Luk 24

Yeesu hultiɗ

1Ŋ mbehi taamb ŋ wi na iɗsiɗkohse na ɓaaɓa teel, ɓitiɓ ca ɓayya cuuraay ca ɓa haɓɗee, ɓa kaɗta ruy-ruyaŋ Yeesu. 2Wa ɓa ree, ɓa raak atoh fa yakka rangee wa pilnginuuɗ. 3Ɓa aassa, waaye ɓa hotɗi fiɗaafaŋ Heɗ ɓoo Yeesu nga. 4Ɓa inahɗi ini ɓa haɓɗan, weɗi ɓo' kanak teeɓkoh ɓa, ɓekkiɗ kulɓa na melciɗe melciɗ. 5Ɓa tiitta, ɓa hiirra kip. Ƴaaɓa woosa ɓa ne : « Wa ye tah ɗu markee ɓoyi na pese ŋ kaaniɗ ci ? 6A nikɗi ndii, a hultiɗuuɗ ! Naandsukaat ina a woyee ɗu, wa a nik na ɗu ŋ Galile. 7A woyee ne : “ Kuɓkiŋ ɓoyi joyiɗ eɗu bakaaɗoh ci, ɓa daaƴ ɗe ŋ kurwaa, ŋ neeha kaahayɗoh a hulit. ” » 8Ɓa naandsukka woo caŋ Yeesu.

9Wa ɓitiɓ ca puloh ruy-ruya, ɓa kaɗta naandsuka in ceem jen Apootar ci ndaŋkiyaah na yinooci (11) na ɓa tas jen. 10Mari Makdala na Saan na Mari yaay ɓi Saak na ɓi ɓitiɓ wiiriis, ɓeɗ woo Apootar ci wa. 11Waaye ɓeem kosɗi ɓa, ɓa liiɓpa haa ne ɓa na woye mbalay. 12Waaye Piyeer kurukka, a yurahha ŋ ruy-ruya na mbup. Wi a ree, a huusukka, a hotɗi ali in nga ɗal uufa ; a haadda, a liiɓsiɗoheeɗa ŋ ini raak.

Ŋ waas Emayuus

13Mbaɗi taalube kanak nga ɓa, kaɗeeɗa kur ka na woyse Emayuus, harmban wa na Yerusalem joyiɗ ree tiindu wahtu kanak. 14Ŋ waasa, ɓa ɓeesɗoheeɗa ŋ in ca raakee jen. 15Weɗi Yeesu ŋ haf ce reɓoh ɓa, a hunnda na ɓa, 16waaye in tahha po ɓa minɗi ɗe inhis. 17A meekissa ɓa ne : « Ɗu na ɓeesɗohe ye an ŋ waasi ? » Ɓa tufukka, ɓa soossa. 18Ƴaara teeksee Kelewopaas nga ɓa woosa ɗe ne : « Moo, hanaa ya fu dong nik ŋ Yerusalem inhaaɗi ini raak nga neeh cii ? »

19Yeesu woosa ɓa ne « Wa ye raak ? » Ɓa loffa ɗe ne « Ini rahas Yeesu yi gen Nasareet. Ŋ fiki Kooh na fiki Israayel ci jen a nikee woosuuɗ yakak ŋ in ci a haɓɗee na woo ciŋ ɗe. 20Waaye kilifaaciŋ seeƴkiɗoh ciŋ ɓoo na ɓi adgoh ɓoo ɓi Yawuut ci eɗohha ɗe ne a apu, ɓa daaƴɗukka ɗe ŋ kurwaa. 21Ɓoo ambeen ne a yi na hee mucɗe Israayel, waaye ina wa raakoh poyi wa tumiɗ neeh kaahay. 22Ɓi ɓitiɓ nga ɓoo deey, feyiɗ ɓoo woti ; ɓa ɓaaɓ-teelkiɗ ruy-ruyaŋ ɗe, 23waaye ɓa raakɗi fiɗaafiŋ ɗe nga. Wa ɓa hay, ɓa woo ne ɓi malaaka teeɓkiɗ ɓa nga, ɓa woosa ɓa ne a yii pes. 24Ɓi ɓo' nga ɓoo namiɗ kaɗ ruy-ruya, ɓa hotta ini ɓitiɓ ceem woo, waaye a yi ŋ haf ce, ɓa hotɗi ɗe. »

25Yeesu woosa ɓa ne : « E ɗu ñaañaaɗi, te keeñ ciŋ ɗu gaawɗi kos in ci woosuuɗ ci woo jen. 26Andi Mucɗohi Gapohse joyeeɗi yaaɓoh ɗaa ne a han aas ŋ ndamiŋ ɗe ? » 27A teeɓpa ɓa in ci Fiis ci woo nga ɗe jen, cambohha ŋ teereeciŋ Musaa po ŋ ciŋ woosuuɗ ci jen.

28Wa ɓa hee ree kur ka ɓa kaɗohe, a mannda na ɓoyi na taalndiɗe ; 29waaye ɓa ammba ɗe, ɓa woosa ɗe ne « Wela fu tas na ɓoo, nohi weɗi muy, Kooh hooɓiɗ. » A aassa, a tassa na ɓa. 30Wa ɓa hee ñame, a ɓayya mbuurnda, a corkiɗta Kooh, a nguɗsohhaa, a eɗeeɗa ɓa wa. 31Teemb ndeem ina tahee po ɓa mineeɗi ɗe inhis, nihsukka, ɓa hotta ne a yi, waaye a saayya ŋ fikiiɓa. 32Yaa nu nga ɗah, woosa morom ce ne : « Ŋ waasi, wi a teeɓee ɓoo ini Fiis ci woo, fu yegɗi in ŋ keeñiŋ ɗa e ? »

33Ɓa jaarra kuruk, ɓa dokukka Yerusalem, ɓa raakka Apootar ci ndaŋkiyaah na yinooci (11) na ɓooɓa nikee na ɓa cohiɗ, 34woyeeɗa ne : « Wa keeh ne Yeesu kilifaani hultiɗuuɗ ! A teeɓiɗ haf ce Simong ! » 35Ƴaaɓa kanak ca nammba naandsuk ina rahas ɓa ŋ waasa, na findi ɓa inhisoh Yeesu wa a nguɗsohee mbuurnda.

Yeesu teeɓiɗ taalubeeciŋ ɗe a yi pes

36Wa ɓa jombee ŋ ineem, ɗekka po a yi Yeesu, a nikka ŋ leerooɓa, a woosa ɓa ne : « Nikaat ŋ jam. » 37Ɓa feyuusa lool, ɓa liiɓee ne a husiɗ. 38Yeesu woosa ɓa ne « Wa ye fey ɗu po ɗu liiɓsiɗohee ŋ ineem ? 39Markaat yaah ciŋ ngo na kot ciŋ ngo, a ñam. Laalaat to ɗu marak ! Husiɗ na raake faan na ƴoh findiiso e ? »

40Wa a woo ɓa ineem, a teeɓpa ɓa yaah ciŋ ɗe na kot ciŋ ɗe. 41Ɓa sumeen te ɓa feyseen weɗ tah ɓa areeɗi min kos. A meekissa ɓa andi ɓa raakiɗ kañam ndaam. 42Ɓa eɗta ɗe nguɗ cuurund utuuɗ. 43A ɓayyaa, a ñammbaa ŋ fikiiɓa. 44Ƴutta, a woosa ɓa ne : « Naandsukaat ini ŋ woyee ɗu wa ŋ nikoh na ɗu ne : “ In ci woyu nga so ŋ waasiŋ Musaa na teereeciŋ woosuuɗ ci, na Sabuur joyiɗ raak jen. ” » 45A rangissa liiɓohaaciŋ ɓa ne ɓa min inah ini Fiis ci tokis. 46A woosa ɓa ne : « Inii weɗ Fiis ci woo : “ Mucɗohi Kooh gapoh hey yaaɓɗasse, a hey apse, a hulit ŋ mbeha kaahayɗoh. 47Te ŋ cuuɓ ciŋ adinaani jen, te wa cambohsan Yerusalem, ɓooɓi hey woyse ŋ tiikiŋ ɗe ne, ɓa ɓoƴsohaat pesohaaɗ, ɓa ɗaasu bakaaɗ ciŋ ɓa. ” 48E ɗu seedeeciŋ in ceem. 49Ŋ hey ɗu woosohe ini Baabiŋ ngo gapoh, kon tasaat ŋ Yerusalem paaɗ po ɗu ɓeku hatili pulohan ŋ ɗafki. »

Yeesu cootiɗ ŋ eel ci

50Ŋ finho ineem, Yeesu pulla na ɓa, ɓa yurahha kur ka na woyse Betani. Ŋ ndaam a meeɓpa yaah ciŋ ɗe, a barke'iɗta ɓa. 51Wi a na barke'ɗee ɓa, a saɓsukoheeɗa na ɓa, a rapɗasseeɗa ŋ Eel ci. 52Ɓa ƴekiɗta ɗe, ƴutta, ɓa dokukka Yerusalem sumoh na sumoh. 53Ŋ neeh caam, ɓa gijisɗi Kahan Kooh, ɓa taalndiɗta, ɓa yakɗeeɗa Kooh.

Currently Selected:

Luk 24: YM

Highlight

Copy