प्रेरित 20
20
पावल माकेडोनिया आउँ गिरिस इलाकाइ
1ओछि भेल हुल-दङ्का थम्हन्हेसौ पावले पर्भु येसुक् चेलालकलाइ हाँख्रालाहा, आउँ उखर्ह्वानि बिस्वासै हौसला पाउस् बाजिहिन् सिच्छालक् देइबानाइ ओछिसौ उखर्ह्वाक्सङ्हिं बिदा भेहिन् माकेडोनिया इलाकाक्पटि जाइलुहुन्। 2ओछि पुग्नेसौ ओहिं ठाउँ-ठाँओइ जाइबानाइ पर्भुक् चेलालकलाइ हौसलाइ भोर्लो थुप्रोय बचन सिखाटे हिंठ्लक्। ओक्राक्पाछु उ गिरिस इलाकाइ जाइलक्। 3ओछि उ तिन मैन्हाँसम्म बस्लक्। तसौ ओक्राक्पाछु उ सिरियाक्पाखा जाहाजै चर्हिबानाइ जाबा खोज्लोटाकै यहुदिलके ओक्रानि मार्बाक् योजना बानातिहि रहट्थ्ला बाजिहिन् थाहा पाइनेसौ ओहिं माकेडोनिया इलाका भेहिन् जाबाक् निर्नय कर्लक्। 4यि बाजिकोक् यात्राइ पावलक्सङ्हिं बेरिया सहरै बस्लाहार पुरसक् बेटायक सोपात्रोस, थेसलोनिके सहरै बस्लाहार अरिस्तार्खस आउँ सिकन्दस, डर्बि सहरै बस्लाहार गायस आउँ तिमोथि, तसौ एसिया इलाकाक्भटे आइल तुखिकस आउँ त्रोफिमस रैल्हुहुन्। 5उखर्ह्वा हाम्राइसौ आगारिय जाइलुहुन्, आउँ हाम्रानि त्रोआस सहरै अस्याहिन् बस्ल रैल्हुहुन्। 6तसौ हामिसेहे छुट्काराक् दिनक् पाबन मानाहिन् पाछु फिलिप्पि सहरक्भटे जाहाजै चर्हिहिन् जाइटे पाँच दिनै त्रोआस सहरै उखर्ह्वालाइ भेंटालुहुँक्, आउँ ओछि हामि सात दिनसम्म बस्लुहुँक्।
त्रोआस सहरै मोर्लो जबान ठिठालाइ जिउँटो पार्ल
7साताक् पैल्हो दिन ओछि भेल पर्भुक् चेलालकक्सङ्हिं हामि पर्भु-भोज खाबाक्नि भेला भेलुहुँक्। तसौ पावले उखर्ह्वाक् आगारि बाज्बा ठाल्लक्, ओर्को बिहानिहि जाबा पोर्लाहार सिहिरे ओहिं उखर्ह्वाक्सङ्हिं आधा रातसम्म कहिन् करिहिन् बस्ल रैल्हक्। 8हामि भेला भेल उप्रक् तालाक् कोठाइ थुप्रोय दिब्यालक् बल्ल रैल्हकुन्। 9युटिकस नाउँ भेल एकजेना जबान ठिठा झ्यालइ बस्ल रैल्हक्। पावले थुप्रोय जुक कहिन् करिहिन् बस्लटाकै उ जबान ठिठा निरे ढुल्कबा ठाल्लक्, ढुल्कटे-ढुल्कटे भोरि निरै पोर्लोक् उहेटाकै तिन ताला उप्रक्भटे टर भिंसओइ खस्लक्। मानुसलके ओक्रानि उठाबा जाइटे उ मोरिहिन् सक्ल रैल्हक् बाजिहिन् थाहा भेलाहा। 10तसौ पावल टर नाभ्लक्, आउँ घोप्टो पोरिबानाइ ओक्रानि हँउकारिबानाइ ओछि छेंओइ रैल्ह मानुसलकलाइ यन्हिं बोल्लाहा, “तोहोराखर्ह्वा बुन् आहाँटह, यि जबान ठिठा जिउँटोय रहैस्।” 11ओक्राक्पाछु पावल उप्रक् तालाइ उक्ललक्, आउँ जम्माहिं मिलिबानाइ पर्भु-भोज खाइलुहुन्। तसौ खाहिन् सक्नेसौपाछु पावले बिहानकोक् उँजत नहिंपोर्बासम्मयँ उहेखर्ह्वाक्सङ्हिं गफ करिहिने बस्लक्। ओक्राक्पाछु उखर्ह्वाक्भटे बिदा भेइबानाइ जाइलक्। 12तसौ ओछि रैल्ह चेलालके उ जबान ठिठालाइ घरसम्मयँ पुर्यालिहिंक्, उ ठिठा बाँच्ल देखिहिन् जम्मायँ खुसि भेलुहुन्।
पावल त्रोआसक्भटे मिलेटस जाइल
13त्रोआसक्भटे पावलबाहेक हामि जम्मायँजेना पानिजाहाज चर्हिबानाइ अस्सोस सहरै जाइलुहुँक्। पावललाइ सेहे अस्सोससम्म हिंठिहिने जावास् लाग्लसैर्हे ओहिं आफ्निलाइ अस्सोसेसौ माटेन् पानिजाहाजै चर्भाक् बन्दबस्त मिलालक्। 14हामि अस्सोसमाहा पुग्नेसौ ओक्रानि भेंटाहुँक्, तसौ हामि ओक्रालाइ जाहाजै चार्हालुहुँक्, आउँ मितिलेने सहरै जाइलुहुँक्। 15ओर्को दिन हामि जाहाज चर्हिबानाइ खियस बाज्ल टप्पुक् छेंओइ आउँ पर्सुकोक् दिनैसेहे सामोस बाज्ल टप्पुमाहा पुग्लुहुँक्। ओक्राक् ओर्को दिनैसेहे मिलेटस सहरै आइपुग्लुहुँक्। 16एसियाइ अल्मल् भेला बाजिहिन् पावल एफिसस सहरै नहिंपोसिहिने जाबाक् निर्नय कर्लक्। किसाबुने ओक्रालाइ यरुसलेमै पुग्बाक् हतार भेल रैल्हकुन्। ओहिं पेन्तिकोस बाज्ल पाबनक् दिनै सकेसम्म छिट्टो पुग्बाक् इच्छा कर्ल धर्लक्।
एफिससक् एल्डरलकक्सङ्हिं पावलक् बिदाइ
17मिलेटस सहरक्भटे पावले एफिसस सहरै मानुसलक् पाठाहिन् मन्डलिक् एल्डरलकलाइ हाँख्राइ पाठालाहा। 18जब उखर्ह्वा ओक्राक्ठालाइ आइलुहुन्, ओहिं उखर्ह्वानि बोल्लाहा, “एसियाइ टाङ् टेक्ल दिनिहिसौ यसाक् मुँइ कहने यि दिनलक् काटाल धरम्ना, उ कहिन् ता तोहोराखर्ह्वालाइ थाहाय रहेर्ला। 19यहुदिलकक् जालझेले कर्टे फेराइ-फेराइ दुक्ख सहबा पोर्लोक्, भेटौसुधा मुँइ नम्र भेइबानाइ कट्का समइसम्म लोर झार्तिहि पर्भुक् सेवा कर्लम्। 20तोहोराखर्ह्वाक्नि भल भेलाहार कहिन् तोहोराखर्ह्वाक् आगारि सुनाबाक्नि आउँ घर-घरे जाहिन् जम्माहिंक् आगारि तोहोरानि सिच्छा देबाकलाइ मुँइ कख्नुहुँ पाछु नहिंहटँलम्। 21मुँइ यहुदिलक् आउँ अर्जाति मानुसलक् जम्माहिं आफ्नि-आफ्निक् पाप मानिलेहिन् परमेस्वरक्पटि फर्कुस्, आउँ पर्भु येसु खिरिस्टक् उप्रै बिस्वास करह बाजिहिन् चेताउनि देलमिखान्। 22असौ दिठाहो, मुँइ पबित्र आत्माइ बोल्लो कहिन् मानिबानाइ यरुसलेमक्पटि जाइतिहि रहम्ना। ओछि मोरा उप्रै किस्-किस् पोरि आइस्, मुँइ किच्छु नाजानम्। 23भेटौ मोरानि यट्कासेहे थाहा रहैस् कि, दुक्ख-कस्ट भोग्बाक् आउँ झेलखारै पोर्बापोरोइस् बाजिबानाइ पबित्र आत्माइ मोरालाइ जुन्हुँ सहरै जायटौ थाहा देलय धरैस्। 24तर मोरा लागि आफ्निक् जिबन किच्छुय बोइनेक् परौ लागैस्। मोरा मनइ यट्का माटेन् रहैस् कि, परमेस्वरे मानुसलकलाइ अनुग्रह कर्ल धरैस् बाज्बाक् खुसिक् खभर फिंझाबाक् काम पर्भु येसुहि मोरानि देल धरैस्। ओहिं देल यि काम मुँइ पुरा कर्बा पारुस्।#२ तिमोथि ४:७
25“असौ दिठाहो, तोहोराखर्ह्वा जक्राक् बिचै मुँइ परमेस्वरक् राज्जेक् पर्चार कर्तिहि आइल रहम्ना, तोहोराखर्ह्वाइ मोरानि फेरि कख्नुहुँ देख्बाउ नापाहो बाजिहिन् मोरानि थाहा रहैस्। 26उहेसिहिरे आजु मुँइ तोहोराखर्ह्वालाइ यि बोल्तिहि रहमेहेर्ला, तोहोराखर्ह्वामध्ये कुन्हुँ नास भेइगलेहेबुने असौ मोरानि ओक्राक् दोस नालागै। 27किसाबुने परमेस्वरे कर्ल सेब्भ्रोउ योजना नहिंनुकाहिने मुँइ तोहोराखर्ह्वालाइ बोल्लो धरमेहेर्ला। 28असौ तोहोराखर्ह्वाइ आफ्निक् लागि आउँ तोहोरानि जिम्मा देल जम्मा बागालक् हेरबिचार करिहिन् बसह। चर्ह्वालके आफ्निक् बागालक् हेरबिचार कर्लक् परौ तोहोराखर्ह्वा परमेस्वरक् मन्डलिक् बिस्वासिलकक् हेरबिचार कर्बा पोर्लाहार, किसाबुने परमेस्वरे आफ्निक् बेटाहिकक् रकटक्भटे तोहोराखर्ह्वालाइ किन्ल धरैस्। 29मोरानि थाहा रहैस्, मुँइ छारिहिन् जाइनेसौ, झुट्ठा बचन सिखालाहारलक् भेंरालकलाइ साखाप पार्बाक्नि होंडारलकक् (ब्वाँसा) परौ तोहोराखर्ह्वाक् माझै आहिन् तोहोलेके हेरचाहा कर्ल बागालक् बिस्वासिलकलाइ नोक्सान कर्बा कख्नुहुँ नहिंछार्बुहुन्बे। 30तोहोरेखर्ह्वाक् माझक्भटे आको झुट्ठा कहिन् सिखालाहार मानुसलक् निस्कट्थ्ला। उखर्ह्वाइ सत्य कहिनलाइ बङ्ग्याइबानाइ पर्भुक् चेलालकलाइ आफ्निक्पाखा फर्काइबानाइ लेगाबाक् खोजोट्थ्ला। 31उहेसैर्हे उ कहिन् सम्झिबानाइ होस्यारो भेहिन् बसह, आउँ मुँइ तिन बर्ससम्म दिनौ-रातौ लोर झारि-झारि जम्मा मानुसलकलाइ चेताउनि देल कहिन् बुन् बिस्राहो।
32“असौ मुँइ परमेस्वरक्सङ्हिं तोहोराखर्ह्वानि ओहिं हेरचाहा करुस् आउँ ओक्राक् अनुग्रह देलाहार बचन तोहोराखर्ह्वाक् जिबनै पुरा भेउस् बाजिहिन् बिम्ति करम्ना। जैहिं तोहोराखर्ह्वानि बिस्वासमाहा बल्यो बानाहिन् धरैस्, आउँ ओहिं पबित्र पारिजाइल जम्मा मानुसलकक्सङ्हिं तोहोराखर्ह्वानि आसिक्क् हकदार बानाहेर्ला। 33मुँइ ता कुन्हुँ मानुसक् सोनो, चाँरि आउँ लुगालकक् लोभ नहिंकर्लम्। 34तोहोराखर्ह्वा आफ्निहिलाइ थाहा रहेर्ला कि, मुँइ आफ्नि हाथे काम करिबानाइ मोरा लागि आउँ मोरा सङलकलाइ चाइलाहार थोकलक् पुरा कर्ल धरम्ना। 35मुँइ कर्ल सेब्भ्रोउ कामलक् तोहोराखर्ह्वालाइ देखाल धरम्ना, तोहोराखर्ह्वाइ आको यहेरङे मेहेनत करिहिन् कमजोरिलकलाइ मदप कर्बा पोर्लाहार। पर्भु येसुइ आफ्निहि बाज्ल बचनलक् सम्झह, ‘कि लेबाइसौं देबामा अज्झ आसिक् रहेला।’”
36यट्का कहिन् बाज्नेसौ पावले उखर्ह्वा जम्माहिक्सङ्हिं ठेउन्हाँ टेकिबानाइ पाराथ्ना कर्लक्। 37उखर्ह्वा एकदमे सोक करिहिन् काँर्लुहुन्, आउँ पावललाइ हँउकारिबानाइ चुम्मा कर्लिहिंक्। 38पावले आजुइसौ उप्रान्त तोहोराखर्ह्वाइ मोरा अन्ह्वार कख्नुहुँ देख्फा नापाहो बाज्लसिहिरे उखर्ह्वा एकदमे दुक्खित भेलुहुन्। तसौ उखर्ह्वाइ पावललाइ पानिजाहाजसम्म पुर्यालुहुन्।
Currently Selected:
प्रेरित 20: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
