लुका 20
20
येसुक अधिकारक बारेयँ प्रस्न कर्ल
(मति २१:२३-२७; मर्कुस ११:२७-३३)
1एक दिन मन्दिरयँ येसुइ मानुससब्के सिछ्या देतिन् रहत र उसब्के खुसिक समचार प्रचार करिराख्ते रहत। उसे बेलायँ बड्क पुजेहेरि, धर्मगुरुसब र अगुवासब मिलिकुन ओनेन्कलघि अइल 2र येसुके पुछ्ल, “तोहे कुछिकमाटे अधिकार पाइकुन इसे कामसब कर्ताहाउ? इसे अधिकार तेउह्राके कोनेइ देल? हाम्राके कओ।”
3येसुइ उसब्के जबाफ देइकेभइल, “मोइ पुनु एक्टा कुरा तेउह्राके पुछ्तम, मेराके उत्तर देओ। 4युहन्नाइ बप्तिस्मा देलाहार अधिकार कुछिकमाटे पाउल, परमेसोरकमाटे कि मानुसकमाटे?”
5इसे सुनिकुन् उसब एक-अर्कसाङ कुराकरिके थाल्ल, “आबे हामे किति कहिके? परमेसोरकमाटे कहउ कने, किति करिके ‘तोहेसब युहन्नाके बिस्वास नइजे कर्ल?’ कइकुन हाम्राके पुछित। 6मानुसकमाटे कहउ कने, इछि जम्मा भइल सभइ मानुसेइ हाम्राइके पाथरेइ हानिकुन मार्तात्, किकेकने उसबेइ त बप्तिस्मा देलाहार युहन्नाके अगमबक्ता कइकुन बिस्वास कर्ताहात्।” 7उहइगुनेइ उसबेइ येसुके जबाफ देल, “खइ, हाम्राइके थाहा नइजे उहाइ उसे अधिकार कुछिकमाटे पाउल।”
8हसे येसुइ उसब्के कहिकेभइल, “ओसेकने मोइ कुछिकमाटे अधिकार पाइकुन इसे सभइ काम कर्तिन बाटम्, मोइ पुनु तेउह्रासब्के नाकम।”
अङ्गुर बारियँ काम कर्लाहार दुस्ट किसानक काथा
(मति २१:३३-४६; मर्कुस १२:१-१२)
9उपाछु येसुइ मानुससब्के एक्टा काथा कहिकेभइल, “एक जेना मानुसेइ बारियँ अङ्गुर लाइकुन अधियायँ किसानके दिकुन, आफ्नि चाहिँ धेरइ दिनसमन अर्क देस जइल। 10फोर पाकिसक्लपाछु अङ्गुर बारिक मालिकेइ काम कर्लाहार एक जेनाके आफ्न भाग लेइके पाठाल। तर अधियाँ लागालारइ नोकरके ठोकिकुन केहाउ नदेइकुन फर्काइदेल। 11फेरि बारिक मालिकेइ अर्क काम कर्लाहार नोकरके पाठाल। बारि अधियाँ लागालारइ उख्राके पुनु ठोक्ल र बिजेत करिकुन केहाउ पुनु नदेइकुन रित्तइ पाठाल। 12उपाछु पुनु उहाइ तेस्रा काम कर्लाहार नोकरके पाठाल। उख्राके पुनु बारि अधियाँ लागालारसबेइ घाइते बानाइकुन् निस्काइ देल। 13हसे अङ्गुर बारिक मालिकेइ कहल, ‘आबे मोइ किति करिके? मेर मायालु छाहोम्के पाठातम, सायद इख्राके त उसबेइ मान कर्ताहात् कि।’ 14तर बारिक धनिक छाहोके अधियाँ कामालारसबेइ देखिकुन एक-अर्कसे कुरा करिके थाल्ल, ‘इसे त अङ्गुर बारिक मालिक्क छाहोक् हखइ। हामे इख्राके मारउ र उक्र सम्पतिक हक हाम्र भइत।’ 15हसे उसबेइ मालिक्क छाहोके पुनु अङ्गुर बारिसे बाहार लेजिकुन मार्ल। ‘आबे बारिक मालिकेइ उसब्के किति करित्?’
16“बारिक मालिक आइकुन अधियाँ लागालारके मारिकुन, उसे अङ्गुरबारि अरुसब्के खेति करिके देताहात्।”
इसे सुनिकुन् मानुससबेइ कहल, “यस्न कइह्याउ पुनु झुनभउस।”
17हसे येसुइ उसबपटि चाहातिन् कहिकेभइल, “ओसेकने धर्मक कितापयँ लेख्ल इसे कुराक अर्थ किति हखइ त?
“‘जोनो पाथरके घर बानालारसबेइ काम नालागइ कइकुन एकपटि राख्ल,
उहइ पाथर पाछु जाइकुन घरक जगयँ मुल पाथर बन्ल।’#भज ११८:२२
18उसे पाथरउप्र झर्लार सभइ टुक्रा-टुक्रा भइत, तर जक्रउप्र उसे झरित उहाइ उख्राके चकनाचुर पारित।”
तिरो बुझालार बारेयँ प्रस्न
(मति २२:१५-२२; मर्कुस १२:१३-१७)
19धर्मगुरु र बड्क पुजेहेरिसबेइ इसे काथा उसबकइ बिरोधयँ कहल हखइ कइकुन बुझ्ल पाछु येसुके धरिके बिचार कर्ल, तर उसब मानुससाङ डारातेरत। 20ओस्न भइतेखना उसबेइ येसुके सुटुक्कइ धरिके दाउ चाँइके थाल्ल। उसबेइ मानुससब्के घुस दिकुन धर्मातिक बाहाना कर्तिन येसुक कुरायँ कमजोरि पत्ता लागाइके पाठाल, किकेकने उसब येसुके फासाइकुन अधिकारि र हाकिमसब्क हातयँ सोप्देलार दाउयँ रहत। 21उसे जासुसि मानुससबेइ जाइकुन येसुके यस्के कहल, “गुरुजिउ, हाम्राके थाहा बाटइ, तोहे ठिक कुरा बोराताउ र ठिक कुरा सिकाताउ। तोहे कोक्रउ पक्छेपात नाकरउ, तोहे त परमेसोरक पायड सत्ते तरिकाइ सिखाताहाउ। 22आबे हाम्राके इसे कुरा कओ, हामे कइसरके तिरो तिरिके उचित बाटइ कि नइजे?”
23तर येसुइ उसब्क चलाखि बुझिकुन कहिकेभइल, 24“तोहे मेराके एक्टा सिक्का देखाओ। उछिका कोक्र चित्र र नाउ बाटइ?”
उसबेइ कहल, “रोमि माहाराजाक।”
25तब येसुइ कहिकेभइल, “ओसेकने जोनो रोमि माहाराजाक हखइ रोमि माहाराजाके देओ, र जोनो परमेसोरक हखइ परमेसोरके देओ।”
26उसबेइ मानुसक आघु ओनेन्के केहाउ कुरायँ पुनु फासाइके नइजेसक्ल र ओनेन् देइकेभइल जबाफ सुनिकुन् उसब दङ्गइ परिकुन् चुपचाप बोस्ल।
मोर्लकमाटे बाच्लाहार बारेयँ प्रस्न
(मति २२:२३-३३; मर्कुस १२:१८-२७)
27उपाछु येसुकलघि बिरोधि सदुकिसब अइल। उसबेइ मोर्लमानुस फेरि बाचित कइकुन बिस्वास निजकर्तेरत। 28उहइगुनेइ उसबेइ येसुके पुछ्ल। “गुरुजिउ, मोसाइ हाम्र लागि कानुनक कितापयँ यस्के लेख्ल रहइ, कोलोउ मानुसक दाजु बिहा करिकुन सन्तान नभइतिन मोर्नेपार दाजुक लागि सन्तान भउस् कइकुन भाहिकेइ भाउजेके बिहा करिके पोर्तेरहइ।#बेब २५:५-६ 29कोलोउ घरक जाहानयँ सात जेना दाजुभाइसब रहत। जेठो दाजुहिक बिहा कर्ल तर उसे सन्तान नभइतिन मोर्ल। 30ओस्न भइतेखना माइलाइ आफ्न भाउजेके बिहा कर्ल, तर उसे पुनु सन्तान नभइतिन मोर्ल। 31उपाछु साइलाइ पुनु ओस्नइ करिकुन् भाउजेके बिहा कर्ल र ओसिनकरिकुन नइ सातइ जेना भाहिकसबेइ पालोहिसे भाउजेके बिहा कर्ल तर सातइ जेना सन्तान नभइतिन मोर्ल। 32पाछु उसे बेटि पुनु मोर्लि। 33ओसेकने मोर्लकमाटे बाचित कने उसे बेटि उसब मद्धे कोक्र दुलिहिक भइत? किकेकने उसे सातइ जेनाक दुलिहि भइलि रहि।”
34येसुइ उसब्के जबाफ देइकेभइल, “इसे सन्सारयँ भइलाहार मानुससबेइ मत्रइ बिहा कर्ताहात् र बिहा करिदेताहात्। 35तर मोर्लकमाटे बाचिकुन सोर्ग जाइके लागि योग्य भइल मानुससबेइ सोर्गयँ न बिहा कर्ताहात् न करिदेताहात्। 36उसब फेरि नामोरत्, किकेकने सोर्गदुत जस्नइ भइताहात् र उसब मोर्लकमाटे जिउल गुनेइ परमेसोरक सन्तान भइताहात्। 37मोसाइ मोर्लारसब जिउतात् कलाहार कुराके राम्रसे पर्मान देलरहइ। जरिराख्ल झाडि आघु उहाइ प्रभु परमेसोरेके अब्राहामक परमेसोर, इसहाकक परमेसोर र याकुबक परमेसोर कइकुन पुकार्ल।#प्रस्था ३:१-६ 38ओनेन् त मोर्लसब्क परमेसोर नइजेहखत, तर जिउतसब्क परमेसोर हखत, किकेकने ओनेन्क नजरयँ सभइ जिउत बाटत।”
39हसे कोलोउ-कोलोउ धर्मगुरुइ ओख्निहिँ कहल, “गुरुजिउ, तोहे हाम्राके ठिक कुरा कहिकेभइल।” 40उपाछु मानुससबेइ ओनेन्के फेरि केहाउ कुरा पुछिके आँट नइजेकर्ल।
मुक्ति देलाहार राजा ख्रिस्ट कोक्र सन्तान
(मति २२:४१-४६; मर्कुस १२:३५-३७)
41येसुइ उसब्के पुछिकेभइल, “कस्के मानुससबेइ मुक्ति देइकेभइलाहार राजा ख्रिस्टके दाउदक सन्तान कहिके सक्ताहात्? 42-43किकेकने राजा दाउदेइ आफ्नि लेख्ल भजनसङ्ग्रहयँ यस्के कहल बाटत,
“‘परमप्रभुइ मेर प्रभुके कहिकेभइल,
जबसमन मोइ तेर सत्रुसब्के तेरइ पइतला तर नापुरेम तोइ मेर दाइनेपटि बोसुक।’#भज ११०:१
44मुक्ति देइकेभइलाहार राजा ख्रिस्टके दाउदेइ नइ प्रभु कहित कने कस्के ख्रिस्ट दाउदक सन्तान भइल?”
धर्मगुरुक बिरोधयँ येसुक चेतावनि
(मति २३:१-३६; मर्कुस १२:३८-४०)
45हसे सभइ मानुसेइ सुनिराख्तेखनाइ येसुइ आफ्न चेलासब्के कहिकेभइल, 46“तोहेसब धर्मगुरुकमाटे होसकरउ। उसब लाबो लुगा लागाइकुन् हिड्तात् र बजारयँ मानुससबेइ जिउ-जिउ कर्ल खोज्तात् हसे सभाघरयँ मुक्खे बोस्लाहार ठाउ र भोज खइलाहार बेलाके पुनु बोसिके लागि मान पाउलाहार ठाउ खोज्तात्। 47उसबेइ बिधुइनिक घर लुट्तात्, आफ्निके मानुसक आघु धर्माति देखाइके लाबो पार्थाना कर्ताहात्। ओस्न मानुससबेइ धेरइ सजाय पाउताहात्।”
Currently Selected:
लुका 20: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
