San Marcos 7

Ñaꞌa ya xáa väꞌa naꞌa nuu Ndioxi

(Mt. 15:1-20)

1Saa ku̱u iin ichí ndi̱xaa nda fariseo xiꞌin sava nda maestro nda sínaꞌa ley Ndioxi, nda ke̱e ñuu Jerusalén, ndi̱xaa nda nuu Jesús. 2Ta saa xi̱ni nda xíxi nda ítaꞌan xiꞌin Jesús, ta köo ndi̱kata nda ndaꞌa nda, saa káa yakua ndaꞌa nda xíxi nda, yakan kua ndi̱kiꞌvi nda iin kuachi chee nuu Ndioxi xaꞌa ya köo xáa súvi nda tá kuꞌva íyo ichí ya si̱ndoo xii nda xinaꞌa, káchi nda ikán. 3Saa chi ndiꞌi nda fariseo xiꞌin ndiꞌi ka na judío, ta ndíkun ndiꞌi na ikán ichí xii sikua na. Xiꞌna ndóo vaꞌa ndaꞌa na saa xíxi na, tá tu köo ndóo ndaꞌa na ta köo xíxi na. 4Ni tá ndíko koo na ndi̱xaꞌan na nuu yaꞌvi, ta köo xíxi yachi na, tá tu täꞌan ndoo ndaꞌa na. Ya yóꞌó kua íkan na xiꞌin kuaꞌa ni ka nuu ñaꞌa. Ndíkata na vaso ta ndíkata na kisi xiꞌin ndiꞌi ka ñaꞌa ya kàà xíniñuꞌu na, saa ndíkata na xito nuu xíndoo na kíxi na. 5Xaꞌa ya ikán kua ndi̱ndakan tuꞌun nda maestro ikán xiꞌin nda fariseo, ndi̱ndakan tuꞌun nda Jesús, káchi nda saa:

―¿Ndachu kua köo xáa súvi nda ítaꞌan xiꞌin un ichí ya si̱ndoo xii yo xinaꞌa? Köo ndi̱kata nda ndaꞌa nda, saa íin yakua ndaꞌa nda xíxi nda, xíxi yakua nda nuu Ndioxi ―káchi nda xiꞌin ra.

6Saa ndi̱kuiin Jesús káꞌan ra:

―Ndaa ni ndixa ndi̱kaꞌan ra Isaías, ra ndi̱kaꞌan ndoso tuꞌun yuꞌu Ndioxi xinaꞌa xaꞌa ndo, ya uvi ni yuꞌu ndo, chi ya ta̱a ra ndi̱kaꞌan Ndioxi xiꞌin ra, káchi ya saa:

Na ivi yóꞌó, nuu yuꞌu kuiti va na ínuu ya káꞌan na, káñuꞌu na yeꞌe,

sundi nima na ta íyo xíka ni ya nuu i, chi köo ndinuꞌu ini na xáa toꞌo na yeꞌe.

7Köo ndáa yaꞌvi ya káꞌan na xáa kaꞌnu na yeꞌe.

Chi kuꞌva sínaꞌa na, ta ya ndáku xiní na ivi yóꞌó va kua sínaꞌa na, chi süvi saa kua káꞌan yeꞌe ikan na,

káchi Ndioxi xiꞌin ya ta̱a ra Isaías. 8Ta saa ndixa íkan ndo, chi köo xáa ndúvi ndo ya káꞌan Ndioxi xiꞌin ndo, xáa ndúvi ka ndo ya sínaꞌa xii yo, tá kúu ya ndíkata ndo kisi xiꞌin vaso tin inka ka nuu ñaꞌa taꞌan ya yóꞌó ―káchi Jesús xiꞌin nda.

9Saa ndi̱kaꞌan ka ra xiꞌin nda, káchi ra saa:

―Ni köo kíꞌin ndo kuenta xaꞌa ya káꞌan Ndioxi, kíꞌin ka ndo kuenta xaꞌa ichí ya si̱ndoo xii yo. 10Ta káꞌan i saa xiꞌin ndo chi ya ta̱a ra Moisés ta káꞌan ya saa: “Xaa toꞌo ndo iva ndo xiꞌin siꞌí ndo” ta saa “tá kúu na távi chiꞌña iva na án siꞌí na, ta ndikun ná kuvi na”, káchi ya ta̱a ra. 11Sundi ndóꞌo̱ ta köo xáa súvi ndo ya ta̱a ra Moisés, chi táxi ndo káꞌan iin taa xiꞌin iva ra án xiꞌin siꞌí ra: “Küvi chindee i yóꞌo̱, chi ndiꞌi ya kúu mií i ta xa ndi̱soko ndiꞌi i ya nuu Ndioxi”, káchi ra. Ta táxi ndo káꞌan ra saa xiꞌin iva siꞌí ra. 12Ta köo táxi ndo chindee taꞌan ra xiꞌin iva ra án siꞌí ra. 13Xiꞌin ya íkan ndo saa ta síndoo ndaꞌa ndo ya káꞌan Ndioxi. Xáa súvi ka ndo ya sínaꞌa mií ndo. Nda inka naꞌa sínaꞌa ndo xiꞌin ya káꞌan ndo. Ta kuaꞌa ni ka nuu ñaꞌa taꞌan ya yóꞌó íkan ndo ―káchi ra xiꞌin nda fariseo tin nda maestro ikán.

14Tá si̱ndiꞌi Jesús ndi̱kaꞌan ra xiꞌin nda ikán, saa ka̱na ra naꞌa káꞌan ra xiꞌin na, káchi ra saa:

―Kuni soꞌo ndiꞌi ndo ta kundaa ini ndo ná kaꞌan i xiꞌin ndo: 15Nda iin ñaꞌa xíxi na án ya yáxi na ivi yóꞌó ta köo xáa väꞌa ya na nuu Ndioxi. Ñaꞌa ya vaxi chí nima na ya ikán kua ndása väꞌa ñaꞌa ―káchi ra xiꞌin na.

16Saa ndi̱kaꞌan ra xiꞌin na:

―Ndiꞌi ndóꞌo̱ xíni soꞌo ya káꞌan i, ta kuni soꞌo ni ndo ta saa ndikiꞌin xiní ndo xiꞌin ya ―káchi ra.

17Ñaa tá si̱ndoo Jesús naꞌa ikán ta ndi̱kiꞌvi ra ini veꞌe, saa ndi̱ndakan tuꞌun ñaꞌa nda ítaꞌan xiꞌin ra xaꞌa ya ndi̱kaꞌan ra. 18Saa ndi̱kuiin ra, káꞌan ra:

―¿Án ndóꞌo̱ köo ndi̱kundaa ini ku tu ndóꞌo̱ va? ¿Án köo xíni ndo ndiꞌi ya kuakee yuꞌu na ivi ta küvi ndasa väꞌa ya na nduyakua na nuu Ndioxi? 19Saa chi ya xíxi na án ya yáxi na, ta süvi chí nima na kuaꞌan ya, chí tixin va na kuaꞌan ya, ta saa kána koo ya xíta ya ―káchi ra xiꞌin na.

Xiꞌin ya ndi̱kaꞌan Jesús ikán kúni kachi ya, ndiꞌi ñaꞌa xíxi yo ta ya vaꞌa ku ndiꞌi ya nuu Ndioxi. 20Saa ndi̱kaꞌan ka ra, káchi ra saa:

―Sundi tuꞌun káꞌan na xiꞌin ya íkan na, ya ikan kua ndása väꞌa na, ndása yakua ya na nuu Ndioxi. 21Saa chi chí nima na kána koo ya väꞌa ndíkani ini na, tá kúu ya ndíkani kiꞌvi ini na, ta saa tá kúu iin ra kuakiꞌvi xiꞌin ñaꞌá ta süvi yá síꞌi ra ku yá, án ñaꞌá kuakiꞌvi yá xiꞌin taa ta süvi i̱í yá ku ra, xiꞌin ya xáꞌni na ndìì. 22xiꞌin ya síkuiꞌna, tin ya kútoo ni na koo kuaꞌa ñaꞌa na, xiꞌin ndiꞌi ka ya kini íkan na ivi yóꞌó, saa tu ya síndaꞌvi na naꞌa, xiꞌin ya kútoo ni na ikan na ñaꞌa ya kúni mií na xiꞌin ikin kuñu na, xiꞌin ya kúu uni ini na, tin ya távi chiꞌña na inka naꞌa, tin ya kútai ni ini na, xiꞌin ya ndíkani ini na xaꞌa ya köo ndáa yaꞌvi inka naꞌa. 23Ndiꞌi ya väꞌa yóꞌó ta chí nima na kána koo ya, ya yóꞌó kua ndása yakua na ndúu väꞌa na nuu Ndioxi ―káchi Jesús.

Ndáa ni ini iin ñaꞌa yá köo kúu judío xíni yá Jesús

(Mt. 15:21-28)

24Tá sindiꞌi ikán ta ke̱e Jesús ndi̱kiꞌin ra kuaꞌan ra chí ñuu Tiro xiꞌin ñuu Sidón. Saa ndi̱kiꞌvi ra ini iin veꞌe, ta ni köo kúni ra kundaa ini naꞌa ya ndi̱xaa ra, ta köo ndi̱kuchiñu tiseꞌe ra. 25Ta kama ni xi̱ni soꞌo iin ñaꞌa yá íyo iin seꞌe síꞌi loꞌo, ta kúu mií yá loꞌo ikán tachi nduvaꞌa. Ñaa ndi̱xaa siꞌí yá si̱kusiti yá xaꞌa Jesús. 26Ta süvi yá judío ku yá, yá köo xíni Ndioxi ku yá, yá ñuu Sirofenicia ku yá. Saa ndi̱xaꞌan yá xáku ndaꞌvi yá nuu Jesús, káꞌan yá xiꞌin ra ya ná tava ra tachi nduvaꞌa kúu mií seꞌe yá. 27Saa ndi̱kaꞌan Jesús xiꞌin yá, káchi ra saa:

―Kundatun un ná kuxi xiꞌna seꞌe na veꞌe, saa chi küvi kindaa na ñaꞌa yuꞌu seꞌe na ta taxi na ya kuxi tina vali ―káchi ra xiꞌin yá.

28Saa ndi̱kuiin yá, káꞌan yá:

―Saa ndixa va, Tata, sundi tá xíxi na, ta kóyo ñaꞌa yuꞌu na tixin mesa ndíkaya tina vali xíxi ri ―káchi yá xiꞌin ra.

29Ñaa ndi̱kuiin ra, káꞌan ra xiꞌin yá:

―Xaꞌa ya vaꞌa ndi̱kuiin un, ta vaꞌa ndiko koo kuanuꞌu veꞌe un, chi xa ke̱e tachi nduvaꞌa ya ndóꞌo seꞌe un ―káchi ra xiꞌin yá.

30Saa ke̱e ndixa yá kuanuꞌu yá, tá ndi̱xaa yá veꞌe yá ta xa ndu̱vaꞌa ndixa seꞌe yá índuꞌu yá nuu xito.

Síndaꞌa Jesús iin taa ra soꞌo tin meꞌme ra

31Ndi̱ko koo Jesús ke̱e ra ñuu Tiro saa ndi̱yaꞌa ra chí ñuu Sidón ikán ndi̱yaꞌa ra ñuu vali ya ñúꞌu iin ñaꞌñu náni Decápolis. Saa ndi̱xaa ra yuꞌu nduta ñûꞌu rá Galilea. 32Ikán ndáka na iin ra sóꞌo tin meꞌme ra ndi̱xaa ra nuu Jesús. Saa ndi̱kaꞌan na xiꞌin Jesús, ya ná chinuu ndaꞌa ra sata ra ta sindaꞌa ñaꞌa ra. 33Saa ndi̱kiꞌin Jesús ra, ta ndi̱xaꞌan ra xiꞌin ra iin ñaꞌñu loꞌo nuu köo naꞌa, ta ikán tu̱vi ndaꞌa ra soꞌo ra, saa si̱kuchi ra sii nuu ndaꞌa ra ñaa ti̱in ndaa ra yaá ra ikán. 34Ñaa nda̱niꞌi nuu ra nuu ndivi saa ndi̱kiꞌin ra tachi ra, ta ndi̱kaꞌan ra xiꞌin ra ikán, káchi ra saa:

―¡Efata! ―káchi ra xiꞌin ra. Tuꞌun ikán kúni kachi ya: ¡Ná kuna ya!

35Saa ndikun ndi̱nuna soꞌo ra, saa ndu̱vaꞌa tu yaa va ra ñaa xa̱á vaꞌa káꞌan ra. 36Saa ndi̱kaꞌan Jesús xiꞌin na ya ná käꞌan na xiꞌin nda iin naꞌa ndá kuꞌva ndu̱vaꞌa ra. Ni ndi̱kaꞌan ni ra xiꞌin na ya ná käꞌan na xiꞌin nda iin naꞌa, ta kuaꞌa ni ka na ndi̱tuꞌun na xiꞌin xaꞌa ra. 37Saa iin ndi̱kanda ini ndiꞌi na, ñaa xa̱á na káꞌan na:

―¡Ndiꞌi vi ya vaꞌa íkan ra! ¡Nda na soꞌo xiꞌin na meꞌme ta síndaꞌa ndiꞌi ra na ―káchi na!

Currently Selected:

San Marcos 7: xta

Highlight

Copy