लुका 16
16
हिसाब-किताब राख्लाहार चलाख मानुस
1येसुइ आफ्नेन्क चेलासब्के कहिकेभइल, “कोलोउ धनि मानुसक घरयँ एक जेना उक्र धन-सम्पतिक हेरचाहा कर्लाहार र हिसाब-किताब राख्लाहार मानुस रहइ। उख्राके मालिकक धन-सम्पति उडाते बाटइ, कइकुन दोस लाग्ल रहइ। 2मालिकेइ उसे हिसाब-किताब राख्लारके बोलाइकुन पुछ्ल, ‘मोइ तेर बारेयँ इसे किति सुन्ते बाटम? तेर सभइ हिसाब-किताब मेराके बुझाउक। आबेसे तोइ हिसाब-किताब राख्लाहार भइके नासकस।’ 3उपाछु हिसाब-किताब राख्लाहार मानुसेइ मनमनइ सोच्ल, ‘मेर साहुइ मेराके नोकरिकमाटे निस्कानेपार, मोइ किति करिके हबखाइ? खनजोत करिकुन खइलाहार काबु नइजे, भिख माङ्गिकुन खाउ कने पुनु लाजातम। 4आबे मोइ किति करिकेपोरित कइकुन मेराके थाहा भइल। मेराके नोकरिसे निस्काइ देनेपार मानुससबेइ आफ्न घरयँ मेराके मान करिकुन बोलाइके नइ पोर्लाहार बानातम।’ 5उपाछु हिसाब-किताब राख्लाहार मानुसेइ मालिकसे रिन लेलार एक-एक जेनाके बोलाइकुन, पइलाके पुछ्ल, ‘तोइ मेर मालिकके तिरिके पोर्लाहार रिन कत्का बाटइ?’ 6हसे उहाइ कहल, ‘तिन हजार लिटर जइतुनक तेल।’ हिसाब-किताब राख्लाहार मानुसेइ कहल, ‘तेर तमसुक लेउक र बोसिकुन तुरुन्तइ पन्ध्र सय लिटर लेखुक।’ 7ओसिनकरिकुन ‘तोइ कत्का बुझाइके बाटइ?’ कइकुन अर्कके पुछ्ल। उहाइ कहल, ‘तिन सय पचास कुन्टल गहुँ।’ उख्राके पुनु हिसाब-किताब राख्लारइ कहल ‘तेर तमसुकयँ तिन सय कुन्टल मत्रइ लेखुक।’ 8मालिकेइ बइमानि हिसाब-किताब राख्लाहार मानुसक बखान कर्ल किकेकने उहाइ बुद्धि पुरेइकुन चलाखिसे काम कर्ल रहइ। इसे सन्सारक मानुससब आफ्निजस्नइ अरु मानुससाङ बेभार कर्लाहार कामयँ परमेसोरक जोतियँ हिठ्लाहार मानुससब्कते अझइ बढि चलाख भइताहात्।
9“मोइ तेउह्रासब्के कहतम्, संसारक धनेइ साङ्घाति बानाओ, ताकि जोख्नि उसे धन सक्काइत, ओख्निके तोहेसबेइ अजम्बरि ठाउयँ मान पाउताहाउ।” 10येसुइ फेरि कहिकेभइल, “जोनो थोरइ कते थोरइ कुरायँ इमान्दार भइत उसे धेरइयँ पुनु इमान्दार भइत, ओसिनकरिकुन जोनो थोरइ कुरायँ बेमान भइत, उसे मानुसचाहिँ धेरइ कुरायँ पुनु बेमान भइत। 11उहइगुनेइ, तोहेसब संसारक धनयँ बइमानि भइताहाउ कने, कोनेइ पो तेउह्रासब्के सत्तेक धनक जिम्मा देइत र? 12तोहेसब अर्काक धनयँ इमान्दारि नाभोओ कने, जोनो धन तेउह्रसब्क आफ्न भइके सक्लाहार, उसे तेउह्राके कोनेइ देइत र?
13“कोलोउ पुनु नोकरेइ दुक्टा मालिकक सेवा करिके नासकइ; किकेकने उहाइ एक्टाके हेला करित् र अर्कके माया करित्, कि त उहाइ एक्टाइ कहल मानित र अर्कके वास्ताइ नाइकरइ। ओसिनकरिकुन तोहेसब पुनु परमेसोर र धन दुहइके सेवा करिके नाइसकउ।”
14इसे सभइ कुरा सुनिकुन् फरिसिसबेइ येसुके ठट्टा कर्ल, किकेकने उसब धनक लोभि रहत। 15हसे येसुइ तिनेन्के कहिकेभइल, “तोहेसब मानुससब्क आघु धर्माति देखाताहाउ, तर परमेसोरेइ तेउह्रसब्क मन जानिकेभइतात्। मानुसेइ बड्क ठान्ल कुरासब्के परमेसोरेइ घिनाताहात्।
परमेसोरक कानुनक एक्टा कुरा पुनु हेराइके नासकइ
(मति ११:१२-१३; ५:१८,३२)
16“बप्तिस्मा देलाहार युहन्नाक बेलासमन मोसाइ देल कानुन र अगमबक्तासब्क सिछ्या प्रचार कर्ल। उसे बेलासे परमेसोरक राज्जेक खुसिक समचार प्रचार कर्ल बाटइ, हसे राज्जेभित्र पोसिके सभइ जेना जोड कर्ते बाटत। 17तइपुनु आकास र पिर्थिबि टलिकुन जाइके सकित तर परमेसोरक कानुनक कुरा एक्टाउ पुनु नाइहेराओइ।
18“जोनेइ आफ्न दुलिहिके छाडिकुन अर्किके बिहा करित् उसे मानुसेइ बेभिचार करित्; हसे दुलाहिक छाड्देल बेटिके बिहा कर्लाहारइ पुनु बेबिचार करित्।”
धनि मानुस र लाजरस
19येसुइ फेरि कहिकेभइल, “एक जेना धनि मानुस रहइ, जोनेइ राम्र-राम्र लुगा लागाइकुन, सद्देहुन मोजमज्जायँ जिबन बितातेरहइ। 20मानुससबेइ उक्र केवारिक आघु एक जेना लाजरस कलाहार जिउभरि घाउ नइ घाउ भइल गरिब मानुसके राख्तेरहत। 21हसे धनि मानुसेइ खाइकुन झार्ल टुक्राटाक्रि खाइके पाउताहिँ कि कइकुन उहाइ चाइराख्ते रहइ। कुकुरसबेइ आइकुन उक्र घाउ चाटिदेते रहइ। 22एक दिन यस्न भइल कि उसे गरिब लाजरस मोर्ल, र सोर्गदुतसबेइ उख्राके लेजिकुन अब्राहामक छेओयँ राखिदेल। हसे उसे धनि मानुस पुनु मोर्ल र मानुससबेइ उख्राके गाड्देल। 23पातालयँ पुगिकुन धेरइ दुख पाउल। उहाइ उप्रपट्टि आँखि उठाइकुन चाहाल त टाढोहिँसे अब्राहाम र लाजरसके साघिन देख्ल। 24हसे उहाइ चिच्चेइकुन कहल, ‘हे बुबा अब्राहाम! मेराके दया करिकुन, लाजरसके आफ्निक पिङ्रिक टुप्पा पानियँ चोपिकुन, मेर मुहुयँ चुहाइकुन मेर जिभिके सितल पारिके इछिका पाठाइदेओ। मेराके इसे आगियँ बेस्के दुख भइराख्ते बाटइ।’ 25तर अब्राहामेइ कहल, ‘मेर छाहोम्, सम्झुक त, तेर जिबनयँ तोइ सभइ सुख पाउल रहस्, तर लाजरसेइ चाहिँ दुखइ-दुख पाउल रहइ। यख्निचाहिँ लाजरसेइ इछिका सुख र सान्ति पाउते बाटइ, तर तोइ चाहिँ इछिका दुख पाइराख्ते बाटस्। 26यत्का मत्रइ नइजे, फेरि तेर र हाम्र माझयँ बड्क खाल्टा बाटइ, जक्र कारनेइ कोलोउ पुनु एपारओपार आइके-जाइके नासकइ।’ 27हसे धनि मानुसेइ कहल, ‘ओसेकने ए बुबा, बिन्ति बाटइ, लाजरसके मेर बुबाक घरयँ पाठाइदेओ। 28लाजरस जाइकुन मेर पाँचइ जेना दाजुभाइके इछिका भइल सभइ कुरा सुनाइकुन, चेतावनि देउस, नत्र उसब पुनु इसे दुखक ठाउयँ अइबकान।’ 29तर अब्राहामेइ उख्राके कहल, ‘उसबसाङ मोसा र अगमबक्तासबेइ लेख्ल धर्मक किताप बाटइ, उसबेइ सुनिकुन मान्ने त पुगिहालित नि।’ 30फेरि धनि मानुसेइ कहल, ‘नइजे बुबा अब्राहाम! ओत्काइ मत्रइ उसब्के नापुगइ, तर मोर्लकमाटे कोलोउ मानुस फेरि बाचिकुन उसब्कलघि जइनेपार त उसबेइ आ-आफ्न पापके छाडिकुन अइताहात् नि।’ 31हसे अब्राहामेइ जबाफ देल, ‘मोसा र अगमबक्तासब्क कुरा निजसुन्लारसबेइ, मोर्लकमाटे जिइकुन कोलोउ मानुस उसब्कलघि जइने पुनु बिस्वास नाकरत्’।”
Currently Selected:
लुका 16: DRY
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
