पेरित 19
19
पावल एफिससनाइ
1अपोल्लोस कोरिन्थनाइ हक्तिन पावल भित्रि इलाका हक्तिन एफिससनाइ आइले। होइनिन उछिका पर्भुलाइ बिस्वास गर्नाराइ केइ चेलाल्काइ भेट्टाइल्याक। 2पावलिन होल्काइ सोद्ल्याक, “केति तोराल्किन पर्भुनाइ बिस्वास गरिके पबित्र आत्मा पाइलो?”
होल्किन बाज्ला, “हाइनिन ता पबित्र आत्मा आछ बाजिके सुन्लाइ पुनि बइने।”
3पावलिन होल्काइ फेरि सोद्ल्याक, “उन्खा हो भने, तोराल्किन किन्खा बप्तिस्मा लिलाइ?”
होल्किन बाज्ला, “युहन्नाकर बप्तिस्मा।”
4अनि पावलिन बल्-ल्याक, “युहन्नान दिल बप्तिस्माचाइ आफ्ने पाप मानिलिके छाड्नार बप्तिस्मा हो। होइनिन ता ‘मुइ भन्दा पछाडि आइनारलाइ बिस्वास गरो’ बाजिके मान्छेल्काइ बल्तेल्याक, ह्व पछि आइल चाइ येसु हो।”#मति ३:११; मर्क १:४,७-८; लुक ३:४;१६; युह १:२६-२७
5ह्य कुरो सुनिके होल्किन पर्भु येसुकर नाउँनाइ बप्तिस्मा लिला। 6जब पावलिन आफ्ने हात होलतउप्रान धर्ले, तब पबित्र आत्मा होलतउप्रान आइले, र होल्किन आने भासा बाज्ला र अगमबानि गर्ला। 7होलत जम्मा बार जन जत्ता रइला।
8पावल तिन महिनासम्म सभाघरनाइ जाइके नडाराइकइ मान्छेल्काइ पर्चार गर्ले, र परमेसोरकर राज्यकर बारेनाइ छलफल गरिके होल्काइ बुजाइल्याक। 9तर कत्ताल्किन मन कठोर पारिके पर्भुनाइ बिस्वास बइगर्ला र पर्भुकर बाटकर बिरुद्दनाइ मान्छेल्को अगाडि बाजइ लाग्ला। होइहुदान पावल होल्को सभानाइ जाइ छाड्ले र पर्भुनाइ बिस्वास गर्नाराइ चेलाल्काइ आफिसिन लाकाइके टुरान्नसकर सिकाइनार ठउँनाइ दिन्ने मान्छेल्कोसिन भेट्टाइके पर्भु येसुकर बारेनाइ छलफल गर्तेल। 10ह्य काम दुइ बर्ससम्म चलिधरल्ते, र एसिया छेत्रनाइ हक्लाइ सेब्बाइ यहुदि र आने जातिल्किन पर्भुकर बचन सुन्ला।
एफिससनाइ अचम्मकर काम
11परमेसोरिन पावलकर हातबान पत्याइ बइसक्नार अचम्मकर कामलत गर्ले, 12इन्खासम्म कि पावलिन परयोग गर्ल रुमाल या मुज्यात्रो लाकाइके बिरामिल्काइ छ्वाइतिन पुनि होलत रोगबान बिसेक हक्तेला र भुत आत्मालत निस्किके जाइतेला। 13होइ बेला ठउँ-ठउँनाइ डुल्तिन झारफुक गरिके हिन्नाराइ केइ यहुदि धामिल्किन पुनि येसुकर नाउँनाइ भुत आत्माल्काइ निकालइ हेर्ला। होल्किन भुत आत्माल्काइ बल्तेल्याक, “पावलिन पर्चार गर्ल येसुकर नाउँनाइ मुइ तुइलाइ निस्कि जाइनार आग्या गर्छु।” 14उछिका एउटो इस्केवास नाउँ हक्ल यहुदि पर्धान पुजारिकर सात भाइ बेटाकख्यानकिन इन्खा काम गर्लाइ रइला।
15तर भुत आत्मान होल्काइ बल्-ल्याक, “मुइ येसुलाइ चिन्छु, र पावललाइ पुनि चिन्छु, तर तोराचाइ कुन हो?”
16ह्व भुत आत्मा लाग्ल मानुस होलतउप्रान उफ्रितिन आइके झम्टिकइ पछार्ल्याक अनि होल्को लुगा च्यात्दिल्याक र घाउ ने घाउ हकिके उछ्यान लाङ्टे भाग्ला। 17ह्य कुरो एफिससनाइ हक्लाइ यहुदि र आने जातकराइ मान्छेल्किन सुन्ला र होलत सेब्बाइ डाराइला। अनि होल्किन पर्भु येसुकर नाउँलाइ एकदम मान गर्ला। 18बिस्वास गर्लाइ धेराइ आइला र होल्किन आफिन गर्ल दुस्ट काम सेब्बाल्को अगाडि मानिलिला र इन्खा काम बइगरे बाज्ला। 19होलत मद्दे जुन-जुनिन झारफुक गर्तेला, होल्किन झारफुक गर्तिन परयोग गर्नार किताबलत जम्मा गरिके आन्ला र सेब्बाल्को अगाडि ड्वाइला। होल्किन ड्वाइल किताबकर मोल गर्तिन पचास हजार चाँदिकर सिक्का बराबर पर्तेल्ति। 20इत्तिके पर्भुकर बचन सक्तिसालि हक्तिन र फइलितिन जाल्ते।
एफिससनाइ हुलदङ्गा
21ह्य सेब्बे घटनापछि पबित्र आत्माकर अगुवाइनाइ पावलिन माकेडोनिया र अखइया पुगिके यरुसलेम जाइनार निर्नय गर्ले। होइनिन बाज्ले, “यरुसलेम पुग्लपछि मुइ रोम पुनि जाइ पर्छइ।” 22अनि पावलिन आफिलाइ सायता गर्नाराइ तिमोथि र इरास्तसलाइ माकेडोनिया पाठाइल्याक, तर आफिचाइ केइ दिन एसिया छेत्रकर एफिससनाइ ने बस्ले।
23होइ समय उछिका पर्भुकर बाटकर बिसयनाइ बड्खो होहल्ला हकल्ते। 24डेमेतिरियस नाउँ हक्ल एउटो मानुस रइल। होइनिन आर्तेमिस देबिकर स्याउनो-स्याउनो चाँदिकर मन्दिरलत बानाइके बेच्तेल र धेराइ मान्छेल्काइ काम दिल रइल। 25एक दिन डेमेतिरियसिन आफ्ने काम गर्नारकाइ र आने इन्खाए काम गर्नारकाइ जम्मा गरिके इन्खा बल्-ल्याक, “ए साथि हो, तोराल्काइ था ने रोइस्या, कि हाइनिन हेइ बेपारबान पइसा कामाइ धर्लाछे। 26तर पावलिन केति बाज्तिन आछ ह्व ता तोराल्किन सुन्लाइ र देख्लाइ आछो। होइनिन एफिससनाइ मात्र बया एसिया छेत्रनाइ हक्ल सेब्बे ठउँकराइ मान्छेल्काइ हातिन बानाइल देबिदेउतालत ता केइ पुनि बया बाजिके भड्काइकइ लाकाइ धर्लाछ। 27होइहुदान हाम्रो बेपार मात्र बया, तर बड्खो देबि आर्तेमिसकर मन्दिर समेत बिना कामकर हक्नार आछि, अनि सारा एसिया छेत्र र सन्सारभरिकराइ मान्छेल्किन मान्तिन आइल बड्खो देबि आर्तेमिसलाइ पुजा गरइ पुनि छाड्नार आछत।”
28ह्य कुरो सुनिके उछि जम्मा हक्लाइ मान्छेलत रिसिन चुर हक्ला, र “एफिससकर आर्तेमिस देबि बड्खो हो” बाजिके नारा लाइ थाल्ला। 29सेब्बे सहरभोरि हुलदङ्गा हकल्ते, अनि मान्छेलत एकजुट हकिके माकेडोनियाबान पावलसिन आइलाइ गायस र अरिस्तार्खसलाइ आठाइके मान्छेलत भेला हकिके छलफल गर्नार सार्बजनिक ठउँनाइ घिस्याइतिन लाकाइला। 30पावल मान्छेल्को भिडनाइ जाइ हेर्ले, तर बिस्वासिकिन जाइ बइदिला। 31एसिया छेत्रकर कतिपय सरकारि हाकिमलत पावलकराइ साथेकलत रइला। होल्किन पुनि पावललाइ मान्छेलत भेला हकिके छलफल गर्नार सार्बजनिक ठउँनाइ देखा जुनपर बाजिके बिन्ति गरि पाठाइला। 32मान्छेल्को भिडनाइ कोइ एउटो कुरो बाजिके ता कोइ अर्के कुरो बाजिके साराइला र झन बड्खो होहल्ला हकल्ते। र धेराइ मान्छेल्काइ ता होलत किनारइ जम्मा हक्लाइ हो ह्व पुनि था बइरइल्याक। 33उछि हक्लाइ यहुदिल्किन अलेक्जेन्डरलाइ अगाडि सार्ला र भिडकाइ केइ कुरो बलिके बुजाइदिखन बाजिके अलेक्जेन्डरलाइ होल्किन बल्ला। होइनिन हातिन इसारा गर्तिन यहुदिल्को बचाउकर लागि केइ बाज्नार कोसिस गर्ले। 34तर अलेक्जेन्डर यहुदि हो बाजिके भिडकराइ सेब्बाइ मान्छेल्किन था पाइला र एकजुट हकिके “एफिससकर आर्तेमिस देबि बड्खो हो” बाजिके दुइ घन्टा जत्ता नारा लाइला।
35सहरकर हाकिमिन भिडकाइ सान्त पार्लपछि बल्-ल्याक, “एफिससकराइ मान्छे हो, एफिसिल्को सहरचाइ बड्खो देबि आर्तेमिसकर मन्दिर र आकासबान झर्ल होक्र मुर्तिकर रछ्यक हो बाज्नार कुरो कुनलाइ था बइने र? 36ह्य कुरो कुन्नुल्किन बया बाजइ बइसकत, होइहुदान तोरा चुप लागो। इत्तिके जोसनाइ आइके गरइ बइहक्नार काम जुनगरो। 37किनारइभने तोराल्किन आठाइके आन्लाइ मान्छेल्किन न ता हाम्रो मन्दिर लुट्लाछत, न ता हाम्रो देबिकर अपमान ने गर्लाछत। 38यदि डेमेतिरियस र ह्वसिन काम गर्नारको हेल्को बिरुद्दनाइ केइ उजुर आछि भने, अदालतनाइ जाइके न्यायकर लागि मुद्दा लड्दिखन। 39तर तोराल्को ह्य भन्दा धेरइ उजुर आछि भने सभा बालाइके छलफल गरइ सक्छे। 40आज हक्ल ह्य होहल्लाकर दोस हाइलाइ लाइ सक्छत। किनारइभने ह्य होहल्ला किनारइ हक्ल हो हाइसिन हेक्र कारन पुनि बइने र जबाफ पुनि बइने।” 41यत्ता बाजिके हाकिमिन भिडकाइ बिदा दिल्याक।
Currently Selected:
पेरित 19: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
