Camba 19

Ɓi Sodom teeɓohiɗ aƴaarkaŋ ɓa

1Waaye malaakaaca kanak ca kaɗee Sodom, ɓa ree nga na niina. Ɓa raak Loot ɓoofiɗ ŋ teembohaara, ŋ aasohaanaŋ miira wil kur ka#19:1 Ɓooɓaŋ jamanoonaam ɗingangeen kur caŋ ɓa yakak ca na atoh ne sangiɗ minuu aas. Yahndeeraŋ ɗinga nikee teembohaaraŋ kilifaaca.. Wa a hot ɓa, a kaɗta coha na ɓa, a ƴekiɗta ɓa po pukiŋ ɗe reesa kehƴi. 2A woosa ɓa ne : « Kilifaaci, ne wa neɓ ɗu ɗah, welaat ŋ kahan ɓoyi joy ɗu taambkoh, ɗu naawis kot ciŋ ɗu, ɗu neeh po kim na ɓaaɓa ɗah, ɗu han taalndiɗ waasiŋ ɗu. » Ɓa loffa ɗe ne : « Tee fu faɗ ɓoo neeh ŋ hari rek. » 3Waaye Loot kiimmba ɓa po ɓa teyɗukka, ɓa wella kahan ce, a nakohiɗta ɓa haɓɗiɗu kañam neɓiɗ na mbuuru, ɓa ñammba.

4Ɓa raawɗi faanuk ndoom, ɓi kur ka, ƴaar caŋ Sodom, ŋ ƴina po yakka, ali ɓo' tasɗi, ɓa willa kahna, 5ɓa ɓeeɗukka Loot, ɓa woosa ɗe ne : « Ɓa nde ƴaaɓi hay kahan fu na niini, pulɗaat ɓa ndii, ɓoo faanuk ɓa. » 6Loot pulla nga ɓa ŋ nguɓu kahna, a rannga buntaana, 7a woosa ɓa ne : « Ƴaaɓiŋ ngo, ŋ kiim ɗu wa kiim, kanaat tum ini moɗaaɗiineem waay ! 8Sikɗukaat, ŋ raakiɗ kuɓu kanak cafƴiɗ, ɓi inahɗi ƴaar, ɗu waaɗ ɗah, ŋ puliɗ ɓa ndii ŋ hari, ɗu haɓiɗ ɓa ini neɓ ɗu, waaye ƴaaɓi kanak cii, kanaat ɓa reɓ, laam, ɓa hanheeciŋ ngo. » 9Ɓa woosa ne : « Kurka ndii waay. » Ɓa ɓaatta nga ne : « Ƴaari nikohaah nikohaah ndii dong, a waaɗ ɓoo teeɓ waas ; ɓoo hey ɗa tume ini uup moɗaaɗi wiŋ ɓa. »

Weɗ ɓa yeñoh Loot yeñ miskiɗ ne ɓa yahroh buntaana, 10waaye ƴaaɓa hanheeca eɗndukka Loot na yaah, ɓa ɓekka ɗe ŋ ɗooƴ kahna, ɓa ranngaa, 11ɓa mbiraañiɗta has caŋ ƴaaɓa nikee ŋ nguɓu kahna, ŋ ya uup ƴissuut po ŋ ya uup yak, ne ɓa hotissuu buntaana.

Kooh ɗumbiɗ Sodom na Gomor

12Wa ineem coot, hanheeca kanak ca woosa Loot ne : « Andi fu raakiɗ ɓaah ndii findi payum, kuɓu ƴaar mbaa ɓitiɓ ? Pulɗa ɓaah ciŋ ɗa ndii jen, 13laam, ɓoo hey ɗumbe kur kii. Nikiɗi yegiɗ moɗaaɗiici na woyse nga te ca uupootiɗ ; a yi woos ɓoo ne ɓoo ɗumba. » 14Ineem tahha Loot pul, a woosa fiir ca hee toke kuɓuucaŋ ɗe ɓitiɓ ca ne : « Araat ɗu pul ŋ kur kii laam, Nikiɗi na hee wa ɗumbe. » Waaye ɓa liiɓpa ne a na apsukee ɓa.

15Wa wiisaaɗiina ree, malaakaaca tufukka Loot an : « Ara coot na ɓitiifu na kuɓuuciŋ ɗa ɓitiɓ ci kanak ci, fu kaanuu ŋ naamooni na hee ŋ kur kii sagu aƴaarkiŋ ɓa. » 16Loot nikka nga, a yiihsiɗkeeɗa, hanheeca kanak ca ammba ɗe na ɓitiice na kuɓuucaŋ ɗe kanak ca ŋ yaah, ɓa puliɗta ɓa po ɓa ussa kur ka sagu miski a miskee Nikiɗi.

17Wa ɓa puliɗ ɓa ŋ bilaf fa, yinoora woosa Loot ne : « Saandoha, ka heeluk, ka tufuk ŋ hatandii, kaɗa ŋ tangooceen, fu min muc. » 18Loot woosa ɗe ne : « Bara ! Heɗ ɓoo, 19fu keeñkohiɗ to, fu tumɗiɗ to in yakak po ŋ muciɗ, waaye, ŋ nar kaɗ po tangooceen ɗah, naamooni hey yo rahse, ŋ kaan. 20Fu hotiɗ kur keen e ? Wa reɓiɗ po ŋ joyiɗ min ree nga. On ndo ŋ saandoh nga, ne ŋ min muc, laam wa kur ƴissuut. » 21Malaakaani woosa ɗe ne : « Ee, po woti ŋ ris ɗa tufkoh ; kaɗa, ŋ heyɗi ɗumbe kur ki fu na wee weem, 22waaye artuka fu kaɗ laam, feeh fu reeɗi ɗah, ŋ minɗi tum ali in. » Ineem tahha po kur kaam teekuusa Sowar (in ƴissuut).

23Wa Loot ree Sowar, tel noha puliɗ. 24Weɗi Nikiɗi toɓoh yongkaah na suufar#19:24 suufar : waɗ ini na koste almet (ŋ farañse "soufre"). ŋ ɗafuk Sodom na Gomor. 25A ɗummba kur ceem jen na ɓooɓa genee nga ca, na oona jen na kidig ca nikee nga. 26Ɓiti Loot heelkeeɗa, a ɓoƴsuusa ɗus meɗa.

27Wa Ibrahiima kuruk na ɓaaɓa teel, a kaɗta ŋ ɗiska a saɓsukohee na Nikiɗi ; 28a marakka ŋ ɓak Sodom na Gomor na ina wil ooneem jen, a hotta ɗuuku haa ɗuuku koraaɓ puloheeɗa ŋ kehƴa rapeeɗa.

29Wa Kooh na ɗumbe Sodom a ɗaakkoheen Ibrahiima nof po tahha a muciɗta Loot ŋ naamoona a sooƴɗoh kur ca Loot genohe.

Faseehiŋ Amon ci na Mowab ci

30Wa ineem coot, Loot kaañisɗi nik ŋ Sowar, a toorukka ŋ tangooca, a yi na kuɓuucaŋ ɗe ɓitiɓ ca kanak ca, ɓa gennda ŋ hur atoh. 31Wa raakka mbeh, yi nikee saawa woosa taambɗoh ce ne : « Ɗiski wa nik ndii baabiŋ ɓoo a yi yaɓko'eeɗa, te ƴaar raakɗi ndii, ɓi fu inah ne ɓa miniɗ ɓoo tok findi wa na tumohse. 32Mbaa haya ɓoo aniɗ baabiŋ ɓoo biiñ, ɓoo hun na ɗe, ɓoo min ɗe raakiɗ ɓi pulohan nga ɗe po tiikiŋ ɗe ƴimuu. »

33Ŋ weka mbaɗi ɓa aniɗta baab ɓa biiñ, saawa aassa faanukka na ɗe, te Loot yegɗi faankaŋ yeem na kurkaŋ ɗe. 34Wa Kooh wiis saawa woosa taambɗoh ce ne : « Niinma, ŋ huniɗ na baab, mbaa ɗah, ɓoo anɗissaat ɗe biiñ woti, fu nam kaɗ fu faanuk na ɗe, ɓoo min ɗe raakiɗ ɓi pulohan nga ɗe. » 35Ɓa anɗissa baabiŋ ɓa biiñ ŋ wekaam, taambɗoha nammba kaɗ faanukka na ɗe ; Loot namɗi yeg faankaŋ yeem na kurkaŋ ɗe. 36Kuɓuucaŋ Loot tumoh na baab ɓa ɗaa, ɓa taambohha nga, ɓa ammba rook. 37Wa saawa raak kuɓu, a nikka ƴaar, a teekka ɗe Mowab (puloh ŋ baab), a yi caaciŋ Mowab ci woti-woti#19:37 Musaa fiis tiiki "woti-woti" ɗah, a fiis ŋ ini kaɗ ŋ woti-wotiinaŋ jamanoonaŋ ɗe. Wa nam nik ɗaa ŋ aaya 38.. 38Taambɗoha nammba raak kuɓu ƴaar, a teekka ɗe Ben-Ammi (kuɓkiŋ ɓaah ho), a yi caaciŋ Amon ci woti-woti.

Currently Selected:

Camba 19: YM

Highlight

Copy