पेरित 27
27
पावल रोमनाइ जाइल
1जब जहाज चडिके इटालिया देस जाइनार हाम्रो निर्नय हक्लो, तब फेस्तसिन पावल र आने कइदिल्काइ अगस्टन पल्टनकर कप्तान युलियसलाइ जिम्मा लाइदिल्ते। 2हाइ एड्रामिटेनोस सहरबान एसिया छेत्रकर धेरइ बन्दरगाह हक्तिन जाइ लाग्ल जहाजनाइ चडिके यात्रा सुरु गर्ले। माकेडोनियाकर थेसलोनिके सहरबान आइल अरिस्तार्खस पुनि हाम्रो साथनाइ रइल। 3अर्को दिन हाइ सिदोन सहरनाइ पुग्ले। उछिका कप्तान युलियसिन पावललाइ दया गरिके आफ्ने साथिल्कोनाइ जाइके भेटघाट गर्नार र चाइल जत्ता सायता लिनार अनुमति दिल्ते। 4फेरि उछ्यान हाइ हिन्ले, तर अगाडिबान बड्खो बातास चल्ल हुदान हाइ साइपरस टापुकर आड लिके छेउ-छेउ हक्तिन जाइले। 5किलिकिया र पामफिलियाकर छेउ-छेउ हक्तिन हाइ लुकियाकर एउटो माइरानाइ सहर पुग्ले। 6उछिका कप्तानिन अलेक्जेन्डिरिया सहरबान इटालिया देस जाइनार जहाज भेट्टाइले र हाइलाइ होइनाइ चडइ लाइले।
7धेरइ दिनसम्म बिस्तारे-बिस्तारे गर्तिन दुखसिन किनिडस सहर पुग्ले, र बातासिन हाइलाइ अगाडि बाढइ बइदिल हुदान केरेट टापुकर आड लिके हाइ सालमोनेकर छेउ-छेउ हक्तिन जाइले। 8हाइ धेरइ दुखसिन टापुकर छेउ-छेउ हक्तिन लासिया सहरकर सुन्दर बन्दरगाह बाज्नार ठउँनाइ पुग्ले।
9उछि पुगइलाइ हाइलाइ धेरइ समय लाग्ले र हुन्डरि बातास आइनार समयन गर्तिन समुन्द्रनाइ यात्रा गरइ पुनि डरलाग्दो हक्ल रल्ति। ह्व बेला यहुदिल्को उपबास बस्नार बिसेस दिन पुनि सकिसक्ल रल्ति। अनि पावलिन होल्काइ इन्खा सल्ला दिल्याक, 10“ए साथि हो, मुइलाइ इन्खा लाग्तिन आछ, हाइ इछ्यान अजइ अगाडि जाइले भने, जहाज र मालसामानकर मात्र नोक्सानि बया, तर हाम्रो जिउ-ज्यानकर समेत खतरा हक्छि जिन्खाए आछि।” 11तर कप्तानिन पावलिन बल्ल कुरो भन्दा जहाजकर मालिक र जहाज चालाइनारकर कुरो बढ्ता पत्याइले। 12जाडोकर समय काटइलाइ ह्व बन्दरगाह मजार बइरल्ति, होइहुदान धेरेजसो मान्छेल्किन जिनिखे पुनि फोनिक्स सहरनाइ पुगिके जाडो काटाइनार बाजिके उछ्यान जहाज चालाइहाल्नार सल्ला दिला। फोनिक्सचाइ केरेटकर एउटो बन्दरगाह हो, ह्व दछिन-पस्चिम र उत्तर-पस्चिमदिस फर्किलाछि।
समुन्द्रनाइ हुन्डरि बातास आइल
13दछिनपटिबान बिस्तारे बातास चलइ लागल्ते, अब हाम्रो योजना सफल हक्छि बाजिके होल्किन जहाज अडाइकइ धर्ल लङ्गर निकाल्ला र जहाजलाइ केरेट टापुकर छेउ-छेउबान लाकाइला। 14तर केइ समय पछि टापु पट्यान एक्कासि “उत्तर-पुर्बि” बाज्नार बड्खो हुन्डरि बातास आल्ते। 15जब जहाज हुन्डरि बातासकर चपेटानाइ परल्ते र अगाडि जाइ बइसक्ले, तब जहाजलाइ जछि लाकाइछि लाकाइदिक बाजिके हाइनिन छाड्दिले। 16कलउडा बाज्नार टापुकर दछिननाइ पुग्ल पछि टापुन हुन्डरि बातासलाइ अलि छेक्दिले र हाइनिन जहाजकर पछाडि बान्ल लाउलाइ बल्ल-बल्ल जोगाइले। 17अनि होल्किन लाउलाइ उप्र उठाइला, र जहाजलाइ हेठ्ठबान डोरिन दरो गरि बान्ला। अब जहाज सिरिटिस बाज्नार बलउटे धापनाइ भासिछि कि बाजिके डरिन जहाज बिस्तारइ हिन्दिक बाजिके जहाजकर लङ्गर समुन्द्रनाइ झार्दिला र जहाजलाइ हुन्डरि बातासनाइ छाड्दिल्याक। 18ह्व डरलाग्दो हुन्डरि बातास चलिधरल्ते, अर्को दिन होल्किन जहाजनाइ हक्ल मालसामान फ्याकइ लाग्ला। 19र पर्सिपल्ट जहाज चालाइकर लागि चाइनार सामानलत पुनि होल्किन फ्याङ्ला। 20धेरइ दिनसम्म हाइनिन घाम, तारा केइ पुनि बइदेख्ले। हुन्डरि बातास जोडसिन चलिधर्ल रल्ति, अब हाइ बाच्छे बाजिके आस पुनि मारिसक्लाइ रइले।
21जहाजनाइ हक्लाइ मान्छेल्किन केइ बइखाइल धेरे दिन हकिसक्ल रल्ति। होइहुदान पावलिन सेब्बाल्को अगाडि ठडाइके बाज्ले, “साथि हो, तोराल्किन मोर सल्ला मानिके केरेटबान जहाज चालाइ बइहक्नाल्ति, ह्व बेला मुइनिन दिल सल्ला मान्ल हक्लान न ता इन्खा दुख ने पाइनाले न ता केइ सामान ने नस्ट हक्नाल्ति। 22अब मुइ तोराल्काइ बल्छु, हरेस जुनखाओ, हाइ कोइ पुनि बइमरे, तर जहाजचाइ नस्ट हक्नार आछि। 23किनारइभने मुइ परमेसोरकर हो, र मुइ होक्रे सेवा गर्छु। आज राति परमेसोरकर एउटो स्वर्गदुत मोर छेउनाइ ठडाइके बाज्ले, 24‘ए पावल, जुनडाराउ, तुइ कइसरकर अगाडि अबस्य ठडाइ ने पर्स्यास। तोर कारनिन गर्तिन परमेसोरिन तुइसिन जाइनाराइ सेब्बाल्को परान बाचाइनारआछ।’ 25होइहुदान साथि हो, साहस गरो! किनारइभने मुइ परमेसोरनाइ बिस्वास गर्छु, मुइलाइ बल्ल ह्य कुरो अबस्य पुरा हक्नार आछि। 26तर हाइचाइ कुनइ एउटो टापुनाइ ठोकिनार आछे।”
27इत्तिके हाइ हुन्डरि बातासनाइ परिके एड्रियास समुन्द्रनाइ लरखरिल चोउद दिन हकिसक्ल रल्ति। तब आदा रातदिस जहाज चालाइनारकिन हाइ कुनइ एउटो ठउँकर छेउनाइ पुग्ले बाजिके अन्दाज गर्ला, 28र पानिकर गइराइ नाप्तिन होल्किन सइतिस मिटर पत्ता लाइला, फेरि अलि ओभर जाइके नाप्तिन छब्बिस मिटर पत्ता लाइला। 29अनि होल्किन जहाज कुनइ चट्टाननाइ ठोकिछि हक्ति बाजिके डाराइला। जहाजलाइ अडाइकर लागि पछाडिकर चाट्टो लङ्गर झार्ला र चाने ब्यान हक्दिक बाजिके पार्थना गरइ लाग्ला। 30होइ बेला जहाज चालाइनाराइ भागइकर लागि जहाजकर अगाडि लङ्गर झार्नार बाहानानाइ लाउ समुन्द्रनाइ झारइ थाल्ला। 31तर पावलिन कप्तान र सिपाइकाइ बल्-ल्याक, “यदि जहाज चालाइनाराइ भाग्ला भने हाइ कोइ पुनि बइबाँचे।” 32तब सिपाइकिन जहाजनाइ बान्ल लाउकर डोरिलत काटिके लाउलाइ ब्वाइदिला।
33मिरमिरे उज्यालो हकइ आँट्ल रल्ति, पावलिन सेब्बाल्काइ केइ खाइनार कुरो खाओ बाजिके बिन्ति गर्ले, र पावलिन बाज्ले, “तोरा चिन्तान गर्तिन केइ बइखाइल आज चोउद दिन हकिसकल्ते। 34होइहुदान तोराल्किन केइ खाइनार कुरो खाओ बाजिके अनुरोध गर्छु। किनारइभने बल पाइकर लागि केइ खाइ ने पर्छइ, जुनडाराओ परमेसोरिन बल्लठि तोरा कुनुल्को पुनि कापालकर एउटो बार पुनि नस्ट हक्नारबइने।” 35ह्य कुरो बाज्ल पछि पावलिन पिठो लिले र सेब्बाल्को अगाडि परमेसोरलाइ धन्नेबाद दिल्ते र पिठो भाचिके खाइ लाग्ले। 36तब सेब्बाल्किन हउसला पाइला र केइ खाइनार कुरो खाइला। 37जहाजनाइ हाइ जम्मा दुइ सय छयत्तर जन रइले। 38सेब्बाल्किन आघाउजि खाइसक्ल पछि जहाज हलुङ्गो पारइलाइ जहाजनाइ हक्ल गहुँ समुन्द्रनाइ फ्याङ्लाबे।
जहाज नस्ट हक्ल
39उज्यालो हक्ल पछि होल्किन समुन्द्रकर छेउ देख्ला, तर होल्किन ह्व ठउँ चिनइ बइसक्ला, र जहाजलाइ उछि ने छेउ लाइनार निर्नय गर्ला। 40होल्किन लङ्गरनाइ बान्ल डोरिलत काटिके लङ्गरलाइ समुन्द्रनाइ ने छाड्दिल्याक र जहाजकर बहना बान्ल डोरिलत पुनि फुकाइदिला। अगाडिकर पाल उठाइकइ बातासपटि फर्काइला र जहाजलाइ छेउदिस लाकाइला। 41तर जहाजकर अगाडिकर भाग बलुवाकर थुप्रोनाइ ठोकिके भासल्ते र जहाज हल्लइसम्म बइसकल्ते, अनि जहाजकर पछाडिकर भाग छालिन हिर्काइके टुक्रइ लागल्ते।
42अब कइदिलत पोउडि खेलिकइ भाग्छत बाजिके सिपाइकिन होल्काइ मार्नार सल्ला गर्ला। 43तर कप्तानिन पावललाइ बाचाइनार मन गर्ले। होइहुदान कप्तानिन कुनुल्काइ पुनि मारइ बइदिल्याक। पोउडि खेलइ सक्नार जत्ताल्काइ पइलानइ पोउडि खेलिकइ छेउ लागो बाजिके हुकुम दिल्याक, 44र बाकि हक्लाल्काइ चाइ फल्याक अथवा जहाजकर टुक्रा आठाइके छेउ लागइ बाजिके हुकुम दिल्याक। इत्तिके हाइ सेब्बाइ सकुसल छेउ लाग्ले।
Currently Selected:
पेरित 27: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
