पेरित 16
16
पावल र सिलाससिन तिमोथिकर भेट
1पावल डर्बि र लुस्त्रा सहरनाइ पुग्ले। उछिका तिमोथि नाउँ हक्ल एउटो चेला रइल। होक्रि आमेक पर्भुलाइ बिस्वास गर्नारि यहुदि बेटि रइलि र ब्वाक चाइ गिरिक रइल। 2लुस्त्रा र आइकोनियननाइ हक्लाइ पर्भुलाइ बिस्वास गर्नाराइ सेब्बाइ दाजि-भाइकिन तिमोथिलाइ असल मानुस ठान्तेला। 3पावलिन होलाइ पुनि सँगिन लाकाइनार मन गर्ले। होइहुदान यहुदिल्काइ कुनइ बाधा जुनपर्दिक बाजिके होइनिन तिमोथिलाइ लाकाइके खतना गर्दिल्ते। किनारइभने तिमोथिकर ब्वाक गिरिक रइल बाजिके उछिकराइ सेब्बाल्काइ था रइल्याक। 4अनि होल्किन सहर-सहर हकिके जाइतिन उछिराइ बिस्वासिल्काइ यरुसलेमकराइ पेरितकिन र एल्डरकिन गर्ल निर्नय सुनाइला र पालन गरइ बाजिके अर्ति दिल्याक। 5इत्तिके मन्डलिकराइ सेब्बाइ बिस्वासनाइ बल्-ल्यो हक्तिन जाइला र दिन-दिने पर्भुनाइ बिस्वास गर्नाराइ मान्छेलत थपितिन जाइला।
माकेडोनिया जाइनार दर्सन
6पावल र होक्र साथेककाइ पबित्र आत्मान एसिया छेत्रनाइ बचन पर्चार गरइ रोक्ल हुदान होलत फिर्गिया र गलातिया इलाका हक्तिन जाइला। 7माइसियाकर सिमानानाइ पुग्ल पछि होलत बिथिनियादिस जाइनार बिचार गर्ला। तर येसुकर आत्मान होल्काइ उछि पुनि जाइ बइदिल्याक। 8होइहुदान होलत माइसिया हक्तिन तोरोआसनाइ जाइला। 9राति पावलिन दर्सननाइ माकेडोनियाकर एउटो मानुसिन ठडाइके होलाइ “दया गरिके माकेडोनियानाइ आइदेउ र हाइलाइ सायता गर्देउ” बाजिके बिन्ति गरिधर्ल देख्ले। 10पावलिन इन्खा दर्सन पाइलपछि हाइ तुरुन्तइ माकेडोनिया जाइलाइ तयार हक्ले किनारइभने उछिराइ मान्छेल्काइ पर्भुकर सुसमचार सुनाइलाइ परमेसोरिन ने बालाइल हो बाजिके हाइलाइ पक्का था हक्लो।
लिडियाकर बिस्वास
11अनि हाइ तोरोआसबान जहाज चडिके सिदइ सामोथाराकेनाइ जाइले, र अर्को दिन नियापोलिस सहरनाइ पुग्ले। 12उछ्यान हाइ फिलिप्पि सहरनाइ पुग्ले, ह्व माकेडोनिया छेत्रकर मुख्य सहर रल्ति। ह्व सहरचाइ रोमिल्को अधिननाइ रल्ति। हाइ ह्व सहरनाइ केइ दिन बस्ले। 13अनि बिस्राम-दिननाइ हाइ सहर बाइर लदि छेउनाइ जाइले, उछिका यहुदिल्को पार्थना गर्नार ठउँ आछि हुदो बाजिके बिचार गर्लाइ रइले, हाइ उछि बस्ले र जम्मा हक्लाइ बेटिल्कोसिन कुरो गरइ लाग्ले। 14हाम्रो कुरो सुन्नाराइ मद्दे लिडिया नाउँ हक्लि परमेसोरकर आराधना गर्नारि बेटि रइलि। ह्व थिआटिरा सहरबान आइके फिलिप्पिनाइ बइजनि रङकर लुगा बेच्तेलि। पावलिन बाज्ल कुरो मजसिन बुजइकर लागि पर्भुन होक्र मन खोल्दिल्ते। 15अनि ह्व र होक्र घरकराइ सेब्बाइ परिवारकिन बप्तिस्मा लिलपछि होइनिन हाइलाइ बिन्ति गर्तिन बल्लि, “यदि तोराल्किन साँच्चि ने मुइलाइ पर्भुकर बिस्वासि ठान्छो भने मोर घरनाइ आइके हाइसिन बसो।” इत्तिके होइनिन हाइलाइ कर लाइलि।
पावल र सिलास झ्यालखन्डनाइ
16एक दिन हाइ पार्थना गर्नार ठउँनाइ जाइतिन रइले, एउटि जोखना हेर्नार आत्मा हक्लि कमारि बेटिसिन हाम्रो भेट हक्लो। होइनिन भुत आत्माकर सक्तिन जोखना हेरिकइ आफ्ने मालिकको लागि धेरइ पइसा कामाइ दितेलि। 17होइनिन पावल र हाम्रो पछि-पछि लागिकइ इत्तिके साराइ लाग्लि, “ह्य मान्छेलत सेब्बाइ भन्दा महान परमेसोरकराइ सेबकलत हो। हेल्किन तोराल्काइ मुक्ति पाइनार बाटकर पर्चार गर्छत।” 18ह्व बेटिन धेरइ दिनसम्म इन्खाए गरिधर्लि। इत्तिके साराइ धर्लनाइ पावललाइ दिक्क लागिकइ ह्व बेटिदिस फर्किके भुत आत्मालाइ बलल्ते, “येसु खिरिस्टकर नाउँनाइ मुइ तुइलाइ आग्या गर्छु, तुइ ह्व बेटिबान निस्किके जाइहाल।” इन्खा बल्लेसात ह्व भुत आत्मा निस्किके जाइहाल्ले। 19ह्व बेटिकर मालिककिन अब ह्य बेटिबान कमाइ हक्नार बाट सक्किल था पाइके पावल र सिलासलाइ आठाइके केरकार गरइकर लागि घिस्याइतिन सहरकराइ सासककोनाइ लाकाइला। 20अनि होल्काइ सासकको अगाडि ठडाइके इत्तिके बल्-ल्याक, “ह्य मान्छेलत यहुदिलत हो, हेल्किन हाम्रो सहरनाइ नचाइदो कुरो सिकाइकइ दुख दितिन आछत। 21हेल्किन इन्खा रितिथिति सिकाइतिन आछत, कि हाइ रोमिल्किन सुइकार गरइ वा पालन गरइ ठिक बइने।” 22तब मान्छेल्को भिड पावल र सिलासकर बिरोदनाइ बाजइ लाग्ला। सहरकराइ हाकिमकिन पावल र सिलासकर लुगा च्यातिकइ फ्याङ्दिल्याक र लठ्ठिन हिर्काइनार आग्या दिल्याक। 23होल्किन ब्यासिकइ लठ्ठिन हिर्काइल पछि पावल र सिलासलाइ झ्यालखन्डनाइ लाकाइल्याक र झ्यालखन्डकर हाकिमलाइ ह्य दुइटाल्काइ उम्कइ बइसक्नार गरिके थुनइ बाजिके आग्या दिल्याक। 24इन्खा आग्या पाइल पछि झ्यालखन्डकर हाकिमिन होल्काइ झ्यालखन्डकर सेब्बे भन्दा भित्र कोठानाइ लाकाइके होल्को गोडनाइ ठिङ्गुरो ठोकिके धर्ल्याक।
25आदा रातदिस पावल र सिलास पार्थना गर्तिन परमेसोरकर भजन गाइधर्लाइ रइला। आने कइदिल्किन चाइ सुनिधर्लाइ रइला। 26तब एक्कासि बड्खो भुइचालो जाल्ते, र झ्यालखन्डकर जगलत हल्लिल्ते, सेब्बे ढोका उघ्रल्ते र सेब्बाल्को बन्धनलत फुक्लल्ते। 27अनि झ्यालखन्डकर हाकिम निन्राबान बिउँझिले, र झ्यालखन्डकर ढोकालत उघ्रिल देखिके सेब्बाइ कइदिलत भाग्ला बाजिके ठान्ले। होइहुदान आफ्ने तरवार झिकिकइ आफिलाइ मारइ हेर्ले। 28ह्य देखिके पावलिन साराइतिन बाज्ले, “तुइनिन आफिलाइ केइ हानि जुनगर, हाइ सेब्बाइ इछि आछे।”
29ह्य सुनिके हाकिम बत्ति मागिकइ कुत्तिन भित्र जाइले र डरिन काम्तिन पावल र सिलासकर अगाडि घोप्टो पर्ले। 30अनि हाकिमिन होल्काइ बाइर आनिकइ सोद्ल्याक, “मुक्ति पाइलाइ मुइनिन केति गरइ पर्छइ?”
31होल्किन बल्-ल्याक, “पर्भु येसुलाइ बिस्वास गर, अनि तुइ र तोर घर परिवारकिन मुक्ति पाइनार आछत।” 32होल्किन हाकिमलाइ र होक्र घर परिवारकाइ पर्भुकर बचन सुनाइल्याक। 33रातकर होइ बेला ने हाकिमिन पावल र सिलासलाइ लाकाइके घाउ धोइदिल्याक। अनि ह्व र होक्र घर परिवारकिन तुरुन्तइ बप्तिस्मा लिला। 34ह्व पछि हाकिमिन होल्काइ आफ्ने घर लाकाइके केइ खाइनार कुरो दिल्याक, र होक्र सेब्बाइ घर परिवारकिन परमेसोरलाइ बिस्वास गर्ल हुदान होलत सेब्बाइ आनन्दित हक्ला।
35अर्को दिन उज्यालो हक्ल पछि सहरकराइ हाकिमकिन सिपाइकाइ इन्खा बलिके पाठाइल्याक, “पावल र सिलासलाइ छाड्दिखन।”
36अनि झ्यालखन्डकर हाकिमिन पावललाइ ह्य कुरो सुनाल्ते, “सहरकराइ हाकिमकिन तोराल्काइ छाड्दिनार आग्या दिलाछत। अब तोरा सान्तिसिन निस्किके जाओ।”
37तर पावलिन सिपाइकाइ बल्-ल्याक, “हाइ रोमि नागरिककाइ केरकार नगरिकइ होल्किन मान्छेल्को अगाडि ठाटाइला र झ्यालखन्डनाइ पुनि थुन्ला, अखन हाइलाइ सुटुक्क छाडइ चाइछत? हाइ बइजाए। होलत आफि आइके हाइलाइ निकालिके लाकाइदिखन।”
38ह्य कुरो सिपाइकिन हाकिमकाइ सुनाइला। पावल र सिलास ता रोमि नागरिक रइलासइ बाजिके था पाइके होलत डाराइला। 39हाकिमलत आइके होल्कोसिन माफ माङ्ला, अनि पावल र सिलासलाइ झ्यालखन्डबान बाइर लाकाइके “हाम्रो सहर छाडिके जाइदेउबे” बाजिके बिन्ति गर्ला। 40झ्यालखन्डबान निस्किके होलत लिडियाकर घरनाइ जाइला। उछिका होल्किन बिस्वासिल्काइ भेटघाट गरिके उत्साह दिके उछ्यान हिन्ला।
Currently Selected:
पेरित 16: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
