Camba 20

Ibrahiima, Saarata na Abimelek

1Ŋ jamanoonaam, Ibrahiima pulohha ndeem, a kaɗta Negef, a yippa ŋ harmban Kades na Suur, a kurkissa nga, a kaɗta Gerar. 2Ŋ nikohaahaŋ ɗe ŋ Gerar, Ibrahiima woyeen ne, a yi na ɓitiice Saarata, ɓa taambɗoh taambɗoh. Abimelek, buuraŋ kur ka, woossa ɓooɓaŋ ɗe ne ɓa ɓayiɗ ɗe Saarata ɓitiɓ. 3Ŋ wek, Kooh teeɓukka Abimelek ŋ heeƴ, a woosa ɗe ne : « Fu mand na kaaniɗ, laam ɓitɓi fu ɓay, a ɓitiɓ jaambur. »

4Raak Abimelek raawɗi hun na Saarata, a woosa Kooh ne : « Heɗ ɓoo, hanaa fu heyɗi ɗumbe ɓooɓiŋ kur kii ŋ ini ɓa inahɗi ? 5Laam Ibrahiima a yi woyee so ne ɓa taambɗoh taambɗoh, te yi ɓitɓi nameen ndo woo ne ɓa taambɗoh. Wi ŋ haɓɗee ineem, ŋ tuma na liiɓohaaɗ moɗiɗ na yaah hooliɗ. »

6Kooh woyissa ɗe ŋ ɗooƴ heeƴi ne : « Ee, mi sah, ŋ inhiɗ ne ini fu tum fu tiiɗaa, weɗ tah ŋ hondohha ɗa tooñ njo, ŋ faɗɗi ɗa ne fu hun na ɗe. 7Ŋ ɗiski wa nik ndii wika ƴaari ɓitiice, laam a woosuuɗ, te a hey ɗa kiimɗe, fu muc ŋ kakaan kii ; fu tumɗaa ɗah, inha ne fu hey kaane, fu na ɓooɓiŋ ɗa jen. »

8Wa Abimelek kuruk na ɓaaɓa teel, a ɓeeɗukka dag caŋ ɗe jen, a naandsukka ɓa ini raak, ɓa neƴƴohha lool. 9A ɓeeɗukka Ibrahiima, a meekissa ɗe ne : « Fu haɓiɗ ɓoo ye wii ? Ŋ tum ɗa ye po wa tahha ɗa ɓek ɓoo bakaaɗi yakkii, mi na ɓooɓiŋ ngo ? Fu tumiɗ ini ɓo' joyɗi tum. » 10A ɓaatta nga ne : « Mi yii meekis ɗa, wa ye ɓek ɗa ŋ inii ? » 11Ibrahiima woosa ɗe ne : « Ŋ liiɓee rek ne, ɓooɓiŋ kur kii ɓa nupɗi Kooh delem ne ɓa hey yo ape sagu ɓitiiso. 12Te wa nam nik keeh ne a taambɗoh ho, laam, e ɓoo ɓaah baab waaye ɓoo ɓaahɗi yaay, ŋ tokka ɗe, a nikka ɓitiiso. 13Ina Kooh pulɗoh ho ŋ kahan baab ɓoo po wi, ŋ wileeɗa, ŋ woyee Saarata ne : “ Fu waaɗta so amboh ɗah, ɗisik nu ɓoo min kaɗ ɗah, fu na woye ne ɓoo taambɗoh taambɗoh. ” »

14Wa ɓa ƴut ŋ woo caŋ ɓa, Abimelek ɓayya ɓi pe', mbaal na ɓi inoh na ñaam, ƴaar na ɓitiɓ, a eɗta Ibrahiima, a nammba ɗe wik ɓitiice Saarata. 15A woosa ɗe ne : « Kur kiŋ ngo weɗɗi, gena ŋ ɗiski neɓ ɗa. » 16A woosa Saarata ne : « Fu hot nga, mi yii eɗ taambɗoh fu ƴel haalis#20:16 ƴel haalis : ŋ jamanoonaŋ Ibrahiima, na Musaa, na ɓi woosuuɗ wiiriis, hanjar raakeeɗi, ca ƴel haalis ceɗ ɓooɓa meeɗ romoh, ca meeɗ meeɗ ɓeesu. Ƴel haalis yino, weɗ pangkoh bumit na wirndasse ŋ neeh yatuus kaɗta neeh ndaŋkiyaah. junni, wa hey teeɓohe ŋ fiki gentoh ciŋ ɗa ne, fu hooliɗ ŋ inii ; ɓooɓi jen inah ne, fu tumɗi in moɗaaɗi. »

17Wa Abimelek wik ɗe Saarata, Ibrahiima kiimmba Kooh, Kooh ngisohiɗta Abimelek na ɓitiice na ñaam ca ɓitiɓ ca po ɓa minissa raak kuɓu. 18Weem raak Nikiɗi rangeen fikiicaŋ ɓitiɓ caŋ kahan Abimelek jen po ɓa minisseeɗi raak kuɓu, sagu Saarata ɓiti Ibrahiima.

Currently Selected:

Camba 20: YM

Highlight

Copy