइ उठाइतिन बाजइ लाग्ला, “गुरु, गुरु, हाइ ता डुबइ आट्ले।” अनि येसु उठिके हुन्डरि र बुङ्डो-बुङ्डो छाललाइ हाकार्ले। उत्तिने खेर थामिल्ते र सान्त हकिहालल्ते।
25येसुन होल्काइ बल्-ल्याक, “तोराल्को बिस्वास खइ?”
ह्य देखिके होलत डाराइला र छक्क पर्तिन आपसनाइ बाजइ लाग्ला, “ह्य ता किन्खा खालकर मानुस रइलसइ? हेइनिन हाकार्लपछि ता हुन्डरि र छालिन पुनि हेक्र आग्या मान्छत।”
येसुन भुत आत्मा लाग्ल मानुसलाइ बिसेक पार्ल
(मति ८:२८-३४; मर्कुस ५:१-२०)
26येसु आफ्ने चेलाल्कोसिन गालिल तालकर पारपटि गेरासेनस पर्देसनाइ पुग्ले। 27होलत लाउबान निस्किलपछि येसुन ह्व सहरकर एउटो भुत लाग्ल मानुसलाइ भेट्टाल्ते। होइनिन धेरइ दिनसिन लुगा लाइल बइरइल अनि घरनाइ नबसिके चिहानदिस बस्तेल। 28होइनिन येसुलाइ देख्लपछि येसुकर अगाडि घोप्टो परिके चिच्याइतिन बाज्ले, “हे येसु, महान परमेसोरकर बेटाक, तोर मुइसिन केति काम? बिन्ति गर्छु, मुइलाइ दुख जुनदेउ।” 29किनारइभने येसुन भुतलाइ ह्व मानुसबान निस्किजाइनार आग्या दिल रल्ति। होलाइ धेरइ चोटि भुत आत्मान दुख दिल रल्ति। होक्र हात गोडनाइ साङ्लान बादिके धर्तिन पुनि भुत आत्माकर सक्तिन साङ्ला चुट्टाइकइ उजाड केइ बइहक्ल ठउँदिसउने लाकाइतेल्ति।
30येसुन होलाइ सोदल्ते, “तोर नाउँ केति हो?”
होइनिन बाज्ले, “फोउज#८:३० फोउज हेक्र अर्थ ल्याटिन भासानाइ छ हजार मान्छेल्को पल्टन वा सङ्ख्या हो।” किनारइभने ह्व भित्र थुप्राइ भुत आत्मालत रइला।
31भुत आत्माल्किन येसुसिन बिन्ति गर्तिन बाज्ला, “हाइलाइ अतल-कुन्डनाइ#८:३१ अतल-कुन्ड दियाबलस वा सइतानलाइ दन्ड वा सजाय दिनार ठउँ, गइरो खाल्टो, निस्कइ बइसक्नार ठउँ। जाइनार आग्या जुनदेउ।”
32उछि नजिककर डाँरानाइ सोरिकर बड्खो बाथानलत चरिधर्लाइ रइला। ह्व भुत आत्माल्किन सोरिभित्र पसइ पाउ बाजिके येसुसिन बिन्ति गर्ला, र येसुन होल्काइ सोरिभित्र जाइ दिल्याक। 33अनि भुत आत्मालत ह्व मानुसबान निस्किके सोरिभित्र पस्ला। ह्व सोरिलत भिरालोबान हुर्रितिन जाइला र तालनाइ डुबिके मर्ला।
34ह्य घटना देखिके सोरि चाराइनाराइ उछ्यान कुत्तिन जाइला, र उछि हक्ल सेब्बे कुरो गाउँ र सहरभोरि बल्दिल्याक। 35अनि थुप्राइ मान्छेलत केति हक्ल हो बाजिके येसु हक्ल ठउँनाइ हेरइ आइला, र पइला भुत आत्मान सताइल मानुसलाइ सद्दे हकिके लुगा लाइके येसुकर छेउनाइ बसिधर्ल देखिके होलत डाराइला। 36भुत लाग्ल मानुस किनिखे बिसेक हक्ल बाजिके देख्नारकिन आनेल्काइ सुनाइला। 37ह्व पछि गेरासेनसकर आसपासकराइ सेब्बाइ मान्छेल्किन येसुलाइ इछ्यान जाइहाल बाजिके बिन्ति गर्ला, किनारइभने होलत एकदम डाराइलाइ रइला। होइ हुदान येसु फर्कइलाइ लाउनाइ चड्ले। 38तर जुन्टो मानुसबान भुत आत्मा निकाल्ल रइल, होइनिन “तुइसिन जाइ पाउ” बाजिके बिन्ति गर्ले। तर येसुन होलाइ बलल्ते, 39“तुइ आफ्ने घरनाइ जा र परमेसोरिन तोर जिबननाइ केति गर्ले, ह्व कुरो जाइके आनेल्काइ सुनाखन।”
अनि ह्व मानुस जाइके येसुन होक्र जिबननाइ गर्ल सेब्बे काम गाउँ र सहरभोरि सुनाइतिन हिन्ले।
रोगि बेटि र मर्लि छुनेनि
(मति ९:१८-२६; मर्कुस ५:२१-४३)
40येसु तालकर इपार आइपुग्तिन मान्छेल्किन येसुलाइ स्वागत गर्ला, किनारइभने होल्किन येसुलाइ अस्याइधर्लाइ रइला। 41उछि एउटो याइरस नाउँ हक्ल सभाघरकर हाकिम आइके येसुकर गोडनाइ घोप्टो पर्तिन, “मोर घरनाइ आइदेउ” बाजिके येसुलाइ बिन्ति गर्ले, 42किनारइभने होक्रि बार बर्स पुग्लि एउटि मात्र बेटेक मरइ आट्लि रइलि।
येसु हाकिमसिन जाइतिन गर्तिन मान्छेल्को भिडिन येसुलाइ गेचाइतेठि गर्ला। 43होइ भिडनाइ बार बर्ससिन रकत बुहुइनार रोगिन दुख पाइलि एउटि बेटि पुनि रइलि, होइनिन आफ्ने सेब्बे सम्पति उपचारनाइ खर्च गर्लि तर पुनि कुन्नुल्किन होलाइ बिसेक पारइ बइसक्ला। 44होइनिन येसुकर पछाडिबान आइके येसुन लाइल लुगाकर फुर्का छुइलि, र छुइलसात होक्र रकत बुहुइनार रोग बन्द हकिहालल्ते। 45येसुन बाज्ले, “मुइलाइ कुनिन छुइले?” तर सेब्बाल्किन “मुइनिन छुइल बया” बाज्ला,
अनि पत्रुसिन बाज्ले, “गुरु, यत्रा मान्छेल्को भिडनाइ तुइलाइ कोइ न कोइकिन छुइहाल्छत नि।”
46तर येसुन बल्-ल्याक, “बया, कुन्नुल्किन मुइलाइ छुइले हो, किनारइभने मुइबान सक्ति निस्किके जाइल मुइनिन था पाइनाइ।” 47ह्व बेटिन अब मुइ नुकिधरइ बइसकु बाजिके था पाइके डरिन काम्तिन आइलि र येसुकर अगाडि घोप्टो पर्लि, होइनिन येसुलाइ किनारइ छुइलि र छुइलसात बिसेक हक्ल कुरो सेब्बाल्को अगाडि बाज्लि। 48येसुन होलाइ बलल्ते, “नानि, तोर बिस्वासिन तुइ बिसेक हक्लाछस, अब ढुक्कसिन जा।”
49येसुन इत्तिके बाज्तिन गर्तिन याइरसकर घरबान एउटो मानुस आइके याइरसलाइ बलल्ते, “तोरि बेटेर मरिसक्ले, अब गुरुलाइ दुख जुनदिक।”
50तर ह्य कुरो सुनिके येसुन याइरसलाइ बलल्ते, “तुइ जुनडाराउ, बिस्वास मात्र गर, तोरि बेटेर बाच्नारआछि।”
51याइरसकर घरनाइ पुगिके येसुन पत्रुस, याकुब, युहन्ना र छुनेनिकरि आमेक-ब्वाकलाइ बाएक आने कुनुल्काइ पुनि भित्र पसइ बइदिल्याक। 52उछि जम्मा हक्लाइ सेब्बाल्किन छुनेनि मर्लनाइ बिलाप गर्तिन काँदिधर्लाइ रइला। येसुन होल्काइ बल्-ल्याक, “जुनकाँदो, ह्य मर्लि बइने, तर निदाइलि मात्र आछि।”
53ह्य सुनिके होल्किन येसुन बल्ल कुरोलाइ हाँसिके खिल्लि उडाइला, किनारइभने होल्काइ छुनेनि मर्लि हो बाजिके पक्का था रइल्याक। 54तर येसुन छुनेनिकर हात आठाइके बाज्ले, “नानि, उठ।” 55अनि छुनेनिकर सास फेरि फर्किके आल्ते, र ह्व तुरुन्तइ उठ्लि अनि येसुन होलाइ केइ खाइनार कुरो दिक बल्-ल्याक। 56छुनेनिराइ आमेक-ब्वाक छक्क पर्ला, तर येसुन होल्काइ “ह्य कुरो कुनुल्काइ पुनि जुनबल्खन” बाजिके कडा आदेस दिल्याक।
Currently Selected:
लुका 8: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
