लुका 3
3
बप्तिस्मा दिनार युहन्नाकर पर्चार
(मति ३:१-१२; मर्कुस १:१-८; युहन्ना १:१९-२८)
1रोमि बड्खो राजा तिबेरिअसिन राज्य गर्ल पन्र बर्स हक्ल रल्ति। ह्व बेला पन्तियस पिलातस यहुदिया छेत्रकर रोमि बडा-हाकिम रइल। रोमि बड्खो राजाकर अधिननाइ हेरोदिन गालिल छेत्रनाइ राज्य गर्तेल र होक्र भाएक फिलिप इतुरिया र तार्खोनितिस छेत्रनाइ राज्य गर्तेल। अबिलेने छेत्रनाइ लुसानियासिन राज्य गर्तेल। 2ह्व बेला हन्नास र कइयाफा चाइ पर्धान पुजारिलत रइला। होइ बेला केइ बइहक्नार उजाड ठउँनाइ जकरियाकर बेटाक युहन्नाकर उछि परमेसोरकर बचन आल्ते। 3युहन्नान यर्दन लदिकर आसपासनाइ जाइके मान्छेल्काइ पर्चार गरइ थाल्ले, “आ-आफ्ने पाप छाडो र बप्तिस्मा लिओ अनि तोराल्किन गर्ल पाप परमेसोरिन छेमा गर्दिस्या।” 4इत्तिके यसइया अगमबक्तान धर्मसास्तरनाइ लेख्ल ह्य कुरोलत पुरा हकइ आल्ते,
“केइ बइहक्नार उजाड ठउँनाइ एउटोन बड्खो सोरिन इत्तिके बाज्तिन आछ,
‘परमपर्भु आइनार मुलबाट तयार पारो,
ह्व हिन्नार बाटलत सोज्याओ!
5सेब्बे खोल्सा-खोल्सि पुरइपर्छइ,
डाँरा-काँरा र पाहाडलत सम्याइपर्छइ,
घुमाउरो बाट सोजो
र अप्ठ्यारो बाट सजिलो बानाइपर्छइ।
6अनि सेब्बाइ मान्छेल्किन परमेसोरिन पाठाइल मुक्ति देख्नारआछत।’”#यस ४०:३-५
7मान्छेल्को भिड युहन्ना हक्ल ठउँनाइ बप्तिस्मा लेइ आइला। युहन्नान होल्काइ बल्-ल्याक, “ए बिखालु सापाकराइ सन्तान हो! ‘परमेसोरिन गर्नार न्यायबान हाइ उम्कइ सक्छे’ बाजिके तोराल्काइ कुनिन बल्-ल्या?#मति १२:३४;२३:३३ 8तोराल्किन साँच्चि आ-आफ्ने पापलाइ छाडिके फर्किलाइ हो भने होइ अन्सार हिन्नार गरो। अनि ‘हाइ अब्राहामकर सन्तान हो र परमेसोरकर दन्डबान उम्किछे’ बाजिके तोरा जुन्सम्जो। मुइ तोराल्काइ बल्छु, परमेसोरिन अब्राहामकर लागि सन्तानलत ह्य पाथरबान पुनि बानाइ सक्छइ।#युह ८:३३ 9गाछकर फेन्राकनाइ कुलारि परिसक्लाछि। मजार फल बइफलाइनार सेब्बे गाछलाइ ढल्काइके आगिनाइ फ्याक्नारआछ।”#मति ३:१०;७:१९
10मान्छेल्किन युहन्नालाइ सोद्ला, “उन्खा हक्लान हाइनिन केति गर्नार हो ते?”
11युहन्नान होल्काइ बल्-ल्याक, “जुनसिन दुइ जोर लाइनार लुगा आछि होइनिन बइहक्नारलाइ एक जोर दिदिक। उन्खाए गरिके खाइनारकुरो हक्नारिन बइहक्नारसिन बाडिके खाइदिक।”
12कर उठाइनाराइ पुनि बप्तिस्मा लेइ आइला र युहन्नालाइ सोद्ला, “गुरु, हाइनिन चाइ केति गरइपर्नार हो?”#लुक ७:२९
13युहन्नान होल्काइ बल्-ल्याक, “सरकारिन तोक्ल भन्दा बर्ता कर जुनउठाओ।”
14सिपाइकिन पुनि सोद्ला, “हाइनिन चाइ केति गर्नार?”
युहन्नान होल्काइ बल्-ल्याक, “करकापनाइ पारिके या झुटो दोस लाइके कुनुल्कोसिन पइसा जुनलिओ। बुरु आफ्ने तलबनाइ चित्त बुजाओ।”
15मान्छेलत मुक्ति दिनार राजा खिरिस्टकर आसनाइ रइला अनि होल्किन मनमने “युहन्ना ने खिरिस्ट हो कि?” बाजिके बिचार गर्तिन रइला। 16युहन्नान होलत सेब्बाल्काइ बल्-ल्याक, “मुइ ता तोराल्काइ पानिकर बप्तिस्मा दिस्या। तर एउटो मुइभन्दा सक्तिसालि आइतिन आछ। मुइ ता होक्र जुत्ताकर तुना फुकाइनार लायककर पुनि बइने। होइनिन तोराल्काइ पबित्र आत्मा र आगिन बप्तिस्मा दिनारआछ। हेरो, होइनिन अन्न निफन्नार सुपा हातनाइ लिइसक्लाछ। 17निफनिके अन्नचाइ भाकारिनाइ थन्काइनारआछ, तर भुसाचाइ कइले बइनिभ्नार आगिनाइ फ्याक्नारआछ।” 18इन्खाए आने पुनि धेरइ अर्ति दितिन युहन्नान मान्छेल्काइ सुसमचार सुनाइल्याक।
19राजा हेरोदिन आफ्ने भाएककरि बोहेक हेरोदियासलाइ आफ्ने बोहेक बानाइके धर्ल हुदान युहन्नान होलाइ डाउनो गरल्ते र होक्र आने धेरइ खराब काम पुनि देखाइदिल्ते। 20होइ हुदान हेरोदिन युहन्नालाइ झ्यालखन्डनाइ थुनल्ते। युहन्नालाइ थुनिकइ होइनिन आफ्ने सेब्बे खराब कामनाइ अर्को एउटो खराब काम थप्ले।#मति ४:१२;१४:३-४; मर्क ६:१७-१८
येसुन बप्तिस्मा लिल
(मति ३:१३-१७; मर्कुस १:९-११; युहन्ना १:३२-३४)
21सेब्बाइ मान्छेल्किन बप्तिस्मा लिधर्तिन येसुन पुनि बप्तिस्मा लिले। येसुन पार्थना गरिधर्तिन स्वर्ग उघ्रिल्ते 22र पबित्र आत्मा ढुकुरकर रुपनाइ येसु उप्रान झरिके आइले अनि स्वर्गबान इन्खा आवाज आल्ते, “तुइ मोर प्यारो बेटाक हो, तुइसिन मुइ धेरइ खुसि आछु।”#उत २२:२; भजन २:७; यस ४२:२; लुक ९:३५
येसुकर पुर्खालत
(मति १:१-१७)
23येसुन परमेसोरकर सेवा गरइ थाल्तिन होक्र उमेर तिस बर्स जत्ता हक्ल रल्ति। मान्छेल्किन योसेफलाइ ने येसुकर ब्वाक बाजिके ठान्तेला। योसेफकर ब्वाक एलि रइल 24एलिकर ब्वाक मत्तात, मत्तातकर ब्वाक लेबि, लेबिकर ब्वाक मल्कि, मल्किकर ब्वाक यान्ना, यान्नाकर ब्वाक योसेफ, 25योसेफकर ब्वाक मत्ताथियास, मत्ताथियासकर ब्वाक आमोस, आमोसकर ब्वाक नहुम, नहुमकर ब्वाक इसलि, इसलिकर ब्वाक नग्गइ, 26नग्गइकर ब्वाक माथ, माथकर ब्वाक मत्ताथियास, मत्ताथियासकर ब्वाक सेमइन, सेमइनकर ब्वाक योसेख, योसेखकर ब्वाक योदा रइल। 27योदाकर ब्वाक योआनन, योआननकर ब्वाक रेसा, रेसाकर ब्वाक यरुबाबेल, यरुबाबेलकर ब्वाक सालतिएल, सालतिएलकर ब्वाक नेरि, 28नेरिकर ब्वाक मल्कि, मल्किकर ब्वाक अद्दि, अद्दिकर ब्वाक कोसाम, कोसामकर ब्वाक एलमादम, एलमादमकर ब्वाक एर, 29एरकर ब्वाक यहोसु, यहोसुकर ब्वाक एलिएजर, एलिएजरकर ब्वाक योरिम, योरिमकर ब्वाक मत्तात, मत्तातकर ब्वाक लेबि, 30लेबिकर ब्वाक सिमियोन, सिमियोनकर ब्वाक यहुदा, यहुदाकर ब्वाक योसेफ, योसेफकर ब्वाक योनान, योनानकर ब्वाक एल्याकिम रइल। 31एल्याकिमकर ब्वाक मलेआ र मलेआकर ब्वाक मिन्ना रइल। मिन्नाकर ब्वाक मत्ताथा, मत्ताथाकर ब्वाक नातान, नातानकर ब्वाक दाउद, 32दाउदकर ब्वाक यिसइ, यिसइकर ब्वाक ओबेद, ओबेदकर ब्वाक बोअज, बोअजकर ब्वाक सल्मोन, सल्मोनकर ब्वाक नहसोन, 33नहसोनकर ब्वाक अम्मिनादाब, अम्मिनादाबकर ब्वाक आराम रइल। आरामकर ब्वाक हेस्रोन, हेस्रोनकर ब्वाक फारेस, फारेसकर ब्वाक यहुदा, 34यहुदाकर ब्वाक याकुब, याकुबकर ब्वाक इसहाक, इसहाककर ब्वाक अब्राहाम, अब्राहामकर ब्वाक तेरह, तेरहकर ब्वाक नाहोर रइल। 35नाहोरकर ब्वाक सरुग, सरुगकर ब्वाक रउ, रउकर ब्वाक पेलेग, पेलेगकर ब्वाक एबेर, एबेरकर ब्वाक सेलह, 36सेलहकर ब्वाक केनान, केनानकर ब्वाक अर्पछद, अर्पछदकर ब्वाक सेम, सेमकर ब्वाक नोआ, नोआकर ब्वाक लेमेख, 37लेमेखकर ब्वाक मतुसेलह, मतुसेलहकर ब्वाक हनोक, हनोककर ब्वाक येरेद, येरेदकर ब्वाक महलालेल, महलालेलकर ब्वाक केनान, 38केनानकर ब्वाक एनोस, एनोसकर ब्वाक सेत, सेतकर ब्वाक आदम, आदमकर ब्वाक परमेसोर रइल।
Currently Selected:
लुका 3: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
