पेरित 23
23
1पावलिन महासभानाइ हक्लाइ सेब्बाल्काइ मजसिन हेर्तिन बाज्ले, “दाजि-भाइ हो, आजकर दिनसम्म मुइनिन परमेसोरकर अगि सुद्द बिबेकिन जिबन बिताइ धर्लाछु।” 2ह्य सुनिके पर्धान पुजारि हननियान पावलकर छेउनाइ ठडाइलाइ मान्छेल्काइ होक्र मुखनाइ हिर्काइनार आग्या दिल्याक। 3तब पावलिन हननियालाइ बलल्ते, “हे कमिरो छ्याप्ल भित्ता! तुइलाइ पुनि परमेसोरिन हिर्काइनार रोइस्यास। तुइ परमेसोरकर नियम अन्सार मोर न्याय गरइ बस्लाछस र पुनि नियमकर बिरुद्द मुइलाइ हिर्काइनार आग्या किनारइ दिछस?”#मति २३:२७-२८
4पावलकर नजिक ठडाइलाइ मान्छेल्किन बाज्ला, “तुइनिन किनिखे परमेसोरकर पर्धान पुजारिकर अपमान गर्नार आँट गर्लइ?”
5पावलिन बाज्ले, “दाजि-भाइ हो मुइलाइ था आछ, धर्मसास्तरनाइ इन्खा लेख्लाछ, ‘तुइनिन आफ्ने सासकको बिरुद्दनाइ खराब कुरो जुनबोल।’ तर ह्व पर्धान पुजारि हो बाजिके मुइलाइ था बइरइल।”#पर २२:२८
6अनि पावलिन ह्व महासभानाइ सदुकि र फरिसिलत आछत बाजिके था पाइले र बड्खो सोरिन बाज्ले, “दाजि-भाइ हो, मुइ ता फरिसिकर बेटाक फरिसि ने हो, मुइनिन मर्ल मानुस फेरि जिउँते हक्छइ बाजिके आस गर्ल कारनिन इछि मोर मुद्दा चलिधर्लाछि।”#पे २६:५; फिलि ३:५
7पावलिन इन्खा बाज्लपछि फरिसि र सदुकिलत बाजाबाज गरइ लाग्ला र होल्को माजनाइ फाटो हकल्ते। 8किनारइभने सदुकिलत मानुस मरिके फेरि जिउँते बइहक, अनि स्वर्गदुत र आत्मालत पुनि बइहकत बाजिके बिस्वास गर्छत। तर फरिसिकिन ह्य सेब्बे कुरोनाइ बिस्वास गर्छत।#मति २२:२३; मर्क १२:१८; लुक २०:२७ 9होइहुदान उछिका बड्खो होहल्ला हकल्ते। फरिसि दलकराइ केइ धर्म-गुरुकिन ठडाइके सदुकिकाइ बिरोद गर्तिन बल्ला, “हाइ ह्य मानुसनाइ केइ दोस बइपाइले। यदि आत्मान वा स्वर्गदुतिन ह्यलाइ इन्खा बल्ल हो भने ता केति हक्लो ते?”
10उछिका होल्को बड्खो बाद-बिबाद हक्ल हुदान पावललाइ लुछ-लाछ पारिके मार्छत हक्ति बाजिके सेनापतिन पावललाइ उछ्यान जबरजस्ति निकालिके ब्यारेकभित्र लाकाओ बाजिके सिपाइकाइ आग्या दिल्याक।
11होइ रात पर्भुन पावलकर नजिक आइके बलल्ते, “ए पावल, आँट गर, जिनिखे तुइनिन यरुसलेमनाइ मोर बारेनाइ साछि दिलइ, उनिखे ने तुइनिन रोमनाइ पुनि साछि देइपर्स्यास।”
पावललाइ मार्नार सडेन्तर
12ब्यान उज्यालो हक्ल पछि यहुदिलत भेला हकिके पावललाइ मार्नार सडेन्तर गर्ला, होल्किन “पावललाइ नमारुन्जेलसम्म हाइ केइ पुनि बइखाइनार र बइपिनार” बाजिके कसम खाइला। 13इत्तिके सडेन्तर गर्नाराइ मान्छेलत चालिस जनभन्दा बढ्ता रइला। 14होलत मुख्य पुजारि र यहुदि अगुवाल्को उछि जाइके बाज्ला, “हाइ पावललाइ नमारुन्जेलसम्म केइ पुनि बइखाइनार बाजिके पक्का गरिके कसम खाइलाछे। 15होइहुदान तोरा र महासभाकराइ सदस्य मिलिके सेनापतिलाइ ‘हाइ पावलकर मुद्दाकर बारेनाइ मजसिन सोद्पुछ गर्छे बाजिके बाहाना बानाइके होलाइ झिकाइकइ आनइलाइ बिन्ति गरो।’ अनि होलाइ इछि आनइ भन्दा अगाडि ने हाइ मारइलाइ तयार हक्नार आछे।”
16तर पावलकर भान्जेकिन ह्य सडेन्तर था पाइलपछि ब्यारेकभित्र जाइके सेब्बे कुरो पावललाइ सुनाइदिल्ते। 17अनि पावलिन तुरुन्तइ एउटो कप्तानलाइ बालाइके बलल्ते, “ह्य छोडारिलाइ सेनापतिसिन भेट गराइदिक, किनारइभने हेक्र होलाइ बल्नार केइ कुरो आछि।” 18कप्तानिन पावलकर भान्जेकलाइ सेनापतिकर उछि पुराइके बलल्ते, “कइदि पावलिन मुइलाइ बालाइके ‘ह्य छोडारिन तुइलाइ बल्नार केइ कुरो आछि’ बाजिके बल्ले र मुइनिन ह्यलाइ इछि आन्दिनाइ।”
19सेनापतिन ह्व छोडारिर हात आठाइके एकान्तनाइ लाकाइके सोदल्ते, “तुइनिन मुइलाइ बलइ पर्नार कुरो केति हो? लु बाज।”
20होइनिन बाज्ले, “कालु यहुदिल्किन पावललाइ अजइ मजसिन सोद्पुछ गर्नार बाहाना बानाइके महासभानाइ आन्देउ बाजिके तुइसिन बिन्ति गर्नारआछत। 21तर तुइनिन होल्को कुरो जुनमान, किनारइभने चालिसटाइ भन्दा बढ्ता यहुदिल्किन पावललाइ मारइकर लागि ढुकि बस्लाछत, होल्किन पावललाइ नमारुन्जेलसम्म केइ पुनि बइखाइनार र बइपिनार बाजिके कसम खाइलाछत र होलत तोर आदेस अस्साइकइ बसिधर्लाछत।”
22इन्खा कुरो सुन्लपछि सेनापतिन छोडारिलाइ, “तुइनिन मुइलाइ बल्ल ह्य कुरो कुनुल्काइ जुनबल्खन” बाजिके आग्या दिके पाठाल्ते।
पावललाइ कइसरिया पाठाइल
23ह्व पछि सेनापतिन कप्तानलत मद्दे दुइटाल्काइ बालाइके बल्-ल्याक, “आज राति नउ बजेदिस कइसरिया जाइकर लागि दुइ सय सिपाइलत, सत्तरि जन घोडा चड्नाराइ सिपाइलत र दुइ सय जन भाला बोक्नाराइ सिपाइकाइ ठिक पारो। 24अनि पावलकर लागि पुनि घोडा ठिक पारो, र होलाइ सुरछ्यासाथ बडा-हाकिम फेलिक्सकर उछि पुर्याओ।” 25तब सेनापतिन बडा-हाकिम फेलिक्सलाइ इन्खा बाजिके पत्र लेख्ले,
26“माननिय बडा-हाकिम फेलिक्स, मुइ कलउडियस लुसियसकर सेवाढोग। 27ह्य पावल बाज्नार मानुसलाइ यहुदिल्किन आठाइके मारइ हेर्लाइ रइला। तर ह्य मानुस रोमि नागरिक हो बाजिके मुइनिन था पाइनाइ र सिपाइकाइ लिके जाइके होलाइ मुइ छुट्टाइकइ आन्नाइ। 28होल्किन पावललाइ कुन्टो दोस लाइलाइ हो बाजिके पत्ता लाइलाइ मुइनिन ह्य मानुसलाइ होल्को महासभानाइ लाकाइनाइ। 29होल्किन मोसान लेख्ल परमेसोरकर नियमकर बारेनाइ दोस लाइलाइ रइलासइ। तर मुइनिन ह्यलाइ मिर्त्यु दन्ड वा झ्यालखन्डनाइ थुनइ पर्नार दोस केइ बइभेट्टाइनाइ। 30जब यहुदिल्किन ह्य मानुसलाइ मार्नार सडेन्तर गर्ल कुरो मुइनिन था पाइनाइ, तब तुरुन्तइ ह्यलाइ मुइ तोर उछि पाठाइनाइ र ह्यलाइ दोस लाइनाल्काइ पुनि तोर उछि ने उजुर गरइ बाजिके आदेस दिलाछु।”
31होइहुदान सिपाइकिन आदेस पाइल अन्सार पावललाइ राति ने एन्टिपाटिरिस सहरनाइ पुराइला। 32र अर्को दिन होल्किन पावललाइ घोडानाइ चड्लाइ सिपाइकाइ जिम्मा दिके आफ्ने ब्यारेकनाइ फर्किला। 33होलत कइसरिया पुगिके पावललाइ बडा-हाकिम फेलिक्सकर अगाडि पत्रसहित बुजाइला। 34ह्व पत्र पढिसक्लपछि फेलिक्सिन पावललाइ सोदल्ते, “तोर घर कुन ठउँनाइ हो?”
पावलिन बाज्ले, “किलिकियानाइ हो।”
35फेलिक्सिन बाज्ले, “तुइलाइ दोस लाइनाराइ आइलपछि मात्र तोर मुद्दा सुन्नारआछु।” अनि होइनिन पावललाइ हेरोदकर दरबारनाइ धरो बाजिके हुकुम दिल्याक।
Currently Selected:
पेरित 23: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
