लुका 16
16
चलाख मुल-चाकर
1येसुइ आफ्निक् चेलालकलाइ बोल्लाहा, “कुन्हुँ एक्जेना धनि मानुसक् घरै ओक्राक् धनसम्पति दिठालाहार मुल-चाकर रैल्हक्। तसौ ‘तोरा मुल-चाकरिहिरे तोरा धनसम्पति उरातिहि रहैस्’ बाजिहिन् मानुसलके उ धनि मानुसलाइ सुनालिहिंक्। 2उ धनि मानुसे ओक्राक् मुल-चाकरिहिकलाइ हाँख्राहिन् सोर्ल्होकुन्, ‘तोरा बिसइमा मुँइ यि किवा कहिन् सुन्तिहि रहम्ना? तोरा ठालाइ भेल जम्मा हिसाब-किताब आनिहिन् मोरालाइ बुझाउ। अखसौ तोरानि मोरा हिसाब-किताब धर्बा नादेम्।’ 3तसौ मालिकक् यरङ् कहिन् सुन्नेसौ उ मुल-चाकरेसेहे मनमने यन्हिं सोंच्लोक्, ‘असौ मोरा मालिके मोरालाइ जागिरक्भटे निस्कालाहार भेइ। असौ मुँइ किवा कर्बा? खेतिपाति करिहिन् खाम्ना बाजौ बुने, खन्जोट कर्बाक् बल बोइने, मानुसलकसङ्हिं भिख माङिहिन् खाउँ बुने मोरालाइ लाज लागइस्। 4ह! असौ मुँइ किवा कर्बा पोर्लाहार मुँइ सम्झमिगे। मोरानि जागिरक्भटे निस्कायटौ मुँइ सङ्लक् बानाहिन् धरिबुने ता उखर्ह्वाइ दिठाइहालट्थ्ला भेकाते!’ 5ओक्राक्पाछु ओहिं आफ्निक् मालिकक् जम्माय रिन लेलाहारलकलाइ एकुन्जेना करिहिन् हाँख्रालाहा। ओहिं आगारि आइलाहारक्लाइ सोर्ल्होकुन्, ‘तुँइ मोरा मालिकक् कट्का रिन तिर्बाक् रहेस्ला?’ 6ओहिं बाज्लक् ‘तिन हाजार लिटर जैतुनक् तेल।’ तसौ उ मुल-चाकरे बोल्लोकुन्, ‘लु, छिटो बसिहिन् तोरा तमसुकइ असौ पन्ध्रसइ लिटर लेख्।’ 7तसौ ओर्कोहुलाइ सोर्ल्होकुन्, ‘तोरासेहे कट्का बुझाबाक् बाँकि रेहेस्ला?’ ओहिं जुबाप देलक्, ‘एक हाजार बोरा गहुँ।’ मुल-चाकरे बोल्लोकुन्, ‘लु तमसुकइ आठसइ बोरा लेख्।’ 8यि कहिन् थाहा पाइनेसौ उ मालिके हिसाब-किताबमाहा बइमान कर्लाहारक् चलाख कामक् बाखान करिदेलकुन्।” तसौ येसुइ बोल्लाहा, “साँच्चिय यि सन्सारक् मानुसलक् आफ्नि सङ्लकक्सङ्हिं कर्बाक् बेभारइ उँजतइ भेल मानुसेसौ अज्झ धेरे चलाख भेट्थ्ला।”
9“मुँइ तोहोरानि बोल्मेहेर्ला, सन्सारक् सम्पतिसम् सङ्लक् बानाहो, आउँ जख्नि उ धनसम्पति सकेला, उखर्ह्वाइ तोहोराखर्ह्वालाइ अनन्तक् घरमाहा स्वागत करुस्।” 10येसुइ फेरि बोल्लाहा, “जुन् मानुसे छोट्के कहिनुहुँमा इमान्दार भेइस् उ मानुस बर्के कहिनुहुँमा इमान्दार भेइस्। उहेरङ् करिहिन् जुन् मानुस छोट्के कहिनुहुँमा बइमान करैस् उ मानुसे बर्के कहिनुहुँमा बइमाने करैस्। 11उहे सिहिरे तोहोलेक सन्सारक् धनसम्पति लेबा-देबामाहा इमान्दार नहिंभेइगलेहे बुनेमा तोहोरालाइ सत्यक् धनक् जिम्मा कुने देहेरा ते? 12तोहोलेक ओर्काक् धनसम्पतिक् उप्रै बिस्वासिलो नाभेहोबुने तोहोराखर्ह्वाइ पाबाक् आफ्निक् धनसम्पति कुने देहेरा ते?
13“कुन्हुँ चाकरे दुइग्वा मालिकक् चाक्रि कर्बा नाप्पारेक्। ओहिं एक्जेनालाइ माया करैस् आउँ ओर्कोलाइसेहे घिन करैस् तसौ ओहिं एक्जेनाइ बोल्लो कहिन्सेहे मानैस् आउँ ओर्को जेनाइ बोल्लोसेहे नामानइ। ओहेरङ् करिहिन् तोहोलेके परमेस्वरक् आउँ धनसम्पति दोहोगोटाक् एकेचोटे चाक्रि कर्बा नाप्पारह।”#मत्ति ६:२४
14यि जम्माय कहिन् सुन्नेसौ फरिसिलके येसुलाइ खिंज्झ्यालिहिंक्, किसाबुने उखर्ह्वाक् लागि ता पैसा पियारो रैल्हाहा। 15तसौ येसुइ उखर्ह्वालाइ बोल्लाहा, “तोहोराखर्ह्वा मानुसलकक् नजरमाहा आफ्निलाइ धर्मि देखाबा ता खोजोहोला, तर परमेस्वरे तोहोरा मनक् भिट्रक् कहिन् आको जानैस्। मानुसलके बर्के ठान्ल्ह कहिनुहुलाइ परमेस्वरे घिन करैस्।
परमेस्वरक् नियम कख्नुहुँ नाँ बिलायक्
(मत्ति ११:१२-१३; ५:३१-३२; मर्कुस १०:११-१२)
16“बप्तिस्मा देलाहार यहुन्नाक् पालासम्म मोसाइ देल परमेस्वरक् नियम आउँ अगमबक्तालके देल सिच्छा चलिहिने आइल रैल्हकुन्। उहेबेलाइसौ यर्साक्सेहे परमेस्वरक् राज्जेक् खुस्सिक् खभर सुनालय रहेला, तसौ जम्माहिं परमेस्वरक् राज्जेमा पोस्बाक् जोर कर्तिहि रहट्थ्ला।#मत्ति ११:१२-१३ 17आकास आउँ पिर्थिबि बिलाहिन् जाबा पारेला तर परमेस्वरक् नियमक् एकौग्वा कहिनौ भुठिहिंन् नाजायक्।#मत्ति ५:१८
18“आफ्निक् बहुलाइ छारिहिन् ओर्कोलाइ बिहाउ कर्लाहार पुर्खर मानुसेसेहे बेबिचार करैस् आउँ ओर्कोइ छार्ल अइमाइलाइ बिहाउ कर्लाहारे आको बेबिचार कर्ल भेइस्।”#मत्ति ५:३२; १ कोरिन्थि ७:१०-११
एक्जेना धनि मानुस आउँ लाजरस
19येसुइ फेरि बोल्लाहा, “कुन्हुँ एक्टा समइमा एक्जेना धनि मानुस रैल्हक्। उ मानुसे साँद्धाउनि मज्जाक्-मज्जाकक् लुगा पेहेरै आउँ मजमस्तिक् जिबन बिटातिहि रैल्हक्। 20ओक्रिहिक् घरक् दिहाँरइ एक्जेना लाजरस बाज्ल जिउँभोरि घाउय-घाउ भेल गरिप मानुसलाइ आनिबानाइ धर्थिक्। 21धनि मानुसे खाइलटाकै झर्ल टुक्राटाक्रि खाबा पामाना बाजिहिन् ओहिं दिठाहिन् बसिहिन् रहओइ। कुकुरलके आको ओक्राक् छेउँछाओमा आहिन् ओक्राक् घाउलक् चाटिदेथिंक्। 22एक्दिन उ गरिप लाजरस मोर्लोक्। तसौ स्वर्गोदुतलके ओक्रालाइ लेगाहिन् अब्राहामक् छेउँहिंमा धर्लिहिंक्। तसौ उ धनि मानुस आको मोर्लोक् आउँ गार्लिहिंक्, 23तसौ नरकै पुग्लक्। नरकमा एक्दमे पिरा सहबा पोर्लोटाकै ओहिं उप्रक्पाखा दिठालक् आउँ टार्हो ठाँओइ अब्राहामक् छेओमाहा गरिप लाजरसलाइ देख्लकुन्। 24ओहिं बाराच्चोटे चिच्याहिन् बाज्लक्, ‘अ बाबा अब्राहाम, मोरा उप्रै दाया कर्। लाजरसलाइ ओक्राक् अङ्ङुरक् टुप्पाक्भटे पानि चोपिबानाइ एक थोप्ला भेटौ मोरा मुखमाहा टोप्साइदेहिक् बाजिहिन् पाठाहिक्ना। मुँइ यि आगिमा सार्होय बर्के पिराइ छटपटातिहि रहम्ना।’ 25तसौ अब्राहामे ओक्रालाइ बोल्लोकुन्, ‘बाबु, किस् तोरालाइ याद बोइने? सन्सारै जिबनभोरि तुँइ सेब्भ्रोउ सुक्खक् थोकलक् पाइल धर्लइ, तर लाजरसेसेहे सन्सारै सटौघरि दुक्खय पाइल धर्लक्। अख्निसेहे लाजरस यछि सुक्ख आउँ सान्ति पाइल धरैस् आउँ तुँइसेहे ओछि नरकक् कुन्डइ दुक्ख पाइतिहि रहस्ला। 26ओट्का माटेन् नहिंभेहिन्, तोरा आउँ हाम्रा बिचमाहा बर्के गैर्हो खार्ह् रहेला। उहेसैर्हे हाम्रा इच्छा भेहिनौ आको कुन्हुँ यर्साक्पार ओर्साक्पार आओट-जाओट कर्बा नाप्पारेक्।’ 27तसौ धनि मानुसे बाज्लक्, ‘ओरोङ् भेइबुने अ बाबा, मुँइ तोरालाइ बिम्ति करम्ना, लाजरसलाइ मोरा घरमाहा पाठाहिक्, 28ओहिं ओछि जाइबानाइ मोरा पाँच जेना दाजुभाइलकलाइ यछि भेल सेब्भ्रोउ कहिन् सुनाहिन् बुझाउस् आउँ उखर्ह्वा यि नरकै जुन् आउस्।’ 29तसौ अब्राहामे बोल्लोकुन्, ‘उखर्ह्वाक् ठालाइ मोसा आउँ अगमबक्तालके लेख्ल परमेस्वरक् बचन रेहेट्थ्ला, तोरा दाजेर आउँ भायरलक् उहे परमेस्वरक् बचनलाइ मानिबुनेटा भेइहालेला ते!’ 30तसौ उ धनि मानुसे बाज्लक्, ‘बोइने अब्राहाम बाबा, ओट्काइ उखर्ह्वालाइ नापुगेथ। तर कुन्हुँ मोर्लो मानुस बाँचिबानाइके उखर्ह्वाक् ठालाइ जाइबुनेता उखर्ह्वाइ आफ्नि-आफ्नि कर्ल पाप मानिबानाइ छार्टुहुन्बे।’ 31तसौ अब्राहामे जुबाप देहिन् बोल्लोकुन्, ‘मोसा आउँ अगमबक्तालकक् कहिन् उखर्ह्वाइ ना सुनठबुने मोर्लोय मानुस जिउँटो भेहिन् जायटौ बिस्वास नाकरथ्’।”
Currently Selected:
लुका 16: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
