१ थेसलोनिकि 1
1
1परमेस्वर बुबा र पर्भु येसु खिरिस्टमा बिस्वास गर्लार थेसलोनिकि सहरमा रलो बिस्वासिहान्के मइ पावल, सिलास र तिमोथिको तर्फभि इ चिट्ठि लेखिकनि पठालाटाहुँ।
परमेस्वरइ ताहान्के अनुग्रह र सान्ति देउस्।#पेरेरित १७:१
थेसलोनिकिहान्को धन्दा र बिस्वास
2हामि पर्थना गर्ते ताहान सभइ जनाके सधइ सम्झतिहि ताहान्को लागि परमेस्वरके धन्येबाद देताहि। 3क्यारेकनि ताहान्इ परमेस्वर बुबामा गर्लो बिस्वासइ गर्ते ताहान्को माया अनि मानिसहान्इ दुख देते सहलो कुरा र हाम्रो पर्भु येसु खिरिस्ट फेरि आउताइ कहि पक्का बिस्वास गर्लाटाओ।
4दाजिभाइ दिदिबहिनिहान हो, परमेस्वरइ ज ताहान्के माया गरिकनि छान्लो हो कलार कुरा हाम्राइ थाहा बाटि। 5क्यारेकनि हामि ताहान्के सुनालो नाम्रो खबर फोकट्या गफ मात्रे नारहिक्, तर पबित्र आत्माइ हाम्राइ सक्तिसालि तरिकाइ बोले सघाइक, र इ धन्दाइ पक्का रुपमा ताहान्मा काम होखिरलाटि कहि पबित्र आत्माइ हाम्राइ कहिक्। ताहान्के हितको लागि कहिकनि हामि ताहान्सिन रते कस्के बोल्हुँ र धन्दा गर्हुँ कलार कुरा ताहान्के थाहे बाटि। 6ताहान्इ हाम्रो र पर्भुको देखासिखि गर्लाटो, क्यारेकनि पबित्र आत्माइ देलो नाम्रो खबरके धेरे दुखमा पनि आनन्दसिन सुइकार गर्लाटो।#पेरेरित १७:५-९ 7अनि एस्के ताहान माकेडोनिया इलाकाको अरु ठउँहान र अखइया इलाकामा रलो सभइ पर्भुमा बिस्वास गर्लार मानिसहान्को लागि एउटा नमुना बन्लाटो। 8क्यारेकनि ताहान्को कारनइ परमेस्वरको बचन माकेडोनिया र अखइयामा मात्रे नाफइलिहिक, तर परमेस्वरमा गर्लो ताहान्को बिस्वासको कुरा सभइ ठउँमा फइलिरलाटि। उसिगर्ते एख्रो बारेमा कहे पर्लार केइ नाटि। 9क्यारेकनि हामि ताहान्ठुँ आउते ताहान्इ हाम्राइ कस्के स्वागत गरो, अनि जिउते र सत्य परमेस्वरको सेवा गरेके लागि मुर्ति पुजाभि कस्के फर्को कलार कुरा त मानिसहान्इ ज कतात्। 10ताहान्इ त परमेस्वरको छउना स्वर्गभि आउताइ कहिकनि पर्खलाटो कहि उनहान्इ हाम्राइ कहाइ। उ मर्लोभि फेरि परमेस्वरइ जिउते बनालो येसु हो। परमेस्वरभि आउलार डरलाग्दो दन्डभि बचालार पनि येसु ज हो।
Currently Selected:
१ थेसलोनिकि 1: BOTE
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
