प्रेरित 9
9
येसुइ साउललाइ बद्लाउ कारालक्
(प्रेरित २२:६-१६; २६:१२-१८)
1उ बेलाइ सम्मउ साउले पर्भु येसुक् चेलालकलाइ बिरोध करिहिन् मार्बाक् धम्कि देइतिहि हिंठ्ल रैल्हक्। 2ओहिं माहा-पुझरिक्ठालाइ जाइबानाइ “दमस्कसक् सभाघरलकै रैल्ह सासकलकलाइ मोरानि चिन्हाँबाक्नि चिठि लेखिदेहेना,” बाजिहिन् बिम्ति कर्लक्। “पर्भुक् पैंदालाइ पछ्यालाहार पुर्खर आउँ अइमाइ जम्माहिंलाइ खोजि-खोजि पक्रिबानाइ यरुसलेमै आन्बा पाउस्” बाजिहिन् ओहिं अधिकार माङ्लक्।
3साउल जाइतिहि कर्लटाकै दमस्कस सहरक् लजिक्कै पुग्टे, एक्कासि आकासक्भटे चहकारो उँजत ओक्राक् चारौपाखा चम्कलकुन्। 4तसौ साउल भिंसओइ धल्लक् आउँ ताट्काले ओहिं यरङ् आवाज सुन्लक्, “साउल, अ साउल, तुँइ मोरानि किसा सातातिहि रहस्ला?”
5तसौ साउले सोर्ल्होकुन्, “पर्भु, तुँइ कुन्ग्वा रहस्ला?”
तसौ ओहिं बोल्लोकुन्, “मुँइ येसु हो, जक्रानि तुँइ सातातिहि रहस्ला।”
6तर असौ उठिबानाइ सहरै जा, “आउँ तुँइ जेहे काम कर्बा पोर्लाहार उ कहिन् तोरानि बाताइदेस्ला।”
7साउलक्सङ्हिं जाइलाहार मानुसलक् ओछि अलबक्क भेइबानाइ ठड्ध्याल रैल्हुहुन्। ओछि उखर्ह्वाइ साराल आवाज ता सुन्लुहुन्, तर कुन्हुँहिलाइ नहिंदेख्लुहुन्। 8तसौ साउल भिंसओक्भटे उठ्लक् आउँ आँख जिर्याइबानाइ दिठाबाक् खोज्लोक्, तर ओहिं किच्छुय देख्फा नहिंपार्लक्। उहेसिहिरे ओक्राक् सङलके ओक्रानि हाथै गर्थिबानाइ डोर्याहिन् दमस्कसै लेगालिहिंक्। 9ओछि ओहिं तिन दिनसम्मयँ आँखे देख्फा नहिपार्लक्, आउँ किच्छुय नहिंखाइलक् आउँ पानिऔ नहिंपिलक्।
10दमस्कसै हननिया नाउँ भेल पर्भु येसुक् एकजेना चेला रैल्हक्। ओक्रालाइ पर्भुइ दर्सनै यन्हिं बोल्लोकुन्, “अ हननिया।”
ओहिं जुबाप देलक्, “हाँ पर्भु, मुँइ यच्छि रहम्ना।”
11तसौ पर्भुइ ओक्रानि बोल्लोकुन्, “उठिबानाइ सिधा बाज्ल गल्लिक्ठालाइ जा, आउँ ओछि यहुदाक् घरै टार्सस सहरक्भटे आइल साउल नाउँ भेल मानुसलाइ खोजिहिक्। किसाबुने ओछि ओहिं पाराथ्ना कर्तिहि रहैस्। 12ओहिं आफ्निक् दर्सनै हननिया बाज्ल एकजेना मानुसे भिट्र पोसिबानाइ फेरि देख्फा पारुस् बाजिहिन् आफ्निक् उप्रै ओक्राक् हाथ धर्ल देख्ल रहैस्।”
13तर हननियाइ बाज्लक्, “अ पर्भु, यि मानुसे यरुसलेमै भेल तोरा पबित्र जनलकलाइ एकदमे साताल कहिन् मुँइ थुप्रोय जेनाक्भटे सुन्ल धरम्ना। 14आउँ तोरा नाउँ लेलाहार जम्माहिंलाइ पक्रिबानाइ बर्के-पुझरिलकक्भटे अधिकार पाहिन् उ यछि आइल रहैस्।”
15तर पर्भुइ ओक्रानि बोल्लोकुन्, “तुँइ जा, किसाबुने अर्जाति मानुसलक्, राजालक् आउँ इस्राएलिलकक् माझै मोरा नाउँ पर्चार कर्बाक्नि मुँइ ओक्रानि चुन्ल धर्मिना। 16आउँ मोरा नाँओक् खातिरै ओहिं कट्का दुक्ख भोग्बा पोर्लाहार, उ कहिन् मुँइ ओक्रानि देखामिना।”
17तसौ हननिया जाइबानाइ यहुदाक् घरै पोस्लोक्, आउँ साउलक् उप्रै हाथ धरिबानाइ बोल्लोकुन्, “बाबु साउल, जुन् पर्भु येसु तुँइ आइतिहि कर्ल पैंदाइ तोराठालाइ देख्वार पोर्लोक्, उहे येसुहि तुँइ फेरि आँखे देख्फा पारुस्, आउँ तुँइ पबित्र आत्माइ पुराय रुपै चालाउस् बाजिहिन् ओहिं मोरानि पाठाल धरैस्।” 18ताट्काले ओक्राक् आँखक्भटे केच्राँक् परौ किच्छु खस्लकुन्, आउँ ओहिं फेरि देख्फा पार्लाहार भेलक्। तसौ उ उठ्लक्, आउँ बप्तिस्मा लेलक्। 19आउँ खान-पिन करिहिन् ओहिं बल पाइलक्।
साउले दमस्कसै पर्चार कर्ल
किच्छु दिनसम्म साउल दमस्कसिहिमा पर्भु येसुक् चेलालकक्सङ्हिं बस्लक्।
20तसौ ओहिं ताट्काले सभाघरलकै जाइबानाइ “पर्भु येसुय परमेस्वरक् बेटायक हो,” बाजिहिन् पर्चार कर्बा ठाल्लक्।
21ओक्राक् कहिन् सुन्लाहारलक् जम्माहिं छक्क पोरिबानाइ बाज्बा ठाल्लुहुन्, “किस् यरुसलेमै येसुलाइ बिस्वास कर्लाहार जट्कालाइ नास कर्बाक् खोज्लाहार यिहेय बोइने ते? यच्छुहु उखर्ह्वालाइ गर्थिबानाइ बर्के-पुझरिलकक् ठालाइ लेगाबाक्नि उ यछि आइल बोइने ते?”
22तर साउलक् पर्चार अज्झ बर्ता सक्तिगर भेइटे जाइलकुन्, आउँ येसुय खिरिस्ट रहैस् बाजिबानाइ ओहिं पक्का पर्मान देलाहा, यि कहिने दमस्कसै रैल्हाहार यहुदिलक् अकमक्क पोर्लुहुन्।
23ओक्राक् थुप्रोय समइपाछु यहुदिलक् जउर भेइबानाइ साउललाइ मार्बाक् जुक्ति रच्लुहुन्।#२ कोरिन्थि ११:३२-३३ 24तर आफ्निलाइ मार्बाक् जुक्ति रच्ल कहिन् साउललाइ थाहा भेलकुन्। उखर्ह्वाइ ओक्रानि मार्बाक्नि रातौदिनौ सहरक् दिहाँरलकै ढुकिबानाइ बसथ्। 25तर ओक्राक् चेलाहिकेलके रातिहि ढक्या भिट्रै हालिहिन् सहरक् पर्खालक्भटे बाहार नाँभाइबानाइ पाराबा लागालिहिंक्।
साउल यरुसलेम सहरै
26जब साउल यरुसलेमै फर्किबानाइ आइलक् ओहिं येसुक् चेलाहिक्लकक्सङ्हिं मिल्बाक् खोज्लोक्। तर उखर्ह्वा जम्मायँ साउलक्सङ्हिं डरालुहुन्, किसाबुने उहौ येसुहिक् चेला हो बाजिहिन् उखर्ह्वाइ बिस्वास कर्बा नहिं पार्ल धर्लुहुन्। 27भेटौ बारनाबासे साउललाइ आफ्निक्सङ्हिं लेइबानाइ प्रेरितलकक्ठालाइ लेगालकुन्। आउँ साउले पर्भुलाइ कहने पैंदाइ देख्लक्, आउँ पर्भु ओक्राक्सङ्हिं कहने कहिन् कर्लक् उ जम्मा कहिन् चेलालकलाइ जानालाहा ओक्राक्पाछु ओहिं दमस्कसै येसुक् नाँओइ आँटिलो भेहिन् पर्चार कर्ल उ जम्मा कहिन् बारनाबासे उखर्ह्वानि जानालाहा। 28उहेसिहिरे साउल उहेखर्ह्वाक् सङ्हिं बस्लक्, आउँ यरुसलेमभोरिय पर्भुक् नाँओइ आँटिलो भेहिन् हिंठिबानाइ पर्चार कर्बा ठाल्लक्। 29ओहिं गिरिक भासा सारालाहार यहुदिलकक्सङ्हिंऔ थोला-बाजि करै, तर उखर्ह्वाइ सेहे साउललाइ मार्बाक् खोज्थिक्। 30जब यि कहिन् पर्भुक्लाइ बिस्वास कर्लाहार दाजु-भाइलके थाहा पाइलुहुन्, तसौ उखर्ह्वाइ साउललाइ कैसरिया सहरै लेगालिहिंक् आउँ ओछिसौ ओक्रानि टार्सस सहरै पाठालिहिंक्।
31ओक्राक्पाछु पुराय यहुदिया, गालिल आउँ सामरिया इलाकाइ भेल जम्मायँ मन्डलिलकमाहा सान्ति भेहिन् आउँ मन्डलिक् उन्नति भेलाहा। ओछि पर्भुक् चेलालके पबित्र आत्माक्भटे हौसला पाहिन् आउँ परमेस्वरक् डर मानिबानाइ जिबन बिताल भेइटे मन्डलिमा मानुसलक् सङ्ख्या बर्ह्टे जाइलुहुन्।
पत्रुसे एनियासलाइ राम्रो पार्ल
32पत्रुस चारौपाखा जाइटे बुल्ल टाकै लुड्डा बाज्ल सहरै भेल पर्भुक् जनलकक्ठालाइ आको भेंटघाट कर्बा जाइलक्। 33ओछि पत्रुसे एनियास बाज्ल एकजेना मानुसलाइ भेंटालकुन्। उ आठ बर्स आगारिहिसौ हाथ-टाङ् नहिंचल्लाहार रोगे ओछ्यानै पस्रिहिन् बस्ल रैल्हक्। 34पत्रुसे ओक्रालाइ बोल्लोकुन्, “अ एनियास, येसु खिरिस्टइ तोरानि राम्रो पारेस्ला। उठ्, आउँ तोरा बिछौना उठाउ।” तसौ एनियास ताट्काले उठिहाल्लक्। 35यरङ् करिहिन् लुड्डा आउँ सारोनै बस्लाहार जट्का जम्मा मानुसलके ओक्रालाइ राम्रो भेल देखिबानाइ पर्भुक्लाइ बिस्वास कर्लुहुन्।
तबितालाइ मोर्लोक्भटे जिउँटो पार्ल
36योप्पा सहरै एकजेना पर्भुलाइ बिस्वास कर्लाहार अइमाइ रैल्हक्। ओक्राक् नाउँ तबिता रैल्हकुन्। जक्रालाइ गिरिक भासाइ डोरकास आको बाजथ्। जक्राक् अर्थसेहे हरिनि हो। ओहिं साँद्धाउनि ओर्कोक् लागि राम्रो काम करै आउँ गरिपलकुहुलाइ मदप करेथ्। 37पत्रुस लुड्डाहिमा भेइटे तबिता बेरामि भेइबानाइ मोर्लोक्, आउँ मानुसलके ओक्राक् मोर्लो देहिलाइ धोइबानाइ घरक् उप्रक् तालाक् एक्टा कोठाइ धर्लुहुन्। 38लुड्डा सहर योप्पा सहरक् लज्जिके रैल्हसिहिरे, चेलालके पत्रुस लुड्डाहिमा रहैस् बाजिहिन् थाहा पाइलुहुन्, तसौ उखर्ह्वाइ दुइजेना मानुसलकलाइ पत्रुसक्ठालाइ यन्हिं बाजिहिन् बिम्ति कर्बा पाठालाहा, “हाम्राठालाइ छिट्टो करिहिन् आइदेबा पोरि।” 39तसौ पत्रुस उठिबानाइ उहेखर्ह्वाक्सङ्हिं योप्पा सहरै जाइलक्। ओछि पुग्नेसौ मानुसलके ओक्रानि घरक् उप्रक् कोठाइ लेगालिहिंक्। बिध्वालकेसेहे पत्रुसक् चारौपाखा ठड्ध्याइबानाइ तबिताइ बानाल लुगालक् देखाइबानाइ काँर्बा ठाल्लुहुन्। 40तसौ पत्रुसे उखर्ह्वा जम्माहिंलाइ कोठाक्भटे बाहार पाठालाहा, आउँ ओहिं ठेउन्हाँ टेकिबानाइ पाराथ्ना कर्लक्। ओक्राक्पाछु ओहिं तबिताक् मोर्लो देहिक्पटि फर्किबानाइ यन्हिं बाज्लक्, “अ तबिता, उठ्!” तसौ ओहिं आँख जिर्यालक्, आउँ पत्रुसलाइ देखिहिन् उठिबानाइ बस्लक्। 41पत्रुसे ओक्राक् हाथ गर्थिबानाइ जुरुक्क उठालकुन्। ओक्राक्पाछु पत्रुसे पर्भुक् पबित्र जनलक् आउँ बिध्वालकलाइ हाँख्राइबानाइ मोरिहिनौ जिउँटो भेल तबितालाइ उखर्ह्वाक् जिम्माइ देलाहा। 42असौ यि कहिन् जम्मा योप्पा सहरभोरिय फिंज्लकुन्, आउँ ओछि थुप्रोय मानुसलके पर्भुक्लाइ बिस्वास कर्लुहुन्। 43ओक्राक्पाछु पत्रुस योप्पा सहरै छालाक् काम कर्लाहार सिमोनक्सङ्हिं थुप्रोय दिनसम्म बस्लक्।
Currently Selected:
प्रेरित 9: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
