पेरित 11
11
पत्रुसकर बयान
1यहुदियानाइ हक्नाराइ पेरितकिन र पर्भुनाइ बिस्वास गर्नाराइ दाजि-भाइकिन आने जातकराइ मान्छेल्किन पुनि परमेसोरकर बचन सुइकार गर्ल कुरो सुन्ला। 2जब पत्रुस यरुसलेमनाइ आइले, तब खतना गरइ ने पर्छइ बाज्नाराइ यहुदि बिस्वासिल्किन इन्खा बाज्तिन पत्रुसकर बिरोद गर्ला, 3“तुइ किनारइ खतना बइगर्लाइ मान्छेल्कोसिन बसिके खाइपि गर्लइ?”
4तब पत्रुसिन केति-केति हक्ल रल्ति, ह्व सेब्बे कुरो सुरुसिन ने सुनाइ लाग्ले, 5“मुइ योप्पा सहरनाइ पार्थना गरिधर्तिन ध्यान-मग्न हक्ल बेला मुइनिन एउटो इन्खा दर्सन देख्नाइ, स्वर्गबान एउटो बड्खो तन्नाजिन्खाए चार कुना बाँदिकइ झरिधर्ल देख्नाइ, र ह्व मुइ हक्लनाइ आल्ते। 6मुइनिन मजसिन हेर्तिन उछिका धर्तिनाइ हक्लाइ घरपालुवा र बनकराइ जनाबरलत, घिस्रिनाराइ जन्तुलत र आकासकराइ चरिलत देख्नाइ। 7ह्व पछि मुइनिन इन्खा बाज्ल एउटो आवाज सुन्नाइ, ‘ए पत्रुस, उठ र हेल्काइ मारिकइ खा।’ 8तर मुइनिन बाज्नाइ, ‘बया पर्भु, इन्खा असुद्द अथवा अपबित्र कुरो मुइ कइले पुनि खाइल बइने।’ 9स्वर्गबान फेरि मुइ इन्खा बल्ल आवाज सुन्नाइ, ‘परमेसोरिन सुद्द बानाइल थोकलाइ तुइ असुद्द जुनठान।’ 10तिन चोटिसम्म इन्खाए हकल्ते, र ह्व सेब्बे थोक फेरि स्वर्गदिस लाकाल्ते। 11होइ बेला ने कइसरियाबान मुइलाइ लेइ पाठाइलाइ तिन्टाइ मानुसलत हाइ बस्ल घरनाइ आइपुग्ला। 12पबित्र आत्मान मुइलाइ ह्व मान्छेल्कोसिन नअनकनाइकइ जा बाजिके बल्ले। मुइसिन हक्लाइ ह्य छउटाइ बिस्वासि दाजि-भाइलत पुनि मोर साथ लाग्ला, र हाइ सेब्बाइ कर्नेलियसकर घरनाइ जाइले। 13कर्नेलियसिन आफ्ने घरनाइ एउटो स्वर्गदुत देखा पर्ल कुरो हाइलाइ बल्ले। ह्व स्वर्गदुतिन होलाइ इन्खा बल्ल रल्ति, ‘योप्पा सहरनाइ पत्रुस बल्ल सिमोनलाइ बालाइ पाठाउ। 14होइनिन तुइलाइ बचन सुनाइनारआछ, ह्व बचनिन तुइ र तोर सेब्बाइ परिवारकिन मुक्ति पाइनारआछत।’ 15जब मुइ बाजइ थाल्नाइ, तब सुरुनाइ हाइउप्रान पबित्र आत्मा आइल जिन्खाए होलत उप्रान पुनि आइले। 16अनि पर्भुन बल्ल ह्य बचन मुइलाइ याद हक्ले, ‘युहन्नान ता पानिन बप्तिस्मा दिले, तर तोराल्किन चाइ पबित्र आत्मान बप्तिस्मा पाइनारआछो।’#पे १:५ 17पर्भु येसु खिरिस्टनाइ बिस्वास गर्तिन परमेसोरिन हाइलाइ जुन्टो बरदान दिले, होल्काइ पुनि परमेसोरिन होइ बरदान दिल्याक। होइहुदान परमेसोरलाइ रोकइ सक्नार मुइ कुन हो र?”
18ह्य कुरो सुन्लपछि यहुदि बिस्वासिल्किन पत्रुसलाइ बिरोद गरइ छाड्ला, र इन्खा बाज्तिन परमेसोरकर महिमा गर्ला, “अब ता आने जातिल्काइ पुनि परमेसोरिन आफ्ने पाप मानिलिके छाड्नार र अजम्बरि जिबन लिनार अनुमति दिलसइ।”
एन्टिओखियानाइ मन्डलि
19इस्तिफनसलाइ मार्ल पछि सतावट सुरु हकल्ते, र बिस्वासिलत छरपस्ट हकिके कोइ फोनिके छेत्र, कोइ साइपरस टापु र कोइ एन्टिओखिया सहरसम्म पुग्ला। होल्किन यहुदिल्काइ मात्र सुसमचार सुनाइला।#पे ८:१-४ 20तर होलत मद्दे कोइ-कोइ चाइ साइपरस र कुरेनिबान आइलाइ बिस्वासिलत रइला। होल्किन एन्टिओखियानाइ आइके आने जातिल्काइ पुनि पर्भु येसुकर बारेनाइ सुसमचार सुनाइला। 21पर्भुकर सक्ति होल्कोसिन हक्ल हुदान धेराइ मान्छेलत बिस्वास गरिके पर्भुनाइ फर्किला।
22जब ह्य खबर यरुसलेमकर मन्डलिनाइ पुगल्ते, तब मन्डलिकराइ अगुवाल्किन बारनाबासलाइ एन्टिओखियानाइ पाठाइला। 23बारनाबास एन्टिओखियानाइ आइपुग्तिन परमेसोरिन ह्व मान्छेल्काइ दया गर्ल र आसिस दिल देखिके एकदम खुसि हक्ले, र बारनाबासिन होल्काइ सेब्बे हिर्दयन पर्भुनाइ बिस्वासि हकिधरइ बाजिके उत्साह दिल्याक। 24किनारइभने बारनाबास बिस्वास र पबित्र आत्मान भरिपुर्न हक्ल असल मानुस रइल, अनि होइनिन धेराइ मान्छेल्काइ पर्भुनाइ आन्ल्याक।
25ह्व पछि बारनाबास साउललाइ हेरइ टार्ससनाइ जाइले। 26बारनाबासिन साउललाइ भेट्टाइके एन्टिओखियानाइ आनल्ते। होलत धेउटाइ पुरा एक बर्ससम्म एन्टिओखियाकर मन्डलिकराइ मान्छेल्कोसिन भेटघाट गर्ला र धेराल्काइ सिकाइला। चेलाल्काइ पइलो चोटि एन्टिओखियानाइ ने खिरिस्टियन बल्ल हो।
27होइ बेला कोइ अगमबक्तालत यरुसलेमबान एन्टिओखियानाइ आइला। 28होलतमद्दे अगाबस नाउँ गर्ल एउटो अगमबक्तान ठडाइके धर्तिभरि ने बड्खो अनिकाल पर्नारआछि बाजिके पबित्र आत्माकर सक्तिबान अगमबानि गर्ले। ह्व अनिकाल पछि रोमि बड्खो राजा कलउडियसकर सासनकालनाइ परल्ते।#पे २१:१० 29इन्खा सुनिके पर्भुराइ चेलाल्किन यहुदियानाइ बस्नाराइ दाजि-भाइकाइ सायताकर लागि आफिन सक्ल जत्ता पइसा पाठाइनार पक्का गर्ला। 30इनिखे उठाइल पइसा होल्किन बारनाबास र साउलकर हातनाइ यहुदिया मन्डलिकराइ एल्डरकोनाइ पाठाइदिला।
Currently Selected:
पेरित 11: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
