पेरित 25
25
फेस्तसकर अगाडि पावलकर मुद्दा
1फेस्तस बडा-हाकिम हकिके आफ्ने छेत्रनाइ आइल तिन दिन पछि कइसरियाबान यरुसलेम जाइले। 2उछिका मुख्य पुजारिलत र यहुदि अगुवालत आइके फेस्तसकर अगाडि पावलकर बिरुद्दनाइ दोस लाइला, 3र पावललाइ यरुसलेम पाठाइदेउ बाजिके बिन्ति गर्ला, किनारइभने होल्किन पावललाइ आइतिन-आइतिन बाटनाइ ने मार्नार सडेन्तर गर्लाइ रइला। 4तर फेस्तसिन होल्काइ बल्-ल्याक, “पावललाइ कइसरियानाइ ने थुनिकइ धर्लाछ र मुइ पुनि चाने कइसरिया फर्कितिन आछु। 5तोरा मद्दे कोइ अगुवालत मुइ सँगिन जाइ चाइछत भने पाठाइदिखन, र पावलिन केइ गल्ति गर्लाछ भने होल्किन उछि ने उजुर गरइ सक्छत।”
6अनि फेस्तस यरुसलेमनाइ लगभग आठ-दस दिन बसिके कइसरिया फर्किले, र होक्र अर्को दिन न्याय गर्नार ठउँनाइ बसिके पावललाइ आन्नार हुकुम गर्ले। 7पावललाइ आन्लपछि यरुसलेमबान आइलाइ यहुदिलत पावलकर वरिपोरि ठडाइके होक्र बिरुद्दनाइ धेरे थरिकर दोस लाइला, तर होल्किन एउटो दोसकर पुनि पर्मान देइ बइसक्ला। 8पावलिन आफ्ने पछ्यनाइ बाज्तिन बल्-ल्याक, “मुइनिन न ता यहुदि नियमकर बिरुद्दनाइ, न ता मन्दिरकर बिरुद्दनाइ, न ता रोमि सरकारकर बिरुद्दनाइ केइ गल्ति गर्लाछु।”
9यहुदिल्काइ खुसि पारइकर लागि फेस्तसिन पावललाइ बलल्ते, “केति तुइलाइ लाइल मुद्दाकर फइसला मोरे अगाडि यरुसलेमनाइ हक्दिक बाजिके तुइ चाइछस?”
10तर पावलिन बाज्ले, “मुइ रोमि सरकारकर न्याय आसननाइ ठडाइलाछु, मोर न्याय इछि ने हकइ पर्छि। किनारइभने यहुदिल्को बिरुद्दनाइ मुइनिन केइ खराब काम गर्ल बइने बाजिके तुइलाइ पुनि मजसिन था रोइस्यास। 11यदि मुइनिन ज्यान सजाय पाइनार कुनइ अपराध गर्लाछु भने मुइ मरइ पुनि तयार आछु। तर यहुदिल्किन मुइलाइ लाइल दोस सत्य बइने भने, कुन्नुल्किन पुनि मुइलाइ होल्को हातनाइ जिम्मा लाइ बइसक। मोर मुद्दाकर न्याय कइसरकर अगाडि हक्दिक बाजिके बिन्ति गर्छु।”
12तब फेस्तसिन सल्लाकारकोसिन सल्ला गर्ले अनि पावललाइ बलल्ते, “तुइनिन कइसरकर अगाडि बिन्ति गर्ल हुदान तुइलाइ कइसरकर उछि पाठाइदिनार आछु।”
राजा अग्रिपासकर अगाडि पावल
13केइ दिन पछि राजा अग्रिपास र होक्रि बइनेक बरनिकि फेस्तसलाइ स्वागत गरइकर लागि कइसरियानाइ आइला। 14होलत उछिका धेरे दिन बस्लपछि फेस्तसिन होल्काइ पावलकर बारेनाइ बल्-ल्याक, “फेलिक्सिन थुनिकइ धर्ल एउटो कइदि इछि आछ, 15मुइ यरुसलेम जाइल बेला उछिकराइ मुख्य पुजारिलत र यहुदि अगुवाल्किन होक्र बिरुद्दनाइ दोस लाइला र होलाइ दन्ड देइ पर्छइ बाजिके बिन्ति गर्ला। 16तर मुइनिन होल्काइ बल्नाइ, ‘दोस लाइनार र दोस लाइल मानुस आम्ने-साम्ने हकिके आफ्ने बिरुद्दनाइ लाइल दोसकर बारेनाइ बाज्नार मउका नपाइके मान्छेल्काइ दन्ड दिनार रोमि सरकारकर चलन बइने।’ 17अनि दोस लाइनाराइ मान्छेलत मुइसिन इछि आइला र आइले अर्को दिन ढिलो नगरिकइ न्याय गर्नार ठउँनाइ पावललाइ आन्नार हुकुम गर्नाइ। 18पावलकर बिरोदिकिन ठडाइके दोस लाइ थाल्ला। तर मुइनिन सोच्ल जिन्खाए होल्किन कुनइ खराब दोस लाइ बइसक्ला। 19तर होल्को बाद-बिबाद चाइ होल्के धर्मकर बारेनाइ र मरिसक्ल येसुकर बारेनाइ रल्तिसइ। पावलिन चाइ मरिसक्ल येसुलाइ अखन पुनि जिउँते आछ बाजिके दाबि गरिधर्ल रइल। 20ह्य कुरोकर जाँच गर्नार बारेनाइ मुइ अलमलनाइ पर्नाइ। होइहुदान मुइ होलाइ ‘केति तोर ह्य मुद्दाकर फइसला यरुसलेमनाइ जाइके गरइ चाइछस?’ बाजिके सोद्नाइ। 21तर होइनिन रोमि सम्राटबान न्याय पाउँ बाजिके बिन्ति गर्ल हुदान होलाइ कइसरकर उछि नपाठाउन्जेलसम्म झ्यालखन्डनाइ धरइ बाजिके मुइनिन हुकुम दिलाछु।”
22ह्य कुरो सुनिके अग्रिपासिन फेस्तसलाइ बलल्ते, “ह्व मानुसकर कुरो मुइ आफिन पुनि सुनइ पाइलासिन हक्नाल।”
फेस्तसिन बलल्ते, “कालु तुइनिन होक्र कुरो सुनइ पाइनार आछस।”
23अर्को दिन राजा अग्रिपास र बरनिकि धुमधामसिन सभा भबननाइ आइके कप्तानलत र सहरकराइ मुख्य मान्छेल्कोसिन बस्ला। अनि फेस्तसकर हुकुम पाइके सिपाइकिन पावललाइ उछि आन्ला। 24फेस्तसिन बाज्ले, “राजा अग्रिपास र इछि उपस्थित हक्लाइ सेब्बाइ मान्ने-गन्नेलत, तोरा सेब्बाल्किन ह्य मानुसलाइ देखिधर्लाछो। ह्य मानुसकर बारेनाइ सारा यहुदिल्किन अबसिन उसो ह्य मानुस बाचइ योग्यकर बइने बाजिके यरुसलेमनाइ र इछि पुनि मुइसिन बिन्ति गर्लाइ रइला। 25तर मुइ ह्य मानुसनाइ ज्यान सजाय पाइनार केइ दोस बइभेट्टाइनाइ र ह्य आफिन पुनि रोमि सम्राटकर उछि बिन्ति गर्ल हुदान मुइ सम्राटकर उछि पाठाइनार निर्नय गर्लाछु। 26तर हेक्र बारेनाइ मुइ सम्राटलाइ केइ पुनि लेखइ बइसक्नाइ। होइहुदान मुइ ह्यलाइ तोराल्को अगाडि, र खास गरिके हे राजा अग्रिपास, तोर अगाडि आन्लाछु। तोराल्किन हेक्र जाँच गर्लपछि मुइ केइ कुरो लेखइ पाइछु कि बाजिके आस गर्लाछु। 27किनारइभने एउटो कइदिकर बिरुद्दनाइ केइ दोस नदेखाइके, होलाइ सम्राटकर उछि पाठाइ मुइलाइ ठिक बइलाग्ले।”
Currently Selected:
पेरित 25: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
