प्रेरित 23
23
1पावले माहासभाक्पाखा आँख गारिहिन् दिठाइबानाइ यन्हिं बाज्लक्, “ताचु-बाबुहेलक्, आस्कोक् दिनसम्मयँ परमेस्वरक् आगारि निर्दोस जिबन बिताल रहम्ना बाजिहिन् मुँइ ठान्हम्ना।” 2यि कहिन् सुनिबानाइ हननिया बाज्ल माहा-पुझरिय पावलक् लज्जिकै ठड्ध्याल मानुसलकलाइ ओक्राक् मुखै बाज्राइ देहेक्टा बाजिहिन् आग्या देलाहा। 3तसौ पावले हननियालाइ यन्हिं बोल्लोकुन्, “बाहार-बाहार गोरो भिट्र कार्दो मान्सस! परमेस्वरे तोरानि आको बाज्रायस्ला। तुँइ मोसाइ देल नियमक्भटे मोरा नियाँ कर्बाक् बस्ल रहस्ला, तर तुँइ ता नियमेसौ उल्टा मोरानि पिट्बाक् आग्या देबाठाल्ल धरस्ला?”#मत्ति २३:२-२८
4ओक्राक्पाछु पावलक् लज्जिकै ठड्ध्याल मानुसलके ओक्रानि बोल्लिहिंक्, “तुँइ किसा परमेस्वरे चुन्ल माहा-पुझरिक् अपमान करस्ला?”
5तसौ पावले बाज्लक्, “दाजु-भायहेलक्, मोरानि उ माहा-पुझरि हो बाजिहिन् थाहा नहिंरहोक्। मुँइ ओरोङ् बाज्बा नहिंभेलाहार रहौकुन्, किसाबुने धर्मसास्ट्रै यन्हिं लेख्ल रहेला, ‘तुँइ आफ्निक् पर्जालकक् सासकक् बिरोधै खाराब कहिन् बोल्बा नाभेक्’।”#प्रस्थान २२:२८
6तसौ पावले उ माहासभाइ सदुकिक् एक दप्फा आउँ फरिसिक् ओर्को दप्फा रैल्ह बाजिहिन् ओहिं थाहा पाइबानाइ बर्के स्वरे चिच्याइबानाइ यन्हिं बोल्लाहा, “ताचु-बाबुहेलक्, मुँइ ता फरिसिक् बेटायक फरिसिय हो। मोर्लोक्भटे मानुसलक् फेरि जिउँट्थ्ला बाजिहिन् मुँइ आसा करिहिन् बस्ल सिहिरे यछि मोरा उप्रै मुद्दा चल्तिहि रहेला।”#प्रेरित २६:५; फिलिप्पि ३:५
7पावले यरङ् कहिन् बाजेहेबिट्के फरिसिलक् आउँ सदुकिलकक् बिचै मनमुटाब भेलाहा आउँ उ सभाइ फुट भेलाहा। 8(किसाबुने सदुकिलके यन्हिं बाजथ्, मानुस मोर्नेसौ ना जिउँटथ्, आउँ स्वर्गोदुत आउँ आत्मा बाज्ल किच्छुय नाभेक्। तर फरिसिलके सेहे यि जम्मा कहिनलक् भेला बाजिहिन् बिस्वास करथ्।)#मत्ति २२:२३; मर्कुस १२:१८; लुका २०:२७ 9उहे कहिने माहासभाइ बर्के खैला-बैला भेलाहा। फरिसिलकक् दप्फाक् कुन्हुँ-कुन्हुँ धर्म-गुरुलके ठड्ध्याइबानाइ सदुकिलकलाइ एकदम बिरोध करिहिन् यन्हिं बाज्बा ठाल्लुहुन्, “यि मानुसक्ठालाइ हामि किच्छुय गल्ति नादेखुहुँक्। यदि यि मानुसक्सङ्हिं कुन्हुँ आत्माइ अथबा स्वर्गोदुते साराल हो भेनेमा किस् बाज्बा ते?”
10ओछि उखर्ह्वाक् मनमुटाब झन् बर्ह्टे जाइलाहा। उहेसिहिरे उखर्ह्वाइ पावललाइ लाछाङ्-लिछिङ् पारिबानाइ मार्थिला ना बाज्बाक् डरे सेनापतिय पावललाइ सभाक्भटे निस्काइबानाइ जबरजस्ति करिहिन् भेटौ सिपाहिक् अड्डा भिट्रै लेगाहोक् बाजिहिन् आग्या देलाहा।
11उहे राति पावलक्ठालाइ पर्भु देख्वार पोर्लोक्, आउँ यन्हिं बोल्लोकुन्, “अ पावल, हिम्मत कर्, किसाबुने जहरङ् तुँइ यरुसलेमै मोरा बिसइमा साछिक् कहिन् बोल्लोसिखान्, उहेरङ् तुँइ रोम सहरै आको साछिक् कहिन् बोल्बा पोर्लाहार।”
पावललाइ मार्बाक्नि साउटि मिलाल
12ओर्को दिनक् बिहानिहि यहुदिलक् एके-मुख भेहिन् पावललाइ मार्बाक् लागि साउटि मिलालुहुन्, आउँ उखर्ह्वाइ पावललाइ नहिंमार्बासम्मयँ हामि किच्छु नाखाहुँक् आउँ नापिहुँक् बाजिहिन् कसम खाइलुहुन्। 13पावललाइ मार्बाक् साउटि मिलाहारलक् चालिस जेनाहुँसौ बर्ता रैल्हुहुन्। 14ओक्राक्पाछु उखर्ह्वाइ बर्के-पुझरिलक् आउँ अगुवालकक् ठालाइ जाइबानाइ यन्हिं बाज्लुहुन्, “हामि पावललाइ नहिं मार्बासम्मयँ किच्छुय नाखाहुँक् आउँ नापिहुँक् बाजिहिन् कसम खाइल धरुहुँक्ला। 15उहेसिहिरे तोहोराखर्ह्वाइ माहासभाक्सङ्हिं मिलिबानाइ सेनापतिलाइ बिम्ति करहक्, आउँ पावललाइ लाग्ल मुद्दाक् कहिन् फेरि राम्रोइसौ कर्बा पोर्लाहार रहेला बाजिहिन् धुव पारिहिन् ओक्रानि निस्काहाक्। तसौ हामि ओक्रानि यछि आइतिहि-आइतिहि पैंदाहिमा मार्बाक् तियार भेहुँक्ला।”
16तर पावलक् भानिजिहिके यहुदिलके साउटि मिलाल उ कहिन् थाहा पाइनेसौं ओहिं सिपाहिक् अड्डा भिट्रइ जाइबानाइ पावललाइ जम्मा कहिन् जानालकुन्। 17तसौ पावले एकजेना कप्तानलाइ हाँख्राहिन् बोल्लोकुन्, “यि ठिठालाइ सेनापतिक्ठालाइ लेगाहिंक्, किसाबुने यहिं ओक्राक्सङ्हिं किच्छु कहिन् कर्बाक् रहेक्ला।” 18उहेसिहिरे उ कप्ताने पावलक् भानिजिहिकलाइ सेनापतिक्ठालाइ पुर्याइबानाइ यन्हिं बोल्लोकुन्, “झेलखारै रैल्हाहार पावले मोरानि हाँख्राइबानाइ यि ठिठाक्लाइ तोरासङ्हिं किच्छु कहिन् बाज्बा पोर्लाहार रहेक्ला उहेसिहिरे यक्रानि हजुरठालाइ आन्ल धर्मिना।”
19तसौ सेनापतिय पावलक् भानिजिहिक् हाथ गर्थिबानाइ एकपाखा लेगाहिन् सोर्ल्होकुन्, “तुँइ मोरासङ्हिं किवा कहिन् बाज्बा खोज्लो रहस्ला? बाजिहाल।”
20उ ठिठाइ बाज्लक्, “यहुदिलके ‘पावल मामाखर्ह्वाक् बिसइमा अज्झ थुप्रोय कहिन् सोर्भाक् ढुव पारिहिन् काल्हु उखर्ह्वानि माहासभाइ लेगाबा पाउस्’ बाजिहिन् हजुरक्ठालाइ बिम्ति कर्बाक् साल्हा कर्ल रहट्थ्ला। 21तर हजुरे उखर्ह्वाक् कहिन् बुन् मान्बेहे, किसाबुने चालिस जेनाइसौ थुप्रोय मानुसलके पावल मामाखर्ह्वालाइ नहिं मार्बासम्मयँ किच्छुय नाखाहुँक्, आउँ नापिहुँक् बाजिहिन् कसम खाइल धरट्थ्ला। उखर्ह्वाइ ता पावल मामाखर्ह्वालाइ मार्बाक्नि ढुकिहिन् बस्ल रहट्थ्ला, आउँ हजुरक् भटेकोक् आग्याक् आसा करिहिन् अस्याहिन् बस्ल रहट्थ्ला।”
22उहेसिहिरे सेनापतिय उ ठिठाक्लाइ यन्हिं बोल्लोकुन्, “तुँइ मोरानि बोल्लो यि कहिन् कुन्हुँहिलाइ बुन् जानाब्या है” बाजिहिन् ओक्रानि पाठालकुन्।
पावललाइ कैसरिया सहरै पाठाल
23ओक्राक्पाछु उ सेनापतिय दुइजेना कप्तानलकलाइ हाँख्राइबानाइ यन्हिं बोल्लाहा, “आजु राति नौ बज्ते दुइ सइजेना हिंठिहिन् जाइलाहार सिपाहिलक्, सत्तरि जेना घोरा चर्ल्हाहार सिपाहिलक् आउँ दुइ सइजेना भक्ला बोक्लाहार सिपाहिलकलाइ कैसरिया सहरसम्म जाबाक्नि तियार काराउ। 24तसौ पावलुहु चर्भाक् घोराहुलाइ तियार काराहो, आउँ ओक्रानि राम्रोइसम् सुरछ्या देइबानाइ बारा-हाकिम फेलिक्सक्ठालाइ पुर्याहाँक्।” 25यट्का बाजिसक्नेसौ उ सेनापतिय बारा-हाकिम फेलिक्सक्लाइ यन्हिं बाजिहिन् एक्टा चिठिऔ लेख्लक्,
26“मान्जन बारा-हाकिम फेलिक्स, हजुरलाइ मुँइ क्लौडियस लुसियसक्भटे सालाम् रहैस्। 27पावल बाज्ल यि मानुसलाइ यहुदिलके पक्रिहिन् मार्बाक् खोज्लो धर्लिहिंक्। भेटौ यि मानुस ता रोमि नागरिक होय खम बाजिहिन् थाहा पाइबानाइ मुँइ आफ्निक् सिपाहिलक् लेहिन् जाइबानाइ उखर्ह्वाक्भटे यक्रानि छुटालमिंक्। 28यहुदिलके यक्रानि कुन् कारने दोस लागातिहि रहट्थ्ला बाजिहिन् बुझ्बाक् इच्छा करिबानाइ मुँइ यक्रानि उखर्ह्वाक् माहासभाइ लेगालमिंक्। 29उखर्ह्वाइ यक्रानि उहेखर्ह्वाक् नियमक् नहिंमिल्ल बिसइक् उप्रै पर्स्न कर्ल बाजिहिन् दोस लागाल धर्लिहिंक्। भेटौ यक्रानि मोर्बाक् साजाइ देबाक् आउँ झेलखारै हाल्बाक्नि किच्छुय दोस नहिंभेंटालम्। 30तसौ यि मानुसलाइ यहुदिलके मार्बाक्नि साउटि मिलातिहि रहट्थ्ला बाजिहिन् मुँइ थाहा पाइलम्। तसौ यक्रानि छिट्छिटो तोराठालाइ पाठाल धर्मिना, आउँ यक्राक् बिरोधै दोस लागालाहारलकुहुलाइ तोरे आगारि जाइबानाइ आफ्निक् कहिन् बाजह बाजिहिन् आग्या देल धर्मिखान्ला।”
31उहेसिहिरे सेनापतिक् आग्याहिंक् बमजिम सिपाहिलके पावललाइ उहे रातिहि एन्टिपाट्रिस सहरसम्म पुर्यालिहिंक्। 32आउँ ओर्को दिन पोर्नेसौ हिंठिहिन् जाइल सिपाहिलके पावललाइ घोरा चर्हिहिन् जाइलाहार सिपाहिलकक् जिम्माइ पाठाहिन् उखर्ह्वा यरुसलेम फर्कलुहुन्। 33जब घोरा चर्ल्हाहार सिपाहिलक् कैसरिया सहर पुग्लुहुन्। तसौ उखर्ह्वाइ बारा-हाकिमक्ठालाइ पावललाइ आउँ सेनापतिय पाठाल चिठिसहित बुझालुहुन्। 34उ चिठि पर्हिहिन् सिधानेसौ बारा-हाकिमे पावललाइ सोर्ल्होकुन्, “तोरा घर कछि रहेस्ला? कुन् ठाँओइ पोरेस्ला?” तसौ पावले बाज्लक्, “मोरा घर किलिकिया इलाकाइ पोरोइस्।” 35तसौ बारा-हाकिमे बोल्लोकुन्, “ओरोङ् भेने तोरानि दोस लागालाहारलक् यछि आइनेसौ माटेन् मुँइ तोरा कहिन् सुनम्ना।” आउँ ओहिं पावललाइ हेरोद राजाइ बानाल दरबारै धरहक् बाजिहिन् हुकुम देलाहा।
Currently Selected:
प्रेरित 23: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
