प्रेरित 5
5
हननिया आउँ सफिरा
1उहे समइमा हननिया बाज्ल एकजेना मानुस आउँ ओक्राक् बोहेक सफिराइ आफ्निक् चुटेक् जिमि बेंच्लुहुन्, 2तसौ हननियाइ बेंचिबानाइ आइल पैसा आधासेहे आफ्निक्सङ्हिं नुकाहिन् धर्लक्, जुन् कहिन् ओक्राक् बोइकोलाइ पुराय थाहा रैल्हकुन्, आउँ बाँकि रैल्ह पैसा लेइबानाइ प्रेरितलकलाइ जिम्मा देलक्। 3ओक्राक्पाछु पत्रुसे बोल्लोकुन्, “अ हननिया, आफ्निक् हिर्दायाइ सैतानलाइ राज कर्बा देइबानाइ तुँइ किसा पबित्र आत्मालाइ ढाँठस्ला? आउँ जिमि बेंच्ल पैसा आधासेहे किसा तुँइ आफ्निक् लागि नुकाहिन् धरै? 4उ जिमि नहिं बेंच्ल टाकै किस् उ तोरा आफ्निक् नहिं रैल्हास् ते? आउँ बेंचिबानाइपाछुऔ उ तोरे अधिकारै बोइने रैल्ह ते? यरङ् नराम्रो काम कर्बाक् बिचार तोरा हिर्दायाइ कहनें आवास्? तुँइ मानुसलकलाइ बोइनें तर परमेस्वरिहिलाइ ढाँठ्ल धरस्ला।” 5पत्रुसक् यि कहिन् सुनेहेबिट्के हननिया डङ्रङ्ङ लर्लक् आउँ ओक्राक् पारान जाइलकुन्। यि कहिन् सुन्लाहार मानुसलकक् मनै बारा डर भेलाहा। 6तसौ ठिठालक् आइबानाइ हननियाक् मोर्लो देहिलाइ कात्रोक् लुगाइ सेर्पिबानाइ बाहारक्पटि बोकिहिन् लेगाइबानाइ चिहानै गार्लिहिंक्।
7यरङ् भेल तिन घन्टापाछु हननियाक् बोहेकौं भिट्र आइलक्। आउँ ओक्रानि आफ्निक् साँयक् मोर्लो कहिन् थाहा नहिं रैल्हकुन्। 8पत्रुसे ओक्रानि सोर्ल्होकुन्, “मोरानि जानाउ ता, तोहोराखर्ह्वाइ जिमि ओट्के पैसाहिमा बेंचेहे ते?”
तसौ ओहिं बाज्लक्, “अँ, ओट्केहिमा।”
9उहे सैर्हे पत्रुसे ओक्रानि बोल्लोकुन्, “तोहोराखर्ह्वा दोहोजेनाइ पर्भुक् आत्मालाइ ढाँट्बाक्नि कहनें मिलिहिन् साल्हा करेहे? दिठाउ तोरा साँइर्ह्लाइ गार्बा जाइलाहार मानुसलक् अख्नि भर्खर दिहाँरक् बाहारै आइपुग्ल रहट्थ्ला, आउँ उखर्ह्वाइ तोरा देहिऔ उहेरङे करिबानाइ बोकिहिन् बाहार लेगिदेस्ला।” 10तसौ उहौ ताट्काले पत्रुसक् आगारि डङ्रङ्ङ लर्लक् आउँ ओक्राक् पारान जाइलकुन्। आउँ ठिठालक् भिट्र आइबानाइ ओक्रुहुलाइ मोरिहिन् सक्ल देखिहिन् बाहारक्पटि बोकिबानाइ लेगाहिन् ओक्रिहिक् साँइकक् छेंओइ गार्लिहिंक्। 11तसौ मन्डलिक् जम्मायँ मानुसलकक् उप्रै आउँ यि घट्नालक् सुन्लाहार जम्माहिंक् उप्रै बारा डर भेलाहा।
प्रेरितलके थुप्रोहिलाइ राम्रो पार्लाहा
12तसौ प्रेरितलकक् हाथक्भटे थुप्रोय चिन्हँलक् देखाबाक् काम, आउँ अचम्मक् कामलक् मानुसलकक् माझै भेइतिहि रैल्हकुन्, आउँ पर्भु येसुलाइ बिस्वास कर्लाहार जम्मायँ जेना सोलोमन बाज्ल पिनाओइ#५:१२ सोलोमन बाज्ल पिनाओइ: यरुसलेम मन्दिरक् बेर्हाक्भिट्र पोरेक्, जक्रालाइ सोलोमनक् पिनाउ बाजेला। जुन् ठाँओइ मानुसलक् हिंठ्लाहार, आउँ यक्राक् उप्रै छान्ह हाल्ल रैल्हकुन्। यि ठाउँ अर्जातिलकक् जउर भेलाहार ठाँओक् छेंओइ रैल्हकुन्, आउँ यि सार्बजनिक् ठाउँ रैल्हकुन् (१ राजा ६:३; यहुन्ना १०:२३)। एके मनक् भेइबानाइ सङ्हिं जउर भेथ्। 13बिस्वास नहिंकर्लाहार मानुसलकेसेहे उखर्ह्वाक्सङ्हिं मिल्बा आबाक्नि आँटे कर्बा नहिं पाइलुहुन्। भेटौसुधा मानुसलके उखर्ह्वालकलाइ एकदमे मान धरथ्। 14पर्भुक्लाइ बिस्वास कर्लाहार पुर्खर आउँ अइमाइ मानुसलक् अज्झउ बर्ता थप्पा ठाल्लुहुन्। 15उहेसैर्हे प्रेरितलके कर्ल अचम्मक् कामलके कर्टे पत्रुस पैंदाइ हिंठ्लटाकै ओक्राक् छाया माटेन् भेटौ बेरामिक्उप्रै पोरुस् बाजिहिन् मानुसलके रोगि बेरामिलकलाइ पैंदा-पैंदाहुमा बिछौनाइ धरथ्। 16आउँ यरुसलेमक् वरिपोरिक् सहरलकक्भटेहु थुप्रोय मानुसलक् ओछि आथ्। आउँ उखर्ह्वाइ बेरामिलक् आउँ दुस्ट-आत्माइ सताइ जाइललकलाइ लेहिन् आयथ्, आउँ उखर्ह्वा जम्मायँ राम्रो भेथ्।
प्रेरितलकलाइ सतावट आइल
17माहा-पुझरि आउँ ओक्राक् सदुकि सङलके प्रेरितलकलाइ एकदमे डाहा करिबानाइ बिरोधै उठ्लुहुन्। 18आउँ प्रेरितलकलाइ पक्रिबानाइ झेलखारै थुन्लाहा। 19भेटौ उहे राति पर्भुक् एक्टा स्वर्गोदुते झेलखारक् दिहाँरलक् उद्रिदेलाहा, आउँ प्रेरितलकलाइ बाहार लेगिबानाइ बोल्लाहा, 20“असौ जाहा आउँ मन्दिरै ठड्ध्याइबानाइ मानुसलकलाइ यि लौओ जिबनक् जम्मा खभर सुनाहो।” 21यि कहिन् सुन्नेसौ उखर्ह्वा स्वर्गोदुते बोल्लोहिक् परौ बिहानिहि मन्दिरै जाइबानाइ मानुसलकलाइ सिच्छा देबा ठाल्लाहा।
उहेटाकै माहा-पुझरि आउँ उखर्ह्वाक्सङ्हिं रैल्हाहारलक् एकेठालाइ जउर भेलुहुन्। तसौ इस्राएलिलकक् माहासभाक् जम्मा अगुवालकलाइ हाँख्रालाहा, आउँ प्रेरितलकलाइ झेलखारक्भटे लेइबानाइ आन्बा बाजिहिन् मानुसलकलाइ पाठालाहा।
22तर सिपाहिलकक् अधिकारि झेलखारइ जाइटे ओछि प्रेरितलकलाइ नहिंभेंटालाहा। उहेसैर्हे उखर्ह्वा फर्किबानाइ जाहिन् माहासभालाइ यिहे खभर सुनालुहुन्, 23“हामि झेलखारक् दिहाँरलकै बल्योहिंसौ ताल्चालक् लागाल आउँ पाल्यालके दिहाँरलकै रख्वारि करिहिन् ठड्ध्यालय देखुहुँक्, तर दिहाँर उद्रटे भिट्रै ता कुन्हुँय नहिंभेटाहुँक्।” 24जब मन्दिरक् सिपाहिलकक् कप्ताने आउँ बर्के-पुझरिलके यि खभर सुन्लुहुन्, असौ प्रेरितलकक् बिसइमा किवा भेला भेका बाजिबानाइ उखर्ह्वा अलमल्ल पोर्लुहुन्। 25उहेटाकै ओछि कुन्हुँ एकजेना मानुस आइबानाइ उखर्ह्वानि बोल्लाहा, “यते सुनह, तोहोलेके जुन् मानुसलाइ झेलखारै हाल्ल धर्लेहेक्, उखर्ह्वा ता मन्दिरै जाइबाइबानाइ येसुक् बिसइमा मानुसलकलाइ सिखातिहि रहट्थ्ला।” 26यरङ् सुन्बाक्साथ मन्दिरक् कप्तान सिपाहिलकक्सङ्हिं प्रेरितलकलाइ लेबाक्नि जाइलक्। ओछि मानुसलके दोंखोइ बाज्रायला ना बाज्बाक् डरे जबरजस्ति नहिं करिहिने उखर्ह्वालाइ लेहिन् आइलाहा।
27उखर्ह्वाइ प्रेरितलकलाइ आनिबानाइ माहासभाक् आगारि ठड्ध्यालाहा, आउँ माहा-पुझरिय उखर्ह्वालाइ सोर्ल्हाहा, 28“हामि तोहोराखर्ह्वालाइ येसुक् नाँओमाहा असौ कुन्हुँलाइ किच्छुय बुन् सिखाहो बाजिहिन् करा आग्या देल धर्लुहुँक्, तर तोहोलेके ता यरुसलेमभोरिय तोहोरेखर्ह्वाक् सिच्छा फिंझाहिन् सक्ल रहला, आउँ झन् येसुलाइ मार्ल दोस तोहोराखर्ह्वाइ हाम्रा उप्रै थुप्र्याबाक् खोज्तिहि रहला।”#मत्ति २७:२५
29तसौ पत्रुस आउँ ओर्को प्रेरितलके यन्हिं बाजिहिन् जुबाप देलुहुन्, “हामि मानुसलकक् आग्या मान्बाइसौ ता बरुस् परमेस्वरक् आग्यासेहे पुरा कर्बा पोर्लाहार। 30तोहोलेके कुरुसै टाङिबानाइ मार्ल येसुलाइ हाम्रा बाज्या-बाराजुक् परमेस्वरे मोर्लोक्भटे फेरि जिउँटो पार्लकुन्। 31इस्राएलिलकलाइ उखर्ह्वाक् आफ्नि-आफ्निक् पापलाइ मानिलेहिन् परमेस्वरक्पटि फर्कबा आउँ छेमा पाबाकलाइ मौका देबाक्नि अगुवा आउँ मुक्ति देलाहारक् रुपै परमेस्वरे आफ्निक् दैन्हँ हाथक्पटि येसुलाइ जम्माहिंसौ ओल्गोइ धर्लकुन्। 32हामि यि जम्मा कहिनक् साछि रहुँक्ला, आउँ परमेस्वरे आफ्निक् आग्या मान्लाहारलकलाइ देल पबित्र आत्मा आको साछि रहैस्।”
33तसौ यरङ् कहिन् सुनिबानाइ माहासभाक् अगुवालक् रिसे मुर-मुरि भेइबानाइ प्रेरितलकलाइ मार्बा खोज्लाहा। 34उहे बेलाइ उखर्ह्वामध्येमा गमलिएल नाउँ भेल एकजेना फरिसि रैल्हक्। उ जम्माहिं मान कर्ल धर्म-गुरु रैल्हक्। ओहिं ठड्ध्याइबानाइ प्रेरितलकलाइ एकछिनकोक् लागि माहासभाक्भटे बाहार जाबाक्नि हुकुम देलाहा, 35ओक्राक्पाछु ओहिं माहासभाक् मानुसलकलाइ यन्हिं बोल्लाहा, “अ इस्राएलक् मानुसेहेलक् तोहोलेके यि मानुसलकलाइ किवा कर्बाक् खोज्लो धरहखान्ला? उ कहिनै होस्यारो भेहो। 36किसाबुने यहिंसौ आगारिऔ थुदास बाज्ल एकजेना मानुसे आफ्निलाइ बर्के मानुस रहम्ना बाजिहिन् ठोक्वा देइटे आइलक्। तर ओक्रानि मार्लिहिंक्, आउँ ओक्राक् पाछुलाग्लाहार चार सइ जट्का मानुसलक् जम्मायँ तितर-बितर भेलुहुन्, तसौ ओक्राक् नाउँ निसाने हेर्लकुन्। 37ओक्राक्पाछु मानुसलकक् गिन्ति कर्बाक् समइमा गालिलक् यहुदा बाज्ल मानुस देख्वार पोर्लोक्। थुप्रोय मानुसलक् ओक्राक्पाछुऔ लाग्लुहुन्, तर ओक्रुहुलाइ मार्लिहिंक्, आउँ ओक्रालाइ पछ्यालाहारलकौ तितर-बितर भेलुहुन्। 38उहेसैर्हे यि अख्निकोक् मामिलाइ मुँइ तोहोराखर्ह्वालाइ बोल्मेहेंर्ला, कि यि मानुसलकक् बिरोधै किच्छुय जुन् करह, बरुस् उखर्ह्वालाइ छारहखान्! किसाबुने उखह्र्वाक् यि बिचार आउँ काम मानुसक्भटे बानाल हो बुनेमा उ आफ्नि हेरिहिन् जायला। 39भेटौसुधा यदि यि काम परमेस्वरक्भटे भेल हो भेने ता तोहोलेके यि मानुसलकलाइ रोक्बा नाप्पारहखान्। नाटेन् ता तोहोलेक परमेस्वरक् बिरोधै उठ्लाहार ठहरहला।”
40तसौ माहासभाक् मानुसलके गमलिएले देल साल्हा मान्लुहुन्। तसौ उखर्ह्वाइ प्रेरितलकलाइ फेरि भिट्र हाँख्राइबानाइ कोर्राइ बाज्राबा लागालाहा, आउँ “येसुक् नाँओइ फेरि कख्नुहुँ कहिन् जुन् कर्टे बुलह” बाजिहिन् करा आग्या देइबानाइ उखर्ह्वालाइ छार्लाहा। 41प्रेरितलक् माहासभाक्भटे यन्हिं बाजिहिन् रामाटे बाहार निस्कलुहुन्, आउँ परमेस्वरे हाम्रानि येसुक् नाँओइ दुक्ख आउँ अपमान सहबाक् योग्यक् ठहराल धरैस्। 42तसौ उखर्ह्वाइ दिनदिने मन्दिरै आउँ मानुसलकक् घर-घरै जाइबानाइ येसुय मुक्ति देलाहार खिरिस्ट हो बाजिहिन् बोल्ते बुल्बा आउँ पर्चार कर्टे बुल्बा नहिं छार्लुहुन्।
Currently Selected:
प्रेरित 5: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
