लुका 4
4
दियाबलसिन येसुलाइ पापनाइ फसाइ आँट्ल
(मति ४:१-११; मर्कुस १:१२-१३)
1येसु पबित्र आत्मान भरिके यर्दन लदिबान फर्किले। पबित्र आत्मान येसुलाइ केइ बइहक्नार उजाड ठउँनाइ लाकाल्ते। 2उछि दियाबलसिन#४:२ दियाबलस परमेसोरकर बड्खो बिरोदि जुनलाइ “सइतान” पुनि बाज्छे। हेक्र बारेनाइ अजइ जानइकर लागि सब्दकर अर्थनाइ हेरो। येसुलाइ चालिस दिनसम्म परिछ्यानाइ पारिके पापनाइ फसाइ आँट्ले। ह्व चालिस दिनसम्म येसुन किछु पुनि खाइल बइरइल। होइ हुदान येसुलाइ एकदम भोक लाग्ल रल्ति।
3होइ बेला ने दियाबलसिन आइके येसुलाइ बलल्ते, “तुइ परमेसोरकर बेटाक हो भने ह्य पाथरलाइ पिठो बन्नार आग्या गर र खा।”
4येसुन बलल्ते, “धर्मसास्तरनाइ इन्खा लेख्लाछ, ‘मानुस पिठोन मात्रइ बइबाच।’”#बेब ८:३
5ह्व पछि दियाबलसिन येसुलाइ ढाङ्गो डाँरानाइ लाकाइके एकइ छिनका सन्सारकर सेब्बे राज्यलत देखाइतिन बलल्ते, 6“मुइ तुइलाइ ह्य सेब्बे राज्यकर राजा र धन सम्पतिकर मालिक बानाइ सक्छु किनारइभने ह्य सेब्बे मुइलाइ दिलाछ र मुइ जुन्टोलाइ देइ चाइछु होलाइ देइ सक्छु। 7मुइलाइ ढोग र ह्य सेब्बे तोर हक्नार आछ्यास।”
8येसुन होलाइ बलल्ते, “धर्मसास्तरनाइ इन्खा लेख्लाछि, ‘तुइनिन परमपर्भु आफ्ने परमेसोरलाइ मात्रइ ढोगइ, र होक्र मात्रइ सेवा गरइ।’”#बेब ६:१३
9फेरि दियाबलसिन येसुलाइ यरुसलेमनाइ लाकाल्ते र मन्दिरकर सेब्बे भन्दा ढाङ्गो ठउँनाइ लाकाइके बलल्ते, “यदि तुइ साँच्चिनइ परमेसोरकर बेटाक हो भने तुइ इछ्यान हेठ्ठ उफ्रि। 10किनारइभने धर्मसास्तरनाइ इत्तिके लेख्लाछ,
‘तोर हेरबिचार गरइलाइ परमेसोरिन आफ्ने स्वर्गदुतकाइ पाठाइनार आछ,
11र होल्किन तुइलाइ हात-हातनाइ थाम्नाराइ आछत
र तोर गोड पाथरनाइ ठोकिनार बइने।’”#भजन ९१:११-१२
12येसुन होलाइ बलल्ते, “धर्मसास्तरनाइ इन्खा पुनि लेख्लाछि, ‘तुइनिन परमपर्भु आफ्ने परमेसोरकर परिछ्या जुनगर।’”#बेब ६:१६
13दियाबलसिन येसुलाइ परिछ्या गरिसक्ल पछि फेरि मउका नपाउन्जेल सम्मलाइ छाडिके जाइले।
येसुन गालिल छेत्रनाइ काम सुरु गर्ल
(मति ४:१२-१७; मर्कुस १:१४-१५)
14पबित्र आत्माकर सक्ति पाइके येसु गालिल छेत्रनाइ फर्किले। येसुकर बारेनाइ सेब्बेपटि चर्चा फिँजल्ते। 15येसुन सभाघरनाइ सिकाइल्याक र सेब्बाल्किन येसुकर पर्सन्सा गर्ला।
नासरतकराइ मान्छेल्किन येसुनाइ बिस्वास बइगर्ला
(मति १३:५३-५८; मर्कुस ६:१-६)
16येसु आफि हुर्किल सहर नासरतनाइ आइपुग्ले। सदइठि येसु बिस्राम-दिन सभाघरनाइ जाइले अनि धर्मसास्तर पढइलाइ ठडाइले। 17येसुलाइ यसइया अगमबक्तान लेख्ल किताब पढइ दिल्ते अनि किताब पल्टाइकइ येसुन इन्खा लेख्ल पढ्ले,
18“परमपर्भुकर आत्मा मुइ उप्रान आछि,
किनारइभने गरिबकाइ सुसमचार सुनाइलाइ परमेसोरिन मुइलाइ छानिकइ पाठाइलाछ।
बन्धननाइ पर्लाल्काइ छुट्कारा देइ,
अन्धाल्काइ देख्नार बानाइ,
अत्याचारनाइ पर्लाल्काइ स्वतन्तर गरइ,
19अनि परमपर्भुन आफ्ने मान्छेल्काइ मुक्ति दिनार समय आइलाछि
बाजिके सुनाइ मुइलाइ पाठाइलाछ।”#यस ६१:१-२
20अनि येसुन किताब बन्द गरिके सभाघरकर एउटो सेबकलाइ दिल्ते र बस्ले। सभाघरनाइ हक्लाइ सेब्बाल्किन येसुलाइ हेरिधर्लाइ रइला, 21अनि येसुन होल्काइ बल्-ल्याक, “आज धर्मसास्तरकर ह्य बचन तोराल्किन सुन्तिन-सुन्तिन पुरा हक्लाछि।”
22सेब्बाइ मान्छेल्किन येसुकर पर्सन्सा गर्ला। होल्किन येसुकर कुरो सुनइ एकदम मन पराइला, अनि होलत छक्क पर्ला। होल्किन बाज्ला, “केति ह्य योसेफकर बेटाक बया र?”
23येसुन होल्काइ बल्-ल्याक, “अब पक्कइ पुनि तोराल्किन मुइलाइ ह्य उखान बाज्नार आछो, ‘ए डाक्टर, पइला तुइ आफिलाइ बिसेक पार। कफर्नहुमनाइ तुइनिन जे-जत्ता गर्ल बाजिके हाइनिन सुन्लाइ रइले, ह्व सेब्बे हेइ आफ्ने सहरनाइ पुनि गर।’” 24येसुन होल्काइ बल्-ल्याक, “साँच्चि मुइ तोराल्काइ बल्छु, कुनु अगमबक्तालाइ पुनि आफ्ने गाउँ-सहरनाइ मान्छेल्किन स्वागत बइगरत।#युह ४:४४ 25अर्को एउटो कुरो पुनि मुइ तोराल्काइ बल्छु, एलिया अगमबक्ताकर समयनाइ तिन बर्स छ महिनासम्म पानि नपरिकइ बड्खो अनिकाल पर्ल रल्ति। ह्व बेला इज्राएलनाइ धेराइ बिद्दुइलत रइला।#१रा १७:१ 26तर परमेसोरिन एलियालाइ इज्राएलनाइ नपाठाइकइ सिदोन छेत्रकर सारपत गाउँकरि बिद्दुइकर#४:२६ सिदोन छेत्रनाइ पर्नार सारपतकर सहर इज्राएलनाइ बइरल्ति। होइ हुदान उछि बस्नाराइ यहुदिलत बइरइला। उछि मात्र पाठाल्ते।#१रा १७:८-१६ 27उन्खाए एलिसा अगमबक्ता हक्तिन इज्राएलनाइ धेराइ कुस्ठ रोगिलत रइला। तर होलत मद्दे कुनुल्काइ पुनि बिसेक बइपार्ले। सिरिया देसकर नामान#४:२७ नामान नामान यहुदि बइरइल। बल्ल मानुसलाइ मात्र बिसेक पारल्ते।”#२रा ५:१-१४
28ह्य कुरो सुनिके सभाघरकराइ सेब्बाइ मान्छेलत रिसिन चुर हक्ला। 29होलत उठ्ला र येसुलाइ सहरबान बाइर निकालिके सहर नजिककर भिरबान झारइ बाजिके लाकाइला। ह्य सहर चाइ डाँरानाइ रल्ति। 30तर येसु मान्छेल्को भिडबान निस्किके जाइले।
भुत लाग्ल मानुस बिसेक हक्ल
(मर्कुस १:२१-२८)
31एक दिन येसु गालिल छेत्रकर एउटो सहर कफर्नहुमनाइ आइले। बिस्राम-दिननाइ येसुन मान्छेल्काइ सिछ्या दितिन रइल। 32येसुकर सिछ्या सुनिके होलत छक्क पर्ला किनारइभने येसुन होल्काइ अधिकार सहित सिछ्या दितेल।#मति ७:२८-२९; मर्क १:२२ 33सभाघरनाइ एउटो भुत लाग्ल मानुस रइल। होइनिन चिच्याइतिन बाज्ले, 34“हे नासरतकर येसु, तुइनिन हाइलाइ केति गरइ लाग्ल? केति तुइ हाइलाइ नास पारइ आइल हो? तुइ परमेसोरिन पाठाइल पबित्र जन हो बाजिके मुइ चिन्छु।”
35ह्य सुनिके येसुन ह्व भुतलाइ हाकार्तिन बलल्ते, “चुप लाग र ह्य मानुसबान निस्किके जाइहाल!” ह्व मानुसलाइ सेब्बाल्को सामुन्ने पछारिकइ भुत निस्किले, तर होलाइ किछु पुनि चोट पटक बइलागल्ते।
36सेब्बाइ छक्क परिके कुरो गरइ थाल्ला, “ह्य मानुसकर बोलिनाइ किन्खा अधिकार र सक्ति रल्तिसइ, हेइनिन हाकार्लसात भुतलत पुनि निस्किके भाग्छत!” 37अनि कफर्नहुम सहरकर चारेदिस येसुकर चर्चा फइलिल्ते।
येसुन धेराइ मान्छेल्काइ बिसेक पार्ल
(मति ८:१४-१७; मर्कुस १:२९-३४)
38सभाघरबान निस्किके येसु सिमोनकर घरनाइ जाइले। ह्व बेला सिमोनकरि सासेक जोरोन थाला पर्लि रइलि। घरकराइ मान्छेल्किन “होलाइ बिसेक पार्देउ” बाजिके येसुलाइ बिन्ति गर्ला। 39येसुन होक्र नजिकइ जाइके जोरोलाइ हाकारल्ते र जोरोन छाडिहालल्ते अनि ह्व उठिके होल्को सेवा गरइ थाल्लि।
40घाम अस्ताइल पछि मान्छेल्किन धेरइ किसिमकराइ बिरामिल्काइ येसु हक्ल ठउँनाइ आन्ला। येसुन सेब्बाइ बिरामि उप्रान हात धरिके होल्काइ बिसेक पार्ल्याक। 41अनि धेराइ मान्छेल्कोबान भुतलत चिच्याइकइ इत्तिके बाज्तिन निस्किला, “तुइ परमेसोरकर बेटाक हो!”
तर येसुन भुतकाइ हाकार्ल्याक र केइ बाजइ बइदिल्याक किनारइभने येसु मुक्ति दिनार राजा खिरिस्ट हो बाजिके होल्किन चिन्तेला।
येसुकर काम
(मर्कुस १:३५-३९)
42बिहान उज्यालो हक्लपछि येसु एकान्त ठउँनाइ जाइले। मान्छेल्किन येसुलाइ हेर्तिन जाइला। येसुलाइ भेट्टाइल पछि होल्किन “हाइलाइ छाडिके जुन्जा” बाजिके रोक्नार कोसिस गर्ला। 43तर येसुन होल्काइ बल्-ल्याक, “मुइनिन परमेसोरकर राज्यकर सुसमचार आने सहरनाइ पुनि सुनाइपर्छइ किनारइभने परमेसोरिन मुइलाइ हेइ काम गरइ पाठाइल हो।”
44इत्तिके येसुन यहुदिया छेत्रकर धेरइ सभाघरनाइ जाइके पर्चार गर्ले।
Currently Selected:
लुका 4: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
