प्रेरित 19
19
पावल एफिसस सहरै
1अपोल्लोस कोरिन्थ सहरै रैल्हटाकै पावल एसियाक् माझक् ठाउँलक् भेहिन् एफिसस सहरै आइपुग्लक्। ओछि पावले कुन्हुँ-कुन्हुँ पर्भुक्लाइ बिस्वास कर्लाहार चेलालकलाइ भेंटालाहा। 2ओहिं उखर्ह्वालाइ सोर्ल्हाहा, “किस् तोहोराखर्ह्वाइ पर्भुक्लाइ बिस्वास करिहिन् पबित्र आत्मा पाइल धरहला?”
तसौ उखर्ह्वाइ बाज्लुहुन्, “पबित्र आत्मा रहैस् बाजिहिन् हामि सुन्लउ ता नाहा।”
3तसौ पावले फेरि उखर्ह्वानि सोर्ल्हाहा, “ओरोङ् भेने तोहोराखर्ह्वाइ कनङ् खालक् बप्तिस्मा लेउहे ते?”
उखर्ह्वाइ बाज्लुहुन्, “यहुन्नाइ सिखाल बप्तिस्मा।”
4तसौ पावले बोल्लाहा, “यहुन्नाइ सिखाल बप्तिस्मासेहे आफ्नि-आफ्निक् पापलाइ मानिलेहिन् परमेस्वरक्पटि फर्कबाक् लागि रैल्हकुन्। ओहिं ता ‘मोराइसौ पाछु आइलाहारिक् उप्रै बिस्वास करह’ बाजिहिन् मानुसलकलाइ जानालाहा। ओक्राक्पाछु आइलाहारसेहे येसुय रैल्हक्।”#मत्ति ३:११; मर्कुस १:४; १:७-८; लुका ३:४; ३:१६; यहुन्ना १:२६-२७
5यरङ् कहिन् सुन्नेसौ उखर्ह्वाइ पर्भु येसुक् नाँओइ बप्तिस्मा लेलुहुन्। 6तसौ पावले उखर्ह्वाक् उप्रै हाथ धरिदेलाहा, आउँ पबित्र आत्मा उखर्ह्वामाहा आइलक्। तसौ उखर्ह्वाइ ओर्कोय भासालकै साराबा ठाल्लुहुन् आउँ अगमबानि कर्बा ठाल्लुहुन्। 7ओछि उखर्ह्वा जम्मा बार्हजेना रैल्हुहुन्।
8तसौ पावल ओछि यहुदिलकक् सभाघरै जाइबानाइ तिन मैन्हाँसम्मयँ नहिं डराहिने परमेस्वरक् राज्जेक् बिसइमा तर्क-बितर्क कर्तिहि मानुसलकलाइ बिस्वासै आन्बाक्नि कोसिस कर्लाहा। 9तर कुन्हुँ-कुन्हुँक् मनसेहे कठोर रैल्हसैर्हे पर्भुक्लाइ बिस्वास कर्बाय नहिंकर्लुहुन्। बरुस् उल्टाय पर्भुक् पैंदाक् बिरोधै जम्माहिंक् आगारि नराम्रो बाज्बा ठाल्लुहुन्, उहेसिहिरे पावल उखर्ह्वाक् सभाघरै जाबाय छार्लक्, आउँ ओहिं चेलालकुहुलाइ आफ्निक्सङ्हिं लेगालाहा। ओक्राक्पाछु ओहिं टुरान्नस बाज्ल मानुसक् पर्भाक् घरै दिन्हुँपट मानुसलकलाइ भेंटाइबानाइ मुक्तिक् बिसइमा तर्क-बितर्क कर्बा ठाल्लक्। 10यरङ् काम दुइ बर्ससम्मयँ चल्लकुन्, आउँ एसियाइ बस्लाहार यहुदि आउँ गिरिक जातक् जम्मा मानुसलके पर्भुक् बचन सुन्लुहुन्।
11परमेस्वरे पावलक् हाथक्भटे अचम्म-अचम्मक् कामलक् कर्लक्। 12यरङ् सम्मकि मानुसलके पावलक् देहिमा रुमाल अथबा पछउरि छुवाइबानाइ बेरामिलकक्ठालाइ लेगाहिन् छुवाथ्, आउँ उ बेरामिलक् राम्रो भेथ् आउँ बेरामिलकक्भटे भुतलकौ निस्किहिन् जाथ्। 13तर झारफुक् कर्लाहार यहुदिलके आको ठाउँ-ठाँओइ जाइबानाइ पर्भु येसुक् नाउँ लेइबानाइ दुस्ट-आत्मालक् निस्काबाक् खोजोथ्। उखर्ह्वाइ दुस्ट-आत्मालाइ यन्हिं बोलोथ्, “पावले पर्चार कर्ल येसुक् नाँओइ मुँइ तोरानि निस्किहिन् जा बाजिहिन् आग्या देमेर्ला।” 14ओछि एकजेना स्केवास नाउँ भेल यहुदि माहा-पुझरिक् सात जेना बेटाहिकेलकुहु यहेरङे काम करथ्।
15एक्दिन दुस्ट-आत्माइ उखर्ह्वानि यन्हिं बोल्लाहा, “येसुक्लाइ मुँइ चिन्हँम्ना, तसौ पावलुहुक् बिसइमा मोरानि थाहा रहैस्। तर तोहोराखर्ह्वासेहे कुन् खर्ह्वा ते?”
16यट्का बाज्नेसौ उ दुस्ट-आत्मा लाग्ल मानुस उखर्ह्वाक् उप्रै झम्टते आइबानाइ उखर्ह्वा जम्माहिंलाइ आफ्निक् अधिनै पारिहिन् पत्कलाहा। तसौ उखर्ह्वा उ घरक्भटे नाङ्ट-भुङ्ट भेहिन् जिउँभोरि चोटे-चोट भेहिन् ओछिसौ पारालुहुन्। 17यि कहिन् एफिससै बस्लाहार यहुदिलक् आउँ गिरिकलक् जम्माहिं सुन्लुहुन्। तसौ उखर्ह्वा जम्मायँ डरालुहुन्, आउँ उखर्ह्वाइ पर्भु येसुक् नाँओलाइ एकदमें आदर कर्लुहुन्। 18बिस्वास कर्लाहार थुप्रोय मानुसलक् आइलुहुन्, आउँ उखर्ह्वाइ आफ्नि-आफ्नि कर्ल नराम्रो कामलक् जम्माहिंक् आगारि सुइकार करिहिन् जानालुहुन्। 19उखर्ह्वामध्येमा थुप्रोयजेना जादु टुना कर्लाहारलके आफ्निक्-आफ्निक् कितापलक् आनिबानाइ जम्माहिंक् आगारि डार्हालुहुन्। उखर्ह्वाइ डार्हाल कितापलकक् मोल जोर्ते झन्ने पाचास हाजार चाँरिक् डब्बल पैसाक् हिसाप निस्कलकुन्। 20यरङ् करिहिन् पर्भुक् बचन सक्तिसालि रुपै फिंज्ते जाइलकुन्।
एफिसस सहरै खैला-बैला भेल
21ओक्राक्पाछु पावले माकेडोनिया आउँ अखैया इलाका भेहिन् यरुसलेम जाबाक्नि निर्नय कर्लक्। आउँ ओहिं यन्हिं बाज्लक्, “मुँइ यरुसलेम पुग्नेसौ रोम सहरौ जाबाय पोर्लाहार।” 22तसौ ओहिं आफ्निक् दुइजेना सङलक् तिमोथि आउँ इरास्तसलाइ माकेडोनियाक्पाखा पाठालक्। तर आफ्निसेहे चुटेक् दिनसम्म एसिया इलाकाहिमा बस्लक्।
23उहे समहिमा पर्भुक् पैंदाक् बिसइमा पर्चार भेलसिहिरे एफिससै एकदमे बर्के खैला-बैला भेलकुन्। 24ओछि डेमेतिरियस नाउँ भेल एकजेना सुन्वारे आर्तेमिस देबिक् चाँरिक् चुटु-चुटु मन्दिरलक् बानाओइ। यि काम करिहिन् उ आउँ ओहिं धर्ल ओर्को सुन्वारलके थुप्रोय पैसा कामाथ्। 25तसौ डेमेतिरियसे आफ्निक् काम कर्लाहार सुन्वारलक् आउँ उहेखर्ह्वाक् परौ काम कर्लाहार ओर्कोहुलाइ जउर काराइबानाइ यन्हिं बोल्लाहा, “सुनह सङेहेलक्, तोहोराखर्ह्वालाइ थाहाय रहेर्ला, यिहे बेपार करिहिन् हामि थुप्रोय पैसा कामाल धरुहुँक्ला। 26यि पावल बाज्ल मानुसे किवा बाज्तिहि रहैस्, तोहोराखर्ह्वाइ देख्तिहि आउँ सुन्तिहि रहला, ओहिं ता एफिससै माटेन् बोइने, तर यि जम्मा एसियाइ बस्लाहार मानुसलकलाइ हाथे बानाल देबि-देउतासेहे देउताय बोइने बाज्तिहि थुप्रोय मानुसलकलाइ सिखाइबानाइ बिहिराबा ठाल्ल धरेट्थ्ला। 27उहेसिहिरे हाम्रा काम माटेन् नास भेलाहार बोइने, तर माहान् आर्तेमिस देबिक् मन्दिरौ काम नहिंलाग्लाहार बनेला, तसौ एसिया आउँ सन्सारभोरिक् मानुसलके मानिहिन् आइल आर्तेमिस देबिक् मान इज्जत हेरिहिन् जायला।”
28यि कहिन् सुनिबानाइ उखर्ह्वा रिसे मुर्मुरि भेहिन् यन्हिं बाजिहिन् चिच्याबा ठाल्लुहुन्, “एफिससै रैल्ह आर्तेमिस देबि माहान् रहैस्।” 29तसौ उ जम्मा सहरै खैला-बैला भेबा ठाल्लकुन्, आउँ इखर्ह्वा हुल उठिबानाइ आहिन् माकेडोनियाक्भटे आइल पावलक् सङ् गायस आउँ अरिस्तार्खसलाइ गर्थिबानाइ रङ्गसालाक् भिट्र घिस्याते लेगालाहा। 30पावल मानुसलकक् हुलक् माझै जाबाक् खोज्लोक्, तर बिस्वास कर्लाहार दाजु-भाइलके ओक्रानि ओछि जाबा नहिंदेलिहिंक्। 31एसिया इलाकाक् कुन्हुँ-कुन्हुँ सरखारि हाकिमलकौ पावलक् सङ् रैल्हुहुन्। उखर्ह्वाइ ओक्रानि रङ्गसालाइ देखा जुन् पोर्बा बाजिहिन् बिम्ति करिहिन् खभर पाठालुहुन्। 32मानुसलकक् हुलै बर्के खैला-बैला भेइतिहि रैल्हकुन्। कुन्हुँ-कुन्हुँ मानुसलक् एक थोक् बाजिहिन् साराथ् भेने कुन्हुँ ओर्कोय थोक् बाजिहिन् चिच्याथ्। ओछि धेरेजसो मानुसलकलाइ किसा जउर भेल बाजिहिन् थाहाय नहिंरैल्हाहा। 33उटाकै यहुदिलके अलेक्जेन्डर बाज्ल मानुसलाइ आगारि सार्लिहिंक्। ओछि जउर भेल भिरक्भटे कुन्हुँ-कुन्हुँ मानुसलके बर्केचोटे साराहिन् ओक्रानि उ घट्नाक् बिसइमा जानालिहिंक्। तसौ ओहिं हाथ बाताहिन् मानुसलकलाइ चुप्लाबा लागाहिन् जोग्बाक् लागि किच्छु कहिन् बाज्बाक् खोज्लोक्। 34तर ओक्रानि उखर्ह्वाइ यि ता यहुदि खम बाजिहिन् चिन्हेसौ ओछि भेलाहार जम्माहिं एकेग्वा स्वरे झन्ने दुइ घन्टासम्मयँ यन्हिं बाजिहिन् चिच्याइ-चिच्याइ बस्लुहुन्, “एफिससै रैल्हाहार आर्तेमिस देबि माहान् रहैस्।”
35तसौ अन्त्यक्पाखा सहरक् हाकिमे जम्मा मानुसलकलाइ सान्त पारिबानाइ यन्हिं बोल्लाहा, “सुनह, एफिससक् मानुसेहेलक्, एफिससक् सहरसेहे माहान् देबि आर्तेमिसक् मन्दिर आउँ आकासक्भटे झर्ल ओक्राक् मुर्तिक् रछक हो बाज्बाक् कहिन् कुनाहाँलाइ थाहा बोइने ते? 36उहेरङ् भेइटे तोहोराखर्ह्वा चुप्लाहिन् बस्बा पोर्लाहार, आउँ यरङ् करिहिन् जोसै आहिन् बिचार नहिंकरिहिने किच्छु काम कर्बाक् राम्रो नाँभेक्। 37तोहोराखर्ह्वाइ गर्थिबानाइ आन्ल मानुसलके ना ता हाम्रा मन्दिरक्भटे चोराल धरट्थ्ला, ना ता हाम्रा देबिक् अपमानें कर्ल धरट्थ्ला। 38यदि डेमेतिरियस आउँ ओक्राक् सुन्वार सङलकक् मध्ये कुन्हुँक् किच्छु बिरोधक् कहिन् भेइबुने उखर्ह्वाइ अदालतै जाइबनाइ उजुरि कर्ने भेइहालेला। ओछि उखर्ह्वाक् लागि नियाँ कर्लाहार नियाँधिसलक् रहिहालट्थ्ला 39अज्झौ यि कहिनुहुसौ ओर्कोय बिसइक् कहिन् उठाबा चाहाला भेनेमा हामि ओक्राक् फैसला जम्मा जनतालकक् सभाइ हाँख्राइबानाइ छलफल करिदेहुँक्ला। 40किसाबुने आजु यि हुल-दङ्का भेलसिहिरे दोससेहे हाम्रा उप्रै लाग्बाक् डर भेल रहेला। हाम्रा उप्रै दोस लागिबुनेता बेथाहि यरङ् हुल-दङ्का कर्ल बाजिहिन् हामि किच्छु बाज्बाय नापाहुँक्।” 41यट्का बाज्नेसौ ओहिं भिरलकलाइ बिदा कर्लाहा।
Currently Selected:
प्रेरित 19: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
