पेरित 17
17
थेसलोनिके सहरनाइ
1पावल र सिलास अम्फिपोलिस र अपोल्लोनियाकर बाट हक्तिन थेसलोनिकेनाइ पुग्ला। उछि यहुदिल्को एउटो सभाघर रल्ति। 2सदइठि पावल बिस्राम-दिन ह्व सभाघरनाइ पुनि जाइले। होइनिन तिन हप्तासम्म बिस्राम-दिननाइ धर्मसास्तरकर कुरो लिके होल्कोसिन बहस गर्ले। 3पावलिन धर्मसास्तरनाइ लेख्ल कुरो बुजाइतिन खिरिस्टनिन दुख भोगइ पर्छि र मर्लबान जिउँते हकइपर्छि बाजिके पर्मानित गरिदिल्ते। र पावलिन बाज्ले, “मुइनिन पर्चार गर्ल येसु ने मुक्ति दिनार खिरिस्ट हो।” 4होलत मद्दे केइकिन पर्भुनाइ बिस्वास गरिके पावल र सिलासदिस लाग्ला। इन्खाए ने परमेसोरकर डर मान्नाराइ धेराइ गिरिकलत र नाउँ चल्लाइ धेराइ बेटिलत पुनि पर्भुनाइ बिस्वास गरिके पावल र सिलासकर पछि लाग्ला।
5तर आने यहुदिलत चाइ डाहन भरिके बजारकराइ बदमासकाइ जम्मा गरिके सहरनाइ होहल्ला गरइ लाइल्याक, र पावल र सिलासलाइ भिडकर अगाडि आनइकर लागि होलत यासोनकर घरनाइ जाइके तोड-फोड गर्ला। 6पावल र सिलासलाइ फेला पारइ बइसक्लपछि होल्किन यासोन र केइ बिस्वासि दाजि-भाइकाइ लछारपछार पार्तिन सहरकराइ सासक हक्लनाइ पुराइके साराइतिन बाज्ला, “सन्सारलाइ उलटपुलट पार्नाराइ मान्छेलत हाम्रो सहरनाइ पुनि आइपुग्लाछत। 7यासोनिन होल्काइ आफ्ने घरनाइ पाउना मानिके धर्ल रइल, र होलत सेब्बाल्किन कइसरकर हुकुम नमानिकइ येसु बल्ल अर्को राजा आछ बाजिके बाज्छत।” 8ह्य कुरो सुनिके भिडलत र सहरकराइ सासकलत आत्तिला। 9होल्किन यासोन र होइसिन हक्लाइ आने दाजि-भाइकाइ धरउटि लिके छाड्दिल्याक।
बेरिया सहरनाइ
10रात पर्लेसात बिस्वासि दाजि-भाइकिन पावल र सिलासलाइ बेरियानाइ पाठाइला। उछि पुग्लपछि होलत यहुदिल्को सभाघरनाइ जाइला। 11उछिकराइ यहुदिलत थेसलोनिकेकराइ यहुदिलत भन्दा बढ्ता असल रइला। होल्किन येसुकर बारेनाइ पावलिन बाज्ल कुरो एकदम खुसि हकिके सुन्तेला र ह्व कुरो ठिक हो कि बया बाजिके दिन्ने धर्मसास्तर पढिके छानबिन गर्तेला। 12होइहुदान धेराइ यहुदिल्किन पर्भुनाइ बिस्वास गर्ला, अनि आनेल्किन आदर गर्नाराइ धेराइ गिरिक बेटिल्किन र अडेल्किन पुनि बिस्वास गर्ला। 13तर थेसलोनिकेनाइ हक्लाइ यहुदिल्किन बेरियानाइ पुनि पावलिन परमेसोरकर बचन पर्चार गर्तिन आछ बल्ल कुरो सुन्ला, र होलत बेरियानाइ पुनि आइके भिडकाइ उचालिकइ पावलकर बिरोद गरइ लाग्ला। 14ह्व पछि बिस्वासि दाजि-भाइकिन पावललाइ तुरुन्तइ समुन्द्रदिस पाठाइला। तर सिलास र तिमोथिचाइ उछि ने बस्ला। 15पावललाइ पुराइ जाइनारकिन होलाइ एथेन्स सहरसम्म पुराइला। पावलिन सिलास र तिमोथि सक्लसम्म चाने मुइ हक्लनाइ आइदिखन बाजिके होल्काइ खबर पाठाइले।
एथेन्स सहरनाइ
16पावलिन सिलास र तिमोथिलाइ एथेन्सनाइ अस्याइधर्ल बेला ह्व सहर मुर्ति ने मुर्तिन भरिल देखिके एकदम दुखित हक्ले। 17होइहुदान पावलिन यहुदि र परमेसोरकर डर मान्नाराइ आने जातिल्कोसिन सभाघरनाइ र बजारनाइ आइनाराइ जाइनाराइ मान्छेल्कोसिन पुनि दिन्ने बहस गर्तेल। 18इपिकिउरि र इस्तोइकि दार्सनिकलत मद्दे पुनि कत्ताल्किन पावलसिन बाद-बिबाद गर्ला। होल्किन बाज्ला, “ह्य बकबके केति बाज्छइ?” कत्ताल्किन चाइ “हेइनिन ता आने बिदेसि देउताकर पर्चार गर्ल जिन्खाए देख्छे” बाज्ला। किनारइभने पावलिन येसु र मर्लबान जिउँते हक्नार कुरोकर पर्चार गर्तेल। 19तब होल्किन पावललाइ अरियोपागसकर सभानाइ लाकाइके सोद्ला, “तुइनिन दिल ह्य नयाँ सिछ्या केति हो, केति हाइ जानइ सक्छे? 20किनारइभने तुइनिन बाज्ल कुरो हाम्रो लागि एकदम अनउठो आछि र तुइनिन बाजइ हेर्ल खास कुरो केति हो, ह्व हाइ बुजइ चाइछे।” 21एथेन्सकराइ सेब्बाइ मान्छेल्किन र उछि बस्नाराइ बिदेसिल्किन नउलो-नउलो कुरो गरिके र सुनिके मात्र समय बिताइतेला।
22पावलिन अरियोपागस सभाकर अगाडि ठडाइके बाज्ले, “एथेन्सकराइ मान्छे हो, तोराल्किन धार्मिक कुरो एकदम मन पराइछो बाजिके मुइनिन था पाइलाछु। 23किनारइभने ह्य सहरनाइ मुइ घुम्तिन जाइतिन तोराल्किन पुजा गर्नार ठउँ पुनि देख्नाइ। मुइनिन एउटो इन्खा थान पुनि भेट्टाइनाइ, उछिका ‘बइचिन्ल देउताकर लागि’ बाजिके खोपिकइ लेख्ल रल्तिसइ। तोराल्किन नचिनिकइ पुजा गर्ल परमेसोरकर बारेनाइ अब मुइ तोराल्काइ बल्छु। 24सन्सार र होनाइ हक्ल सेब्बे थोक बानाइनार परमेसोर ने स्वर्ग र धर्तिकर मालिक हो, होइहुदान परमेसोर मान्छेल्किन बानाइल मन्दिरनाइ बइबस। 25अनि होलाइ मान्छेल्किन चाराइल केइ कुरोकर खाँचो बइपरि, किनारइभने होइनिन ने सेब्बाल्काइ जिबन, सास र सेब्बे कुरो दिछइ।#१रा ८:२७; यस ४२:५; पे ७:४८ 26धर्तिभरि ने मानुसलत बस्दिखन बाजिके परमेसोरिन एउटो मानुसबान धेरइ जाति बानाइले। होलत कछि र कखनसम्म बसइ पर्छइ बाजिके परमेसोरिन अगाडि ने तोक्दिल्याक। 27मान्छेल्किन परमेसोरलाइ हेर्दिखन र छामिकइ भेट्टाइदिखन बाजिके इन्खा गर्ल हो। तर पुनि परमेसोर हाइबान बद्दुर बइने। 28किनारइभने
‘हाइ परमेसोरनाइ बाचिधर्लाछे, हिन्डुल गर्छे र होइनाइ ने हाम्रो अस्तित्व आछि।’
तोराल्को आफ्ने कबिकिन पुनि बाज्लाछत,
‘हाइ साँच्चि ने परमेसोरकरे सन्तान हो।’
29तब हाइ परमेसोरकर सन्तान हक्ल हुदान परमेसोरलाइ हाइनिन मान्छेल्किन कल्पना गरिके हातिन बानाइल सुन, चाँदि या पाथर जिन्खाए हो बाजिके सम्जइ बइहक। 30इन्खा अन्जानकर बेलानाइ गर्ल कामलाइ परमेसोरिन वास्ता बइगर्ले, तर अब परमेसोरिन सेब्बे ठउँकराइ सेब्बाइ मान्छेल्काइ आफ्ने-आफ्ने पापलाइ मानिलिके छाड्नार आग्या दिलाछ। 31किनारइभने सन्सारकर सेब्बाइ मान्छेल्को न्याय गर्नार एक दिन परमेसोरिन तोक्दिलाछ, र ह्व दिन परमेसोर आफिन छान्ल मानुसबान ठिक इन्साफ गर्नारआछ। होलाइ मर्लबान जिउँते पारिके परमेसोरिन सेब्बाइ मान्छेल्काइ हेक्र पर्मान दिलाछ।”
32जब होल्किन मर्लबान जिउँते हक्नार कुरो सुन्ला, तब कोइ-कोइकिन गिल्ला गर्ला। तर कत्ताल्किन चाइ “हाइ हेक्र बारेनाइ तुइबान फेरि सुनइ चाइछे” बाज्ला। 33ह्व पछि पावल सभाबान बिदा हक्ले। 34केइ मान्छेलत पावलकर साथ लाग्ला, र पर्भुनाइ बिस्वास गर्ला। होलत मद्दे अरियोपागस सभाकर डियनुसियस, दामारिस नाउँ हक्लि एउटि बेटि र आनेलत पुनि रइला।
Currently Selected:
पेरित 17: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
