San Marcos 6

Ndi̱ko koo Jesús kuanuꞌu nuu ra Nazaret

(Mt. 13:53-58; Lc. 4:16-30)

1Saa ke̱e Jesús ñuu ikán, ta ndi̱ko koo ra ndi̱xaa ra ñuu ra xiꞌin nda ítaꞌan xiꞌin ra. 2Tá ti̱ndaa kivi i̱í ndíkundee na, saa ndi̱xaa ra veꞌe ñuꞌu sinagoga xa̱á ra sínaꞌa ra. Ta kuaꞌa ka vi na xíni soꞌo káꞌan ra, iin ndíkanda ini na xíni soꞌo na káꞌan ra, saa káꞌan na xaꞌa ra:

―¿Ndachu vaꞌa xíni ni ra? Tá káꞌan iin ra ndíchi ni saa káꞌan ra. ¿Ta ndachu vaꞌa íkan ra yatuꞌun? 3Ta süvi chiñu ndee vi kúu mií ra xiꞌin itun va xáa chiñu ra. Án su seꞌe yá María va ku ra, ta xíni tu yo nda ñani va ra, ra Jacobo, xiꞌin ra José tin ra Judas xiꞌin ra Simón. Xíni tu yo ná kuꞌva va ra ―káchi na.

Ta xa̱á káꞌan ni na xaꞌa ra. 4Saa xa̱á ra káꞌan ra xiꞌin na:

―Ndiꞌi naꞌa ta káñuꞌu ni na nda káꞌan ndoso tuꞌun yuꞌu Ndioxi, sundi nda iin na ñuu mií nda köo xíin na xaa toꞌo ñaꞌa na, ni na taꞌan nda, ni na veꞌe nda ta köo xíin na xaa toꞌo ñaꞌa na ―káchi Jesús xiꞌin na.

5Xaꞌa ya ikán köo ndi̱kan ra kuaꞌa yatuꞌun, uvi ndaa va ku na kúꞌvi chi̱nuu ndaꞌa ra sata, ta si̱ndaꞌa ra na. 6Ta ndi̱kanda ini ra xi̱ni ra na, chi tuun ni nima na, köo xíin na kandixa ñaꞌa na. Saa ndi̱xika ra ndiꞌi kúu ñuu vali ya íyo yati sínaꞌa ra tuꞌun Ndioxi.

Tíꞌvi Jesús nda ítaꞌan xiꞌin ra kuaꞌan nda kaꞌan ndoso nda tuꞌun Ndioxi

(Mt. 10:5-15; Lc. 9:1-6)

7Saa ku̱u ka̱na ra uxi uvi saa nda ítaꞌan xiꞌin ra, ta ti̱ꞌvi ra nda kuaꞌan nda kaꞌan ndoso nda tuꞌun Ndioxi. Tá uvi, tá uvi nda ti̱ꞌvi ra kuaꞌan. Ta saa ta̱xi ra ndee ndaꞌa nda ya tava nda tachi nduvaꞌa kúu mií naꞌa. 8Saa xa̱ꞌnda ra chiñu nuu nda ya ná küꞌun nda iin ñaꞌa xiꞌin nda kuniñuꞌu nda ichí: ni bolsa ni xita vaꞌa, ni xuꞌun küvi kuꞌun xiꞌin nda. Ndisaa iindaa itun kátavi na ku nu vaꞌa kuꞌun xiꞌin nda. 9Sundi vaꞌa kuꞌun iin nduxan ya xa ndíkaa xaꞌa nda xiꞌin nda, ta nda iin ka toto ya ndinama nda küvi kuꞌun xiꞌin nda ―káchi ra xiꞌin nda.

10Saa ndi̱kaꞌan ka ra xiꞌin nda, káchi ra saa:

―Tá ndá veꞌe ndi̱xaa ndo, ta vaꞌa ndoo ndo koo ndo xiꞌin na ikán nda kivi ná kee ndo ñuu na. 11Tá ndá ñuu ndi̱xaa ndo, köo xíin na ndikiꞌin vaꞌa na ndóꞌo̱, ni köo xíin na kuni soꞌo na ya káꞌan ndo, ta köo ndo ñuu na. Kana koo ndo kuaꞌan ndo, ta ndiyakun ndo yaa ñuu na ya chi̱chi sata nduxan ndo, ya ná kundaa ini na ku̱ndasi na tuꞌun Ndioxi. Ya ndaa káꞌan i xiꞌin ndo tá ná tindaa kivi sindiꞌi ya xaa nani Ndioxi kuachi xiꞌin na ñuu ivi yóꞌó, ta ndee ni ka uꞌvi sitixuꞌvi ra na ku̱ndasi tuꞌun ra nuu na väꞌa xi̱ndoo ñuu Sodoma xiꞌin ñuu Gomorra xinaꞌa ―káchi ra xiꞌin nda.

12Saa ka̱na koo nda kuaꞌan nda, káꞌan nda xiꞌin naꞌa ya ná ndiko koo ini na xaꞌa kuachi na, ta ndiko koo na nuu Ndioxi. 13Ta táva nda kuaꞌa ka vi tachi nduvaꞌa ya kúu mií naꞌa, saa chikaa tu nda ceite xiní na ta síndaꞌa nda na.

Soꞌva ku̱u tá ndi̱xiꞌi ra Juan ra síkuchi naꞌa

(Mt. 14:1-12; Lc. 9:7-9)

14Saa xi̱ni soꞌo ra rey Herodes tuꞌun xaꞌa Jesús, saa chi xa ndiꞌi ni kúu ñaꞌñu ndi̱xita tuꞌun xaꞌa ra. Saa xa̱á ra káꞌan ra, káchi ra saa:

―Ra Juan, ra síkuchi naꞌa ku ra ndi̱taku yakan vaꞌa kúu mií ra yatuꞌun Ndioxi ―káchi ra.

15Ta inka na káꞌan:

―Ra Elías, ra ndi̱kaꞌan ndoso tuꞌun yuꞌu Ndioxi xinaꞌa ku ra ndi̱taku ―káchi na.

―Va iin ra ndi̱kaꞌan ndoso tuꞌun yuꞌu Ndioxi ku ra, án sana ndá nda ndi̱kaꞌan ndoso tuꞌun yuꞌu Ndioxi xinaꞌa ku ra ndi̱taku ―káchi na.

16Saa tá xi̱ni soꞌo ra Herodes ya káꞌan na, ñaa xa̱á ra káꞌan ra:

―Ra Juan ra xa̱ꞌnda i chiñu xa̱ꞌnda na sukun ndi̱xiꞌi ku ra, ndi̱taku ra ―káchi ra.

17Saa chi xa yachi vi xa̱ꞌnda chiñu ra Herodes ya ti̱in na ra Juan ka̱tun na ra xiꞌin cadena kuaꞌan ra veꞌe kàà xaꞌa ya ndi̱kaꞌan ra Juan xiꞌin ra Herodes xaꞌa yá Herodías, yá síꞌi ra Felipe ñani ra. 18Chi tá xi̱taku ra Juan ta ndi̱kaꞌan ni ra xiꞌin ra Herodes ya väꞌa ndi̱kan ra xaꞌa ya ndi̱kiꞌin ra yá síꞌi ñani ra.

19Xaꞌa ya ikán kua kini ni ku̱ndasi nuu yá Herodías xi̱ni yá ra Juan, yakan kúni yá kaꞌni ñaꞌa yá. Ta köo níꞌi yá kuꞌva kaꞌni yá ra, 20saa chi íꞌvi ni ra Herodes xíni ñaꞌa ra xaꞌa ya xíni ra kúu ra iin taa ra vaꞌa, ra i̱í. Xaꞌa ya ikán kua köo ndi̱taxi ra kundivaꞌa ra. Ta saa ni, ndíꞌi ni ini ra xíni ra ya ndi̱kaꞌan ra Juan xiꞌin ra. Vani ndíꞌi ni ini ra xiꞌin tuꞌun ikán saa ni kútoo ni ra xíni soꞌo ra ya káꞌan ra Juan. 21Ta xa̱kin ra Herodes viko xínu ra kuiya ra, saa ka̱na ra nda kúu mií chiñu xiꞌin ra. Ka̱na ra nda kumindante xiꞌin nda ínuu nuu ndiꞌi ka na kúu mií chiñu ndee ndóo mí estado Galilea ikán. Ka̱na ra na ndi̱xaa na viko veꞌe ra. Ta ikán ku nuu ndi̱xinu kivi ya ndátun yá Herodías nuu kaꞌni yá ra Juan. 22Saa ndi̱xaa seꞌe síꞌi yá Herodías ini veꞌe nuu íyo viko ikán ta ti̱xaꞌa yá. Saa ku̱too ni mií ra rey Herodes xiꞌin ndiꞌi mií na ndóo xíxi xiꞌin ra, ku̱too ni na ndá kuꞌva ti̱xaꞌa yá. Xaꞌa ya ikán kua ndi̱kaꞌan ra xiꞌin yá, káchi ra saa:

―Vaꞌa, nduku un ya kúni mií un nuu i, ta taxi i ya ndaꞌa un ―káchi ra xiꞌin yá.

23Saa chi̱naꞌa ra nuu yá káchi ra saa: ―Vaꞌa, taxi ndiꞌi i ya kúni mií un ndaꞌa un, ni táꞌvi sava ñuu nuu xáꞌnda chiñu i, ta taxi i ya ndaꞌa un ―káchi ra xiꞌin yá.

24Saa ke̱e yá ndi̱xaꞌan yá ndi̱kaꞌan yá xiꞌin siꞌí yá, káchi yá saa:

―¿Unkua vaꞌa nduku i nuu ra ―káchi yá.

Saa ndi̱kuiin siꞌí yá, káchi yá saa:

―Kaꞌan xiꞌin ra ná taxi ra xiní ra Juan, ra síkuchi naꞌa ndaꞌa un ―káchi siꞌí yá.

25Saa ndi̱ko koo yá, xínu yá ndi̱kiꞌvi yá nuu índuꞌu ra rey Herodes, ta ndi̱kaꞌan yá xiꞌin ra, káchi yá saa:

―Vaꞌa, taxi un xiní ra Juan, ra síkuchi naꞌa ndaꞌa i, ta chikaa un ya ini iin koꞌo taxi un ndaꞌa i ndikun tikaꞌan ―káchi yá xiꞌin ra.

26Tá ndi̱kaꞌan yá saa xiꞌin ra, ta ku̱chiꞌña ni ini ra. Sundi xaꞌa ya xi̱ni soꞌo na ndóo xiꞌin ra chi̱naꞌa ra nuu yá, ta si̱xinu saꞌa ra ya ndi̱kaꞌan ra xiꞌin yá. 27Saa ndi̱kun xa̱ꞌnda ra chiñu nuu iin ra lapa ya ná kuꞌun ra ndikiꞌin ra xiní ra Juan kixi ya xiꞌin ra. 28Saa ke̱ta ra ikán ndi̱xaꞌan ra veꞌe kàà xa̱ꞌnda ra sukun ra Juan ta níꞌi ra xiní ra xa̱a xiꞌin ra. Ndíkaa ya ini iin koꞌo xa̱a xiꞌin ra. Saa ta̱xi ra ya ndaꞌa yá ikán, ta yá ikán ta̱xi yá ya ndaꞌa siꞌí yá.

29Ñaa tá ku̱ndaa ini nda ítaꞌan xiꞌin ra Juan xaꞌa ya ndo̱ꞌo ra, ta ndi̱xaꞌan nda ndi̱kiꞌin nda ikin kuñu ra si̱nduxin nda.

Táxi Jesús xíxi uꞌun mil taa

(Mt. 14:13-21; Lc. 9:10-17; Jn. 6:1-14)

30Sindiꞌi saa ndi̱ko koo nda ítaꞌan xiꞌin Jesús, ndítuꞌun ndiꞌi nda xiꞌin ra xaꞌa ñaꞌa ya i̱kan nda nuu ndi̱xaꞌan nda ndi̱kaꞌan ndoso nda tuꞌun Ndioxi. 31Ta saa ndi̱kaꞌan Jesús xiꞌin nda, káchi ra saa:

―Naꞌa ndo ná kuꞌun mií yo iin ñaꞌñu nuu köo naꞌa, ta ikán ndikundee loꞌo yo ―káchi ra xiꞌin nda.

Ndi̱kaꞌan ra saa xiꞌin nda chi ndiꞌi saa kivi ta iin kátin naꞌa nuu ra, na kuaꞌan tin na vaxi xáa nuu ra, nda ni ya kuxi nda köo táxi ya tiempo. 32Saa ke̱e Jesús kuaꞌan ra xiꞌin nda ítaꞌan xiꞌin ra, ndi̱kee nda ini iin itun barco ta ndi̱kiꞌin nda kuaꞌan nda nuu köo naꞌa. 33Ta kuaꞌa va naꞌa xi̱ni kuaꞌan nda, ñaa ndi̱kuni ñaꞌa na, saa ki̱ꞌin na kuenta xiꞌin nda nuu kuaꞌan nda. Ta ka̱na koo na kuaꞌan xaꞌá na sata nda, ta kuaꞌa ni ñuu ke̱e na. Xiꞌna ka na ndi̱xaa, saa ndi̱xaa nda, 34núu nda sata itun barco, saa xi̱ni Jesús ndiꞌi na ikán ta ku̱ndaꞌvi ni ini ra xi̱ni ñaꞌa ra, saa chi tá íyo levo kiti köo xitoꞌo saa íyo na. Saa xa̱á ra sínaꞌa ra na xaꞌa ndiꞌi ya vaꞌa. 35Tá ti̱ndaa xikuáa, saa ku̱yati nda ítaꞌan xiꞌin ra nuu ra, ndi̱kaꞌan nda xiꞌin ra, káchi nda saa:

―Tata, xa xikuáa ni kua, ta nuu ndóo yo yóꞌó ni köo mií naꞌa ndóo. 36¿Án väꞌa ná kaꞌan un xiꞌin na kuꞌun na, ndá sata na ñaꞌa kuxi na ñuu vali án ñuu ya ñúꞌu yati? ―káchi nda xiꞌin ra.

37Saa ndi̱kuiin Jesús, káchi ra saa:

―¿Ndachun kuꞌun na nduku na ñaꞌa kuxi na? Vaꞌa, taxi mií ndo ná kuxi na ―káchi ra xiꞌin nda.

Saa ndi̱kuiin nda káꞌan nda:

―¿Án kúni un kuꞌun nde sata nde ñaꞌa kuxi na? Ta nda uvi ciento xuꞌun denario#6:37 Iin denario ku xuꞌun kíꞌin iin taa xáa chiñu ra nduvi ndaa vi kua vaꞌa nani ya sata nde ñaꞌa kuxi na ―káchi nda xiꞌin ra.

38Saa ndi̱kuiin ra, káꞌan ra:

―¿Ndisaa ku xita vaꞌa ndíso ndo? Kuáꞌan ndo koto ndo ―káchi ra xiꞌin nda.

Saa ndi̱xaꞌan nda xi̱to nda, ñaa ndi̱ko koo nda káꞌan nda xiꞌin ra:

―Uꞌun ku xita vaꞌa ta uvi ku tiaka ―káchi nda xiꞌin ra.

39Saa xa̱ꞌnda ra chiñu nuu nda, ya ná sikitaꞌan nda na, tá iin tiꞌvi iin tiꞌvi ná ndikundoo na nuu ita kuii. 40Ta saa ndixa i̱kan nda, chi̱ndoo nda na tá iin ciento na xiꞌin tá uvi xiko uxi na ta̱ꞌvi nda ndi̱kundoo na. 41Ñaa ti̱in Jesús uꞌun xita vaꞌa ikán xiꞌin uvi tiaka, ta nda̱niꞌi nuu ra nuu ndivi táxi ra tixaꞌvi ndaꞌa Ndioxi. Saa ta̱ꞌvi ra xita vaꞌa ta̱xi ra ndaꞌa nda ítaꞌan xiꞌin ra, ya nditaꞌvi nda ya taxi nda ndaꞌa na kuxi na. Si̱ndiꞌi saa ta̱ꞌvi tu ra uvi tiaka ikán va. 42Xi̱xi ndiꞌi na i̱kan ra, ndakua ndi̱xaa ini na. 43Nda ndi̱ndoo ka ñaꞌa yuꞌu na, si̱kutu nda uxi uvi tika xiꞌin xita vaꞌa tin tiaka kiti ndi̱ndoo yuꞌu na. 44Ta ndiꞌi na xi̱xi xita vaꞌa ikán kúu nda uꞌun mil taa.

Xíka Jesús nuu nduta ñûꞌu

(Mt. 14:22-27; Jn. 6:16-21)

45Sindiꞌi ikán saa ndi̱kaꞌan Jesús xiꞌin nda ítaꞌan xiꞌin ra nda̱a nda sata barco. Kuaꞌan nda inka ñaꞌñu yuꞌu nduta ñûꞌu ta ka̱na koo nda kuaꞌan nda chí ñuu Betsaida. Xiꞌna nda ítaꞌan xiꞌin ra kuaꞌan, saa ndi̱ndoo siín mií ra ndái ra naꞌa. 46Tá si̱ndiꞌi nda̱i ndiꞌi ra na saa ndi̱kiꞌin na kuaꞌan na, ta saa nda̱a ra iku káꞌan ra xiꞌin Ndioxi. 47Tá ku̱ñuu ta xa kuaꞌan itun barco nda maꞌñu nduta ñûꞌu, ta Jesús ndi̱ndoo mií ra nuu ñuꞌú íchi. 48Saa xi̱ni ra ni küvi kuꞌun nda ítaꞌan xiꞌin ra, ndá ya nduxa kuaꞌan nda chi tachi ta káni ni ya nuu itun barco ikán. Tá xa kuaꞌan túvi ta saa ke̱ta Jesús xíka ra kuaꞌan ra nuu nduta ñûꞌu ndi̱kitaꞌan ra xiꞌin nda, ta siloꞌo yaꞌa ra kuꞌun ndaku ra. 49Ñaa tá xi̱ni nda ítaꞌan xiꞌin ra kuaꞌan ra nuu rá, ta ndi̱ndiꞌvi ka vi nda, va iin ya nǎꞌa kua káꞌán nda, saa iin ndi̱ndaꞌi koꞌo nda, 50chi ndiꞌi nda xi̱ni ya, yakan ndi̱ndiꞌvi ni nda. Ta kama ni ndi̱kaꞌan ra xiꞌin nda, káchi ra saa:

―Kündiꞌi ini ndo chi yeꞌe va ku i, kuïꞌvi ndo ―káchi ra xiꞌin nda.

51Ñaa ndi̱xaa ra nda̱a ra sata barco xiꞌin nda, saa si̱yaa tachi iin yayaa ku̱u. Ta saa iin ndi̱kanda ini nda ñúꞌu nda, 52chi täꞌan kundaa ini nda ya kúu ra ra chee nuu nda, vani xi̱ni nda yatuꞌun nuu nda̱sa kuaꞌa Jesús xita vaꞌa, ta saa ni köo ndi̱kundaa ini nda.

Síndaꞌa Jesús na kúꞌvi ndóo ñuu Genesaret

(Mt. 14:34-36)

53Saa ndi̱yaꞌa nda nuu nduta ñûꞌu ikán ta ndi̱xaa nda ñuu Genesaret, ta yuꞌu tikuii ikán ka̱tun nda barco ndi̱ndoo nuu ndíchi nu. 54Tá kána koo nda ini nu ta kama ka vi ndi̱kuni naꞌa Jesús. 55Saa iin vivitin xi̱nu na ndi̱xika na ndi̱kaya ndiꞌi na ivi na kúꞌvi ndóso na nuu xito ndi̱xaa na xiꞌin na nuu íin Jesús. 56Ndiꞌi kúu ñaꞌñu nuu xáa Jesús, ñuu naꞌnu kua, ñuu vali kua, iku kua, ndiꞌi nuu xáa ra ta chíndoo naꞌa na kúꞌvi ichí, saa xíkan na ya mani nuu ra ya ná taxi ra tiin na án nda loꞌo yuꞌu toto ra ta nduvaꞌa na, káchi na. Ta saa ndixa chi ndiꞌi kúu na ti̱in ndaa ñaꞌa ta ndu̱vaꞌa ndiꞌi na.

Currently Selected:

San Marcos 6: xta

Highlight

Copy