Camba 28

1Weɗ Isaahha ɓeeɗkoh Yaŋhooɓa a kiimiɗta ɗe barke, a dennga ɗe an : « Kana ɓay ɓitiɓ muk ŋ cafaƴ ci gen ndii, Kanaan, 2kaɗa Paddan-Aram, ŋ Betuwel yi rim yaay ɗu, fu ɓay ɓitiɓ ngaŋ kuɓuucaŋ taanum fu Laban yi taambɗoh yaay ɗu. 3Koohi Min onaat ɗa barke, a tum ɗa ɓasil po fu nik caaciŋ ɓi cuuɓi cuuɓ. 4Kooh onaat ɗa barkeeni a onee Ibrahiima, fu na ɓi rimkohan nga ɗa po fu raak kur ki fu nikoh jaambur wii, wi a gapee Ibrahiima. » 5Isaahha tuuƴca Yaŋhooɓa a kaɗta Paddan-Aram ŋ taanum ce Laban, kuɓu Betuwel yi ɓaah ŋ cuuɓiŋ Aram ci, a nikka taambɗoh Rebeka, yaay ɓi Yaŋhooɓa na Esaaw.

6Ŋ ini kaɗ ŋ Esaaw, a kerhiɗ ne Isaahha kiimɗiɗ Yaŋhooɓa barke po a tuuƴiɗ ɗe Paddan-Aram ne a waak ɓitiɓ nga te a dengiɗ ɗe ne a kanaat ɓay ɓitiɓ ŋ cafaƴ ciŋ Kanaan. 7A kerhissa ne Yaŋhooɓa teyɗukɗiɗ baab ɓa na yaay ɓa po a cootiɗ Paddan-Aram. 8Weɗ Esaaw inhoh ne cafaƴ ciŋ Kanaan neɓɗi baab ɓa. 9Wa tahha po a kaɗta ɓayya ɓitiɓ ŋ kuɓuuciŋ Ismaayla yi kuɓkiŋ Ibrahiima. A ɓayya Mahalat taambɗoh Nebayot, a ɓaatta ngaŋ ɓa a raake.

10Yaŋhooɓa, ŋ pulohaŋ ɗe Beerseba, a yurah Haaraan. 11A kaɗoh kaɗoh po ɗiska noha muyoh ɗe, a parahha ŋ atoh ca ŋ ɗiska, a tiknukkaa, a neehha nga. 12A heeƴca inaa feyohiɗ : Seel yipohha kehƴi po wa maannga ŋ eel ca, malaakaaciŋ Kooh rapeeɗa nga, ruhseeɗa. 13An ŋ heeƴi, Nikiɗi nikee ŋ serooce a woosa ɗe ne : « Ñam Nikiɗi, Koohiŋ caac ɗu Ibrahiima na baab ɗu Isaahha. Kehƴi fu faankoh wii, ŋ hey ɗa wa one, fu na ɓi na hee rimkohe nga ɗa. 14Ɓi rimkohan nga ɗa hey laaye po ɓa mand na merhey. Ɗu hey ɓaatke ŋ ɓak ci jen : pulohaaɗ-noh na muyohaaɗ-noh, yaah-sing na yaah-ñaahum. Cuuɓ ciŋ kehƴi jen hey raake barke saguufu, fu na ɓi na hee rimkohe nga ɗa. 15Mi yii na ɗa te ŋ hey ɗa niiɗe ɗisik nu fu kaɗ ɗah. Ŋ hey ɗa dokne ŋ kehƴii laam ŋ hey ɗa tumɗe in ci ŋ gap ɗa te ŋ moosanɗi ɗa faɗoh. »

16Wa Yaŋhooɓa yunuk a woosa ne : « Ndekete yoo, Nikiɗi yii ŋ ɗiski te ŋ inheeɗaa. » 17A neƴƴohha, a woyissa ne : « Ndii deey wa kaañaah haa, wa nikɗi ɗisik wiiriis ɗal kahan Kooh te weɗ yahndeeriŋ eel ci. »

18Wa Kooh wiis na ɓaaɓa Yaŋhooɓa kurukka teel, a ɓayya atoh fa a tiknukohe, a yippaa, a ɓayya diwliin a yiiffaa ŋ ɗafuk wa. 19A teekka ɗiska Betel (kahan Kooh). Waaye kur ka teeksee Luus ŋ ɗeɓgaan. 20Ƴutta, a gapukka an : « Kooh hun na so, a tufkoh ho ŋ ɓaaɓiŋ ngo, a on ndo kañam na ɓekkaah, 21te a amboh ho po ŋ dokuk kahan baab ɓoo moɗoɗ ɗah, ŋ ineem a yi Nikiɗi, a yi nikan Koohiŋ ngo. 22Te atoh fi ŋ yip inhisoha wii, wa hey nike kahan Kooh. Ndaŋkiyaah nu a tumiɗ to ɗah, ŋ hey ɗe eɗe yinooriŋ wa. »

Currently Selected:

Camba 28: YM

Highlight

Copy