लुका 21
21
बिधुइनि चाढाल भेटि
(मर्कुस १२:४१-४४)
1येसुइ चाहातिन् बोस्ल बेलाके मन्दिरयँ भइल भेठि चाढालार बाकसयँ धनिसबेइ आ-आफ्न भेठि घालिराख्ते देखिकेभइल। 2येसुइ एक्टि गरिब बिधुइनिइ पुनु तामोक दुक्टा सिक्का चाढाल देखिकेभइल। 3येसुइ इसे देखिकुन कहिकेभइल, “साच्चिकइ मोइ तेउह्रासब्के कहतम्, इसे गरिब बिधुइनिइ अरु कते धेरइ भेठि चाढालि बाटि। 4किकेकने अरुइ चाहिँ आफुसाङ भइल धेरइ धनकमाटे केहाउ भेठि चाढाल, तर इसे बिधुइनि चाहिँ गरिब भइकुन पुनु आफ्नसाङ भइल बेहेन-बेरक छाक टार्लार सभइ खर्च नइ चाढालि।”
यरुसलेमक मन्दिर भत्कित कइकुन येसुइ कहिकेभइल
(मति २४:१-१४; मर्कुस १३:१-१३)
5एकपल्ट चेलासबेइ, “राम्र-राम्र पाथरेइ बानाल र भेटिसोरुप चाढाल सामानकमाटे सिङ्राल इसे मन्दिर धेरइ राम्र बाटइ!” कहतिन् कुरा करिराख्ते रहत। उहइबेलायँ येसुइ उसब्के कहिकेभइल, 6“यस्न बेला पुनु आइत, जोनो बेलायँ इछिका देख्ल घरसब्क एक्टा पाथरउप्र अर्क पाथर पुनु बाँकि नारहइ, उसे सभइ भत्कित!”
7उसबेइ येसुके पुछ्ल, “गुरुजिउ, यस्न कह्या भइत र? हसे यस्न कुरा भइके लाक्ते कस्न चिना भइत?”
8येसुइ कहिकेभइल, “होस करिकुन बोसउ, तेउह्रासब्के कोलोउयेइ पुनु झुक्काइके झुन्पाउस। किकेकने मेर नाउयँ धेरइ मानुस ‘मोइ नइ ख्रिस्ट हखम’ कहतिन् अइताहात्, ‘अन्तिम बेला नजिकइ अइल बाटइ’ कइकुन कताहात् तर तोहेसब उसब्क पाछु झुनलागसब। 9घम्साघम्सि लडाइ र झग्रा भइल कुरा सुनिकुन् झुनडाराओसब, किकेकने पइला यस्न घट्नासब भइकेनइ पोरित। तर ओख्निके नइ सन्सारक अन्त नाभओइ!”
दुख र समस्या
10येसुइ फेरि कहिकेभइल, “जाति-जातिक माझयँ र एक्टा राज्जेइ अर्क राज्जेउप्र लडाइ करित्। 11एक्दमइ बड्क भुइचाल जाइत, धेरइ ठाउयँ अनिकाल पोरित, माहामारि भइत र आकासयँ डाराउनो कुरा भइत हसे बड्क-बड्क चिनासब देखार पोरित। 12इसे सभइ कुरा भइलारकते आघु तोहेसब मेराके पच्छेल गुनेइ मानुससबेइ तेउह्राके धर्ताहात्, साताइत र उसबेइ तेउह्रासब्के सभाघरयँ लेजिकुन मुद्दा हालिकुन झेलखानायँ राख्तात्। हसे तेउह्राके राजा र बड्क-हाकिमक आघु आन्ताहात्। 13उहइबेला तेउह्रासब्के मेर बारेयँ गवाहि देइके मउका मिलित। 14उहइगुनेइ आफ्निके बाचाइके लागि किति कहिके हखइ कइकुन चिन्ता नालेइके। 15किकेकने मोइ तेउह्रासब्के यस्न बोरालाहार सब्द र बुद्धि देतम, कि तोहेसब कहल कुराक उत्तर देलाहार तेउह्रसब्क बिरोधिसब्क मुहुयँ बुजो लागित। 16हसे आफ्नइ उइया-बुबा, दाजुभाइ, आफन्त र साङ्घातिसबेइ समेत तेउह्रासब्के धरिके लागाइत, र उसबेइ तोहेसबमद्धे कत्काके त मार्ताहात्। 17मेर कारनेइ तेउह्राके सभुनि घिना कर्ताहात्। 18तर तेउह्रसब्क मुडक बार एक्टाउ पुनु नाझरइ। 19तोहेसब बिस्वासयँ ढलफल नाभइने, तोहेसब जिबन पाउताहाउ।
येसुइ यरुसलेम सहर नास भइलाहार बारेयँ कहिकेभइल
(मति २४:१५-२१; मर्कुस १३:१४-१९)
20“यरुसलेम सहरके सेनासबेइ घेरा हाल्ल देख्लपाछु, इसे सहर नास भइलाहार बेला आइपुग्ल बाटइ कइकुन तोहेसब जानउ। 21हसे उसे बेला यहुदियायँ भइलारसब डाँडापट्टि भागुस, सहरभित्र भइलाहार बाहार भागुस, र बाहार गाउयँ भइलाहार सहर भितर झुनपोसुस्। 22किकेकने धर्मक कितापयँ लेख्ल सभइ कुरा पुरा भइकेलागि इसे सजायक दिन भइत। 23उसे दिनयँ छावा पाउलाहारि र दुद खावालाहारि बेटिसब्क लागि झन गाह्र भइत। इसे सन्सारयँ बड्क दुख आइत र परमेसोरक सजाय उसे जातक मानुस उप्र पोरित। 24सत्रुसबेइ मानुससब्के तरबारेइ काटिकुन मार्तात् र कइद करिकुन अरु देसयँ लेज्तात्। अरु जातक मानुससब्क दिन पुरा नइजेभइलसमन उसबेइ यरुसलेमके गोडेइ खुनिकुन राख्तात्।
मानुसक छावा अइलाहार बेला
(मति २४:२९-३१; मर्कुस १३:२४-२७)
25“घाम, धवर र तिरियासबयँ अचम्मक चिना देखा पोरित, समुन्रक गर्जन र डाराउनो भेलसबेइ कर्ते पिर्थिबिक सभइ देसक मानुससब डाराइकुन आत्तिताहात्। 26सन्सारयँ भइके अइलाहार घटनासब्क डरेइ मानुससब मुर्छा पर्तात् किकेकने आकासक सभइ सक्तिसब हल्लित। 27हसे उसबेइ मानुसक छावाके बड्क सक्ति र महिमासे बाद्द्रियँ आइराख्ल देख्तात्। 28जब इसे सभइ कुरा भइके थालित तब ठोडेओ र आफ्न मुड उप्र उठाओ, किकेकने तेउह्रासब्के मुक्ति नजिकइ आइराख्ल बाटइ।”
नेभाराक रुखकमाटे सिछ्या
(मति २४:३२-३५; मर्कुस १३:२८-३१)
29उपाछु येसुइ उसब्के एक्टा काथाक रुपयँ यस्न कहिकेभइल, “नेभारा र अरु रुखसब्के चाहुक्, 30उसे रुखयँ लओ पात पालाल देख्नेपार, तोहे गरम सुरु भइलाहार बेला भइल कइकुन जान्ताउ। 31ओसिनकरिकुन नइ मोइ कहल सभइ कुरासब पुग्ते जइनेपार, परमेसोरक राज्जे नजिकइ बाटइ कइकुन बुझ्ताहाउ।
32“साच्चि, मोइ तेउह्रासब्के कहतम्, इसे सभइ घटना पुरा नइजेभइलसमन इसे पुस्ता नास नाभओइ। 33आकास र पिर्थिबि बितिकुनजाइत, तर मोइ बोराल बचन कइह्याउ पुनु बितिकुन नाजाओइ।”
तोहेसब होस करिकुन बोसउ
34“तोहेसब होस करिकुन बोसउ, धेरइ भोज-भतेरक पाछु झुनलागउ, मातिकुन झुनहिठउ र इसे जिबनक लागि फिक्रि झुनकरउ। नत्र तेउह्रसब्क मन दबित र तेउह्र उप्र अन्चक्लइ उसे दिन पासोजस्नइ आइत। 35किकेकने पिर्थिबियँ बास कर्लाहार सभइ मानुसउप्र उसे दिन आइत। 36उहइगुनेइ तोहेसब होस करिकुन बोसउ। ‘उसे सभइ डाराउनो कुराकमाटे बाचिकुन मानुसक छावाक आघु ठोडेइके सकउ’ कइकुन परमेसोरसाङ सद्देहुन पार्थाना कर्तिन जग्लइ रहउ।”
37येसुइ दिनपटि मन्दिरयँ सिछ्या देतेरहत कने रातिचाहिँ सहरकमाटे निस्किकुन जइतुन कलाहार डाँडायँ रात बिताते रहत। 38हसे ओनेनेइ बोराल बचन सुनिके सभइ मानुससब बेहनइ मन्दिरयँ अइतेरहत।
Currently Selected:
लुका 21: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
