पेरित 10
10
पत्रुस र कर्नेलियस
1कइसरिया सहरनाइ कर्नेलियस नाउँ हक्ल एउटो मानुस रइल। ह्व रोमि सेनाको इटालिया बाज्नार पल्टनकर कप्तान रइल। 2ह्व परमेसोरकर बचन पालन गर्नार धर्मि मानुस रइल। ह्व र होक्र सेब्बाइ परिवारकिन परमेसोरकर डर मान्तेला। होइनिन खाँचोनाइ पर्लाल्काइ खुसि मनिन सायता गर्तेल र दिन्ने परमेसोरसिन पार्थना गर्तेल। 3एक दिन दिउँसो तिन बजे पार्थनाकर समयनाइ कर्नेलियसिन दर्सननाइ परमेसोरकर एउटो स्वर्गदुतलाइ इस्पस्ट रुपनाइ आफिदिस आइधर्ल देख्ले, र इत्तिके बाज्ल सुन्ले, “ए कर्नेलियस।”
4कर्नेलियसिन डाराइतिन होलाइ हेरिधरल्ते र बाज्ले, “केति!”
अनि स्वर्गदुतिन होलाइ बलल्ते, “तोर पार्थना र तुइनिन गरिबकाइ गर्ल सायता परमेसोरिन याद गर्लाछ। 5अब तुइनिन योप्पा सहरनाइ पत्रुस बाज्नार सिमोनलाइ बालाइ मान्छेल्काइ पाठाउ। 6ह्व छालाकर काम गर्नार सिमोनकर घरनाइ बस्लाछ, होक्र घर समुन्द्रकर छेउनाइ आछि।” 7जब कर्नेलियसिन बात मार्नार स्वर्गदुत बिदा हक्ले, तब आफ्ने दुइटाइ नोकर र आफ्ने सुरछ्या गर्नाराइ मद्दे परमेसोरकर डर मान्नार एउटो सिपाइलाइ बालाल्ते, 8र होल्काइ आफिन देख्ल सेब्बे कुरो बलिके योप्पा सहरनाइ पाठाइल्याक।
9अर्को दिन होलत योप्पा सहरकर नजिक पुग्तिन दिउँसो बार बजेदिस पत्रुस पार्थना गरइ घरकर छतनाइ चड्ले। 10होलाइ भोक लागिकइ केइ खाइनार मन गर्ले, ह्व बेला आनेल्किन खाइनार कुरो तयार गरिधर्तिन पत्रुस ध्यान-मग्न हक्ले। 11होइनिन स्वर्ग उघ्रिल र उछ्यान चारे कुनानाइ बान्ल बड्खो तन्ना जिन्खाए धर्तिदिस झरिधर्ल देख्ले। 12ह्व तन्नानाइ धर्तिनाइ हक्लाइ सेब्बे थरिकराइ चारखुट्टे जनाबरलत, घिस्रिनाराइ जिबजन्तु र आकासकराइ चरिलत रइला। 13अनि पत्रुसिन एउटो आवाज सुन्ले, “ए पत्रुस उठ, र होल्काइ मारिकइ खा।”
14तर पत्रुसिन बाज्ले, “बया पर्भु, मुइनिन इन्खा असुद्द अथवा अपबित्र थोक कइले पुनि खाइल बइने।”
15पत्रुसिन फेरि इन्खा आवाज सुन्ले, “परमेसोरिन सुद्द बानाइल थोकलाइ तुइ असुद्द जुनठान।” 16तिन फेरासम्म इन्खा हकल्ते, र तुरुन्तइ ह्व तन्ना स्वर्गदिस उठाइ लाकाल्ते।
17जब पत्रुस आफिन देख्ल दर्सनकर अर्थ केति हुदो बाजिके अलमलनाइ पर्ल रइल, होइ बेला कर्नेलियसिन पाठाइलाइ मान्छेलत सिमोनकर घर पुगिके ढोका अगाडि ठडाइला। 18र होल्किन बालाइतिन सोद्ला, “पत्रुस बाज्नार सिमोन इछि बस्लाछ?”
19ह्व बेला पत्रुस आफिन देख्ल दर्सनकर बारेनाइ सोच्तिन गर्तिन पबित्र आत्मान पत्रुसलाइ बलल्ते, “सिमोन, हेठ्ठ तिन्टाइ मान्छेल्किन तुइलाइ हेर्तिन आछत। 20उठिके हेठ्ठ झर र नअनकनाइकइ होल्कोसिन जा, होल्काइ मुइनिन पाठाइल हो।” 21अनि पत्रुस हेठ्ठ झर्ले र ह्व मान्छेल्काइ बल्-ल्याक, “तोराल्किन हेर्ल मानुस मुइ ने हो। तोरा किनारइ इछि आइलाइ?”
22होल्किन बाज्ला, “हाइलाइ रोमि कप्तान कर्नेलियसिन पाठाइल हो। ह्व इमान्दार र परमेसोरकर डर मान्नार मानुस हो। होलाइ सेब्बाइ यहुदिल्किन पुनि मान गर्छत। परमेसोरकर एउटो पबित्र स्वर्गदुत कर्नेलियस हक्लनाइ देखा परिके तुइलाइ होक्र घरनाइ बालाइके तुइबान सन्देस सुनइ बाजिके होइनिन स्वर्गदुतबान आदेस पाइलाछ।” 23तब पत्रुसिन होल्काइ भित्र बालाइके सेवा सत्कार गर्ले, र ह्व दिन होलत उछि ने बस्ला।
अनि अर्को दिन पत्रुस होल्कोसिन जाइले, र योप्पानाइ हक्लाइ केइ बिस्वासि दाजि-भाइलत पुनि होल्कोसिन जाइला। 24पर्सिपल्ट होलत कइसरिया पुग्ला। कर्नेलियस चाइ आफ्ने नातेदारकाइ र नजिककराइ साथेकख्यानकाइ बालाइके पत्रुसकर बाट हेरिधर्ल रइल। 25जब पत्रुस भित्र पसइ आँट्तिन कर्नेलियसिन घोप्टो परिके होक्र गोडनाइ ढोगल्ते। 26तर पत्रुसिन होलाइ उठाइतिन बलल्ते, “उठ, मुइ पुनि ता मानुस मात्र हो।” 27तब पत्रुस कर्नेलियसिन कुरो गर्तिन घरभित्र पस्ले। उछिका पत्रुसिन धेराइ मान्छेलत जम्मा हक्ल देख्ले। 28पत्रुसिन होल्काइ बल्-ल्याक, “हाइ यहुदिल्काइ आने जातिकराइ मान्छेल्कोसिन सङ्गत गरइ अथवा भेटघाट गरइ हाम्रो धर्मकर बिरुद्द हो बाजिके तोरा सेब्बाल्काइ था ने रोइस्या। तर कुनइ पुनि मान्छेल्काइ असुद्द अथवा अपबित्र जुनठान बाजिके परमेसोरिन मुइलाइ देखाइलाछ। 29होइहुदान तुइनिन बालाइलसात मुइ नअनकनाइकइ आइनाइ। अब बाज, मुइलाइ किनारइ बालाइल हो?”
30कर्नेलियसिन बाज्ले, “चार दिन अगाडिकर कुरो हो। दिउँसो तिन बजेदिस मुइ घरनाइ ने पार्थना गरिधर्ल रइनाइ। एक्कासि चहकिलो लुगा लाइल एउटो मानुस मोर अगाडि ठडाइके बाज्ले, 31‘ए कर्नेलियस, परमेसोरिन तोर पार्थना सुन्लाछ र तुइनिन गरिबकाइ गर्ल सायता याद गर्लाछ। 32अब योप्पा सहरनाइ पत्रुस बाज्नार सिमोनलाइ लेइ मान्छे पाठाउ। ह्व समुन्द्रकर छेउनाइ छालाकर काम गर्नार सिमोनकर घरनाइ बस्लाछ।’ 33होइहुदान मुइ झट्टइ तुइलाइ बालाइलाइ मान्छेल्काइ पाठाइनाइ र हाम्रो लागि दुख गरिके इछिसम्म आइलइ। अब पर्भुन तुइलाइ आग्या गर्ल कुरो सुनइलाइ हाइ सेब्बाइ परमेसोरकर अगाडि जम्मा हक्लाछे।”
पत्रुसकर सन्देस
34तब पत्रुस बाजइ थाल्ले, “अब मुइलाइ पक्का था हक्ले, कि परमेसोरिन कुनुल्काइ पछ्यपात बइगर।#बेब १०:१७ 35मान्छे जुनसुके जातकर हक्दिक, परमेसोरकर डर मान्नार र असल काम गर्नार मानुसलाइ ने परमेसोरिन सुइकार गर्छइ। 36परमेसोरिन इज्राएलिल्काइ पाठाइल सन्देस, अर्थात येसु खिरिस्ट मार्फत पर्चार गर्ल सान्तिकर सुसमचार तोराल्काइ था रोइस्या, ह्व ने सेब्बाल्को पर्भु हो। 37युहन्नान पर्चार गर्ल बप्तिस्मापछि गालिल छेत्रबान सुरु हकिके सारा यहुदियाभरि फइलिल कुरो तोराल्काइ था ने रोइस्या। 38परमेसोरिन नासरतकर येसुलाइ पबित्र आत्मा र सक्तिन अभिसेक गर्ले। परमेसोर येसुसिन हक्ल हुदान येसुन मजार काम गर्तिन र दियाबलसिन सताइलाल्काइ बिसेक पार्तिन सेब्बे ठउँनाइ जाइले। 39येसुन सारा यहुदिया र यरुसलेमनाइ गर्ल सेब्बे कामकर हाइ साछि आछे। होल्किन येसुलाइ कुरुसनाइ झुन्ड्याइकइ मार्ला। 40तर तिन दिननाइ परमेसोरिन येसुलाइ मर्लबान जिउँते पारल्ते र मान्छेल्किन होलाइ देख्ला। 41सेब्बाइ मान्छेल्किन ता बया, तर हाइ जुनलाइ परमेसोरिन साछि हकइलाइ छान्ल रइल र येसु मर्लबान जिउँते हक्लपछि हाइनिन येसुसिन खाइपि पुनि गर्ले। 42येसुन हाइलाइ मान्छेल्कोनाइ पर्चार गरइलाइ र येसु मर्लाइ र जिउँताल्को न्याय गरइलाइ परमेसोरिन छान्ल ब्यक्ति हो बाजिके साछि देइलाइ आदेस दिलाछ। 43सेब्बाइ अगमबक्ताल्किन पुनि येसुकर बारेनाइ इनिखे बाज्लाछत, ‘येसुनाइ बिस्वास गर्नाराइ सेब्बाल्किन येसुकर नाउँनाइ पापबान छेमा पाइनार आछत।’”
आने जातिल्किन पबित्र आत्मा पाइलाइ
44पत्रुसिन ह्य कुरो बाज्तिन-बाज्तिन बचन सुन्नाराइ सेब्बाइ उप्रान पबित्र आत्मा आइले। 45आने जातिल्काइ पुनि परमेसोरिन पबित्र आत्माकर बरदान दिल देखिके पत्रुस सँगिन आइलाइ यहुदि बिस्वासिलत छक्क पर्ला। 46किनारइभने होल्किन आने भासानाइ बाज्लाइ र परमेसोरकर पर्सन्सा गरिधर्ल सुन्ला। तब परत्रुसिन बल्-ल्याक, 47“हाइ जिन्खाए हेल्किन पुनि पबित्र आत्मा पाइलाछत। अब ह्य मान्छेल्काइ पानिकर बप्तिस्मा लेइलाइ कुनिन रोकइ सक्छइ र?” 48अनि पत्रुसिन होल्काइ येसु खिरिस्टकर नाउँनाइ बप्तिस्मा लेइ बाजिके आदेस दिल्याक। तब होल्किन पत्रुसलाइ “केइ दिन हाइ सँगिन बस” बाजिके बिन्ति गर्ला।
Currently Selected:
पेरित 10: MAJH
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
