प्रेरित 22
22
1“मोरा ताचु-बाबु आउँ बाबाहेलक्, तोहोराखर्ह्वाक् आगारि मुँइ निर्दोस रहम्ना बाज्बाक् कहिन् असौ सुनहँ।” 2उखर्ह्वाइ पावललाइ हिब्रु भासाइ साराल सुनिबानाइ जम्मायँ जेना झन् दापदिप्प भेलुहुन्।
3तसौ पावले यन्हिं बोल्लाहा, “मुँइ किलिकियाक् टार्सस सहरै जर्मल एक्टा यहुदि हो, तर मुँइ यिहे यरुसलेम सहरै हुर्कलम्। आउँ गमलिएलक् चेला भेइबानाइ हाम्रा बाज्या-बाराजुहिंसौ मान्टे आइल धर्मसास्ट्रक् सहि-सहि सिच्छालक् मुँइ सिख्ल धरम्ना। आजु तोहोलेक परमेस्वरमाहा जट्का जोसिलो रहला, ओट्केकुरे मुँहु जोसिलो रैल्हम्।#प्रेरित ५:३४-३९ 4पर्भुक् पैंदा पछ्यालाहार मानुसलकलाइ मुँइ मोर्बासम्मयँ सातालमिखान्, तसौ मुँइ पुर्खर आउँ अइमाइलकलाइ बाँर्हि-बाँर्हि झेलखारै हाल्लमिखान्।#प्रेरित ८:३; २६:९-११ 5मुँइ बाज्बा ठाल्ल यि कहिन् साँच्चाहिंक् हो बाजिबानाइ माहा-पुझरि आउँ माहासभाक् जम्मा मानुसलके आको बाज्बा पारट्थ्ला। उहेखर्ह्वाक्भटे मुँइ दमस्कसै बस्लाहार यहुदि दाजु-भाइलकलाइ पक्रबाक् अधिकार भेल चिठि मुँइ पाइलम्। उहेसैर्हे मुँइ ओछि रैल्ह पर्भुक्लाइ बिस्वास कर्लाहार मानुसलकलाइ बाँर्हिबानाइ यरुसलेमै आनिबानाइ साजाइ देबाक् लागि दमस्कसै जाइतिहि रैल्हम्।
6“मुँइ दमस्कसक् लज्जिकै पुग्बाय लाग्लटाकै मध्येदिन भेल रैल्हकुन्। उहेटाकै आकासक्भटे एक्कासि चहकारो उँजत मोरा चारौपटि चम्कलकुन्। 7आउँ मुँइ भिंसओइ ढल्लम्, तसौ उहेटाकै मुँइ यन्हिं बाज्ल एक्टा आवाज सुन्लम्, ‘अ साउल, अ साउल, तुँइ मोरानि किसा सातास्ला?’ 8तसौ मुँइ सोर्ल्होमिक्, ‘पर्भु, तुँइ कुन्ग्वा?’ पर्भुइ मोरानि बोल्लोक्, ‘मुँइ नासरतक् येसु, जक्रानि तुँइ सातातिहि रहस्ला।’ 9ओछि मोरासङ्हिं जट्काजेना मानुसलक् रैल्हुहुन्, उखर्ह्वाइ उँजतसेहे देख्लुहुन्, तर मोरासङ्हिं सारालाहारक् आवाजसेहे बुझ्बा नहिंपार्लुहुन्। 10फेरि मुँइ सोर्ल्होमिक्, ‘पर्भु, असौ मुँइ किवा कर्बा ते?’ तसौ पर्भुइ मोरानि बोल्लोक्, उठ् आउँ दमस्कस सहरै जा, तोरानि परमेस्वरे खटाल कामलकक् बिसइमाहा ओच्छिहि जानायस्ला। 11मुँइसेहे उ चहकारो उँजते कर्टे किच्छुय देख्बा नहिं पार्लम्, उहेसिहिरे मोरासङ्हिं रैल्हाहार सङलके मोरा हाथै गर्थिबानाइ डोर्याहिन् दमस्कसै पुर्यालुहुन्।
12“ओछि हननिया नाउँ भेल एकजेना मानुस रैल्हक्। उ मोसाक् नियमक्भटे चल्लाहार धर्मि मानुस रैल्हक्, आउँ ओक्रानि दमस्कसै बस्लाहार जम्मा यहुदिलके मान-इज्जत कर्थिक्। 13उ मोराठालाइ आइलक्, आउँ मोरा छेंओइ ठड्ध्याइबानाइ यन्हिं बोल्लोक्, ‘अ साउल बाबु, तुँइ फेरि देख्लाहार भेंउ’ ओहिं यट्का बाजेहे बिट्के मुँइ फेरि आँखे देख्लाहार भेलम्, तसौ ओक्रुहुलाइ देख्लमिंक्। 14ओक्राक्पाछु ओहिं मोरानि बोल्लोक्, ‘तुँइ हाम्रा बाज्या-बाराजुक् परमेस्वरे ओक्राक् इच्छा जानुस्, आउँ उ धर्मि सेबक येसुलाइ देखुस् बाजिहिन् आउँ ओक्राक् मुखक्भटे बोल्लो कहिन् सुन्बाक्नि तोरानि चुन्ल धरेस्ला। 15किसाबुने सेब्भ्रोउ मानुसलकक् आगारि ओक्राक्भटे जे देख्ल आउँ सुन्ल धरस्ला, तुँइ उ कहिनलकक् साछि भेस्ला। 16उहेसिहिरे असौ तुँइ किसा ढिलो करस्ला? उठिबानाइ बप्तिस्मा लेउ, आउँ येसुक् नाँओइ बिस्वास करिहिन् आफ्निक् पापक्भटे सुद्ध भेउ।’
17“जब मुँइ ओछिसौ यरुसलेम फर्किबानाइ आहिन् सिधानेसम् मन्दिरै पाराथ्ना कर्लटाकै मुँइ एक्टा दर्सन देख्लम्। 18उहेटाकै येसुइ मोरानि यन्हिं बोल्तिहि रैल्हक्, ‘चान्चारो करिहिन् यरुसलेमक्भटे निस्किहिन् जा, किसाबुने मोरा बिसइमा तुँइ देल साछिक् कहिनलक् यस्कोक् मानुसलके सुइकार नाकरथ्।’ 19तसौ मुँइ बाज्लम्, ‘अ पर्भु’ मुँइ जम्मा सभाघरलकै जाइबानाइ तोराउप्रै बिस्वास कर्लाहारलकलाइ गर्थिबानाइ पिट्तिहि आउँ झेलखारै हाल्ल कहिन् ता इखर्ह्वा जम्माहिंलाइ थाहा रहिहालेट्थ्ला। 20तोरा कहिनक् साछि देलाहार स्तिफनसलाइ रक्टानपुर पारिबानाइ मार्लटाकुहुँमा मुँइ ओच्छिहि रैल्हम्। ओक्रानि मार्लाहारलकक् सङ्हिं लागिबानाइ उखर्ह्वाक् लुगालक् रुङिहिन् बस्ल रैल्हम्।#प्रेरित ७:५८ 21तर पर्भुइ मोरानि बोल्लोक्, ‘तुँइ जा, किसाबुने मुँइ तोरानि टार्हो-टार्हो रैल्ह अर्जाति मानुसलकक्ठालाइ पाठामेर्ला’।”
22यट्का बाज्बासम्म माटेन् मानुसलके पावलक् कहिन् सुन्ल धर्लुहुन्। आउँ ओक्राक्पाछु उखर्ह्वाइ यन्हिं बाजिहिन् बर्केचोटे चिच्याबा ठाल्लुहुन्, “यि मानुसलाइ मार्बाय पोर्लाहार! यक्रानि पिर्थिबिमा बाँच्बा देबा नाभेक्।” 23उखर्ह्वाइ आफ्नि होर्लो पछउरिलक् घुघाइबानाइ धुर उरातिहि चिच्याबा ठाल्लुहुन्। 24यि देखिबानाइ रोमि सेनापतिय बोल्लोकुन्, “ओक्राक् बिरोधै मानुसलके किसा यट्का धेरे चिच्यातिहि रहट्थ्ला बाजिहिन् थाहा पाबाक्लाइ ओक्रानि सिपाहिक् अड्डा भिट्रइ आनहँक्, आउँ कोर्रा लागाइदेहेक्,” बाजिहिन् हुकुम कर्लक्। 25जब सिपाहिलके पावललाइ कोर्राइ बाज्राबाक्नि बाँर्भा ठाल्लिहिंक्, तसौ पावले आफ्निक् छेंओइ ठड्ध्याल कप्तानलाइ सोर्ल्होकुन्, “किस् रोमि नागरिकलाइ दोसे नहिंठहराहिने मानुसलाइ कोर्रा बाज्राबा रोमि कानुने देला ते?”
26यट्का कहिन् सुन्नेसौ कप्ताने रोमि सेनापतिक् ठालाइ जाइबानाइ यन्हिं सोर्ल्होकुन्, “हजुरे यि किवा कर्बाक् खोज्लो रहला? यि मानुस ता रोमि नागरिके हो खम!”
27तसौ रोमि सेनापतिय आइबानाइ पावललाइ सोर्ल्होकुन्, “किस् तुँइ साँच्चिय रोमि नागरिक होय ते?”
तसौ पावले बाज्लक्, “अँ हो हजुर!”
28यि सुनिबानाइ रोमि सेनापतिय बाज्लक्, “मुँइ ता थुप्रो पैसा तिरिबानाइ रोमि नागरिक बन्ल रहम्ना।”
तर पावले बाज्लक्, “मुँइ ता जल्महिंसौ रोमि नागरिक हो।”
29यरङ् कहिन् सुन्बाक् साथ पावललाइ केर्बा आइलाहार जम्मा मानुसलक् पाछु हटिबानाइ जाइलुहुन्। पावल रोमि नागरिक होय खम बाजिहिन् थाहा पाइबानाइ सेनापति आको डरालक्, किसाबुने ओहिं पावललाइ बाँर्ह्ल धर्लकुन्।
पावल माहासभाक् आगारि
30ओर्को दिन पोर्नेसौ उ रोमि सेनापतिय किसा यहुदिलके पावललाइ दोस लागाल भेका बाजिहिन् बुझ्बाक्नि ओक्रानि फुक्लालकुन्, आउँ जम्मा बर्के-पुझरिलक् आउँ माहासभाक् जम्मा मानुसलकलाइ जउर कारालाहा, तसौ पावललाइ जम्माहिंक् आगारि लेगाइबानाइ ठड्ध्याबा लागालकुन्।
Currently Selected:
प्रेरित 22: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
Free Reading Plans and Devotionals related to प्रेरित 22
Faith & Love: A One Year Bible Reading Plan - Part 6
This Is the Way: A 30-Day Journey Through the Book of Acts
Book of Acts