Johannes 10
10
ONTOPORUA 10.
Omusita omuanaua Jesus.
1Tshiri, tshiri, andi mu rombuere, ngu ta hi motshigunda tsheenzi, ina pita motsheero, ndere omompito hi iri ta rondere mo, ohe ombudi, h’omufuci.
2Ndere ngu ta piti motsheero, ohe omusita gueenzi.
3Omurangeri guotsheero ote mu egurura, nd’eenzi tadi uvu eui rje, h’oti icana eenzi de muene omadina gado, nde te di piica mo.
4Ng’a piica eenzi de, ote di tetekerere, do tadi mu randura, oshoka odi tshi eui rje.
5Do itadi randura omukuiirongo, aaue, otadi h’onda po, oshoka eui rjomukuiirongo ngu kadi ri tshi.
6Ejere ndika okue ri ja rombuere, ndere kaa huvite ko, shi ta popi ku jo.
7Ano te ja rombuere itshee: Tshiri, tshiri, andi mu rombuere: Ongaje otsheero tsheenzi.
8Ajeshe mba ji ire ndje komesho, nand’ojendji, ojo aafuci niimpuru, nd’eenzi inadi ju uva.
9Ongaje otsheero. Omuntu ngu ta hi mo, ta piti mu ngaje, ohe tu upicua. Oti i mo, he ta zi mo nokumona uusita.
10Omufuci oti ir’ike a ka jake, he a dipage, a shanagure, ndere ngaje onde ja, opo ja mone omuenjo, jo je gu mone nerooro.
11Ongaje omusita omuanaua. Omusita omuanaua ota gandjere eenzi de omuenjo gue.
12Ndere nakurira, ngu ke shi musita, neenzi kadi shi de, e uete embungu tari ja, ota cigi po eenzi, he ta h’onda po. Nd’embungu tari ru, rjo tari sharakanica eenzi.
13Ndere nakurira ta h’onda po, oshoka ohe nakurira, na sho eenzi ke na na do.
14Ongaje omusita omuanaua, ngaje ndi tshi dandje, do dandje di tshi ndje.
15Ngashi Tate e tshi ndje, na ngaje ondi tshi Tate, ngaje ote gandjere eenzi dandje omuenjo guandje.
16Ondi n’itshee eenzi di iri, di kadi mo motshigunda tsheenzi shi. Na dika uo ondi nokudeeta, nde tadu uvu eui rjandje, po tapu kara otshigunda tshimue nomusita gumue.
17Otsho Tate oku ore ndje, oshoka ote gandja omuenjo guandje, ngaje ndi gu tuumburure itshee.
18Kakuna ngu te gu kuca ndje, aaue, ongaje muene tii gu gandja, nondi neenkondo okugugandja nondi neenkondo okugutuumburura. Omurombo ngu onde gu peua ku Tate.
19Mpaka aajuda oja pengacana itshee morua shi a popi shi.
20Ojendji jo mu jo oja ti: Oku nombepo ombuineji, ke neendunge, otamu mu puakenene tshee?
21Jamue po taa ti: Eehapu dika kadi shi domuntu e nombepo ombuineji. Ombepo ombuineji ngeno otahi vuru nani okupashurira omuposi omesho?
Pejapurico rjontempeli.
22Opua ri pu notshituci tshejapurico rjontempeli mu Jerusalem pokufu.
23Jesus te ende montempeli morupanda rua Salomon.
24Aajuda taa mu gongarere, nde taa ti ku he: Sigo unake oto eca eemuenjo detu di kare kadi nuuino?
25Jesus h’ota jamukura mo: Otii tshi mu rombuere ngaa, ndere itamu iteere. Jironga mbi te rongo medina rja Tate, otaji okorora ndje.
26Ndere itamu iteere oshoka kamu shi eenzi dandje.
27Eenzi dandje do tadi uvu eui rjandje, ondi di tshi, do otadi rambarara ndje.
28Andi di pe omuenjo guarushe, do itadi kana sigoosigo no kakuna ngu te di kuca motshikasha tshandje.
29Shi nda peua ku Tate, otshi vure ajishejishe, nde kakuna ngu ta vuru okutshijeka motshikasha tsha Tate.
30Sse na Tate otshimue.
31Mpa aajuda oja jeda omamanja je mu dipage.
32Jesus h’ota guire mo, ta ti: Iironga iiuanaua ojindji ja Tate onde ji mu urukira. Omoru otshironga tshi ini mua ara mu dipage ndje nomamanja?
33Aajuda taa jamukura: Ha kutja moru otshironga otshiuanaua tatu ku dipaga, aaue, ndere moru etshekokarunga, oshoka ngueje omuntu oui ininga muene Karunga.
34Jesus te ja rombuere, ta ti: Mompango heni inamu tshangua mo nani, taku ti: Onde mu rombuere one ookarunga?
35Nge ha ruka ookarunga ajeshe, mba ja romborua ku Karunga — nde ompango itahi vuru okudimua po —
36Ano otamu rombuere ngiini ngu a japurua ku She, ngu e mu tuma muujuni: oto tsheke Karunga, oshoka onda tire: ongaje Omumua Karunga?
37Ng’itandi rongo iironga ja Tate, itamu iteere.
38Ndere nge tandi ji rongo, iteereni; ng’inamu ara okuiteera ndje, iteereni iironga, opo mu dimburure, ne mu iteere, nokutja Tate oku ri mu ngaje nangaje ndi ri mu Tate.
39Mpa oja ara okumukuata, ndere he ta zi mo miikasha jauo, nde ta hi.
40He ta tshuna haandija ha Jordan keshara, mpo Johannes kua ri a tshatsha tango, nde ta kara ko.
41Ojendji oje ja ku he, taa ti: Johannes ina ronga iirongankondo.
42Ndere ajishe mbi Johannes e mu popja, ojotshiri. Nd’ojendi je mu iteera.
Currently Selected:
Johannes 10: KWM
Highlight
Share
Copy
Want to have your highlights saved across all your devices? Sign up or sign in
Omission Heklesia Ekatolika, 1951. Namibian Catholic Bishops Conference.
