पेरित 22
22
1“दाजि-भाइ तथा ब्वालत, तोराल्को अगाडि मुइनिन आफ्ने पछ्यनाइ बाजइपर्नार कुरो अब सुनो।” 2पावलिन हिब्रु भासानाइ बाज्ल सुनिके सेब्बाइ मान्छेलत झन चुपचाप हक्ला।
3अनि पावलिन बाज्ले, “मुइ किलिकियाकर टार्सस सहरनाइ जन्मिल एक यहुदि हो, तर मुइ हेइ यरुसलेम सहरनाइ धर्म-गुरु गमलिएलकर चेला हकिके हुर्किनाइ। हाम्रो पुर्खादेखि चल्तिन आइल बिधि र परमेसोरकर नियम मुइनिन मजसिन सिक्नाइ। आज तोरा परमेसोरनाइ जत्ता जोसिलाइ आछो, मुइ पुनि ओत्ता ने जोसिलो रइनाइ।#पे ५:३४-३९ 4मुइनिन पर्भुकर बाटनाइ लाग्लाइ मान्छेल्काइ मर्नासम्म गरिके सताइल रइनाइ। मुइनिन अडे र बेटिकाइ आठाइके झ्यालखन्डनाइ थुन्दितेन्याङ। 5मुइनिन बाज्ल ह्य कुरो साँच्चि हो बाजिके पर्धान पुजारि र महासभाकराइ सदस्यकिन पुनि साछि देइ सक्छत। होल्किन ने मुइलाइ दमस्कसनाइ हक्लाइ यहुदि दाजि-भाइको नाउँनाइ पत्र दिला र मुइ उछि हक्लाइ बिस्वासिल्काइ पक्रिके यरुसलेमनाइ आनिके सजाय देइलाइ दमस्कस जाइतिन रइनाइ।#पे ८:३;२६:९-११
पावल परिबर्तन हक्ल बयान
(पेरित ९:१-१९;२६:१२-१८)
6“मुइ मद्दे दिननाइ दमस्कस सहर नजिके पुगइ लाग्तिन, एक्कासि स्वर्गबान एकदम उज्यालो जोति मोर वरिपोरि चम्कल्ते। 7मुइ भुइनाइ लड्नाइ र मुइनिन इन्खा बाज्ल एउटो आवाज सुन्नाइ, ‘साउल, ए साउल, तुइ मुइलाइ किनारइ सताइछस?’ 8अनि मुइनिन सोद्नाइ, ‘पर्भु तुइ कुन हो?’ पर्भुन बाज्ले, ‘मुइ नासरतकर येसु हो, जुनलाइ तुइ सताइ धर्लाछस।’ 9मुइसिन हक्नारकिन जोति ता देख्ला, तर मुइसिन बोल्नारकर कुरो बइबुज्ला। 10फेरि मुइनिन सोद्नाइ, ‘हे पर्भु अब मुइ केति गरुँ?’ पर्भुन मुइलाइ बल्ले, ‘उठिके दमस्कस सहरनाइ जा, तुइलाइ जुन्टो कामकर लागि खटाइलाछ होक्र बारेनाइ उछिनइ बल्नारआछ।’ 11ह्व उज्यालो जोतिन गर्तिन मुइनिन केइ पुनि देखइ बइसक्नार हक्नाइ, अनि मोर साथिकिन मुइलाइ डोराइकइ दमस्कसनाइ लाकाइला।
12“ह्व सहरनाइ मोसान लेख्ल परमेसोरकर नियम पालन गर्नार हननिया नाउँकर एउटो धर्मि मानुस रइल। उछिराइ सेब्बाइ यहुदिल्किन होलाइ आदर गर्तेला। 13ह्व मुइ हक्लनाइ आइके मोर छेउनाइ ठडाइके बाज्ले, ‘साउल भाइ, फेरि देख्नार हक।’ अनि मुइ तुरुन्तइ देख्नार हक्नाइ र होलाइ देख्नाइ। 14होइनिन मुइलाइ बल्ले, ‘तुइनिन हाम्रो पुर्खाल्को परमेसोरकर इछ्या जानइ, धर्मि सेबक येसुलाइ देखइ र होक्र मुखबान बाज्ल कुरो सुनइकर लागि तुइलाइ छान्लाछ। 15किनारइभने तुइनिन जे कुरो सुन्ल र देख्लाछस, ह्य सेब्बे कुरोकर तुइ मान्छेल्को अगाडि होक्र साछि हक्नारआछस। 16होइहुदान अब तुइ किनारइ ढिलो गर्छस? उठ र बप्तिस्मा लि अनि येसुकर नाउँ लिके आफ्ने पापबान सुद्द हक।’
आने जातिल्को लागि पावलकर बोलावट
17“अनि मुइ यरुसलेम फर्किके आइल पछि मन्दिरनाइ पार्थना गरिधर्ल बेला ध्यान-मग्न हक्नाइ। 18पर्भुन मुइलाइ इन्खा बलिधर्ल देख्नाइ, ‘चाने यरुसलेमबान हिनिहाल, किनारइभने तुइनिन मोर बारेनाइ दिल साछि इछिकराइ मान्छेल्किन सुइकार गर्नार बइनेत।’ 19मुइनिन बाज्नाइ, ‘हे पर्भु, मोर बारेनाइ होल्काइ सेब्बे कुरो था रोइस्याक, मुइ धेरइ सभाघरनाइ जाइके तुइलाइ बिस्वास गर्नारकाइ झ्यालखन्डनाइ थुन्ल र ठाटाइल पुनि सेब्बाल्किन देख्लाछत। 20अनि तोर साछि दिनार इस्तिफनसलाइ रक्तामे पारिके मार्तिन मुइ पुनि उछि रइनाइ। होलाइ मार्नारकोसिन सहमत हकिके होल्को लुगा रुँगिकइ बस्ल रइनाइ।’#पे ७:५८ 21तर पर्भुन बल्ले, ‘तुइ जा, किनारइभने मुइ तुइलाइ बद्दुर-बद्दुसम्म आने जातिल्कोनाइ पाठाइनार आछु।’”
22होल्किन पावलकर कुरो इछिसम्म मात्र सुन्ला, र होल्किन बड्खो सोरिन चिच्याइतिन इत्तिके बाज्ला, “इन्खा मानुसलाइ मारइनइ पर्छइ! अब ह्य मानुसलाइ जिउँते छाडइ बइहक।” 23होल्किन आफ्ने लुगा फुकालिकइ आकासदिसउने फ्याङ्ला र धुलो उडाइतिन साराइ लाग्ला। 24ह्य देखिके रोमि सेनापतिन बाज्ले, “पावललाइ ब्यारेकभित्र आनो र मान्छेलत हेक्र बिरुद्दनाइ किनारइ साराइ धर्लाछत कोर्रा लाइके जाँचो।” 25जब सिपाइकिन कोर्रा लाइलाइ पावललाइ बादइ लाग्ला तब पावलिन नजिकइ ठडाइल कप्तानलाइ बलल्ते, “केति रोमि नागरिकलाइ दोसि पक्का नगरिकइ कोर्रा लाइ रोमि कानुनिन तोराल्काइ दिस्या?”
26कप्तानिन ह्य सुन्ल पछि जाइके सेनापतिलाइ बलल्ते, “तुइनिन केति गरइ आँट्ल? ह्य मानुस ता रोमि नागरिक रइलसइ।”
27तब सेनापतिन आइके पावललाइ सोदल्ते, “मुइलाइ बल, केति तुइ रोमि नागरिक हो?”
पावलिन बाज्ले, “हो।”
28सेनापतिन बाज्ले, “मुइ ता धेरे पइसा तिरिकइ रोमि नागरिक हक्ल हो।”
तर पावलिन बाज्ले, “मुइ ता जन्मइदेखि ने रोमि नागरिक हो।”
29इन्खा सुन्लेसात पावललाइ जाँच गरइ ठिक पर्लाइ पछि हट्ला, अनि पावल रोमि नागरिक हो बाजिके था पाइके सेनापति पुनि डाराइले, किनारइभने होइनिन पावललाइ बादइ लाइल रइल।
पावल महासभाकर अगाडि
30यहुदिल्किन पावललाइ किनारइ दोस लाइलाइ हो, ह्य सेब्बे कुरो सेनापतिन पत्ता लाइ चाइतेल। होइहुदान अर्को दिन होइनिन सेब्बाइ मुख्य पुजारि र महासभाकराइ सेब्बाइ सदस्यकाइ भेला हक्नार आग्या दिल्याक र पावललाइ होल्को अगाडि ठडाइदिल्ते।
Currently Selected:
पेरित 22: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
