पेरित 21
21
पावल यरुसलेम जाइल
1एफिसस मन्डलिकर अगुवाल्कोसिन बिदा हक्ल पछि हाइ जहाज चडिके सिदइ कोस टापुनाइ आइपुग्ले। अर्को दिन रोडस टापुनाइ पुगिके उछ्यान पटारा सहरनाइ आइपुग्ले। 2उछिका फोनिकेसम्म जाइनार एउटो जहाज भेट्टाइले र हाइ होइ जहाजनाइ चडिके जाइले। 3अनि साइपरस टापु देखा परल्ते र हाइ होक्र दाइनेपट्यान सिरियादिस लाग्ले। टुरोस सहरनाइ सामान झारइ पर्ल हुदान जहाज उछि छेउ लाइला र हाइ पुनि उछि झर्ले। 4हाइ उछि बस्नाराइ बिस्वासिल्काइ भेट्टाइ जाइले र एक हप्तासम्म होल्कोसिन बस्ले। पबित्र आत्माबान होल्किन पावललाइ यरुसलेम बइजाइ बाजिके बिन्ति गर्ला। 5उछिका बस्नार हाम्रो समय सक्किल पछि हाइ बिदा हकिके उछ्यान हिन्ले। सेब्बाइ बिस्वासि दाजि-भाइ र होल्को बोहेक छ्वाएक समेत हाइलाइ सहर बाइरसम्म पुराइ आइला र हाइ सेब्बाइ समुन्द्रकर छेउनाइ घोडा टेकिके पार्थना गर्ले। 6ह्व पछि हाइ जहाजनाइ चड्ले र होलत चाइ आफ्ने घर फर्किला।
7हाइ टुरोसबान समुन्द्रकर यात्रा गर्तिन टोलेमाइसनाइ पुग्ले। अनि उछि हक्लाइ बिस्वासिल्काइ भेट्टाइके सेवाढोग गर्ले र होल्कोसिन एक दिन बस्ले। 8अर्को दिन उछिबान बिदा हकिके हाइ कइसरिया सहरनाइ आइले, र पर्चारक फिलिपकर घरनाइ बस्ले। फिलिप चाइ यरुसलेमनाइ सेवा गरइ छान्लाइ सातुटाइ मद्दे एउटो रइल।#पे ६:५;८:५ 9होक्र चारुटि ब्याहा बइगर्लाइ बेटेकलत रइला, होल्किन अगमबानि बाज्नार बरदान पाइलाइ रइला। 10हाइ उछि बस्ल केइ दिन पछि यहुदिया छेत्रबान अगाबस नाउँ गर्ल एउटो अगमबक्ता हाइ हक्लनाइ आइले।#पे ११:२८ 11ह्व अगमबक्तान पावलकर पट्का लिके आफ्ने हात र गोडनाइ बान्तिन बाज्ले, “पबित्र आत्मान इत्तिके बाज्छइ, ‘ह्य पट्का जुन मानुसकर हो, होलाइ यरुसलेमनाइ यहुदिल्किन इत्तिके बान्नार आछत र आने जातिल्को हातनाइ सुम्पिदिनार आछत।’”
12ह्य कुरो सुन्ल पछि हाइ र उछि हक्लाइ सेब्बाइ बिस्वासिल्किन पावललाइ यरुसलेम बइजाइ बाजिके बिन्ति गर्ले। 13तर पावलिन बाज्ले, “तोरा किनारइ काँदिकइ मोर मनलाइ दुखित पार्छो? मुइ यरुसलेमनाइ बन्धननाइ परइ मात्र बया, तर पर्भु येसुकर नाउँनाइ मरइ पुनि तयार आछु।”
14पावललाइ मानाइ बइसक्लपछि “पर्भुकर इछ्या पुरा हक्दिक” बाजिके हाइ चुप लाग्ले।
15ह्व पछि हाइ तयार हक्ले र यरुसलेमदिस लाग्ले। 16कइसरियाकराइ केइ बिस्वासिलत पुनि हाइसिन जाइला, र होल्किन हाइलाइ साइपरस टापुकर एउटो पुरानो बिस्वासि मनासोनकर घरनाइ बास बसइ लाकाइला।
पावल यरुसलेम पुग्ल
17जब हाइ यरुसलेम आइपुग्ले, तब उछिकराइ बिस्वासिकिन हाइलाइ खुसिसाथ स्वागत गर्ला। 18अर्को दिन पावल हाइसिन याकुबलाइ भेट्टाइ जाइले। उछिका सेब्बाइ एल्डरलत जम्मा हक्लाइ रइला। 19पावलिन होल्काइ सेवाढोग गर्ल पछि, आने जातिल्को माजनाइ होक्र सेवाकाइबान परमेसोरिन गर्ल कामकर बारेनाइ होल्काइ एक-एक गरिके सुनाइल्याक। 20पावलकर कुरो सुनिके होल्किन परमेसोरकर पर्सन्सा गर्ला। अनि होल्किन पावललाइ बल्ला, “हेर भाइ, इछि पुनि हजारउ यहुदिल्किन पर्भु येसुनाइ बिस्वास गर्लाछत, र मोसान लेख्ल परमेसोरकर नियम पुनि मजसिन पालन गर्छत। 21होल्किन तोर बारेनाइ केइ कुरो सुन्लाछत, ह्व कुरो आने जातिल्को माजनाइ हक्लाइ यहुदिल्काइ तुइनिन, ‘मोसान लेख्ल परमेसोरकर नियम पालन बइगरइ, आफ्ने बेटाकको खतना बइगरइ र यहुदि रितिथिति पालन बइगरइ’ बाजिके सिकाइल आछस रे। 22अब केति गर्नार हो? तुइ आइलाछस बाजिके पक्कइ पुनि होल्किन सुन्नारआछत। 23होइहुदान हाइ जे बल्छे ह्व मान। हाइसिन भाकल गर्लाइ चारुटाइ आछत।#गन्ति ६:१३-२१ 24तुइ होल्काइ लिके जा र होल्कोसिन सुद्द हकइ, र होल्काइ चाइनार खर्च चाइ तुइ तिर्देइ र होल्काइ कापाल खउरइ लाइ। इत्तिके तुइ मोसान लेख्ल परमेसोरकर नियम पालन गर्ल देखिके तोर बारेनाइ सुन्ल कुरो सत्य बया रल्तिसइ बाजिके सेब्बाल्किन था पाइनार आछत। 25तर आने जाति बिस्वासिल्काइ, होल्किन मुर्तिलाइ चाराइल खाइनार कुरो, रकत, घोक्रो आठाइके मार्ल पसुकर मासु बइखाइ र बेभिचारबान बद्दुर बसइ बाजिके निर्नय गरिके हाइनिन पत्र लेखिके पाठाइसक्लाछे।”#पे १५:२९
26होइहुदान पावलिन अर्को दिन ह्व चारुटाकाइ लिके जाइले र होल्कोसिन सुद्द हक्ले। अनि सुद्दिकरन पुरा हक्नार दिन र सेब्बाल्को लागि बलि चाराइनार दिनकर बारे पुजारिलाइ था देइलाइ पावल मन्दिर जाइले।
पावलाइ आठाइलाइ
27जब सुद्द हक्नार सातउ दिन पुरा हकइ लाग्ल रल्ति, तब एसिया छेत्रबान आइलाइ केइ यहुदिल्किन पावललाइ मन्दिरनाइ देखिके भिडकाइ सुर्याइला र पावललाइ पक्रिला। 28होलत साराइतिन बाजइ लाग्ला, “हे इज्राएलकराइ मान्छे हो, हाइलाइ सायता गरो! जताततइ जाइके हाम्रो जातिकर बिरुद्दनाइ, मोसान लेख्ल परमेसोरकर नियमकर बिरुद्दनाइ र ह्य मन्दिरकर बिरुद्दनाइ सेब्बाइ मान्छेल्काइ सिकाइतिन हिन्नार मानुस हेइ हो। ह्य मात्र बया, हेइनिन आने जातिकराइ मान्छेल्काइ पुनि मन्दिरभित्र पसाइकइ ह्य पबित्र ठउँलाइ असुद्द पार्लाछ।” 29होल्किन इनिखे बाज्ला, किनारइभने होल्किन एफिससबान आइल तोरोफिमसलाइ पावलसिन सहरनाइ देख्ल हुदान पावलिन होलाइ मन्दिरभित्र आन्ल हो बाजिके ठान्ला।#पे २०:४
30तब ह्य कुरोकर सहरभोरि होहल्ला हकल्ते र चारेपट्यान मान्छेलत कुत्तिन आइला। होल्किन पावललाइ घिस्याइतिन मन्दिरबान बाइर आन्ला अनि तुरुन्तइ मन्दिरकर सेब्बे गेट बन्द गर्ला। 31जब होल्किन पावललाइ मारइ हेर्तिन रइला, तब यरुसलेम सहरनाइ हुलदङ्गा हक्तिन आछि बाजिके रोमि पल्टनकर सेनापति हक्लनाइ खबर पुगल्ते। 32अनि ह्व तुरुन्तइ सिपाइ र कप्तानकाइ लिके कुत्तिन आइले। होल्किन सेनापति र सिपाइकाइ देखिके पावललाइ हिर्काइ छाड्ला। 33सेनापतिन जाइके पावललाइ पक्रिल्ते र दुइटो साङ्लान बान्नार आग्या गर्ले। अनि उछि हक्लाइ मान्छेल्काइ सोद्ल्याक, “ह्य मानुस कुन हो? हेइनिन केति गल्ति गर्लाछ?” 34तर भिडनाइ हक्लाइ मान्छेल्किन कोइकिन एउटो कुरो कोइकिन अर्को कुरो बाज्तिन साराइला र होहल्लान गर्तिन खास कुरो केति हो बाजिके बुजइ बइसक्ले। होइहुदान पावललाइ ब्यारेकनाइ लाकाइ बाजिके आग्या गर्ले। 35जब पावल सिपाइकोसिन सिढिनाइ आइपुग्ले, तब भिडकिन पावललाइ मारइ हेर्ला। होइहुदान सिपाइकिन होलाइ बाचाइकर लागि बोकिके लाकाइला। 36ह्व बेलासम्म पुनि मान्छेल्को भिड पावललाइ मारइ ने पर्छइ बाजिके बड्खो सोरिन साराइतिन रइला।
पावलिन आफ्ने बारेनाइ बाताइल
37ब्यारेकभित्र पसइ लाग्तिन पावलिन सेनापतिलाइ बलल्ते, “केति मुइ तुइसिन केइ कुरो बाजइ सक्छु?”
सेनापतिन बाज्ले, “केति तुइ गिरिक भासा जान्छस? 38उसने, केइ समय अगाडि राज्यकर बिरोद गर्नाराइ चार हजार ज्यानमाराल्काइ केइ बइहक्नार उजाड ठउँनाइ अगुवाइ गरिके लाकाइनार मिस्रि तुइ ने हो।”
39पावलिन बाज्ले, “बया, मुइ ता किलिकियाकर टार्सस सहरनाइ जन्मिल यहुदि हो। मुइ होइ नाउँ चल्ल सहरकर एउटो नागरिक हो। बिन्ति आछ मुइलाइ ह्य मान्छेल्को अगाडि केइ कुरो बाजइ देउ।”
40जब सेनापतिन पावललाइ अनुमति दिल्ते, तब सिढिनाइ ठडाइके पावलिन मान्छेल्काइ हातिन इसारा गर्ले। मान्छेलत सान्त हक्लपछि पावलिन हिब्रु भासानाइ बाजइ लाग्ले।
Currently Selected:
पेरित 21: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
