पेरित 26
26
अग्रिपासकर अगाडि पावलकर मुद्दा
1राजा अग्रिपासिन पावललाइ बलल्ते, “अब तुइलाइ आफ्ने पछ्यनाइ बाज्नार अनुमति आछ।”
तब पावलिन हात पसारिकइ आफ्ने पछ्यनाइ बाजइ लाग्ले, 2“हे राजा अग्रिपास, यहुदिल्किन मुइलाइ लाइल दोसकर बारेनाइ, आज तोर अगाडि आफ्ने बचाउकर लागि बाज्नार मउका पाइलनाइ मुइ खुसि आछु। 3किनारइभने तुइलाइ यहुदिल्को चालचलन र बाद-बिबादकर कुरो मजसिन था रोइस्यास। होइहुदान मुइ तुइलाइ बिन्ति गर्छु मोर बयान धइरे गरिके सुन्देउ।
4“मुइ आफ्ने देसनाइ अनि यरुसलेमनाइ स्यान्खोसिन ने किन्खा जिबन बिताइल रइनाइ बाजिके सेब्बाइ यहुदिल्काइ मजसिन था रोइस्याक। 5पइला मुइ हाम्रो धर्मकर कट्टर फरिसि समहुकर मानुस रइनाइ र होइ अन्सार जिबन बिताइतेनाइ। यदि होल्किन चाइला भने ह्य कुरोकर साछि देइ सक्छत।#पे २३:६; फिलि ३:५ 6परमेसोरिन हाम्रो पुर्खाल्कोसिन गर्ल पर्तिग्यानाइ मुइनिन आसा धर्ल हुदान आज इछि मोर मुद्दा चलिधर्लाछि। 7हे राजा अग्रिपास, हेइ पर्तिग्या पाइनार आसानाइ हाम्रो बार कुलकिन पुनि रात-दिन एउटे मन हकिके परमेसोरकर आराधना गर्छत, र मुइनिन पुनि हेइ आसा धर्ल हुदान यहुदिल्किन मुइलाइ दोस लाइलाइ हो। 8परमेसोरिन मर्ल मान्छेल्काइ जिउँते पार्छइ बाज्नार कुरोनाइ किनारइ तोरा बिस्वास गरइ बइसको?
9“मुइ आफि पुनि सक्लसम्म नासरतकर येसुकर बिरोद गरइ पर्छइ बाजिके सोच्ल रइनाइ। 10यरुसलेमनाइ उन्खाए ने बिरोद गर्नाइ। मुइनिन मुख्य पुजारिल्कोबान अधिकार पाइके पर्भु येसुनाइ बिस्वास गर्नाराइ धेराल्काइ झ्यालखन्डनाइ थुनइ लाइनाइ र होल्काइ मार्तिन मुइ पुनि सहमत रइनाइ। 11मुइ सेब्बे सभाघरनाइ जाइके होल्काइ धेरे चोटि सजाय दिनाइ र येसुलाइ बिस्वास जुनगरो बाजिके थर्काइतेनाइ। होल्कोसिन एकदम रिसाइके मुइ अर्को देसकर सहरनाइ पुनि जाइके उछिकराइ बिस्वासिल्काइ सताइ लाग्नाइ।#पे ८:३;२२:४-५
आफ्ने परिबर्तन बारे पावलकर बयान
(पेरित ९:१९;२२:६-१६)
12“इत्तिके एकदिन मुख्य पुजारिल्कोबान अधिकार पत्र र आग्या पाइके मुइ दमस्कस सहरदिस जाइतिन रइनाइ। 13हे राजा, मद्दे दिननाइ स्वर्गबान घामकर जोति भन्दा उज्यालो जोति हाम्रो वरिपोरि चम्कल्ते, 14र हाइ सेब्बाइ भुइनाइ पछारिले। होइ बेला मुइ हिब्रु भासानाइ इन्खा बाज्ल सुन्नाइ, ‘साउल, ए साउल, तुइ मुइलाइ किनारइ सताइछस? सुइरानाइ लात्ति हिकाइतिन तुइलाइ ने बाथाइस्यास।’ 15अनि मुइनिन सोद्नाइ, ‘पर्भु, तुइ कुन हो?’ पर्भुन बाज्ले, ‘मुइ येसु हो, जुनलाइ तुइ सताइधर्लाछस। 16अब उठ र आफ्ने गोडनाइ ठडाउ, किनारइभने मुइ तुइलाइ मोर सेबक र मोर बारेनाइ साछि दिनार बानाइकर लागि तुइ हक्लनाइ देखा पर्लाछु। तुइनिन अखन मोर बारेनाइ देख्ल कुरो र तुइलाइ पछि देखाइनार कुरोलत आने मान्छेल्काइ सुनाइ पर्छइ। 17मुइ तुइलाइ आफ्ने जाति र आने जातिल्कोनाइ पाठाइतिन आछु। मुइ तुइलाइ होल्कोबान जोगाइनार आछु। 18तुइनिन होल्को आँखि खोल्देइ, र होलत आँधारिबान उज्यालोदिस र सइतानकर सक्तिबान परमेसोरदिस फर्किदिखन। अनि होल्किन आफ्ने पाप छेमा पाइनारआछत र मुइलाइ बिस्वास गरिके पबित्र हक्लाइ परमेसोरकर जनकोसिन बस्नार ठउँ पाइनारआछत।’
19“होइहुदान हे राजा अग्रिपास, स्वर्गबान आइल ह्य दर्सनलाइ मुइ नटेरिकइ बसइ बइसक्नाइ। 20सबभन्दा पइला दमस्कसनाइ, अनि यरुसलेमनाइ, सारा यहुदिया छेत्रनाइ, र आने जातिल्काइ पुनि आ-आफ्ने पापलाइ मानिलिके परमेसोरदिसउने फर्को र आफ्ने पाप मानिलिके परमेसोरदिस फर्किल हो बाजिके कामबान पर्मान देइ, बाजिके पर्चार गर्नाइ।#पे ९:२०,२८-२९ 21होइहुदान यहुदिल्किन मुइलाइ मन्दिरनाइ आठाइके मारइ हेर्ला। 22तर आजकर दिनसम्म परमेसोरिन मुइलाइ सायता गरिधर्लाछ। होइहुदान इछि हक्लाइ स्याउनाइ बुङ्डाइ सेब्बाल्को अगाडि ठडाइके मुइ साछि दिनार मउका पाइलाछु। अगमबक्ताल्किन र मोसान पुरा हक्छि, बाजिके बाज्ल कुरो भन्दा आने बढ्ता केइ पुनि मुइनिन पर्चार गर्ल बइने। 23होल्किन बाज्लाइ रइला, मुक्ति दिनार खिरिस्टनिन दुख भोगिकइ मरइ पर्छि, र मर्लबान जिउँते हक्नाराइ मद्दे पइलो हकिके होइनिन आफ्ने जाति र आने जातिल्काइ जोतिकर घोसना गर्नारआछ।”#यस ४२:६;४९:६; १को १५:२०
24पावलिन ह्य कुरो बाज्तिन गर्तिन फेस्तसिन बड्खो सोरिन साराइतिन बाज्ले, “ए पावल, तुइ बउलाइलइ, तोर धेरे ग्यानिन तुइलाइ बोउला बानाइल्यास।”
25पावलिन बाज्ले, “माननिय फेस्तस, मुइ बउलाइल बइने, तर मुइ सद्दे आछु र सत्य कुरो बोल्तिनआछु। 26ह्य सेब्बे कुरो राजा अग्रिपासलाइ था आछि र होक्र अगाडि मुइ नडाराइकइ बाजइ सक्छु। ह्य कुरोलाइ राजान मजसिन ध्यान दिलाछ, किनारइभने ह्य एउटो कुनानाइ घट्ल घटना बया। 27हे राजा अग्रिपास, केति तुइ अगमबक्ताल्किन बाज्ल कुरोलत बिस्वास गर्छस? मुइलाइ था आछ, कि तुइ बिस्वास गर्छस।”
28अग्रिपासिन पावललाइ बलल्ते, “केति थोरे समयनाइ तुइ मुइलाइ खिरिस्टियन बानाइ चाइछस?”
29पावलिन बाज्ले, “चाहे थोरे समयनाइ हक्दिक चाहे धेरे समयनाइ हक्दिक, परमेसोरसिन ह्य बाजिके मुइ पार्थना गर्छु, हे राजा तुइ मात्र बया, मोर कुरो सुन्नाराइ सेब्बाइ मुइ जिन्खाए हक्दिखन, तर मुइ जिन्खाए साङ्लान जुन्बान्दिखन।”
30तब राजा अग्रिपास, बडा-हाकिम फेस्तस, बरनिकि र उछि हक्लाइ सेब्बाइ मान्छेलत उठ्ला। 31होलत उछ्यान बाइर निस्किलपछि एक आपसनाइ इत्तिके कुरो गर्ला, “ह्य मानुसिन ज्यान सजाय पाइनार अथवा झ्यालखन्डनाइ कइदि हक्नार कुनइ काम ता गर्ल बइरइलसइ।” 32अनि अग्रिपासिन फेस्तसलाइ बलल्ते, “ह्य मानुसिन कइसरलाइ बिन्ति बइगर्ल हक्लासिन छाड्तिन पुनि हक्नाल्ति।”
Currently Selected:
पेरित 26: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
