पेरित 20
20
पावल माकेडोनिया र गिरिसनाइ
1होहल्ला सान्त हक्लपछि पावलिन बिस्वासिकाइ बालाइल्याक, र होल्काइ उत्साह दिल्याक, अनि होल्कोसिन बिदा हकिके माकेडोनियादिस जाइले। 2उछि पुग्लपछि होइनिन ठउँ-ठउँनाइ जाइके उछिराइ बिस्वासिकाइ धेरे होउसला दिल्याक। ह्व पछि पावल गिरिसनाइ जाइले। 3उछिका ह्व तिन महिनासम्म बस्ले। ह्व पछि पावल जहाजनाइ चडिके सिरिया जाइ लाग्तिन यहुदिल्किन होलाइ मार्नार सडेन्तर गर्ल कुरो होइनिन था पाइले। होइहुदान पावल फर्किके माकेडोनिया हक्तिन सिरिया जाइनार निर्नय गर्ले। 4अनि यात्रानाइ पावलसिन बेरियानाइ बस्नार पुरसकर बेटाक सोपात्रोस, थेसलोनिकेकराइ अरिस्तार्खस र सिकन्दस, डर्बिकराइ गायस र तिमोथि अनि एसिया छेत्रकराइ तुखिकस र तोरोफिमस रइला। 5हेलत अगाडि ने जाइके हाइलाइ तोरोआसनाइ अस्याइधर्लाइ रइला। 6तब हाइचाइ अखमिरि पिठो खाइनार चाड मानाइसक्लपछि फिलिप्पि सहरबान जहाजनाइ चडिके पाँच दिननाइ तोरोआसनाइ पुग्ले र होल्काइ भेट्टाइले। उछिका हाइ एक हप्तासम्म बस्ले।
युटिकस जिउँते हक्ल
7हप्ताकर पइलो दिन जब हाइ पिठो भाचइलाइ उछिराइ बिस्वासिल्कोसिन जम्मा हक्ले, तब पावलिन अर्को दिन जाइनार मन गर्ल हुदान होल्काइ आदा रातसम्म सिकाइधर्ले। 8हाइ जम्मा हक्ल उपल्चो तालाकर कोठानाइ धेरइ बत्ति बाल्ल रल्ति। 9युटिकस नाउँ हक्ल एउटो छोडारि झ्यालनाइ बसिधर्ल रइल। पावलिन धेरइ बेरसम्म बोलिधर्तिन ह्व मस्त निन्रानाइ परिके तेस्रो तालाबान झर्ले। मान्छेल्किन होलाइ उठाइ जाइतिन ह्व मरिसक्ल रइल। 10तर पावल हेठ्ठ झर्ले, र घोप्टो परिके होलाइ आँगालो हाल्तिन बाज्ले, “तोरा जुनआत्तिओ, किनारइभने ह्य छोडारि जिउँते आछ।” 11ह्व पछि पावल उपल्चो तालानाइ चड्ले र पिठो भाचिके खाइसक्लपछि फेरि ब्यान उज्यालो नहकुन्जेलसम्म सिकाइधर्ले। ह्व पछि पावल होल्कोसिन बिदा हक्ले। 12अनि होल्किन जिउँते हक्ल ह्व छोडारिलाइ घरनाइ पुराइदिला, र होलत ढुक्क हक्ला।
तोरोआसदेखि मिलेटससम्म
13तोरोआसबान पावल बाएक हाइ सेब्बाइ जहाज चडिके अस्सोस सहरनाइ जाइले। पावललाइ चाइ अस्सोससम्म हिनिके जाइनार इछ्या हक्ल हुदान होइनिन आफिलाइ अस्सोसनाइ मात्र जहाज चड्नार बन्दोबस्त गर्ल रइल। 14अनि पावलिन हाइलाइ अस्सोसनाइ भेट्टाइलपछि हाइसिन जहाजनाइ चड्ले र हाइ सेब्बाइ मितिलेने सहरनाइ जाइले। 15अर्को दिन हाइ जहाजनाइ यात्रा गरिके खियस टापुकर छेउनाइ पुग्ले र पर्सिपल्ट सामोस टापुनाइ पुग्ले। होक्र अर्को दिन चाइ मिलेटस सहरनाइ पुग्ले। 16एसिया छेत्रनाइ अलमल हक्छइ बाजिके पावलिन एफिसस सहरनाइ बइपस्नार निर्नय गर्ले। किनारइभने होइनिन पेन्तिकोसकर चाडनाइ सक्लसम्म यरुसलेमनाइ पुग्नार इछ्या गर्ल रइल।
एफिससकराइ एल्डरकोसिन बिदाइ
17पावलिन मिलेटसबान एफिससकर मन्डलिकराइ एल्डरकाइ बालाइ मानुस पाठाइले। 18जब होलत उछि आइपुग्ला, र पावलिन होल्काइ बल्-ल्याक, “एसिया छेत्रनाइ आइल दिनसिन मुइ तोराल्कोसिन बस्तिन किनिखे दिन बिताइनाइ ह्व तोराल्काइ था रोइस्या। 19यहुदिल्किन घरि-घरि सडेन्तर गरिके दुख दितिन तापुनि मुइ नम्र हकिके आँसु ब्वाइतिन पर्भुकर सेवा गर्नाइ। 20र तोरा सेब्बाल्को अगाडि र घर-घरनाइ जाइके सिछ्या सिकाइतिन मुइनिन तोराल्को भलाइ हक्नार केइ कुरो बाकि नधरिकइ सिकाइनाइ। 21मुइनिन यहुदि र आने जातकराइ मान्छेल्काइ आ-आफ्ने पाप छाडिके परमेसोरदिसउने फर्को र पर्भु येसुनाइ बिस्वास गरो बाजिके चेतावनि दिनाइ, ह्व सेब्बे कुरो तोराल्काइ था रोइस्या। 22अब मुइ पबित्र आत्मान बल्ल मानिके यरुसलेम जाइतिन आछु। उछि मुइलाइ केति हक्नार हो, ह्व मुइलाइ केइ पुनि था बइने। 23मुइलाइ यत्ता मात्र था आछ, कि सेब्बे सहरनाइ सतावट र झ्यालखन्डकर दुख भोगइपर्नार आछ बाजिके पबित्र आत्मान मुइलाइ बल्लाछ। 24तर मुइ आफ्ने जिबनलाइ कुनइ मोलकर बइठानु। किनारइभने परमेसोरकर अनुगरहकर बारेनाइ सुसमचार सुनाइ र पर्भु येसुन मुइलाइ दिल काम पुरा गरइ सकु भन्ने मोर इछ्या आछ।#२ति ४:७
25“अब हेरो, मुइनिन तोरा जुन-जुनलाइ परमेसोरकर राज्यकर बारेनाइ पर्चार गर्तिन हिन्लाछु, अब तोराल्किन मोर मुख फेरि कइले देखइ बइपाओ बाजिके मुइलाइ था आछ। 26होइहुदान आज मुइ तोराल्काइ साछि दितिन बल्छु, यदि तोरा मद्दे कोइ नास हक्लो भने होक्र दोस मुइलाइ लाग्नार बइने। 27किनारइभने परमेसोरिन हाम्रो उद्दारकर लागि गर्ल र गर्नार कामकर बारेनाइ कुनइ कुरो पुनि बाकि नधरिकइ मुइनिन तोराल्काइ सेब्बे बलिसक्लाछु। 28होइहुदान तोराल्किन आफ्ने र पबित्र आत्मान तोराल्काइ जुन बिस्वासिलत दिलाछ, होल्को मजसिन हेरचाह गरो। परमेसोरकर मन्डलिकराइ मान्छेल्को मजार गोठ्ला हको, किनारइभने पर्भु येसुन ह्व मान्छेल्काइ आफ्ने रकतिन किन्ल हो। 29मुइलाइ था आछ, कि मुइ जाइलपछि डरलाग्दो ब्वाँसो जिन्खाए मान्छेलत तोराल्को माजनाइ पस्नारआछत, र मन्डलिलाइ दुख दिनारआछत। 30तोराल्के माजबान पुनि झुटो सिछ्या दिनाराइ मान्छेलत निस्किनारआछत। होल्किन पर्भुकर चेलाल्काइ आफ्ने बाटनाइ लाकाइ हेर्नार आछत। 31होइहुदान मुइनिन तोराल्काइ तिन बर्ससम्म रात-दिन आँसु ब्वाइतिन एक-एक गरिके सेब्बाल्काइ चेतावनि दिल कुरो सम्जिकइ होसियार हकिके बसो।
32“अब मुइ तोराल्काइ परमेसोरनाइ र होक्र अनुगरहकर बचननाइ सुम्पिदिछु, जुनिन तोराल्काइ बिस्वासनाइ बल्-ल्यो बानाइछइ र आफ्ने मान्छेल्काइ हकवाला बानाइछइ। 33मुइनिन कुनुल्को सुन, चाँदि र लुगाकर लोब बइगर्नाइ। 34तोराल्काइ था रोइस्या, मुइनिन आफ्ने हातिन काम गरिके आफिलाइ र मोर साथनाइ हक्लाल्काइ चाइनार कुरो जुटाइनाइ। 35मुइनिन तोराल्काइ सेब्बे कुरोबान उदारन दिके देखाइलाछु। इनिखे ने तोराल्किन पुनि सक्लसम्म काम गरिके खाँचोनाइ पर्लाल्काइ सायता गरइ पर्छइ। पर्भु येसुन बाज्ल कुरोलाइ सम्जो, ‘लेइ भन्दा देइ अजइ आसिस हो।’”
36पावलिन यत्ता बाजिसक्ल पछि सेब्बाल्कोसिन घोडा टेकिके पार्थना गर्ले। 37होलत सेब्बाइ कान्ला, र पावललाइ आँगालो हालिके मइँ खाइके बिदा गर्ला। 38पावलिन अब मोर मुख फेरि कइले देखइ बइपाओ बाजिके बल्ल कुरोनाइ होल्किन एकदम दुख मान्ला। अनि होल्किन पावललाइ जहाजसम्म पुराइ जाइला।
Currently Selected:
पेरित 20: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
