Luk 23

Yeesu ɓayuuɗ ɗiskaŋ Pilaat na ɗiskaŋ Herod

1Ŋ finho woo keem, ɓooɓa nikee ŋ coha jen kurukka, ɓa ɓayya Yeesu ŋ Pilaat. 2Wa ɓa ree ɓa yambeeɗa ɗe in ci an : « Ƴaarii ɓoo raak ɗe ɓekeeɗa ɓi kur ki ŋ yoond, a sangoheeɗa ɓa wirind buura yakkaŋ Rom lempo ; te a nam tum haf ce Mucɗohi Kooh gapohe, weɗ buur. » 3Pilaat meekissa ɗe ne : « A fu buuriŋ Yawuut ci e ? » Yeesu loffa ɗe ne « Fu woyiɗa. » 4Pilaat woosa kilifaacaŋ seeƴkiɗoh ca na mboolnda ne : « Ŋ hotɗi ne ƴaari ɗaliɗ waas. » 5Waaye ɓa ñaakka nga, ɓa woyeeɗa ne : « Ŋ jangɗohiŋ ɗe, ƴaarii na ɓeke ɓooɓi ŋ yoond, a camboh Galile po ndii, a wiliɗ Yudee jen naa. »

6Wa Pilaat kerah woo ceem a meeksohha andi Yeesu gen Galile. 7Wa a inah ne Yeesu puloh Galile, wa Herod adgohee, a tuuƴca ɗe nga ɗe. Raak Herod nam nik ŋ Yerusalem ŋ neeh caam.

8Herod maañeen waaɗ hot Yeesu sagu in ca a kerhee nga ɗe, tahha po, wa a hot ɗe, a summba nga lool ; a liiɓee ne a hey tume keemaan ŋ fikiice. 9A meekissa ɗe meeksoh laayiɗ waaye Yeesu lofɗi ɗe ali in. 10Kilifaacaŋ seeƴkiɗoh caŋ waasiŋ Musaa na jangɗohoh caŋ wa nikee nga, ɓa yambeeɗa ɗe yamb na hatil. 11Herod na soldaar caŋ ɗe ƴissuutɗeeɗa ɗe, ɓa ɓekiɗta ɗe kulɓa moɗoh na moɗoh, ɓa njembteeɗa ɗe, Herod tuuƴca ɗe ŋ Pilaat.

12Pilaat na Herod kerhiɗoheeɗi waaye ina kooɗoh mbaɗi, ɓa nikka nawle.

Pilaat eɗohiɗ Yeesu ne a apu

13Wa ɓa ree ŋ Pilaat, a cohɗohha kilifaacaŋ seeƴkiɗoh ca, na yakak ca, na mboolnda jen. 14A woosa ɓa ne : « Ɗu komiɗ to ƴaarii, ɗu woo ne a na ɓeke ɓi kur ki ŋ yoond. Ŋ meeksiɗ ɗe ŋ fikiiɗu te ŋ hotɗi ali in ŋ in ci ɗu na yambee ɗe. 15Te Herod namɗi hot in, weɗ tah a tuuƴissa ɗe ndii ; mbaa a haɓiɗɗi ini a joy apohu. 16Kon ŋ hey ɗe laɓɗuke, ƴut ɗah, ŋ faɗis ɗe. » [17]#23:17 Ngaŋ Fiis ci maañiɗ ci, cum raak ayaanii : "Raak, Paak nu ree ɗah, Pilaat joyeen ɓa faɗsiɗ ambuuɗ yino." Waaye Fiis ci uup woor ngaŋ ci maañiɗ ci ris woti raakɗi woo keem. 18Ɓa hunnda ɓa woyeeɗa ŋ ɗafka ne : « Apɗuka ƴaarii te fu faɗsiɗ ɓoo Barabaas. » 19Raak, a yi Barabaas a ɓaahohiɗ ŋ yoond ŋ kur ka te a apeen ɓo', weɗ tahee po a ɗaakuusa ŋ kasoona.

20Waaɗa Pilaat waaɗee faɗis Yeesu, tahha po a woyisseeɗa na mboolnda ; 21waaye ɓa leehkeeɗa ne : « Daaƴaa ɗe ŋ kurwaa ! Daaƴaa ɗe ! » 22Pilaat woyissa ɓa, wa nikka waasi kaahayɗoh, ne : « Moo, ƴaari tum ye in moɗaaɗi ? Ŋ hotɗi ali ini joy ɗe tah apu, weɗ tah, ŋ hey ɗe laɓɗuke, ƴut ɗah, ŋ faɗis ɗe. » 23Waaye ɓa taalndiɗta ɓa leehkeeɗa ŋ ɗafka ne : « A daaƴsaat ŋ kurwaa ! » Leehuk caŋ ɓa ɓayndohha Pilaat, 24a tufukka ɓa tumiɗ ini ɓa meeksohe. 25A faɗsiɗta ɓa ƴaara ɓa meeksohe, ya ɗaaksee ŋ kasoona sagu ɗuuɗa a ɗuuɗɗee kur ka na apa a apee ɓo'. A eɗta ɓa Yeesu ne ɓa tum ɗe ini ɓa waaɗee nga ɗe.

Yeesu daaƴuuɗ

26Wa ɓa ɓayee Yeesu, ɓa cohha na ƴaar puloh ɓak caŋ yohon ca, teeku Simong gen Sireen. Ɓa ammba ɗe, ɓa ɓayɗukohha ɗe kurwaana, a ñaakeeɗa ŋ Yeesu. 27Ɓi ɓo' laayiɗ ñaakeeɗa nga ɗe ; ɓi ɓitiɓ nga ɓa fuɗeeɗa, ɓa miskiɗkeeɗa sagu Yeesu. 28A yurhiɗkohha na ɓa, a woosa ne : « Ɓitiɓ ciŋ Yerusalem, kinaat to fuɗ, fuɗaat kay haf ɗu na kuɓuuciŋ ɗu, 29laam jamano wii hay ɓa hey woye ne : “ Ɓitiɓ ci jaasiriɗ ci, ɓi moosɗi raakoh kuɓu te ɓa moosɗi ɓapɗoh, ɓa neɓɗiɗ. ” 30Te ɓooɓi hey woye tangooci njooliɗ ci ne : “ Keenaat ŋ ɗafuk ɓoo ! ” ɓa woo tangoocum ne : “ Ulaat ɓoo ! ” 31Moo, kidig iiri tumu an ɗah, kidig suyiɗ tumsan na ? »

32Raak ɓa ɓayndoheen tumoh moɗaaɗi kanak ne ɓa nam ɓa ap na Yeesu. 33Wa ɓa kaɗ po ɓa reesa ɗiska na woyse "Ƴoh-haf", ɓa daaƴca ɗe ŋ kurwaa. Ɓa nammba daaƴ tumoh moɗaaɗiica kanak ca ŋ kurwaa, yii lahha ɗe yaah-ñaahum, yinni lahha ɗe ŋ yaah-sing. 34Yeesu woosa ne : « Baab ɗaasaa ɓa, ɓa inahɗi ini ɓa na haɓɗe. » Ɓa piilohha kulɓaacaŋ ɗe ne ɓa paysoh ca. 35Ɓooɓa nikee markeeɗa ini raak. Kilifaacaŋ Yawuut ca njembteeɗa ɗe, ɓa woyeeɗa ne : « A mucɗiɗ ɓinooɓi, a mucɗaat haf ce ne a yi Mucɗohi Gapohse, ɓoyi Kooh tan ɗah. » 36Soldaar ca reɓpa nga ɗe ne ɓa nam ɗe njembit, ɓa eɗeeɗa ɗe masuɓ raakiɗ bineegar, 37ɓa woyeeɗa ne : « Nik ne a fu buuriŋ Yawuut ci ɗah, mucɗa haf fu. »

38Inii fiisseen wa tiimmba hafiŋ ɗe an : « Yii a yi buuriŋ Yawuut ci. »

39Yino ŋ tumoh moɗaaɗiica daaƴsee ŋ serooce ɓaseeɗa ɗe an : « A fu Mucɗohi Gapohse haa e ? Mucɗa haf fu, fu muciɗ ɓoo book. » 40Yinoora ngassa ɗe an : « Fu nupɗi Kooh e ? Te ŋ hot fu na ƴaari a ɗu ɓaah miskiɗi. 41Ini mi na ɗa tumu wa waas, sagu in ci ɓoo haɓiɗ, waaye ƴaarii tumɗi ali in. » 42A woyissa ne « Yeesu, kinaa so alkoh, ne fu aase ŋ Nguuriŋ ɗa ɗah. » 43Yeesu loffa ɗe ne « Ñam na woyee ɗa wa te wa keeh, woti fu hey hune na so Aljana. »

Kakaan kaŋ Yeesu

44-45Wa nikee ŋ njooloor, nohi ɗasɗukka, kehƴi jen nikka ŋ ñuus ini ree wahtu kaahay. Weɗi ridoona ɗasɗee Ɗiska Hoolohngaanaŋ Kahnaŋ Kooh faarkoh tareet ŋ leerni, ini kooɗoh ɗafka po kehƴa.#Pula 26:31-33 46Yeesu leehukka ŋ ɗafka a woosa ne : « Baab, ŋ wikiɗ kiñin kiŋ ngo ŋ yaah ciŋ ɗa. » Wa a woo woo keem, a nguɗta. 47Ƴaara adgohee soldaar ca hotta ina raak, a yakiɗta Kooh an : « Wa keeh kat ne ƴaarii nikee ɓo' yurhiɗ. » 48Mboolnda hayee ŋ ɗiska jen ne ɓa marak, hotta ina raak, ɓa haadeeɗa, ɓa laɓɗeeɗa daɗ ciŋ ɓa, ɓa miskiɗkeeɗaa. 49Nawleecaŋ Yeesu jen cangtiɗukka ɓa markeeɗa. Ɓitiɓ ca pulohee na ɗe Galile nikee nga.

Yeesu ɓekuuɗ ŋ ruy-ruy

50-51Wa raakeen ƴaar teeku Suseef, a genee Arimate ŋ Yudee. A ɓaahee ŋ atte'oh ca yakak ca waaye a huneeɗi ŋ ina ɓa kooɗkee po ɓa mirndohhaa tum. A nikee ɓo' baahiɗ, yurhiɗ, a ɓaah ŋ ɓi sekee hayiŋ Nguuriŋ-Kooh. 52A kaɗta ŋ Pilaat ne yeem eɗ ɗe fiɗaafaŋ Yeesu. 53A yipkiɗtaa ŋ kurwaana, a lemessaa na uuf, a ɓekkaa ŋ ruy-ruy haɓɗuuɗ ŋ atoh yakak, wi ali ɓo' moosɗi ɓekohu.

54Wa nikee ŋ mbehi na kooɗkohse, raak mbehi na iɗsiɗkohse aaseeɗa. 55Ɓitiɓ ca pulohee na Yeesu Galile taambiɗta Suseef, ɓa hotta ruy-ruya na findi fiɗaafa ɗaakohu nga. 56Ɓa haadda ne ɓa haɓɗa cuuraay na laackoloñ eeñɗohaa wa. Waaye mbehi na iɗsiɗkohse cammba, ɓa iɗsiɗukka findi waasiŋ Musaa woyoha.

Currently Selected:

Luk 23: YM

Highlight

Copy