१ थेसलोनिकि 2
2
थेसलोनिकि सहरमा पावलको धन्दा
1दाजिभाइ दिदिबहिनिहान हो, ताहान्सिन हामि गर्लो भेटघाट बेर्थ नारहिक् कलार कुरा ताहान्के पनि थाहा बाटि। 2तर ताहान्ठुँ आएकते पहिलि मानिसहान्इ फिलिपि सहरमा हाम्राइ दुख देलो र बेजत गर्लो कुरा ताहान्के थाहा बाटि। तर थेसलोनिकिमा हाम्रो धेरे बिरोधिहान रते पनि हाम्रो परमेस्वरको साहेताइ हामि ताहान्के परमेस्वरको नाम्रो खबर सुनाहिं।#पेरेरित १६:१९-२४; १७:१-९ 3क्यारेकनि हामिइ कलो कुराहान्मा कुन्हुँ छलकपट, खराब बिचार र फटालो कुरा नारहिक्। 4तर परमेस्वरइ हाम्राइ बिस्वासिलो ठानिकनि त नाम्रो खबर प्रचार गरे जिम्मा देलाटि। उसिगर्ते हामिइ मानिसहान्के खुसि पारे नाहो, बरु हाम्रो मनको कुरा जान्लार परमेस्वरके खुसि पारे नाम्रो खबर सुनाताहुँ। 5क्यारेकनि ताहान्के थाहा बाटि कि हामि कन्हुँ पनि फटालाहार कुरा नागर्हुँ। अनि हामि लोभमा पनि नापर्हुँ। इ कुराहान्को साछि त परमेस्वर बाटि। 6हामि खिरिस्टको मुख्य चेला होख्लो नाताइ ताहानमा अधिकार जमाए सक्लार्हुँ। तर पनि ताहानभि न त मानिसहानभि न अरु कुन्हुँभि हाम्राइ आदर गरुस् कहि खोज्हुँ, 7तर एउटा आमाइ आफ्नो बच्चाहान्को हेरचाहा गर्लो जस्ने, हामिइ पनि ताहान्को माझोमा नम्र होखिकनि ताहान्के हेरचाहा गर्हिं। 8हामिइ ताहान्के धेरे माया गर्लो कारनइ परमेस्वरको नाम्रो खबर सुनाए मात्रे नाहो, तर ताहान्को लागि हामि आफ्नो जिउ पनि देहे तयार रहुँ। क्यारेकनि ताहान हाम्रो लागि जारे ज प्यारो रहो। 9दाजिभाइ दिदिबहिनिहान हो, ताहान्के नाम्रोसिन थाहा बाटि, हाम्रो कारनइ ताहानमध्ये कुन्हुँके पनि बोझ नाहोखुस् कहिकनि हाम्राइ चाहेलार कुराको लागि आफि रात दिन कजाइतिहिं ताहान्के नाम्रो खबर सुनाहिं। हाम्रो दुख र कस्टको बारेमा ताहान्के थाहा बाटि।
10हामि ताहान पर्भुमा बिस्वास गर्लारहान्सिन रलो बेरामा पबित्र, धर्मि र निर्दोस रिहिं। इ कुराको साछि ताहान र परमेस्वर पनि बाटो। 11ताहान्के थाहा बाटि, बुबाइ आफ्नो छउना छउनिहान्के सिखालो जस्ने हामि पनि ताहान सभइके सिखाहिं। हामि कस्के परमेस्वरके मन पर्लार बाटमा भोए ताहान्के हउसला दिहिं, 12ताहान्के आफ्नो राज्ये र महिमामा बट्हेके बोलालार परमेस्वरके खुसि पार्लार जिबन जिएके लागि हामिइ ताहान्के सिखाहुँ।
13हामिइ ताहान्के परमेस्वरको बचन सुनाते ताहान्इ उ सिछाके मानिसको बोलि नासोचिकनि साच्चिके परमेस्वरको सत्य सिछा हो कहि सुनिकनि बिस्वास गर्लो कारनइ सधइ परमेस्वरके धन्येबाद देताहि। होखे पनि साच्चि ज इ परमेस्वरके सिछा रहिक्। अनि इ सिछाइ पनि बिस्वास गर्लार ताहान्मा काम गरि ज रलाटि। 14क्यारेकनि दाजिभाइ दिदिबहिनिहान हो, यहुदिया इलाकामा खिरिस्ट पर्भु येसुमा बिस्वास गर्लार परमेस्वरको मन्डलिहान्को देखासिखि ताहान्इ गर्ताओ। क्यारेकनि यहुदि इलाकामा रलो मन्डलिहान्इ यहुदिहानभि जस्नो सतावट भोग्वाइ, ओस्ने ज ताहान पनि ताहान्के मानिसहान्भि सतावट भोगे पर्लाटि।#पेरेरित १७:५ 15केइ यहुदिहान्इ पर्भु येसुके र अगमबक्ताहान्के पनि मार्वाइ र हाम्राइ पनि सताइकनि लघार्वाइ। उनहान्इ परमेस्वरके मन नापर्लार धन्दा गर्लाटाइ र सभइ मानिसहान्को बिरोध गर्तात्।#पेरेरित ९:२३,२९; १३:४५,५०; १४:२,५,१९; १७:५,१३; १८:१२ 16परमेस्वरको नाम्रो खबर अरु जातहान्इ सुनिकनि मुक्ति झिनपाउस् कहिकनि उनहान्इ नाम्रो खबर प्रचार गरे हाम्राइ रोक्लार कोसिस् गर्लाटाइ। एस्के परमेस्वरको नजरमा उनहान्को पाप झन कते झन बढ्तिहि बाटि। तर आब त परमेस्वरको रिस उनहान्मा पर्ताइ।
पावलइ थेस्लोनिकिहान्के फेरि भेटे इच्छा गर्ताइ
17दाजिभाइ दिदिबहिनिहान हो, हामि केइछिनको लागि ताहान्सिन दुस्हि होखे परिक, तर पनि हाम्रो मन त ताहान्सिन ज बाटि। हाम्राइ ताहान्सिन फेरि भेट्लार जारे ज इच्छा बाटि। 18हामि ताहान्ठुँ आए जारे ज कोसिस गर्लो रहुँ, मइ पावल त झन घरि घरि आए खोजिन, तर सइतान्इ हाम्रो बाट छेकिक्। 19क्यारेकनि हाम्रो पर्भु येसु फेरि आउते ओख्रो आघु हाम्रो आस, आनन्द अथवा घमन्ड गर्लार मुकुट ताहान ज हो। 20साच्चिके हाम्रो इज्जत र आनन्द ताहान ज हो।
Currently Selected:
१ थेसलोनिकि 2: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
