Johannes 9
9
ONTOPORUA 9.
Omuposi ta mono ekuaco.
1Mokuenda po Jesus ta mono omuntu, hera ngaa a varua omuposi.
2Aarongua taa mu pura, taa ti: Muongi, otshikoro otsha re po, otshe muene nenge tshaakuruntu je, omuntu nguno sho a varua omuposi?
3Jesus ta jamukura: Nand’ohe, nand’aakuruntu je inaa jona, ndere iironga ja Karunga opo jo oroke mu he.
4Ngaje ondi nokuronga iironga ja ngo, ngu a tuma ndje, manka pu necimbo. Uusiku tau ja, mu itamu tshiua kurongua ku muntu.
5Manka ndi ri muujuni, ongaje uujerere uujuni.
6Sho e tshi popja, okua sija omate pevi, ta nengeke okavi nomate, ta gogo na ko omesho ga nguija.
7Nde ta ti ku he: Inda u ki ikoshe mondombe Siloe (taku ti: omutumua). He tu unduka ti i ko, ti ikosho, nde ta zi ko e uete ko.
8Ano nduno aatshiinda najeshe mba ja ri je mu mona tshito, oshoka okua ri omueheri, oja ti: K’ohe nguija nani, ngu a ri a kaatumba po, he te ehera? Jamue taa ti: Ee, ohe.
9Jamue taa ti: Aaue, k’ohe, okue mu f’ike naanaa. Ndere he muene ta ti: Ongaje ngaa.
10Jo taa mu pura: Ongiini omesho ga pashuka nduno?
11Ti i mo, ta ti: Omuntu nguija, ngu ta tiua Jesus, a ninga otshikuiira tshevi, ta gogo omesho gandje, nde ta rombuere ndje: Inda kondombe Siloe, nde to ikosho. Tandi i ko, andi ikosho, nondi uete ko.
12Mbeja taa mu pura: oku ri peni? H’ota ti: Kandi tshi uo.
13Konima jo taa fara ngu a ri omuposi, kaafariseji.
14Esiku rjesabata ndio, Jesus sho a nengeke, nde te mu pashurire omesho ge.
15Aafariseji taa mu pura itshee, nokutja, okua ninga omunamesho ngiini? He te ja rombuere: Okua tura otshikuiira momesho gandje, ndi ikosha, nde te mono ko.
16Jamue jo maafariseji taa ti: Omuntu ngok’ina za ku Karunga ngo, oshoka ita diginine esabata. Jamue itshee taa ti: Omuntu omunandjo ota vuru ngiini okuronga iirongankondo ja tja ngaaka? Otsho ngaa ja kara ja pengacana ngii.
17Jo taa pura itshee omuposi, taa ti: Matsa nguee nduno oto mu ti ore, ngu a pashura omesho gohe? Omuposi h’ota jamukura mo: Ngu a ri omuprofeti.
18Naangashiingika aajuda inaa mu iteera ue, nokutja okua ri omuposi, nde a ninga omunamesho. Jo otsho ano taji icana aakuruntu ja ngu a ninga omunamesho.
19Jo taa ja pura, taa ti: Nguno omumueni, ngu namu mu ti okua varua omuposi? Nena okua ninga omunamesho ngiini?
20Aakuruntu jo taa jamukura, taa ti ku jo: Otu tshi, nokutja nguka omumuetu, okua varerue omuposi.
21Ndere kutja okua mona ngiini omesho, sse katu tshi tshi, nenge ngu e mu pashura omesho, katu mu tshi itshee. Mu pureni he muene, okua koka, he muene na popje.
22Otsho aakuruntu taa popi ngii morua shi ja tira aajuda, oshoka aajuda okua taa kundacana: keshe ngu te mu epurura ohe Kristus, na tidue mo megongaro.
23Ano aakuruntu taa ti: He okua koka, mu pureni he muene.
24Jo taa hicana nduno itshee omuntu ngu a ri omuposi, nde taa mu pura: Simaneka Karunga! Ss’otu tshi, nokutja omuntu nguka omunandjo.
25H’ota jamukura mo: Nani ng’omunandjo, ngaje kandi tshi uo, ndere tshimue ondi tshi tshi, nokutja ngaje onda ri omuposi, nde nena ote mono ko.
26Taa mu pura itshee: Okue ku ningira tshee? Okua pashura omesho gohe ngiini?
27H’oti i mo ta ti: Onde tshi mu rombuere nare, ne mue tshu uva. Otshike nduno mua ara mu tshu uve urure? Onge na ne mua ara mu ninge aarongua je, nenge?
28Jo taa mu cingi, taa ti: Onguee ninga omurongua gue, sse aarongua ja Moses.
29Ss’otu tshi, nokutja Karunga okua popja na Moses; ndere omuntu nguk’openi a za, sse katu tshi tshi.
30Omuntu ta jamukura, ta ti ku jo: Nda kumua ko morua shi tamu ti: kamu tshi mpa a za, nd’okua pashura omesho gandje.
31Ss’otu tshi, nokutja Karunga ki iteera aanandjo, ndere ohi iteere ajeshe, mba taa karere Karunga, jo taa rongo eharo rje.
32Hera ngaa uujuni u ri po, kapena nando ompa pu uvirue, omuntu a pashura omesho ga ngu a varua omuposi.
33Ng’okuaj’omuntu nguno ina za ku Karunga, ando ina pondora tsha.
34Jo taa jamukura: Oua varua omurunderera, nde to tu rongo eendunge? Jo taa mu undurire pondje.
35Jesus e ke tshu uva, nokutja oje mu ekerashi; sho a ka tsakanena itshee nomuntu ngu, h’ote mu pura: Oui iteera Omumua Karunga?
36Ta jamukura: H’ore, Muene, ndi mu iteere?
37Jesus te mu rombuere: Oue mu mona, ohe ngu ta popi na ngueje, ohe ngo.
38He ta ti: Muene, ondi iteera. H’ota ts’eengoro nokuri, nde te mu injongamene.
39Jesus ta ti: Onde ja muujuni kepanguro, opo mba kaa uete, ja mone ko, nde mba je uete, ja ninge aaposi.
40Jamue po jo maafariseji je tshu uvu shi, mba ja ri pu he, nde taa ti ku he: Nani na sse aaposi?
41Jesus ta jamukura mo: Ngeno ne aaposi, ando kamu nothikoro, ndere ne amu ti: Otu uete, ano otshikoro tsheni tatshi kara po.
Currently Selected:
Johannes 9: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
