प्रेरित 10
10
कर्नेलियसे पत्रुसलाइ हाँख्राल
1कैसरिया सहरै कर्नेलियस नाउँ भेल एकजेना मानुस रैल्हक्। उ रोमि सिपाहिक् इटालिया बाज्ल पल्टनक् कप्तान रैल्हक्। 2उ परमेस्वरक् धर्मि जन रैल्हक्, ओहिं आउँ ओक्राक् परिबारे परमेस्वरक् डर मानथ्। ओहिं खाँचोमा पोर्लोलकलाइ खुसि मनेसौ साहायता करेथ्, आउँ साँद्धाउनि परमेस्वरक्सङ्हिं पाराथ्ना करै। 3एक्दिन कर्नेलियसे दिनकोक् तिन बजेक्पाखा एक्टा दर्सन पाइलक्। उ दर्सनै साँच्चिय परमेस्वरक् एक्टा स्वर्गोदुत ओक्राक्ठालाइ आइबानाइ यन्हिं बोल्लोकुन्, “अ कर्नेलियस!”
4कर्नेलियसे स्वर्गोदुतक्पाखा एकेटोले दिठालक्, आउँ डराइबानाइ बाज्लक्, “हजुर पर्भु, मुँइ यि किवा देख्तिहि रहम्ना?”
तसौ स्वर्गोदुते ओक्रालाइ बोल्लोकुन्, “तोरा पाराथ्नालक् आउँ तुँइ गरिपलकलाइ दान देल कहिन् परमेस्वरे बलिक् रुपै सुइकार कर्ल धरदेस्ला। 5असौ तुँइ योप्पा सहरै रैल्ह पत्रुस बाज्ल सिमोनलाइ हाँख्राबाक्नि मानुसलक् पाठाउ। 6उ समुन्रक् छेंओइ घर भेल छालाक् काम कर्लाहार सिमोनक्ठालाइ बस्ल रहैस्।” 7जब कर्नेलियसक्सङ्हिं सारालाहार स्वर्गोदुत बिदा भेहिन् जाइलक्, तसौ ओहिं आफ्निक् दुइजेना चाकरलक् आउँ परमेस्वरलाइ सटौघरि मान्लाहार आउँ ओक्राक् सेवा कर्लाहार एकजेना सिपाहिलाइ हाँख्रालक्। 8कर्नेलियसे आफ्नि देख्ल जम्मा कहिन् जानाहिन् उखर्ह्वालाइ योप्पा सहरै पाठालाहा।
9ओर्को दिनै जब उखर्ह्वा योप्पा सहरक् लज्जिकै आइपुग्ल टाकै पत्रुससेहे दिनकोक् बार्ह बजेक्पाखा पाराथ्ना कर्बाक्नि घरक् कौसिमा जाइलक्। 10पाराथ्ना कर्तिहि-कर्तिहि ओक्रानि एकदमे भुख लाग्लकुन्, आउँ किच्छु थोक् खावास् लाग्लकुन्। ओर्कोलके सेहे खाबाक् थोकलक् तियार कर्तिहि रैल्हुहुन्, उहेसमइमा पत्रुसेसेहे सोंचिहिन् बस्ल टाकै एक्टा अचम्मक् दर्सन पाइलक्। 11तसौ ओहिं स्वर्गो उँद्रिजाइल आउँ ओटेभटे चारौकोनाइ बार्ल्ह एक्टा बर्के तन्नाक्परौ चिंज पिर्थिबिक्पाखा झर्टे आइल देख्लक्। 12उ तन्नाइ पिर्थिबिमा भेल जम्मा थरिक् चारटाङ्याँ जन्तुलक्, सोइकोलाहार जिवा-जन्तु आउँ आकासै उझ्रलाहार चरै-चुर्गुनिलक् रैल्हुहुन्। 13ओक्राक्पाछु पत्रुसे यन्हिं बाज्ल एक्टा आवाज सुन्लक्, “अ पत्रुस उठ्, आउँ इखर्ह्वालाइ मारिबानाइ खा।”
14तसौ पत्रुसे जुबाप देलक्, “बोइने पर्भु, मुँइ कख्नुहुँय किच्छु असुद्ध चिंजलक् नाँहा खाइल।”
15तसौ पत्रुसे फेरि दोहोराइबानाइ उहे आवाज सुन्लक्, “परमेस्वरे सुद्ध ठहराल चिंजलाइ असुद्ध बुन् ठान्।” 16तिन बाजि सम्मयँ यहेरङे भेलकुन्, आउँ ओक्राक्पाछु उ तन्ना फेरि स्वर्गोक्पाखा लेगिजाइलकुन्।
17जब पत्रुसे आफ्नि देख्ल दर्सनक् अर्थ बुझ्बा नहिंपारिहिन् अलमल्ल पोर्लो रैल्हक्, उहेटाकै कर्नेलियसे पाठाल मानुसलक् सिमोनक् घर खोज्ते-खोज्ते ओक्राक् घरक् दिहाँरक् आगारि पुगिहिन् ठड्ध्यालुहुन्। 18तसौ उखर्ह्वाइ बर्के चोटे हाँख्राइबानाइ, “सिमोन बाज्ल पत्रुस यच्छि बसैस् नाँ?” बाजिहिन् सोर्ल्हुहुन्।
19जब पत्रुसे आफ्नि देख्ल दर्सनक् बिसइमाहा सोंच्तिहि रैल्हक्, तसौ पबित्र आत्माइ ओक्रानि यन्हिं बोल्लोकुन्, “यटे सुन्, तिनजेना मानुसलके तोरानि खोज्बा ठाल्ल रहट्थ्ला। 20उहेसिहिरे असौ उठ् आउँ टर नाभिहिन् जा आउँ अफ्ठ्यारो नहिंमानिहिने उहेखर्ह्वाक् सङ्हिंय जा, किसाबुने उखर्ह्वालाइ मुँहि पाठाल धर्मिखान्ला।” 21तसौ पत्रुस टर नाभ्लक् आउँ उ मानुसलकक्ठालाइ जाइबानाइ यन्हिं बोल्लाहा, “दिठाहो, तोहोलेके खोज्लो मानुस मुँहि हो। तोहोलेके मोरानि किसा खोज्तिहि रहला?”
22उखर्ह्वाइ ओक्रानि जुबाप देलिहिंक्, “एकजेना कर्नेलियस बाज्ल कप्ताने हाम्रानि पाठाल हो। उ एकदमे धर्मि आउँ परमेस्वरक् डर मान्लाहार मानुस रहैस्। आउँ जम्मा यहुदिलकुहु ओक्रानि एकदमे मान कर्थिला। एक्टा पबित्र स्वर्गोदुते ओक्राक्ठालाइ देख्वार पोरिबानाइ तोरानि ओक्राक् घरै हाँख्राइबानाइ तोराभटे खभरलक् सुन्बालाइ स्वर्गोदुते बोल्लो धरेला।” 23उहेसिहिरे पत्रुसे उखर्ह्वालाइ घर भिटर लेगाइबानाइ खुवाइ-पियाइ कर्लक्, आउँ उ रात उखर्ह्वा ओच्छिहि बस्लुहुन्।
ओर्को दिन पोर्नेसौ पत्रुस उठिबानाइ योप्पामाहा रैल्ह पर्भुक्लाइ बिस्वास कर्लाहार कुन्हुँ-कुन्हुँ दाजु-भाइलकलाइ लेहिन् उहेखर्ह्वाक् सङ्हिं जाइलक्।
24पर्सुकोक् दिनै उखर्ह्वा कैसरिया बाज्ल सहरै पुग्लुहुन्। कर्नेलियसे सेहे आफ्निक् मिल्लाहार सङलकलाइ आउँ आफन्त मानुसलकलाइ हाँख्राइबानाइ उखर्ह्वा आबाक् पैंदा अस्याहिन् बस्ल रैल्हक्। 25जब पत्रुस घर भिटर पोस्बा ठाल्ल रैल्हक्, कर्नेलियसे ओक्रानि भेंटाइबानाइ ओक्राक् टाङै नेउँगारिहिन् ढोक् कर्लकुन्। 26तर पत्रुसे ओक्रालाइ उठाइबानाइ यन्हिं बोल्लोकुन्, “भेइ-भेइ, मुँहु ता तोरे परौ मानुस होते।” 27तसौ पत्रुस कर्नेलियसक्सङ्हिं कहिन् कर्टे घर भिट्र जाइलक्, आउँ ओछि थुप्रोयजेना मानुसलक् जउर भेल देख्लक्। 28पत्रुसे उखर्ह्वानि बोल्लाहा, “तोहोराखर्ह्वा जम्माहिंलाइ थाहाय रहेर्ला कि हामि यहुदिलकलाइ अर्जातिक् मानुसलकक्सङ्हिं सङ्गत कर्बाक् आउँ उखर्ह्वाक् घरै भेंटाबा जाबाक् हाम्रा रितिथितिक् उल्टा कहिन् हो। भेटौसुधा असौ कुन्हुँ मानुसलकलाइ असुद्ध जुन् ठान्भा बाजिहिन् परमेस्वरे मोरालाइ देखाल धरैस्। 29उहेसिहिरे तुँइ मोरालाइ हाँख्राबा पाठाहेबिट्के किच्छु अफ्ठ्यारो नहिंमानिहिने मुँइ यछि आइल रहम्ना। असौ मोरानि जानाउबे, किसा हाँख्राबा पाठाओइ?”
30तसौ कर्नेलियसे बाज्लक्, “चारदिन आगारकोक् कहिन् हो। दिनकोक् तिन बजेक्पाखा मुँइ घरै पाराथ्ना कर्तिहि रैल्हम्। एक्कासि चहकारो लुगा पेहेर्ल एकजेना मानुस मोरा आगारि ठड्ध्यालक्। 31तसौ ओहिं मोरानि यन्हिं बोल्लोक्, ‘अ कर्नेलियस, परमेस्वरे तुँइ कर्ल पाराथ्ना सुन्ल रहैस्, आउँ गरिपलकलाइ तुँइ कर्ल दायाक् कामलकलाइ सम्झल धरैस्। 32उहेसिहिरे योप्पा सहरै आइल पत्रुस बाज्ल सिमोनलाइ हाँख्राबाक्नि मानुसलकलाइ पाठाहिखान्। उ समुन्रक् छेंओइ घर भेल छालाक् काम कर्लाहार सिमोनक्ठालाइ बस्ल रहैस्।’ 33उहेसिहिरे मुँइ टारामटार तोरानि हाँख्राबा पाठाम् आउँ तुँइ आको यछि आइहालइबे राम्रोय भेउकुन्बे। असौ हामि जम्मायजेना परमेस्वरे तोरालाइ बोल्बा लागाल कहिन् सुन्बाक्नि पर्भुक् आगारि यछि जउर भेल रहुँक्ला।”
कर्नेलियसक् घरै पत्रुसे सुनाल खभर
34तसौ पत्रुसे बाज्बा ठाल्लक्, “साँच्चिय परमेस्वरे जम्मा मानुसलकलाइ बरौबर बेभार करैस् खम् बाजिहिन् असौ मुँइ राम्रोइसम् बुझ्ल धरम्ना।#ब्यबस्था १०:१७ 35तसौ जुन्हुँ जातलक् भेटौसुधा ओक्राक्सङ्हिं डर मान्लाहार आउँ राम्रो काम कर्लाहारलकलाइ ओहिं मन पोराइस्। 36तोरानि थाहाय रहेस्ला कि, परमेस्वरे येसुक्भटे सान्ति पाइलाहार खुसिक् खभर इस्रालिलकक्ठालाइ पाठाल धरैस्। उहेय जम्माहिंक् पर्भु रहैस्। 37यहुन्नाइ बप्तिस्मा लेहो बाज्बाक् पर्चार करिहिन् पाछु, गालिल इलाकाइसौ सुरु भेहिन् यहुदिलकक् देसभोरि फिंज्झ्ल घट्नाक् कहिन् तोहोरालाइ थाहाय रहेर्ला। 38परमेस्वरे नासरतक् येसुलाइ चुनिबानाइ पबित्र आत्मा आउँ सक्ति देलकुन्। तसौ येसुइ राम्रो-राम्रो कामलक् कर्तिहि आउँ भुत लाग्ल मानुसलकलाइ राम्रो पार्तिहि जम्मा ठाँओइ जाइलक्, किसाबुने परमेस्वर ओक्राक् सङ्हिं रैल्हक्। 39असौ हामि उहे यहुदिलकक् देसै आउँ यरुसलेमै कर्ल जम्मा कामलकक् साछि रहुँक्ला। उखर्ह्वाइ येसुलाइ कुरुसै टाङिबानाइ मार्लिहिंक्। 40तर तिन दिनक् दिनै परमेस्वरे ओक्रालाइ मोर्लोक्भटे जिउँटो पार्लकुन्, आउँ मानुसलकक् आगारि ओक्रानि देख्वार कारालकुन्। 41जम्माहिक्ठालाइ ता उ देख्वार नहिं पोर्लोक्, तर परमेस्वरे हामि जक्रालाइ ओक्राक् साछि देबाक् लागि ओहिं आगारिहिसौ चुन्ल धर्लक्। उ हाम्राठालाइ देख्वार पोर्लोक् आउँ मोर्लोक्भटे जिउँटो भेनेसौ हामि ओक्राक्सङ्हिं खान-पिन कर्लुहुँक्। 42तसौ जम्मा मानुसलकलाइ ओक्राक् खुसिक् खभर पर्चार कर्बाक्नि आउँ परमेस्वरे ओक्रिहिलाइ जिउँटो आउँ मोर्लोलकक् नियाँ कर्बाक्नि खटाल धरेला बाजिहिन् साछि देबाक्नि हाम्रानि आग्या देल धरैस्। 43अगमबक्तालकुहु ओक्राक् बिसइमा यन्हिं बाजिहिन् साछि देल धरट्थ्ला, ओक्राक् उप्रै बिस्वास कर्लाहार जम्माहिं ओक्राक् नाँओक्भटे पापक् छेमा पाट्थ्ला।”
अर्जाति मानुसलके पबित्र आत्मा पाइल
44जख्नि पत्रुसे यि कहिन् बाज्तिहि रैल्हक्, ओक्राक् बचन सुनेहेबित्के ओछि रैल्ह जम्माहिंमा पबित्र आत्मा आइलक्। 45परमेस्वरे पबित्र आत्माक् बरदान अर्जाति मानुसुहुलाइ देल देखिबानाइ पत्रुसक्सङ्हिं आइलाहार यहुदि बिस्वासिलक् छक्कय पोर्लुहुन्। 46किसाबुने उखर्ह्वाइ ओर्को भासाउ साराल आउँ परमेस्वरक् पर्सन्सा कर्बाठाल्ल सुन्लुहुन्। तसौ पत्रुसे बाज्लक्, 47“हाम्रेपरौ इखर्ह्वाइ आको पबित्र आत्मा पाइल रहट्थ्ला। असौ यि मानुसलकलाइ पानिक् बप्तिस्मा लेबाक्नि कुनेग्वाइ रोक्बा पारैस्?” 48उहेसिहिरे पत्रुसे उखर्ह्वालाइ येसु खिरिस्टक् नाँओइ बप्तिस्मा देहोखान बाजिहिन् बोल्लाहा। तसौ उखर्ह्वाइ पत्रुसलाइ किच्छु दिनसम्म उहेखर्ह्वाक्सङ्हिंय बस्बाक्नि बिम्ति कर्लुहुन्।
Currently Selected:
प्रेरित 10: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
